LLAMKAYNINKUTA, wasinkuta hinaspa kapuqninkuta qechurachikunankumanta yachaspankupas runakunaqa tukuy imatam rantiyta munanku. ¡Mayna llakikunapaqmá chayqa!

Chayna runakunaqa chayllam rantikuqkunapa willakuyninta qawaspanku hatun wasita, mosoq carrota hinaspa chaninniyoq pachata rantinankupaq tantearunku. Qollqenku mana kaptinpas prestakuspankum tukuy imata rantinmanku kapuqniyoq kasqankuta qawachinankupaq, ichaqa kunkan kuchukamam manukusqa kachkanku.

Huk librom kaynata nin: “Pimantapas aswan allin tarikunapaq imatapas chaninniyoqta manukuyqa, rikchakunmanmi drogata malliruspa allin tarikuyman hina. Kaykunataqa chayllam tariruchwan, ichaqa manam unaypaqchu. Tiempopa risqanman hinam hukmanyasqa hinaspa mana qollqeyoq qeparuchwan”, nispa (The Narcissism Epidemic).

Bibliam nin imapas kapuqninchikmanta alabakuyqa mana allin kasqanta (1 Juan 2:16). ¿Imanasqa? Kapuqniyoq kayta maskayqa allin kaqkunamantam karuncharuwachwan. Qawasun qollqewan mana rantiy atina kaqkunamanta.

Estados Unidos nacionpi Beatriz * sutiyoq sipasmi nin: “Taytayqa llamkayllamanmi qokurun, chaymi tukuy ima necesitasqaykumantapas astawanraq kapuwanku, ichaqa llamkayninrayku maymanpas illaspanmi wasiykupiqa mana tarikunchu. Yachanim llamkananmantaqa, ichaqa tiempochakunantaqmi ñoqaykupaqpas”, nispa.

Tapukuy: ¿Imakunamantam Beatrizpa taytanqa pesakunman tiempopa risqanman hina? Qollqella maskasqanqa ¿imaynatam sasachachkan churinwan amistadninta? ¿Qollqemantapas astawanqa imatam familianqa necesitan?

Imatam Biblia nin:

• “Qollqella kuyayqa tukuy mana allin ruraykunapa mamanmi. Wakin runakunapas qollqellata kuyaruspankum [...] tuksikuchkaq hina llumpaysuta ñakarinku.” (1 Timoteo 6:10.)

• “Cheqninakuspa wira aychayoq mikuruymantaqa kuyanakuspa yuyu mikuyllapas mikuruymi aswan allinqa.” (Proverbios 15:17.)

Huk rimaypiqa: Familiapi kusisqa kawsakuytaqa manam qollqewanqa rantichwanchu. Chay kusikuytaqa tarisun familiapaq tiempochakuspam, kuyakuyta qospa hinaspa paykunamanta nanachikuspam (Colosenses 3:18-21).

17 watanpi Sara sutiyoq sipasmi nin: “Mamaymi hikutawarqa apu runawan casarakunaypaq, mana chayna kaptinñataq allin estudioyoq kanaypaq, chaynapi achka qollqeyoq kaspay hawka kawsakunaypaq. Yaqachusmi payqa qollqellapi umayoq”, nispa.

Tapukuy: ¿Imakunam Sarapa mamanta llakichin hamuq punchawkunamanta? ¿Llakikunapaq hinachu icha yanqallachu? ¿Imaynatam kapuqniyoq kayta qawanan?

Imatam Biblia nin:

• “Kay pachapiqa amayá qori-qollqetaqa huñukuychikchu, chaykunaqa puyurachikuqllam hinaspa ismuruqllam, suwapapas wasita yaykuruspa suwarunallanmi.” (Mateo 6:19.)

• “Qamkunaqa manam yachankichikchu paqarin punchaw imam pasarusunaykichiktaqa.” (Santiago 4:14.)

Huk rimaypiqa: Qollqewanqa manam rantiwaqchu wiñaypaq kusisqa kawsakuytaqa. Manataqmi onqoymantawan wañuymantaqa librawachwanchu (Eclesiastes 7:12). Bibliaqa yachachinmi Diosmantawan munayninmanta yachaspa wiñay kawsay haypanamanta (Juan 17:3).

24 watanpi Tania sutiyoq sipasmi nin: “Tayta-mamaymi yachachiwarqa kapuqllaywan kawsakunaypaq. Mana tukuy imayoq kaspaykupas ñañaywanqa kusisqam kawsakurqaniku”, nispa.

Tapukuy: ¿Imanasqataq sasa kanman kapuqllanchikwan kusisqa kawsakuyqa? ¿Imatam qollqemanta familiaykiman yachachinayki?

Imatam Biblia nin:

• “Pachanchikpas mikunanchikpas kaptinqa, chaywanyá contentakusun.” (1 Timoteo 6:8.)

• “Mayna kusisqam ‘Diostam necesitani’ niqkunaqa.” (Mateo 5:3.)

Huk rimaypiqa: Qollqewan imapas rantisqanchikqa manam ancha chaninniyoqchu kawsakuyninchikpiqa. Bibliam nin: “Runaqa manam tukuy imayoq karunallanpaqchu kawsanan”, nispa (Lucas 12:15). Kusisqa kawsanapaqqa kay tapukuykunapa kutichiynintam yachananchik:

• ¿Imapaqmi kawsanchik?

• ¿Imataq hamuq tiempopi suyawanchik?

• ¿Imaynatam Diosmanta yachayman?

Kay revistataqa Jehova Diospa testigonkunam ruwanku, paykunam yanapasunki kay tapukuykunapa kutichiyninta tarinaykipaq.