1, 2. a) ¿Imaynanpitaq regaloqa ancha valorniyoq qampaqqa kanman? b) ¿Imaynanpitaq rantinchikpi Jesuspa wañusqanqa ancha valorniyoq regaloqa kanman?

¿MAYQEN chaskisqayki regalom qampaqqa aswan valorniyoq? Regaloqa manam achka qollqepa chaninraqchu kanan valorniyoq kananpaqqa. Valorniyoq kayninqa manayá hayka chaninniyoq kasqanmantachu penden. Aswanmi chay regaloqa ancha valorniyoq kanqa kusichisuptiki otaq allinta servisuptikiqa.

² Achka regalo chaskisqaykimantaqa chullallam llapanmanta ancha valorniyoqqa. Runakunaman Jehová Diospa regalo qosqanmi. Ariyá, Jehová Diosqa tukuy imakunatam qowarqanchik, ichaqa Churin Jesuspa wañusqanmi aswan valorniyoq regalo qowasqanchikqa; chay regalotam Bibliaqa nin rantinchikpi Jesuspa wañupuwasqanchik nispa (Mateo 20:28). Kay yachachikuypim qawasunchik imaynam rantinchikpi Jesuspa wañukusqanqa ancha valorniyoq chaskisqanchik regalo, ancha kusisqa kananchikpaq chaynataq munasqanchiktapuni chaskinanchikpaq yanapawasqanchikrayku. Cheqaptamá Jehová Diosqa kay rurasqanwan sapakamata ancha kuyawasqanchikta qawachiwanchik.

3. ¿Ima ninantaq rantinchikpi Jesuspa wañukusqanqa, hinaspa imatam yachananchik Diospa qowasqanchik regalon ancha valorniyoq kasqanta entiendenapaq?

³ Rantinchikpi Jesuspa wañukusqanqa huchamantawan wañuymanta librawananchikpaq Jehová Diospa sumaq arreglo rurasqanmi, chaynapi manaña wañuspanchik wiñay kawsayta haypananchikpaq (Efesios 1:7). Bibliapa nisqanman hina kay yachachikuyta allinta entiendenapaqqa Eden huertapi pasakusqanmantam yachananchik. Adan huchallikurusqanrayku ima chinkarachisqanta yachaspallanchikmi Jesuspa wañukusqan ancha valorniyoq kasqantaqa entiendesunchik.

4. ¿Imaynataq Adanqa kawsakunman karqa mana haykapipas huchallikuspanqa?

⁴ Adanta unanchaspanmi Jehová Diosqa ancha valorniyoq chuyay-chuyay kawsayta qorqa. Yuyaymanay chayna kawsakusqanpi. Cuerponpi hinaspa yuyayninpi chuyay-chuyay kaspanmi mana haykapipas onqonmanchu, machuyanmanchu nitaq wañunmanchu karqa. Chaymantapas “Diospa unanchasqan” churinmi karqa (Lucas 3:38). Imaynam kuyakuq tayta churinwan kuyanakunku, chaynam paykunapas kuyanakurqaku. Arí, Jehová Diosqa Adanwanmi rimarqa, kusirichiq llamkaytam qorqa; nirqataqmi paymanta imam suyasqantapas (Genesis 1:28-30; 2:16, 17).

5. ¿Ima ninantaq Diosqa “kikinman rikchakuqtam rurarqa” Adantaqa, nispa Biblia niptin?

⁵ Diosqa “kikinman rikchakuqtam rurarqa” Adantaqa (Genesis 1:27). Kaywanqa manamá nichkanchikchu rikchayninpi Dioswan kaqlla kasqantachu. Kay libropa 1 kaq yachachikuyninpi yachasqanchikman hinaqa mana rikuy atina espiritum Jehová Diosqa (Juan 4:24). Chaymi payqa mana aycha cuerpoyoqchu nitaq tulluyoqchu. Aswanqa imayna kayninkunapi rikchayniyoqtam Diosqa Adantaqa unancharqa : kuyakuyniyoqta, yachayniyoqta, justiciayoqta hinaspa kallpayoqtapas. Chaymantapas huk allin kaypim Dios Taytanmanqa rikchakurqa, payqa librem karqa allin kaqta otaq mana allin kaqta  akllakunanpaqpas. Chaynaqa manamá herramienta hinallachu karqa huk clase llamkayllapi servichikunapaq. Aswanqa kikinmi allin kaqta otaq mana allin kaqtapas akllakunan karqa. Diosta kasukuyta akllakuspanqa, wiñaypaqchá chay suma-sumaq Paraisopi kawsakunman karqa.

