“Pipas warmita munapayaspan qawaqqa sonqonpim hukwan pierdekuy huchata rurarunña.” (Mateo 5:28)

¿IMANASQAM KAYMANTA YACHANA?

Kunan tiempoqa, millakuypaq qalalla kaqkuna qawayqa ancha reqsisqam hinaspapas yaqa lliwmi atinmanku maypipas qawaytaqa. Kusisqa kawsakuyta hinaspa Diosta kusichiyta munaspaykiqa yachanaykim chaymanta paypa ima piensasqanta.

¿IMATAM BIBLIA NIN?

Bibliapiqa achka versiculokunapim qawachin millakuypaq qalalla kaqkuna qawayqa mana allin kasqanta.

Clarotam willakun, pi qaripas mana señoran kaq “warmita munapayaspan qawaqqa” huchapakuyman wichiykunanmanta. Bibliapa kayna nisqanqa yanapanmanmi casadotapas solterotapas millakuypaq qalalla kaqkunata llumpayta munapayaspan qawaptinqa. Chaykunata qawayqa Diostam llakichin.

‘Wañuchichkaq hinayá vidaykichikmanta chinkachiychik huchapakuyta, millakuypaq kaqkuna ruwayta, mana allin munaywan aysachikuytawan intuchikuyta, amataqyá imatapas llumpaytaqa munapayaychikchu.’ (Colosenses 3:5, NM)

¿IMATAM RUNAKUNA NINKU?

Wakin yachaysapa runakunaqa manam allintachu entiendenku qalalla kaqkunata qaway huchapakuyman apasqanta. ¿Nichkanchu kaywanqa millakuypaq qalalla kaqkunata qaway mana allin kasqanta?

¿IMATAM BIBLIA NIN?

Bibliapiqa ninmi “tupa-tupaykachispa” penqaypaq rimayqa mana allin kasqanta hinaspa huchapakuy hina kasqanta (Efesios 5:3, 4). ¿Chaychu allin kanman millakuypaq qalalla kaqkunata qawayñataq? Millakuypaq qalalla kaqkunaqa grabasqam kachkan qawanapaq, kanmanmi hukwan pierdekuymanta, qaripuralla penqakuypaq ruwasqankumanta hinaspa chayman rikchakuq huchapakuykunamantapas. Chay millakuypaq qalalla kaqkunata llumpayta munapayaspa qawayqa, penqaypaq kaqkunata tupa-tupaykachispa rimaymantaqa astawanraqmi Diosta sientichin.

Runakunaqa manam acuerdoman chayankuchu millakuypaq qalalla kaqkunata qawayqa mana allin ruwayman apananmantaqa. Bibliam ichaqa clarota niwanchik millakuypaq qalalla kaqkunata qawayqa Dioswan amistadninchikta yanqacharunanmanta hinaspapas Diostam llumpayta sientichin. Chaymi nin huchapakuyta hinaspa ima mana allin munapayaytapas vidanchikmanta chinkachinapaq. Millaypaq qalalla kaqkunata qawaqkunaqa sonqonkupim sapichachinku hinaspapas chay ruwayllatañam munanku.

‘Allin kaqtayá qamkunaqa ruwaychik. Amayá mana allintaqa ruwaychikchu. ¡Allin ruwayta kuyaychik, mana allin ruwaytañataq cheqniychik!’ (Amos 5:14, 15)

¿IMATAM BIBLIA NIN?

Ninmi wakin cristianokunaqa ñawpa vidankupi imaymana huchapakuypi puriqkuna, sinkakuqkuna hinaspa suwakuqkuna kachkaspankupas chay ruwayta saqesqankumanta (1 Corintios 6:9-11). ¿Imaynatam saqerqaku? Diospa kamachikuyninta kasukuspankum mana allin ruwaykunata cheqnirqaku.

Millakuypaq qalalla kaqkuna qawaytaqa cheqnichwanmi, chaypaqqa mana allinpi tukusqantam piensana. Utah law Universidadpim qaynakunalla willakurqaku millakuypaq qalalla kaqkunata qawaqkunaqa: “llumpay llakikuypi, mana piyniyoq hina sientekuspa, casado vidanku yanqachasqa” hinaspa chayna mana allinkunapi tukusqankuta. Chaymantapas millakuypaq qalalla kaqkunata qawayqa runatam Diosmanta karunchan.

Bibliaqa yanapawanchikmanmi allin ruwaykunata kuyanapaq. Astawan leespanchikmi, astawan kuyasun allin kawsakunapaq niwasqanchiktaqa. Chayqa yanapawasuntaqmi millakuypaq qalalla kaqkunata mana qawanapaq hinaspam Salmo qellqaq hina nisun: “Mana allin kaqkunatam qepanchakusaq”, nispa (Salmo 101:3).