CRISTIANOKUNAQA Jesucristopa wañukusqan punchawta otaq ‘Señorpa Santa Cenan’ sutichasqa huñunakuyta yuyarinapaqmi kamachikuyta chaskirqanchik (1 Corintios 11:20). ¿Imanasqataq chay punchawqa ancha valorniyoq? ¿Haykapim chay punchawta yuyarina, imaynatam yuyarina?

Jesucristom chay yuyarinapaq punchawta qallarichirqa 33 kaq watapi judiokunapa mana Qonchuyoq Tanta fiestata otaq Pascua fiestata yuyarisqanku tutata. Pascua fiestataqa huk kutillatam watapi yuyarikuq (judiokunapa punchawkuna yupasqankuman hina) nisan sutiyoq killapa 14 kaq punchawninpi. Llullu killa rikurimuytam nisan nisqa killaqa qallarirqa marzo killa qallariypa semana qepallata. Chaymantapacham judiokunaqa yupaqku chunka tawayoq punchawta Pascua fiestata yuyarinankupaq Inti seqaykusqan qepata.

Chay tutam Jesusqa apostolninkunawan Pascua fiestata yuyarirqaku, Judas Iscariote qatiqninta qarqoruspanmi Santa Cena nisqata yuyarinapaq qallarichirqa. Chay cenañam judiokunapa Pascua fiestankupa rantinpi rurakurqa, chayraykum watapi huk kutillata yuyarikunan.

Mateo qellqam willawanchik ima pasakusqanmanta: “Mikuchkaptinkum Jesus tantata hapiykuspan Diosman graciasta qorqa hinaspam pakiykuspan discipulonkunaman aypurqa: —Chaskispa mikuychik, kaymi cuerpoy —nispa. Vasotapas hapiykuspanmi Diosman graciasta qorqa hinaspam  paykunaman haywarqa: —Llapaykichik tomaychik. Kaymi contrato rurasqaypa yawarniy. Chaqchusqam kanqa achka runakunapa huchankunata pampachanaypaq”, nispa (Mateo 26:26-28).

Wakin runakunam ninku Jesuspa cuerpon tantayarusqanta, tomasqan vinotaq yawaryarusqanta. Ichaqa Jesuspa cuerponqa hina kaqllam karqa tantata aypuptinqa. Chaynaqa, ¿nichwanchu Jesuspa apostolninkuna paypa aychantapuni mikusqankuta chaynataq yawarnintapuni tomasqankutapas? Manam, chaynata ruraspankuqa runata mikuq hinach kanmanku karqa, Diospa kamachikuyninkunatapas manach kasukuchkanmankuchu karqa (Genesis 9:3, 4; Levitico 17:10). Lucas 22:20 nisqanman hinaqa Jesusmi “vinoyoq vasota hapiykuspan nirqa: ‘Kay vinoqa yawarniywan rurasqa mosoq contratom. Yawarniyqa qamkunarayku chaqchusqam’”, nispa. ¿Cheqaptapunichu vinoyoq vasoqa ‘mosoq contratopa’ rantinpi rikurirunman karqa? Manam, contratotaqa rimaspam rurakun, manam vasowanchu.

Chaynaqa tantawan vinoqa manam Jesuspa cheqap cuerponchu nitaq cheqap yawarninchu. Tantaqa Jesuspa chuyay-chuyay cuerponmanmi rikchakun. Jesusqa Pascuapi puchuq mana qonchuyoq tantatam aypurqa (Exodo 12:8). Qonchutam Bibliaqa yaqa sapa kuti tupachin huchawan otaq millakuypaq ruraykunawan. Chaynaqa mana qonchuyoq tantaqa wañupuwaqninchik Jesuspa chuyay-chuyay cuerponmanmi rikchakun (Mateo 16:11, 12; 1 Corintios 5:6, 7; 1 Pedro 2:22; 1 Juan 2:1, 2).

Vinoqa Jesuspa yawarninmanmi rikchakun, chay yawarninmi mosoq contrato rurakusqanta chaninchan. Jesuspa nisqanman hinaqa yawarnintam chaqchurqa ‘huchanchikkunamanta pampachasqa’ kanapaq. Chaynapim wakin runakunaqa Jehová Diospaq chuyaña kanku, chayraykum chay mosoq contratopiña kachkanku (Hebreos 9:14; 10:16, 17). Chay contrato rurakusqanraykum 144.000 sapaqchasqa Diospaq sonqo runakuna hanaq pachaman rinqaku. Chaypim paykunaqa kamachikuqkuna hinaspa sacerdotekuna kanqaku runakunapa allinninpaq (Genesis 22:18; Jeremias 31:31-33; 1 Pedro 2:9; Apocalipsis 5:9, 10; 14:1-3).

¿Pikunallataq tantataqa mikunman hinaspa vinotapas tomanman Jesuspa wañukusqan punchawta yuyarinapaq huñunakuypiqa? Yacharusqanchikman hinaqa mosoq contratopaq kaqkunallam otaq hanaq pachaman riqkunallam. Diospa chuya espiritunmi sapakamata sonqonkupi willan hanaq pachapi kamachikuq kanankupaq akllasqa kasqankuta (Romanos 8:16). Paykunam Jesuswan  kamachinankupaq contrato rurakusqanpipas kachkanku (Lucas 22:29).

Chaynaqa, ¿imatataq ruranku Mosoq pachapi wiñay kawsanapaq suyakuyniyoq runakunaqa? Jesuspa kamachisqanta kasukuspankum Señorpa Santa Cena sutichasqa huñunakuyman rinku, chaypi kaspankum tantata mana mikuchkaspankupas nitaq vinota tomachkaspankupas chay huñunakuy ancha valorniyoq kasqanta qawachinku. Jehová Diospa testigonkunaqa Señorpa Santa Cenantam watapi huk kutillata yuyarinku judiokunapa sutichasqan nisan killapa 14 kaq punchawnin qallariyta, Inti seqaykusqan qepata. Enteron pachapi pisi runakunalla hanaq pachapaq sapaqchasqa kaptinpas llapallan cristianokunapaqmi chay punchawpi huñunakuyqa ancha valorniyoq. Chay punchawqa Jehová Diospa ancha kuyakuyninpi hinaspa churin Jesucristopa ancha kuyakuyninpipas yuyaymananapaqmi (Juan 3:16).