¿Kanchu tukuy imamanta sapa kuti rimanaykipaq amistadniki? Chayna kaptinqa, ichapas niwaq amistadlla kasqaykichikta. Sichu qosayki chaymanta yacharuspanqa, ¿qam hinachu piensanqa?

Yaqachusmi chayna amistad kasqaykichikqa llumpayña kanman, mana chayna kananpaqmi imatapas ruwanayki. Ichaqa puntata qawasun imanasqa chay pasakusqanmanta. *

Kikillaykipi piensaptiki. Huk qari warmita respetowan rimapayaptin otaq imapipas yanapaykuptinqa kusisqam tarikun. Unay wataña casarasqa kaspanpas mana qosan kaq runawanmi chayna tarikunman. Chaymantaqa anchatam cuidakuna. Huk casarasqa warmi mana qosan kaq runawan kuyanakuyta qallaykuptinqa, qosanpaq kuyakuyninmi hawa sonqollaña kachkanman.

• Tapukuy: “¿Casada vidaypi ima sasachakuy kasqanraykutaq amistadninta maskani?”, nispa.

Sumaqta rimapayasuptiki. Bibliaqa ninmi casarakuqkuna kawsakuyninkupi sasachakuyniyoq kanankumanta (1 Corintios 7:28). Ichapas wakinpiqa qosayki mana interesakusqanta otaq mana kuyasusqaykita piensawaq, otaq hukmanyaruwaq sasachakuynikichikta mana allichasqaykichikrayku. Qosaykiqa manapaschá kaykunamanta rimaytaqa munanqachu, hinaptin hukmanyasqa tarikuwaq hinaspa huk runa respetowan rimapayasuptiki otaq imapipas yanapaykusuptikiqa kusikuywan chaskikuwaq. Casado vidamanta yachaq runakunam ninku casado vidankupi sasachakuyninkuta mana allichaspankuqa mana allinpi otaq divorciakuypi tukurunankumanta.

• Tapukuy: “¿Casada vidaypi sasachakuy kasqanraykuchu amistadniypa rimapayawasqanta allinpaq hapini?”, nispa.

Sasachakuytam musyanayki. Biblia nin: “Pipas marqayninpi ninata apaspanqa pachantam kañarachikun”, nispa (Proverbios 6:27). Casarasqa kachkaspayki huk runawan kuyanakuyta qallaykuspaykiqa llumpay sasachakuymanmi yaykurunkiña (Santiago 1:14, 15). ¿Imanasqa? Qosallaykitam kuyanaykiqa manam huk runatachu.

Ama yanqata piensaychu. Piwanpas anchata amistadta ruwaruspaykiqa yaqapaschá kaynata niwaq: “Paywan casarakuruptiyqa imaynaraq viday kanman karqa”, nispa. Chaynata nispaykiqa amistadnikipa allin kayninkunatam qosaykipa pantasqankunawan tupachichkawaq, chayqa manamá allinchu. Manam chay amistadllaykichu chaynataqa sientechisurqanki, qosaykipas chayllaraq reqsinakuptikichikqa chaynam karqa. (Imatam Biblia yachachin: Jeremias 17:9.)

Allinta tanteay. Runakunaqa carronkupi hinaspa wasinkupim alarma nisqata churanku mana suwachikunankupaq. Yaqa chaynatam ruwawaq casado vidaykiwanpas. Bibliam nin sonqota waqaychanamanta (Proverbios 4:23). Chaypaqqa ichapas kaykunata ruwawaq:

• Sutillata qawachiy casada kasqaykita. Chaypaqmi yanapasunkiman qosaykipa fotonta llamkaynikipi churayniki. (Imatam Biblia yachachin: Genesis 2:24.)

• Allinta tanteay imakunata mana ruwanaykimanta otaq parlanaykimanta. Manam allinchu kanman amistadnikiwan casada vidaykipi sasachakuynikikunamanta rimaynikiqa otaq mikuq lloqsiynikichikpas.

• Mana qosayki kaq runawan kuyanakuyta qallaykuspaykiqa, saqeypuni chay ruwayta. Mana chayna kaptinqa tapukuy imanasqa mana atisqaykita. Chay runaman sayapakunaykimantaqa qosaykiman sayapakuy. Paytam kuyanaykiqa hinaspapas tukuytam ruwanayki casada vidaykita salvanaykipaq. (Imatam Biblia yachachin: Proverbios 5:18, 19.)