¿IMAYNATAQ tarikunchik pi kuyasqanchik amistadninchikpas cartata aparachimuwaptinchik? Anchatamá kusikunchik ¿aw? Chaynam Timoteopas tarikurqa apostol Pablopa carta apachisqanwan. Chay carta apachisqantam kunan riqsinchik iskay kaq Timoteo qillqawan. Chay cartapa ima nisqanta qawananpaqqa Timoteoqa sapallanchá kayta munarqa. Chaynapi kuyasqan Pablopa ima nisqanta yachaykunanpaq. Manaraq cartata qawachkaspanqa yaqapaschá Timoteoqa nirqa: “Imaynaraq Pablo kachkan, ¿Diosmanta astawan willakunaypaq hinaspa hukkunatapas yanapanaypaqchu imallatapas qillqamuwachkan?”, nispa. Kaypim yachasunchik Timoteoman Pablopa ima qillqasqanmanta.

Timoteoqa cartata ñawinchayta qallaykuspanmi yacharurqa Pablopa ancha kuyasqan kasqanta. Chay cartapim nirqa “kuyasqay churiy Timoteo” nispa (2 Tim. 1:2). Chay cartata chaskispanqa Timoteoqa yaqachusmi kimsa chunka masnin watanpiña karqa, hinaspapas achka watañam iñiqkunapi punta apaq karqa. Chaymantapas, chunka wata masnin apostol Pablota riysisqanraykum tukuyta yacharqa.

Timoteoqa ancha kallpanchasqachá tarikurqa sasachakuykuna kaptinpas Pablopa hinalla Diosman sunqu kasqanta yachaspanqa. Pabloqa Roma nacionpim preso kachkarqa, hinaspapas wañuchinankutam suyachkarqa (2 Tim. 1:15, 16; 4:6-8). Chaywanpas Pabloqa Timoteomanmi kaynata qillqarqa: ‘Tukuytam aguantachkani’, nispa. Chayna nisqanwanmi Timoteoqa mana iskayrayarqachu Pablo mana manchakuq kasqanmantaqa (2 Tim. 2:8-13). Sasachakuypi kaspanpas Pablopa mana hukmanyasqanmi Timoteota anchata kallpancharqa. Chayqa ñuqanchiktapas kallpanchawachwanmi.

Apostol Pablom Timoteota kallpancharqa tukuy sunqunwan Diosta servinanpaq, chaymi kaynata nirqa: ‘Diosmanta chaskisqaykitayá hinalla kawsachiy ninatapas ratachichkawaq hina’, nispa (2 Tim. 1:6). Griego rimaypi ‘chaskiy’ ninanqa mana imatapas ruwachkaspa  mana imallapaq chaskiy ninanmi. Timoteoqa mana imallapaq imatapas chaskichkaq hinam iñiqmasinkunata yanapananpaq akllasqa karqa (1 Tim. 4:14).

‘Chaskisqaykitayá hinalla kawsachiy ninatapas ratachichkawaq’ hina nispa Pablopa nisqanwanqa yaqapaschá Timoteoqa piensarqa tullpapi wañuruchkaqña ninapi. Wakinpiqa ninan wañuruptinmi sansallanña qiparun. Chayna kaptinqa pukupayasqam kaqmanta nina rikurin. Chayna nisqanwanmi Pabloqa Timoteota nichkarqa tukuy sunqunwan Diospaq ruwaypi kallpanchakunanmanta. Chayna nisqanqa karqa “imam ruwanaykitayá tukuy sunquykiwan ruway” nichkaq hinam. Ñuqanchikpas anchatam kallpanchakunanchik tukuy sunqunchikwan Diosta servinanchikpaqqa.

Apostol Pabloqa Diosmanta tukuy sunqunwan Timoteo willakunanpaqmi chay cartasqanpi kaynatawan qillqarqa: “Ñuqanchikpi kaq chuya espiritupa yanapakuyninwanyá allinta waqaychay chaskisqayki allin yachachikuyta”, nispa (2 Tim. 1:14). Chay allin yachachikuyqa karqa bibliamanta imam kaqta yachasqanmi (2 Tim. 1:13). Timoteoqa Diospa serviqnin kasqanraykum imam kaqta yachachinan karqa iñiqmasinkunamanpas chaynataq huk runakunamanpas (2 Tim. 4:1-5). Chaymantapas Timoteoqa punta apaq kaspan iñiqkunata yanapananpaqmi akllasqa karqa (1 Ped. 5:2). Chaynaqa, ¿imaynatam Timoteoqa imam kaq yachasqanta waqaychanan karqa? Jehova Diospa yanapakuyninwanmi hinaspa bibliamanta astawan yachaspanmi (2 Tim. 3:14-17).

Ñuqanchikpas bibliamanta imam kaqta yachaspanchikmi hukkunaman yachachinchik (Mat. 28:19, 20). Ichaqa chay imam kaqta yachasqanchikta mana kaqpaqta hina mana hapinanchikpaqqa sapa kutim Diosta mañakunanchik, hinaspapas bibliatam estudiananchik (Rom. 12:11, 12; 1 Tim. 4:13, 15, 16). Ichapas wakiqninchikqa kanchik iñiqkunapi punta apaq utaq tukuy tiemponchikwan Diosmanta willakuq. Chaymi imam kaqta yachachinapaqqa mana hatun tukuspa Diospa yanapakuyninta mañakunanchik.

Timoteoqa hukkunatam yachachinan karqa, chaynapi paykunapas iñiqkunata yanapanankupaq. Chaymi apostol Pablo kaynata nirqa: “Ñuqamanta uyarisqaykikunatayá confiana runakunaman yachachiy, chaynapi paykunapas hukkunaman yachachinankupaq allin preparasqa kanankupaq”, nispa (2 Tim. 2:2). Chaywanmi Pabloqa Timoteota yuyarichichkarqa tukuy ima yachasqanta hukkunaman yachachinanpaq. Chaynam kunanpas iñiqkunapi punta apaqkunaqa kallpanchakunanku hukkunaman yachachinankupaq, chaynapi paykunapas punta apaq kanankupaq. Allin punta apaqqa lliw imapas yachasqankunatam hukkunaman yachachin. Payqa manam ninchu “yachachiptiyqa ñuqamanta aswan yachayniyuqmi rikurirunqa” nispanqa. Aswanqa munanmi yachachisqan iñiqmasinkuna allin yuyayniyuq kaspanku iñiqmasinkuta astawan yanapanankuta.

Timoteoqa anchatachá agradecekurqa Pablo cartamusqanmantaqa. Yaqapaschá Timoteoqa Pablopa qillqamusqanta sapa kuti qawaspan yuyaymanaq, chaynapi Pablopa nisqanman hina ruwananpaq.

Ñuqanchikpas Timoteo hinam kallpanchakunanchik Diospaq ruwayninchikta tukuy sunquwan ruwananchikpaq hinaspa imam kaqta hinalla yachananchikpaq. Chaymantapas, punta apaq kaspaqa hukkunatam yachachinanchik, paykunapas iñiqkunata astawan yanapanankupaq. Chaynata ruwaspaqa Timoteota Pablopa nisqanman hinam Diospa kamachiwasqanchikta allintapuni ruwasun (2 Tim. 4:5).