LUISTAWAN Jorgeta pasasqanqa pitapas pasanmanmi. Pipas imatapas ninakuruspaqa tumpanakuspam pampachanakuyta mana munankuchu. Mana pampachanakuspaqa amistadninkutam yanqacharunmanku.

¿Tarikurqankichu chayna sasachakuypi? Chayna tarikuspaqa manam hawkachu kawsanchik. Manam munanchikchu vecinonchikwan otaq amistadninchikwan cheqninakuytaqa. Chaynaqa, ¿imaynatam paykunawan sumaqllata kawsakuchwan sasachakuy kaptinpas? ¿Atichwanchu imapas ninakusqanchikmanta pampachanakuyta? ¿Atichwanchu mana lirianakuspalla rimanakuyta?

Kaqmanta reparasun Luispi hinaspa Jorgepi, ¿imanasqam amistadninkuta yanqacharurqaku?: 1) Jorgem qawachirqa mana kuyapayakuq kasqanta, 2) Luisñataqmi piñakuspan reclamarqa chaywanmi Jorge piñakururqa, 3) iskayninkum lirianakuyta qallaykurqaku, 4) manam mayqenninkupas entiendenakurqakuchu.

Tiempo pasasqanman hinam Luiswan Jorgeqa cuentata qokururqaku piñanakunankupaq iskayninku huchayoq kasqankumanta, chaymi amistarqaku. ¿Imataq yanaparqa? Amistanankupaq otaq ima sasachakuytapas atipanankupaq achka runakunata yanapaq consejokunam.

Chay consejokunaqa Bibliapim kachkan, chayqa yanapawanchikmi entiendeq, kuyakuq, pacienciakuq hinaspa llakipayakuq kanapaq, chayna kayqa yanapawanchikmi pampachanakuspa hawkalla kawsakunapaq (Proverbios 14:29; 1 Corintios 13:4, 5).

Manam Luistawan Jorgellatachu Bibliapi consejokunaqa imayna kayninkuta cambianankupaq  yanaparqa. Achka runakunam mana allin genionkuta cambiarunku. Chayna yanapasqanmantayá iskay willakuypi reparasun: Australia nacionpi kaq Robert sutiyoq runam manchakuypaq piñakuq kayninta cambiarurqa, Timor Oriental nisqanku nacionpi kaq Nelson sutiyoq runapas llumpay cheqninakusqanwanmi amistadta ruwarurqa. Bibliapi consejokuna vidankuta imayna cambiasqanmantam ¡Rikchariy! revista paykunata tapurqa.

ROBERT, imayna uywasqa kasqaykimanta willaykuwayku.

Taytaymi llumpay maqakuq kaspan maqawaq. Wakinpiqa yawarniypas sutunankama maqawaspanmi desmayachiwaq. Chaynata ruwawasqanwanmi llumpay mana allin genioyoq wiñarqani. Chayraq mozoyaq warmakunata correginankupaq wasipim iskay wata karqani. Chaymanta tiempo pasaytam mana allin ruwasqaymanta manchakuypaq presokunapa kasqan carcelman apawarqaku. Chaymanta lloqsiruspaymi Australiaman pasakurqani allintaña kawsakunaypaq.

¿Yanapasurqankichu Australiaman risqaykiqa?

Manam chayman risqaychu yanapawarqaqa, aswanqa Bibliapa nisqanmanta Testigokunapa yachachiwasqankum. Ichaqa llumpaytam sasachakurqani genioyta controlaypi, chaywanmi wakinpiqa mana imapaq valeq hina sientekurqani. Huk kutipim Proverbios 19:11 nisqanpi yuyaymanarqani, ninmi: “Anaq piñakuq runam yachayniyoq runaqa. Ofiendeqkunata pampachaspanmi alabasqa kanqa”, nispa. Yachayniyoq kayta munaspaymi piensayta qallaykurqani runaqa imanasqa imayna kasqanchikpi, rimasqanchikpi otaq imatapas ruwasqanchikpi. Chaywanmi pisi-pisimanta entiendeq, pacienciakuq chaynataq mana cheqnikuq kanaypaq kallpanchakurqani.

¿Willawankikumanchu huk kutipi ima pasasusqaykita?

Huk kutipim amigoyta sientirachirqani, payñataqmi mana allin ruwasqaymanta hukkunapa qayllanpi niwarqa. Chayqa llumpaytam penqarachiwarqa. Ichaqa chayllam yuyarirurqani Bibliapi huk textota, chaypim nin: “Mana allinta rurasuptikichikqa amayá chaynatachu kutichiychik”, nispa (Romanos 12:17). Amigoypa piñakuynin pasaruptinmi sapallaykupi parlarqaniku, paymi willawarqa familianwan llumpay sasachakuypi kasqanmanta. Chaymantam paywan amistarqaniku hinaptinmi tiempo pasayta sumaq casacata regalaykuwarqa. Imapiraq rikukuyman karqa genioyta mana controlaspayqa.