6. ¿Imatam Adan chinkarachirqa Diosta mana kasukusqanpi, hinaspa imaynataq chayrayku tarikunchik?

⁶ Sutillamá kachkan Diosta mana kasukusqanpi Adan wañunanpaq sentenciasqa kasqanqa. Huchallikusqanraykum chuya kawsakuynin chinkarurqa chaskinanpaq lliw allinkunapiwan (Genesis 3:17-19). Manam kikinpa kawsakuynillantachu Adanqa chinkarachirqa, aswanqa llapallan mirayninkunapatawanmi. Diospa Palabranmi nin: “Huk runallawan kay pachapi huchallikuy qallariruptinmi chayrayku wañuypas rikurirurqa chaymi lliw runakuna huchallikuspanchik wañunchik”, nispa (Romanos 5:12). Chaynapim llapallanchik Adanmanta huchayoqña kanchik. Chaymi Bibliaqa yachachiwanchik wañuyman entregaykuwasqanchikta chaynataq kikinpunipas, chayraykum huchapa hinaspa wañuypa ‘munaychakusqanña’ kanchik (Romanos 7:14). Kikillankumanta Diosta mana kasukusqanraykum Adanpawan Evapaqa manaña ima suyakuypas karqañachu. Ichaqa, ¿imam pasanman karqa mirayninkunawan hinaspa ñoqanchikwanpas?

7, 8. ¿Ima ninantaq librasqa kayqa?

⁷ Jehová Diosmi churinpa wañuyninwan runakunata librananpaq tantearurqa. ¿Ima ninantaq librasqa kayqa? Chay ninanqa imatapas kutichipamuwananchikpaq apakuqman pagapuymi; ejemplopaq, qollqerayku pitapas pakaruptinku librasqa kananpaq kacharimuqninman pagapuymi. Chaymantapas Bibliapi librasqa kaymanta willakuptinqa, rimachkanmi pitapas daño rurarusqanchikmanta pagapuymanta. Ejemplopaq, pipas daño ruraqqa chay daño rurasqanman hinam paganan karqa.

⁸ Yacharusqanchikman hinaqa, llapallanchikpaqmi Adanqa allin kaqkunata chinkarachirqa. ¿Imaynatataq Adanpa huchanmantaqa pagakunman karqa chaynapi huchamantawan  wañuymanta librasqa kananchikpaq? Qawasunchikyá librawananchikpaq Jehová Diospa arreglo rurasqanmanta hinaspa imayna qamta yanapasunaykimantapas.

9. ¿Imatam necesitakurqa librasqa kananchikpaq?

⁹ Chuyay-chuyay kawsakuytam Adanqa chinkarachirqa. Chaymi chayna kawsayta kaqllamanta chaskinapaqqa, huchayoq runapa vidanwanqa manam atikunmanchu karqa (Salmo 49:7, 8). Librasqa kananchikpaqqa mana huchayoq Adan kaqlla runatam necesitakurqa. Justicianrayku chayna kanantam Diosqa Palabranpi qawachirqaña. Chay justicianpim nirqa pitapas wañurachispaqa “vidanmantam vidanwan paganqa”, nispa (Exodo 21:23). Chaynaqa, ¿imawantaq Adanpa chinkarachisqan chuya kawsakuypa valornintaqa pagakunman karqa? Mana huchayoq runapa vidantam necesitakurqa “llapallanchikta salvawananchikpaq” (1 Timoteo 2:6).

10. ¿Imaynatam Jehová Diosqa librawarqanchik?

