“Ñoqallayqa llakipa intusqan[mi] purichkani, tukuy punchawmi kurkunpallaña purichkani.” (Salmo 38:6, Chuya Qellqa edición revisada 2012)

¿IMATAM KAYMANTA YACHAQ RUNAKUNA NINKU?

Llapanchikmi wakinpiqa llakisqa tarikunchik, ichaqa chaywan llumpayta onqoruspaqa astawanmi mana allinpi tarikuchwan. Kaymanta yachaq runakunam iskay-kimsata rimanku, llakikuymantawan chaywan llumpay onqoymanta, chayna kaptinpas wakin runakunaqa llumpay llakisqam tarikunku mana imapaqpas serviq hina hapikuspanku.

¿IMATAM BIBLIA NIN?

Diospa wakin serviqninkunapas hukmanyasqam tarikurqaku. Huk kaqninmi karqa Ana, payqa ‘llumpayta waqaspanmi llakisqallaña’ tarikurqa (1 Samuel 1:10). Huk kutipiñataqmi Diosmanta willakuq Elias llumpay hukmanyasqa kaspan Diosta mañakurqa: “Kunankamallañayá kawsasaq, ñoqataqa wañurachiwayñayá”, nispa (1 Reyes 19:4).

Punta pachak watapi cristianokunaqa ‘hukmanyasqakunata kallpanchanankupaq’ kamachikuytam chaskirqaku (1 Tesalonicenses 5:14). Kaykunam sutillata qawachin Diosta tukuy sonqonkuwan serviqkunapas wakinpiqa llumpay hukmanyasqa kasqankumanta.

“Diospa tukuy ima unanchasqankuna[m] ñakarichkan waqachkaq hina hinaspa wachakuywan ñakarichkaq warmi hina.” (Romanos 8:22)

¿IMATAM BIBLIA NIN?

Onqonchikqa punta tayta-mamanchikkuna huchallikurusqankuraykum. Salmo 51:5 nin: “Huchallikuqpaqmi mamallayqa wiksayakuwarqa. Mana allin ruraqpaqmi mamallayqa wachakullawarqa”, nispa. Romanos 5:12 nin: “Huk runallawan kay pachapi huchallikuy qallariruptinmi chayrayku wañuypas rikurirurqa chaymi lliw runakuna huchallikuspanchik wañunchik”, nispa. Adanmanta huchata chaskisqanchikraykum onqonchik hinaspa hukmanyanchikpas. Chaymi Diosqa kaynata niwanchik: “Diospa tukuy ima unanchasqankuna[m] ñakarichkan waqachkaq hina hinaspa wachakuywan ñakarichkaq warmi hina”, nispa (Romanos 8:22). Ichaqa, qowanchiktaqmi huk suyakuytapas mana imawanpas onqospa mosoq pachapi kawsakunapaq, kay suyakuytaqa manam pipas qowanchikmanchu (Apocalipsis 21:4).

“Huchanmanta llakiq runapa hichpallanpim [Diosqa] sayaykun. Huchayoqpas wanakuptinqa Tayta Diosmi salvaykun.” (Salmo 34:18)

¿IMANASQATAQ ANCHA ALLIN KAYMANTA YACHAYNINCHIKQA?

Manam makillanchikpichu mana sasachakuyniyoq kayqa (Eclesiastes 9:11, 12). Ichaqa atichwanmi mana allinkuna piensasqanchikta controlaytaqa.

¿IMATAM BIBLIA NIN?

Lucas 5:31 nisqanman hinaqa, doctormanmi onqoqkunaqa rinanku. Chaynaqa, llumpay llakikuywan onqospaykiqa maskawaqmi doctorpa yanapakuyninta. Bibliaqa nintaqmi Diosta mañakuypas ancha allin kasqanmanta. Salmo 55:22 nin: “Diosmanyá qoykuy preocupasqa kasqaykitaqa. Payñam cuentallikunqa qanmantaqa. Allin runataqa manam wiñaypaqchu saqenqa urmasqataqa”, nispa. Diosta mañakuyqa manam yanqallachu. Jehova Diosqa “huchanmanta llakiq runapa hichpallanpim” kachkan, payta mañakuspaqa paywanmi rimachkanchik (Salmo 34:18).

Yanapawachwantaqmi amistadninchikman sonqonchikta kichaykuypas (Proverbios 17:17). Jehova Diospa testigon Danielam kaynata willakun: “Huk iñiqmasiymi anchata pacienciakuspan llumpay llakisqa kasqaymanta payman willakunaypaq yanapawarqa. Achka watakunam chay llakikuyniytaqa mana pimanpas willakurqanichu, chaymantañam musyakurqani qallariymantapacha willakunay kasqanmanta. Manam haykapipas piensarqanichu anchata chay yanapawananmantaqa”, nispa.