¿Imaynatam familiaykipi sasachakuykunata allichanki?

Kanmi señoray chaynataq 20 watayoq churiypas, chaymi wakin familiakunapi hina ima sasachakuyniykupas kan. Ichaqa yacharunim Bibliapi consejokunamanta, hukninmi yachachin pampachaq kanapaq. Imamantapas pampachawananchikpaq sonqonchikmanta mañakuspanchikqa ima sasachakuytapas chayllam allichanchik.

NELSON, llampu sonqo kusisqallaña kasqaykitam qawayki, ¿chaynachu karqanki warma kasqaykimanta?

Manam. Mozollaraq kaspaymi gobiernopa contranpi kaq politicokunawan juntakurqani. Chaymantapas distritoy munaychakuruq munaq politicokunatam llumpayta cheqnirqani. Allin peleaq kayta munaspaymi haytakuyta hinaspa takakuyta yacharurqani (artes marciales), chaymi pipas piñachiwaptinqa maqaparuq kani.

¿Imataq yanapasurqanki chayna vidaykita cambianaykipaq?

Biblia estudiaytam qallaykurqani chaynataq yachachikuyninkuna kasukuytapas, astawanraqmi sonqoyman chayaq kaqkunataqa. Huknin textom nin: “Runamasikichik qamkunapaq allin kaqkuna rurananta munaspaqa qamkunapas paykunapaqyá allin kaqkunata ruraychik”, nispa (Mateo 7:12). Hukninñataqmi nin: “Kuyankim runamasikita kikikita hina”, nispa (Mateo 22:39). Jehova Diospa testigonkunam Bibliapi cheqap yachachikuykunamanta yachachiwarqaku, paykunaqa runamasinkutam maymantaña kaptinkupas kuyanku. Ñoqapas munarqanim paykuna hina kayta, chaymi kallpanchakusqayman hina Testigoña kani. Vidaypi cambiasqaywanmi ñawpa watakunapi reqsiwaqniykuna anchata admirakunku, chaymantapas manañam manchakuwankuñachu.

¿Haykapipas kaqmanta atipachikurqankichu genioykiwan?

Runakunapa qayllanpiqa manam, ichaqa wasiypim wakinpiqa mana controlakuyta atiqchu kani. Huk kutipim piñakuspay señorayta maqarurqani, anchatam ñakakuni chayna ruwasqaymanta. Señoraypa pampachaykuwasqanmi kallpanchawarqa genioyta cambianaypaq.

Hukkuna manaña manchakususqaykimantam nirqanki, willaykuwayku.

Huk punchawmi Augustowan tuparurqani, payqa ñawpa watakunapi cheqnisqay politicokunapa umalliqnin runam karqa. Payqa upallallam pasayta munarqa ichaqa sumaqllata saludaspaymi nirqani amaña cheqninakunaykupaq hinaspam wasiyman hamunanpaq nirqani. Watukamuwaspanmi vidaypi cambiasqaywan admirakuspan Biblia estudiayta qallaykurqa. Augustoqa amigoymi chaymantapas iñiqmasiyñam.

Runakunaqa imamantapas manam acuerdopichu kanku, chaywanmi wakinqa llumpayta sasachakunku. Chaymantapas manam pampachanakuyta munankuchu. Chaymi Biblia kaynata consejan: “Atisqaykichikman hinayá imatapas ruraychik llapallanwan hawkalla kawsanaykichikpaq”, nispa (Romanos 12:18).

Kay yachachikuypi qawamusqanchik willakuykunawanmi cuentata qokunchik Bibliapi yachachikuykunaqa chaynataq consejokunaqa runakunapa imayna vidanta cambiachinanpaq atiyniyoq kasqanmanta (2 Corintios 10:4). Chayna kasqanmantam Biblia nin: “Ñanninkunapas mayna sumaqmi, chayninta puriyqa hawkayaypi kawsakuymi. Yachayqa kawsaymi pipas tariruqninpaqqa. ¡Mayna kusisqam tariruspa waqaychaqkunaqa!”, nispa (Proverbios 3:17, 18, Chuya Qellqa revisión 2012).

¿Munankichu hawkalla hinaspa kusisqa kawsakuyta? ¿Imatam ruwawaq amistadnikiwan sientenarachikuspaqa? Chayna sasachakuyta atipanaykipaqmi Bibliapi yachachikuykuna yanapasunki.