¹⁰ ¿Imaynatam Jehová Diosqa librawarqanchik? Payqa kay Pachamanmi kachamurqa unanchasqan mana huchayoq espiritu kaq churinta. Ichaqa ancha kuyasqan sapallan Churintam kachamurqa wakiqnin churinkunamantaqa (1 Juan 4:9, 10). Paymi sonqomanta munaspan hanaq pachapi kawsakusqanta saqemurqa (Filipenses 2:7). 4 kaq yachachikuypi qawasqanchikman hinam Jehová Diosqa milagrota rurarqa Churin nacenanpaq, chuya espiritunwanmi Maria wiksayakururqa. Chaymi Jesusqa mana huchayoq runa nacerqa (Lucas 1:35).

11. ¿Imaynatataq chullalla runaqa wara-waranqantin runakunata librawanchikman?

¹¹ ¿Imaynatataq chullalla runaqa wara-waranqantin runakunata librawarqanchik? ¿Imaynatam llapa runaqa huchayoq rikurirurqaku? Yuyariy, Adanqa huchallikururqam, chaymi kay suma-sumaq kaqta chinkarachirqa: chuya kawsakuyninta, chayraykum mirayninkunapas manaña kawsarqakuchu chuya kawsaypiqa . Huchatawan wañuytam paykunamanqa saqerqa.  Bibliapi ‘qepa kaq Adan’ sutichasqa Jesusqa mana huchayoq chuya kawsakuyniyoqmi karqa, manataqmi haykapipas huchallikurqachu (1 Corintios 15:45). Jesusqa salvawananchikpaqmi Adanpa rantinpi wañurqa. Taytanpa kamachisqantam lliwta kasukurqa hinaspam chuya vidanta ofrendata hina qorqa. Chaynatam Jesusqa Adanpa huchanmanta vidanwan pagarqa hinaspam Adanpa mirayninkunaman suyakuytapas qowarqanchik (Romanos 5:19; 1 Corintios 15:21, 22).

12. ¿Imatam Jesusqa tukuy ñakarisqanwan qawachirqa?

¹² Bibliaqa willawanchikmi manaraq Jesus wañuchkaptin imaymana ñakarisqanmanta. Llumpayta ñakarichispankum azoterqaku hinaspam qeruman clavarurqaku chaypi astawan ñakarispan wañunanpaq (Juan 19:1; Galatas 3:13; qawariy kay libropa sapaq yachachikuyninkunapi 204 kaq paginanmanta 206 kaq paginankama). ¿Imanasqamá llumpaytaqa ñakarirqa? Ñakariykunapi runakuna tarikuptinkum Diosman sonqo kayninkuta Satanasqa iskayrayachirqa, chaymantam astawan qawasunchik huk kaqnin yachachikuypi. Sinchi ñakariyta tukuy sonqonwan aguantaspanmi Jesusqa qawachirqa Satanaspa nisqan llulla kasqanta. Chaywanmi qawachirqa imaynam mana huchayoq runa ima rurananpaqpas kikinmanta akllakuyniyoq kaspanpas atinmanmi Diosman sonqo kaytaqa imawanña Diablo ñakarichichkaptinpas. ¡Maynatachá Jehová Diosqa kusikurqa Churin payman sonqo kasqanmanta! (Proverbios 27:11.)

13. ¿Imaynatataq pagakurqa librasqa kananchikpaq?

¹³ ¿Imaynatam librasqa kananchikpaqqa pagakurqa? 33 kaq watapi 14 punchawninpi judio nisan sutiyoq killapim, Diosqa mana huchayoq Churinta wañuchinankupaq saqerqa. Chaynapim Jesusqa “wiñaypaq chulla kutillata” chuya vidanta ofrendarqa (Hebreos 10:10). Wañukusqanmanta kimsa punchawmantam espiritu cuerpoyoqtaña Jehová Diosqa kawsarirachirqa. Adanpa mirayninkunata huchamanta librananpaqmi wañukusqanpa ancha valorniyoq kasqanta hanaq pachapi Taytanman qawachirqa (Hebreos 9:24). Jehová Diosmi chaskirqa Jesuspa wañukusqanpa valorninta chaynapi llapallan runakuna  huchamantawan wañuymanta librasqa kanankupaq (Romanos 3:23, 24).

