Manapaschá qonqayta atinkichu qosaykipa imapas nisusqaykitaqa otaq imapas ruwasusqaykitaqa. * Mana allin rimasqanqa otaq imapas ruwasqanqa umallaykipichá kachkan. Hinalla kuyanaykimantaqa piñasqachá tarikunki. Casado vidaykipi kuyanakuy manaña kasqanta piensasqaykiwanchá astawan piñasqa tarikunki.

Ima sasachakuytapas atipawaqmi. Ichaqa puntatam yachanayki piñasqa kasqaykiqa imanasqa mana allin kasqanmanta.

Piñasqalla kaynikiqa casado vidaykitam yanqacharunman. ¿Imanasqa? Yanqacharunmanmi kuyanakuynikichikta, confianakuynikichikta chaynataq huk sonqolla kawsakuynikichiktapas. Casado vidapi piñasqalla kayqa onqoy hinam kanman. Chaymi Bibliaqa nin piñakuq kayta saqenapaq (Efesios 4:31).

Sonqonpi piñakuyta waqaychaqqa kikinmi ñakarin. Sonqoykipi piñasqa kasqaykiqa rikchakunmanmi cheqnisqayki runata nanachiyta piensaspa kikikipa maqakusqaykiman. Huk qellqapim Mark Sichel sutiyoq runa nin: “Ichapas cheqnisqayki runaqa hawka kachkan, payqa manapaschá piensayllapas-piensanchu qanwan sasachakuypi kasqantaqa”, nispa. Nintaqmi: “Iskaynikichikmantaqa kikikim astawan ñakariypiqa tarikunki”, nispa (Cómo sanar las heridas familiares).

Kikinchikmantam piñasqa kaypas otaq manapas. Wakin señorakunam ninku: “Piñasqa kanaypaqqa qosaymi huchayoq”, nispa. Hukkunañataqmi ninku: “Imapas kanpunim piwanpas piñasqa kanapaqqa”, nispa. Chaynata piensasqankuwanqa nichkankum hukkunawan piñasqa kayqa mana controlay atina kasqanta. Bibliam ichaqa kaynata nin: “Sapakamam kikinpa vidanta qawakunan”, nispa (Galatas 6:4). Manam hukkunapa imayna kasqanku controlaytaqa atichwanchu, kikinchikpa imayna kasqanchiktam ichaqa atichwan. Ima sasachakuypas kaptinqa manam piñakuyllachu kanan.

Pampachakuq kanaykipaq kallpanchakuy. Manam sasachu piñasqa kasqaykimanta qosaykiman tumpaykuyqa. Ichaqa ima sasachakuypas kaptinqa manam piñakuqllachu kanayki, atiwaqmi pampachaykuytapas. Bibliapa kayna nisqantam kasukuwaq: “Amayá inti seqaykunankamaqa piñakuruychikchu” (Efesios 4:26). Pampachanaykipaq kallpanchakuspaqa sumaqllatam casado vidaykipi sasachakuykunata allichanki. (Bibliam consejan: Colosenses 3:13.)

Imayna sonqoyoq kasqaykita qawakuy. Bibliam willakun wakinqa chaylla piñakuq kasqankumanta (Proverbios 29:22). ¿Chaynachu qampas kanki? Sonqoykipi tapukuy: “¿Cheqnikuytachu sonqoypi waqaychani? ¿Chaylla piñakuqchu kani? ¿Imatapas masyarichiqchu kani?”, nispa. Bibliam nin kikinpa piensasqallanpi hapipakuqqa allin amistad kaqkunata rakinachisqanmanta (Proverbios 17:9; Eclesiastes 7:9). Casado vidapipas chayqa pasakunmanmi. Cheqnikuyta sonqoykipi waqaychaspaqa kallpanchakuy qosaykiwan pacienciakunaykipaq. (Bibliam consejan: 1 Pedro 4:8.)

Allin tanteowan rimay. Bibliam nin: “Kanmi upallanapaq tiempo. Kanmi rimanapaq tiempo”, nispa (Eclesiastes 3:7). Manam allinpaqchu kanman qosaykipa imapas lliw nisusqaykiwan chaylla piñakuynikiqa. Wakinpiqa Bibliapa kayna nisqan kasukuynikim allin kanman: ‘Qamkunaqa upallaspaykichikyá camaykichikpi yuyaymanaychik’, nispa (Salmo 4:4). Imamantapas rimanayki kaptinqa rimay rabiayki pasaruptinña. Beatrizmi nin: “Piñasqa kaspayqa rabiay pasawanankamam suyani. Chaywanmi wakinpiqa cuentata qokuni imapas niwasqanqa piñakunaypaq hina mana kasqanmanta, chayqa yanapawanmi respetowan rimanaypaq”, nispa. (Bibliam consejan: Proverbios 19:11.)

“Pampachay” ninanqa ima ninan kasqanpi yuyaymanay. Bibliapi “pampachay” ninanqa pipa imanawasqanchiktapas mana kaqpaqpas hapiymi. Chaywanqa manam nichkanchikchu ciertota mana imanawasqanchiktachu, aswanqa ñoqanchikmi tanteanchik mana kaqpaqpas hapinapaq. ¿Imanasqa? Yachanchikmi pipapas imanawasqanchikmantaqa piwanpas piñasqa kayqa saludninchikpaq otaq casado vidanchikpaq mana allin kasqanta.