¿Imatam biblia nin?

¿Allinchu kanman wañuypa patanpi churakuy?

HUK PERIODICOPIM NIRQA: “RUNAKUNAQA SAPA KUTIM WAÑUYTA MANA MANCHAKUSPANKU AVIONKUNAMANTA PAWAYKUNKU, QAQAKUNATA SIQANKU WASKAKUNAWAN WARKUKUSPA, BOTEMAN SIQARUSPA PAQCHIKUNAMAN PAWAYKUNKU HINASPA LAMAR QUCHAPIPAS TIBURONKUNAPA KASQANPI NADIANKU”, NISPA (THE WILLOW GLEN RESIDENT).

KAY periodicopi nisqankuman hinam runakunaqa wañuyta mana manchakuspanku tukuyta ruwachkanku. Wakinmi alto-altoman * qispiruspa chaykunamanta pawaykunku. Wakinkuñataqmi torokunata lancinku, wakinmi caballopi loco hina kallpanku. Qipa wiñaykunaqa astawanraqmi motokunapi, bicicletakunapi, carrokunawan urqukunaman qaqa patankunata qispinku. Chaywanmi cuentata qukunchik vidankuta mana valorasqankuta. Huk qillqapipas ninmi: “Runakunaqa mana manchakuq kasqankuwan riqsichikunankupaqmi wañuytapas mana manchakuspanku tukuyta ruwanku hinaspam hukkunatapas kallpanchanku chaykunata ruwanankupaq”, nispa (Time).

Chaynakunapi purispankum wakinqa umankuta pakikunku, tullunkuta pakikunku, wakinqa wañuytapas tarinku. 1997 watapim Estados unidospi monopatinwan kallpaq runakuna, ritiyuq alto urquman qispiqkuna, chaynataq altomanta pawaykuqkuna achkallaña accidentakururqaku. Runakunaqa hinallam tukuy chaykunata ruwachkanku wañuypa patanpi kasqankuta yachakuchkaspankupas. Huk runam nirqa: “Wañurunaytaqa yachakunim”, nispa. Huk runañataqmi nirqa: “Tulluykita utaq umaykita mana pakikuspaqa manam allintachu kallpanchakuchkanki”, nispa.

¿Chaykunapi purichwanchu Jehova Diosta kasukuqkunaqa? ¿Bibliapi yachachikuykunaqa yanapawachwanchu allinta tantiakunapaq? Qatiqninpiyá chaykunamanta yachaykusunchik.

Jehova Diosqa munanmi cuidakunanchikta

Jehova Diosmantam bibliapi nin: “Tukuy kawsakuyqa qamllamantam hamun”, nispa (Salmos 36:9 *). Diosqa unanchawaqninchik kasqanraykum yachan imaynata kusisqa kawsakunanchikmanta (Salmos 139:14; Hechos 14:16, 17; 17:24-28). Chaymi payqa cuidakunanchikta munan. Ñawpaq tiempopi serviqninkunamanpas cuidakunankupaqmi kamachikuyninkunatawan yachachikuyninkunata qurqa. Kunanpas Diospa kamachikuyninkunaqa yanapawasunmi cuidakunanchikpaq.

Moisesman qusqan kamachikuykunapim Jehova Dios kamachirqa runamasinchikta cuidananchikpaq. Jehova Diosmi nirqa: ‘Pampa hina qatayuq musuq wasita ruwakuspaykiqa pirqantam ruwanki qatanpa muyuriqninpi. Mana chayqa pipas wichiykamuspa wañuruptinmi wasipi kaqkuna huchayuq kawaqchik’, nispa (Deuteronomio 22:8). Chaymantapas nirqam pitapas toro waqraruspan wañurachiptinqa torolla wañuchisqa kananmanta, ichaqa toron waqrakuq kasqanta yachachkaspam dueñon kachaykuptin pitapas waqraruspan wañurachiptinqa dueñonpas hinaspa toropas wañuchisqam kanan karqa (Exodo 21:28, 29). Chay kamachikuykunata qusqanwanmi cuentata qukunchik Jehova Diosqa cuidakunanchik munasqanta.

Chay kamachikuykunataqa hinallam qipakunamanpas Jehova Diosta serviqkunaqa kasukurqaku. Huk kutipim kamachiq Davidta yakunayarurqa hinaptinmi kimsa qari-qari soldadonkuna rirqaku Belen llaqtapi pozomanta yakuta wisimuq, ichaqa chay llaqtaqa Filistea runakunapa makinpim karqa. Chaymi Davidpa soldadonkunaqa wañuytapas mana manchakuspanku peleaspa chay llaqtamanqa yaykurqaku. Davidman yakuta aparamuptinkum, payqa nirqa: “¡Diosnilláy ¿tomaymanraqchu kay runakunapa yawarninpa chanin yakuta utaq wañuyman wischukuspanku apamuwasqanku yakuta?! ¡Chaytaqa amayá piensayllapas-piensasaqchu!”, nispa (1 Cronicas 11:17-19). Chaywanmi cuentata qukunchik Davidqa runankunapa vidanta anchata valorasqankuta.

Jesuspas vidantaqa ancha-anchatam valorarqa. Huk kutipim satanas nirqa templopa alto-altonmanta pampaman pawaykunanpaq ichaqa Jesusmi nirqa: “‘Amam Jehova Diosnikitaqa pruebaman churankichu”, nispa (Mateo 4:5-7). Chaywanmi cuentata qukunchik David hinaspa Jesuspas vidankuta anchata valorasqankumanta.

Chaykunapi yuyaymanasqanchikmi yanapawasun ñuqanchikpas wañuypa patanman apawaqninchik kaqkunata mana ruwanapaq.

¿Wañuypa patanman vidanchikta churayqa allinchu kanman?

Manam allinchu kanman wañuypa patanman vidanchikta churayqa, chaymi manaraq imatapas ruwachkaspa sunqunchikpi tapurikunanchik: “¿Hayka runakunataq kaykunata ruwaspanku umankuta utaq tullunkuta pakikururqaku? ¿Ñuqapas umaytachu utaq chakiytachu pakikiruyman hinaspa wañuymanpas chayaruymanchu?”, nispa.

Jehova Diosta yupaychaqkunaqa wañuytapas mana manchakuspa imatapas ruwaspaqa sasachakuypim tarikuchwan. Hinaspapas Jehova Diospa llaqtanpim imapipas yanapakuyta mana atichwanchu (1 Timoteo 3:2, 8-10; 4:12; Tito 2:6-8). Imata ruwaspapas cuidakunanchikmi chaynatam vidanchikta valorasunchik.

[Notakuna]