Bibliapim nin: “[Satanasmi] kay pachapi llapallan runakunata pantachichkan”, nispa (Apocalipsis 12:9). Satanaswan demonionkunaqa manam munankuchu bibliapa nisqanta creenanchiktaqa. Aswanqa wañuqkuna hinalla kawsasqankuta piensachiwaspanchikmi engañawanchik. Satanasqa kaykunawanraqmi pantachiwanchik:

Achka religionkunam ninku runakunapa cuerpollan wañusqanta, almanñataq hinalla kawsasqanta. Ninkum almaqa mana wañuq kasqanta.

Bibliapim ichaqa nin kikinchik alma kasqanchikta, manam ninchu ukunchikpi huk alma kasqantaqa. Adanmanta rimaspanmi bibliapi nin: “Chaymantam Jehova Diosqa ñutu allpamanta runata ruwarqa, hinaspam sinqanman kawsachiq samayta pukuykuptin kawsaq almaña rikurirurqa”, nispa (Genesis 2:7, willakuy). Chaynaqa Adanqa manam almayuqchu karqa, aswanqa paymi alma karqa.

Animalkunapas almam kanku (Genesis 1:20, 21, 24, willakuy, 30, Traducción del Nuevo Mundo de las Santas Escrituras, NM).

 Kikinchik alma kasqanchikraykum wañuqlla kanchik. Chaymi bibliapiqa achka kutipi nin almaqa wañuq kasqanta.

• Bibliapim nin: “Huchallikuruq almaqa wañunqapunim”, nispa (Ezequiel 18:4, willakuy).

• Sanson sutiyuq Diosta serviq runam nirqa: “Filistea runakunapa almanwan kuskayá almaypas wañuchun”, nispa (Jueces 16:30, NM).

• Jesusmi nirqa: “Sabado punchawpiqa, imataq allin kanman: ¿Allin kaqta ruwaychu icha mana allin kaqta ruwaychu? ¿Alma salvaychu icha wañuchiychu?”, nispa (Marcos 3:4, Diospa palabran Mateo-Apocalipsis).

Wakin textokunapipas ninmi almaqa wañusqanmanta (Genesis 17:14, NM). Wakinpim nin espadawan wañusqanta (Josuey 10:37, NM), tiqusqa wañusqanta (Job 7:15, NM), yakupi wañusqanta (Jonas 2:5, NM). Chaynaqa almaqa wañunmi.

Enteron bibliata leespaykiqa manam huk kutillapipas tarinkichu alma wiñaypaq kawsasqanmanta nisqantaqa. Almaqa manam wañukuqpa espiritunchu utaq animanchu. Chayraykum “almaqa manam wañunchu” nispankuqa  pantayta yachachinku. Chayna piensananchiktaqa satanaswan demoniokunam munanku. Diosqa chiqninmi chay pantay yachachikuykunataqa (Proverbios 6:16-19; 1 Timoteo 4:1, 2).

Satanasqa runakunatam pantachin “wañusqakunawanmi rimani” niqkunawan. Chay runakunaqa piensankum wañusqakunawan rimasqankuta, chaymi runakunaqa ninku wañusqakunapa espiritunwan utaq animanwan rimasqanta. Bibliapim ichaqa niwanchik wañusqakunaqa manaña rimasqankumanta (Eclesiastes 9:5, 6, 10).

Chaynaqa, ¿pikunawantaq chay runakunaqa rimanku? Demoniokunawanmi. Demoniokunaqa qawachkanmi imayna rimasqanta, imayna rikchayniyuq kasqanta, imata ruwasqanta hinaspa imata yachasqanta. Chayraykum demoniokunaqa wañukuq runakunaman rikchakuspanku runakunawan rimanku (1 Samuel 28:3-19).

Satanasqa runakunatam pantachin wañukuq runakunamanta yanqa cuentokunawan. Chay cuentokunaqa runakunatam Diosmanta karunchan (2 Timoteo 4:4).

