Jehova Diosqa satanaspa tukuy imaymana mana allin ruwasqantam allichanqa. Paymi Jesusta churaykun kamachinanpaq. Jesus kamachiptinqa kay allpa pacham suma-sumaq kanqa (Daniel 7:13, 14; Lucas 23:43).

Jehova Diosmi palabranpi niwanchik kaykuna manaña kananmanta:

• MANAÑAM MUCHUY KANQACHU. Bibliapim nin: “Allpaqa allintam rurunqa. Diosninchikmá bendeciwasun”, nispa. Nintaqmi: “Kay allpa pachapim kawsaykuna achkallaña qispinqa. Urqukunapa puntankunapipas achkallañam kanqa”, nispa (Salmos 67:6; 72:16).

• MANAÑAM WAÑUCHINAKUY KANQACHU. Bibliapim nin: “Hamuspaykichikyá qawaychik Jehova Diospa ruwasqankunata. Qawaychikyá allpa pachapi sumaq ruwasqankunata. Payqa kay allpapi wañuchinakuytapas chinkachinmi”, nispa (Salmos 46:8, 9).

• MANAÑAM MANA ALLIN RUNAKUNA KANQACHU. Bibliapim nin: “Mana allin ruwaqkunaqa chinkachisqam kanqaku. [...] Ñam chayaykamuchkanña mana  allin ruwaqkunapa chinkachisqa kayninkuqa. Maskaspapas paykunataqa manañam tarinkichu”, nispa (Salmos 37:9, 10).

• MANAÑAM UNQUYPAS, NANAYPAS, WAÑUYPAS KANQACHU. Bibliapim nin: “Chay punchawkunapiqa ñawsakunam qawarikunqa, mana uyariqkunam uyarikunqa. Chay punchawkunapiqa, wiqrum luwichu hina kallpanqa, mana rimay atiqpas kusikuymantam qaparinqa”, nispa (Isaias 35:5, 6).

  Bibliapiqa nintaqmi: “Diospa carpanqa runakunawanñam kachkan. Paymi runakunawan yachanqa, paykunañataqmi runankuna kanqa, Diosqa paykunawanmi kanqa. Diosmi llapa runakunapa wiqinta pichanqa, manañam kanqachu wañuypas, llakikuypas, waqaypas nitaq nanaypas. Ñawpaq kaqkunaqa pasarunñam”, nispa (Apocalipsis 21:3, 4).

Manam Diosqa satanaswan demoniokuna hinaqa llullakunchu (Lucas 1:36, 37). Payqa qamta kuyasusqaykiraykum munan kay allpa pacha suma-sumaqña kaptin chaypi kawsakunaykita. Chayrayku bibliata estudianaykipaq kallpanchakuy chaynataq Diospa palabranpi yachasqaykiman hina kawsakunaykipaqpas. Chaynatam satanaspa mana allinkuna ruwasqanmanta librasqa kanki. Chaymantapas, huchamantawan wañuymantam librasqa kanki. Jesuspas nirqam Diosmanta imam kaqta yachaspanchikqa libre kananchikmanta (Juan 8:32).