14, 15. ¿Imatam rurananchik ‘huchanchikkunamanta pampachasqa’ kananchikpaq?

¹⁴ Jesuspa wañukusqanraykum huchayoq kachkaspapas sumaq bendicionkunata chaskichwan. Qawarisun ima bendicionkunatam kunan tiempopi chaynataq hamuq tiempopipas chaskichwan sumaq regalo Dios qowasqanchikmanta.

¹⁵ Huchanchikkuna pampachasqa kanamanta. Huchayoq kasqanchikraykum sasachakunchik allin kaqkunata rurananchikpaq. Llapallanchikmi huchallikunchik rimasqanchikwanpas otaq rurasqanchikwanpas. Ichaqa Jesuspa wañukusqallanwanmi atichwan ‘huchanchikkunamanta pampachasqa’ kaytaqa (Colosenses 1:13, 14). Chaypaqmi ichaqa sonqomantapuni huchanchikkunamanta wanakunanchik. Humillakuykuspataqmi Jehová Diosta mañakunanchik Churinpa wañukusqanpi iñisqanchikrayku huchanchikkunamanta pampachaykuwananchikpaq (1 Juan 1:8, 9).

16. ¿Imanasqataq Diostaqa chuya concienciayoq yupaychachwan, hinaspa imaynatam yanapawanchik chuya concienciayoq kayqa?

¹⁶ Diospa qayllanpi chuya concienciayoq kanamanta. Conciencianchik acusawaptinchikqa mana suyakuyniyoqmi kachwan hinaspapas mana imapaq valeq hinam kachwan. Jesuspa wañukusqanraykum Jehová Diosqa pampachaykuwanchik hinaspa kuyakuyninpi pantaq runa kachkaptinchikpas, chaskiwanchikraqmi chuya concienciayoq yupaychananchikpaq (Hebreos 9:13, 14). Chaynapim confianzallawanña Paymanqa oracionpi asuykuchwan (Hebreos 4:14-16). Chaymantapas conciencianchik chuya kaptinqa yuyayninchikpipas chaynataq kikinchikwanpas hawkam tarikusun hinaspam aswan kusisqaraq kasunchik.

17. ¿Ima bendicionkunataq kanqa rantinchikpi Jesuspa wañukusqanrayku?

¹⁷ Kay pachapi wiñay kawsanapaq suyakuymanta. “Huchallikuypa  pagonqa wañuymi” nispam nin Romanos 6:23. Hina chayllapitaqmi nin: “Diospa qowasqanchikmi ichaqa Señorninchik Cristo Jesuswan kuska wiñaypaq kawsakuy”, nispa. Kay libropa 3 kaq yachachikuyninpim hichpaykamuq Paraisopi bendicionkunamanta yacharurqanchik (Apocalipsis 21:3, 4). Kay llapallan bendicionkunaqa hinaspa manaña onqospa wiñaypaq kawsakuypas Jesuspa wañukusqanraykum rurakunqa. Chaykunata chaskinanchikpaqqa, ñoqanchikrayku Jesuspa wañukusqanmanta agradecekusqanchiktam qawachinanchik.

18. ¿Imanasqataq Jehová Diosta agradecekunanchik librasqa kananchikpaq Jesuspa wañusqan regalo qowasqanchikmanta?