 Africa nacionpim runakuna ninku kaqmanta wañusqa runakunata rikusqankuta, ichaqa rikunku huklaw llaqtakunapis. ¿Imanasqataq wañuqkunaqa ayllunkunamantapas hinaspa amistadninkunamantapas karupi rikurinman?

Wakiqninchikqa huk runakunamanmi rikchakunchik, chaymi wakinpiqa hukkunawan pantawanchik. Chaynam pasarurqa Africa nacionpi iskay iñiqmasinchikkunawan. Huk kutipim Diosmanta willakuchkaptinku yuyaq runa paykunata qatirqa. Imanasqa qatisqankumanta tapuptinkum chay runa nirqa huknin iñiqmasinchik wañukuq wawqin kasqanta. Iñiqmasinchikkuna “pantarunkim” niptinpas payqa nirqam: “Manam ñuqaqa pantanichu”, nispa. Chaynam wakinpiqa wañuqkunata rikusqankumanta yanqa cuentokuna rikurin.

Runakunaqa willasurqankichá mana haykapipas rikusqanku kaqkunata musqukusqankumanta, imapas manchakuypaq kaqkuna rikusqankumanta utaq uyarisqankumanta. Chaykunaqa runakunatam manchachin.  Africa lawpi Marein sutiyuq warmim willakun sapa tuta abuelanpa econta uyarisqanta. Mareinqa mancharikuspanmi qaparispan hukkunata rikchachiq. Tiempopa risqanman hinam kay warmiqa locayarurqa.

Wañuqkuna hinalla kawsaspankuqa, ¿yaqachu ayllunkuta manchachinman? Manam. Chay manchachikuqkunaqa demoniokunam.

Wakinpiqa demoniokunaqa engañawananchikpaqmi allinninchikpaq hina imatapas niwachwan. Sierra Leona nacionpi yachaq Gbassay sutiyuq warmim unquchkarqa, chaymi musquyninpi wañukuq taytan rikuriykuspan nisqa huk sachapa llaqinta yakupi tomananpaq. Chaytaqa manam pimanpas willakunanchu karqa. Chay musquyninpi nisqanman hina ruwaspansi chay warmiqa sanoyarurqa.

Huk warmipas nirqam huk tuta wañukuq qusan rikuriykusqanta. Kuyayllapaq sumaq pachayuqsi rikuriykusqa.

Chaykunaqa allinpaq hinam rikchakun, ichaqa ¿Diosmantachu hamun? Manam. Diosqariki chiqap rimaqmi (Salmos 31:5). Manam pantachiwanchikmanchu, demoniokunallam pantachiwanchikqa.

 Ichaqa, ¿kanmanchu allin ruwaq demoniokuna? Manam, wakinpi yanapakuqtukuspankupas llapallankum kanku mana allin ruwaqkuna. Evawan rimaspanqa satanasqa allin ruwaqpaqmi rikchakurqa (Genesis 3:1). Ichaqa satanaspa nisqanta kasukuspanmi Evaqa wañukurqa.

Mana allin ruwaq runakunaqa kuyakuqtukunkum. Kuyakuqtukuspankum runakunata engañanku. Africa nacionpim chayna runakunata ninku: “Yuraq kiruyuq kaspankupas yana sunqum kanku”, nispa. Satanaspas allin ruwaqtukuspanmi runakunata engañan, chaymantam bibliapi kaynata nin: “Satanasqa kancharichkaq angelman rikchakunanpaqmi tukuyta ruwachkan”, nispa (2 Corintios 11:14).

Kunanqa Diosqa manam imatapas musquynintakamaqa pimanpas willanchu, manataqmi musquypi hinaqa imatapas qawachinñachu. Diospa ima niy munawasqanchikqa bibliapim kachkan, chaynapi Diospa runankuna ‘alli-allin yachachisqa hinaspa listolla kananchikpaq’ (2 Timoteo 3:17).

Diosqa kuyawasqanchikraykum satanasmanta cuidakunapaq bibliapi niwanchik. Payqa manam munanchu demoniokuna imatapas ruwawananchiktaqa.