¿Mana allinchu kanman trago tomay?

“Vinotam horqonku sonqonkuta kusichinankupaq. Aceitetam horqonku uyankuta llusikunankupaq. Tantatañataqmi horqonku kallpanchakunankupaq.” (Salmo 104:15)

¿IMATAM RUNAKUNA NINKU?

Wakin wasikunapiqa sapa mikuypa hawanmanmi as tragota tomaykunku. Wakinpiñataqmi mana malliyllapas malliykunmankuchu. Yaqapaschiki trago tomaytaqa mana chaynallatachu lliw runakunaqa qawanku costumbrenkurayku, onqosqankurayku hinaspa religionninkuraykupas.

¿IMATAM BIBLIA NIN?

Diospa Palabranqa mana allintam qawan sinkakuyta hinaspa trago tomayllaman qokuruytaqa, ichaqa manam chaynatachu qawan malliykuyllataqa (1 Corintios 6:9, 10). Ñawpa tiempomantaraqmi Diosta serviq runakuna vinota tomaqku, kaypas tragom, Bibliapim kaymanta riman iskay pachak masnin kutikama. (Genesis 27:25). “Mikunaykitayá mikuy kusikuywan. Vinoykitayá tomay sonqomanta kusikuywan”, ninmi Eclesiastes 9:7. Vino tomay kusirikunapaq kasqanraykum casamientopipas vinotaqa tomaqku. Jesucristopas casamientopim punta kaq milagronta ruwarqa, chaypim yakuta ‘allinnin vinopi’ tikrarqa (Juan 2:1-11). Vinotaqa servichikuqkutaqmi hampikunankupaqpas (Lucas 10:34; 1 Timoteo 5:23).

 ¿Ninchu Bibliapi hayka tomanamanta?

“¡Ay, imaynaraq kankichik vino tomanaykichikpaq qari tukuqkuna!” (Isaias 5:22)

¿IMANASQAM KAYMANTA YACHANAYKI?

Sapa watam achka familiakuna ñakarinku huk kaqnin tayta-maman otaq iskayninkupas tomayman qokurusqankurayku. Sinkakuywanqa ima desgraciapipas tarikuchwanmi urmaruchwanpas, carrotapas chocaruchwan, otaq imapas karunmanmi. Tiempopa risqanman hinaqa ñutqonchikta, sonqonchikta, kichpanninchikta hinaspa wiksanchiktapas dañarunmanmi.

¿IMATAM BIBLIA NIN?

Jehova Dios chaskiwananchikpaqqa tomaypiwan mikuypim controlakuq kananchik (Proverbios 23:20; 1 Timoteo 3:2, 3, 8). Diosqa manam allintachu qawan mana conrolakuqtaqa. Bibliam nin: “Vinowanmi runaqa burlakuq runa rikurirun. Poqosqa aqawanñataqmi qaparkachaq runa rikurirun. Chaykunata upyaspa pantaruspaqa manaña yachayniyoqmi rikurirun”, nispa (Proverbios 20:1).

Mana tanteoyoq runataqa allin ruwaq kachkaptinpas mana allin ruwaymanmi wichiykachinman trago tomayninqa. Oseas 4:11 nin: “Vinolla aqalla upyakuq runaqa mana entiendeqñam rikurirun”, nispa. Kay cierto kasqantam Juan sutiyoq runa yacharurqa ñakarisqankunawan. * Señoranwan piñanakuruspanmi hotelman pasakurqa, chaypim sinkakuruspa huchapakururqa, kay ruwasqankunamanta llumpayta ñakakuspanmi wanakunanpaq prometekurqa. Sinkakuyqa yanqachanmi cuerponchikta, allin kayninchikta hinaspa iñiyninchiktapas. Bibliapim nichkan sinkakuqkuna wiñay kawsayta mana haypanankumanta (1 Corintios 6:9, 10).

¿Haykapim mana allinchu kanman tomayqa?

“Tanteoyoq runaqa desgracia sucedenanta qawarispanmi asurikun. Pisi experienciayoq runañataqmi chayninta pasaykuspan ñakarikun.” (Proverbios 22:3)

¿IMANASQAM KAYMANTA YACHANA?

“Tragoqa nisyu droga hinam” (World Book Encyclopedia). Chayraykum pisi trago tomayllapas wakinpiqa mana allinchu kanman.

¿IMATAM BIBLIA NIN?

Runakunaqa sapa kutim sasachakuypi tarikunku mana tomanan kachkaptin tomaspanku. Bibliam nin: “Tukuy imam tiempoyoqlla”, nispa. Kanmi tiempo mana tomanapaqpas (Eclesiastes 3:1). Wakinkuqa llumpay mozollaraqmi kanku tomanankupaqqa. Hukkunaqa saqechkankum trago tomayman qokurusqankuta. Hukkunañataqmi tragowan mana tupaq hampitapas tomachkanku. Achka runakunataqmi mana tomanankuchu llamkaq rinanku kachkaptin nitaq llamkachkaspankupas, aswanraqmi maquinakunawan llamkaspankuqa. Tanteoyoq runakunaqa vidankutawan cuerponkutam qawanku Diospa sumaq regalonta hina (Salmo 36:9). Chay regalo chaninchasqantaqa qawachichwantaqmi tragomanta Bibliapa ima nisqanta kasukuspa.