¹⁸ ¿Imanasqataq librawananchikpaq Jesuspa wañukusqanmantaqa Jehová Diosta anchallataña agradecekunanchik? Regaloqa ancha valorniyoqmi sichu pipas kallpanchakuspan, tiemponta rakispan, otaq sasa tarisqan qollqenwan qowaptinchikqa. Chaymantapas kusichiwanchikmi regalo qowaqninchik cheqap kuyawasqanchikta qawachiwaptinchik. Chaynaqa ancha valorniyoqmi librawananchikpaq Jesuspa wañukusqan Diospa regalonqa, sasa kachkaptinpas qowasqanchikrayku. “Diosqa ancha-anchatam kuyarqa runakunata, chaymi  sapallan Churinta qomurqa”, nispam nin Juan 3:16. Librawananchikpaq Jesuspa wañukusqanwanmi Jehová Diosqa ancha-ancha kuyawasqanchikta qawachiwanchik. Chaynallataqmi Jesuspas ancha kuyawasqanchikta qawachiwanchik, rantinchikpi wañukusqanwan (Juan 15:13). Hinaptinqa rantinchikpi Jesuspa wañukusqanmi qawachiwananchik Jehová Dios hinaspa Churinpas sapakamata kuyawasqanchikta (Galatas 2:20).

19, 20. ¿Imakunata ruraspam Diosta agradecekusqaykita qawachiwaq rantinchikpi Churinpa wañusqan regalo qowasqanchikmanta?

¹⁹ Chaynaqa, ¿imakunata ruraspam Diosta agradecekusqaykita qawachiwaq rantinchikpi Churinpa wañusqan regalo qowasqanchikmanta? Qallarinapaq, regalo qowaqninchik Jehová Diostayá astawan reqsiy (Juan 17:3). Reqsiytaqa atiwaqmi kay libropa yanapakuyninwan Bibliata estudiaspaykiqa. Jehová Diosta astawan reqsispaykim, astawan kuyanki. Astawan kuyaspaykiñataqmi astawanraq kasukuyta munanki (1 Juan 5:3).

²⁰ Iñinaykim rantinchikpi Jesuspa wañukusqanpi. Bibliapunim nin: “Churipi iñiqqa wiñay kawsayniyoqmi”, nispa (Juan 3:36). ¿Imaynatam qawachichwan Jesucristopi iñisqanchikta? Manam rimasqallanchikwanchu. Santiago 2:26 nisqanpi hinam, ‘iñiyninchikpas manam valenchu allinkunata mana ruraptinchikqa’. Cheqaptapunim cheqap iñiytaqa ruraywanmi qawachinanchik. Jesuspi iñisqanchiktam qawachichwan rimasqanchikpi hinaspa rurasqanchikpipas pay hina kananchikpaq kallpanchakuspanchik (Juan 13:15).

21, 22. a) ¿Imanasqataq rinanchik Jesuspa wañukusqan punchawta yuyarinapaq huñunakuyman? b) ¿Imatataq yachasunchik 6 hinaspa 7 kaq yachachikuykunapi?

²¹ Watapi chulla kutita Señorpa Santa Cenan nisqan huñunakuyman riy. 33 kaq watapi 14 kaq punchaw tuta nisan sutiyoq killapim Jesusqa ‘Santa Cena’ sumaq huñunakuyta qallarichirqa (1 Corintios 11:20; Mateo 26:26-28). Sutichakuntaqmi Jesuspa wañukusqan punchawta yuyarinapaq huñunakuy nispa. Chay huñunakuytaqa Jesusmi qallarichirqa apostolninkuna  chaynataq llapallan cheqap cristianokunapas kayta yuyarinankupaq: chuyay-chuyay vidanta rantinchikpi qosqanta. Jesuspunim kay huñunakuymanta rimarqa, kaynata kamachispan: “Chaynatam qamkunapas rurankichik ñoqata yuyariwaspa”, nispa (Lucas 22:19). Jesuspa wañukusqan punchawta yuyarinanchikpaq huñunakuyqa, yuyarichiwanchikmi Jehová Diospa chaynataq Jesuspa ancha kuyawasqanchikta. Chay huñunakuyman rispanchikpas rantinchikpi Jesuspa wañukusqanmanta agradecekusqanchiktam qawachinchik. *

²² Librawananchikpaq Jesuspa wañukusqanqa Jehová Diospa ancha valorniyoq regalo qowasqanchikmi (2 Corintios 9:14, 15). Jesuspa wañukusqanqa wañukuqkunapaqpas allinninpaqmi kanman, chaymantam qawasunchik 6 hinaspa 7 kaq yachachikuykunapi.