Argentinapi kaq Mabelmi vivallaña doctora karqa (fisioterapeuta). Ichaqa 2007 kaq watapim llumpay pisipasqa hina sientekuyta qallaykurqa, chaymantapas sapa punchawmi puramenteta uman nanarqa. Paymi nin: “Doctorkunamanmi huknin-hukninman rirqani, tukuy hampitam tomarqani ichaqa manam imapas sanoyachiwarqachu”. Chaymantam qawarqaku resonancia magnética nisqa aparatowan, hinaspam tarirurqaku cerebronpi tumorta. Mabelmi nin: “Umaypi runa wañuchiq tumor kasqanta yacharuspaymi yaqa imanakururqanipas.

Ichaqa operaruwaptinkuñam cuentata qokurqani llaki vidapi tarikusqayta. Operawasqankumanta rikchariruspayqa manam kuyuriyta atirqanichu. Cuartopa alto qatallantam qawayta atirqani. Manaraq operawaptinkuqa vivallaña imapas ruwaqmi karqani, operawasqankumanta qepatam ichaqa ima ruwaytapas mana atirqanichu. Hospitalpi kaspayqa tukuy bullatam uyarirqani: doctorkunapa imapas chanlanyachisqanta, herido apamuq carropa qaparisqanta chaynataq onqoqkunapa way-way wayasqantapas. Chaypiqa ñakariywan nanayllam karqa.

Kunanqa allinchañam kachkani. Atiniñam sapallay puriyta, wakinpiqa callemanpas sapallayñam rini; ichaqa manam allintachu qawakuni, chaymantapas tanpi-tanpitam purini”.

Kusisqa sonqo kanaykipaq kallpanchakuy. Bibliam nin: ‘Kusisqallaña sonqoyoq runaqa sanoy-sanoymi kanqa. Llakisqallaña sonqoyoq runam ichaqa onqosqalla’, nispa (Proverbios 17:22). Mabelmi nin: “Operawasqankumanta qepatam allinyanaypaq tukuy ejerciciota ruwachiwarqaku, chaywanmi cuentata qokurqani doctora kaspay atiendesqay runakuna mayna ñakarisqankumanta. Wakinpiqa llumpayta nanawasqanraykum chay ejerciciokunata manaña ruwayta munaqchu kani. Ichaqa kallpanchakurqanim hinalla ruwanaypaq, piensarqanim chayna kallpanchakusqayqa mana yanqapaq kananta”.

Ama hukmanyaychu. Mabelmi nin: “Bibliapim yacharuni imanasqa ñakariykuna kasqanmanta, chaynataq kay tukuy mana allinkuna chaylla chinkananmantapas”. *

Ama qonqaychu, Diosqa sientesunkim (1 Pedro 5:7). Mabelmi nin: “Operawanankupaq huk cuartoman yaykuchiwaptinkum piensarqani Bibliapa kayna nisqanpi: ‘Amayá manchakuychu. Ñoqam qanwan kachkani’, nispa (Isaias 41:10). Chaywanmi hawka sientekurqani, cuentatam qokurqani imawan ñakarisqayta Jehova Dios yachasqanta”.

Diosmi prometen: hamuq tiempopiqa ima onqoywanpas manaña ñakarinamanta (Isaias 33:24; 35:5, 6).