IMATAM BIBLIA NIN
Chuya kaymanta
¿Ima nintaq Diosqa chuyanchakuymanta?
“Aychanchikpi hinaspa espiritunchikpi tukuy mana allinmantayá chuyanchakusun.” (2 Corintios 7:1)
BIBLIAPA NISQAN:
Diosqa kuyawanchikmi, chaymi mana unquspa unay kawsakunanchikta munan. Bibliapim kaynata niwanchik: ‘Sunquykipiyá waqaychay kamachikuyniykunata hinaptinqa unay watakunam kawsakunki, hinaptinqa hawkallañam kawsakunki’, nispa (Proverbios 3:1, 2). Israel nacionman chuya kanankupaq kamachikuy qusqanmi Dios kuyawasqanchikta qawachin (Deuteronomio 23:12-14). Chay kamachikuykuna kasukuyqa manam sasachu karqa, chayta ruwaspankuqa manam wakin nacionkuna hinachu unqunanku karqa, chay nacionkunapaqqa manam chayna kamachikuyqa karqachu (Deuteronomio 7:12, 15).
Tukuy imakunam aychanchikta qachachan: coca akuy, cigarro pitay, trago upyay hinaspa drogakunapas. Ichaqa tukuy kaykunata saqiq runaqa achka unquykunamantam karunchakun hinaspapas unay watatam kawsakunku. Chaymantapas chuya kanapaq Diospa kamachikuyninkunata kasukuspaqa runamasinchikkunapa allinnintam maskachkanchik (Marcos 12:30, 31).
¿Ima nintaq Diosqa kawsakuyninchikpi hinaspa Dios yupaychayninchikpi chuya kaymanta?
‘Wañuchichkaq hinayá vidaykichikmanta chinkachiychik: huchapakuyta, millakuypaq kaqkuna ruwayta, mana allin munaywan aysachikuyta hinaspa qullqilla kuyayta. Tukuy chaykunata ruwaspa mana kasukuqkunamanmi Diosqa llumpay castigonta kachaykunqa.’ (Colosenses 3:5, 6)
BIBLIAPA NISQAN:
Bibliaqa manam “aychanchikpi” tukuy mana allinmanta chuyanchakunallapaqchu niwanchik, aswanqa ‘espiritunchikpipas’ chuyanchakunapaqmi. Jesus kay Pachapiraq kachkaptinmi, religionpi punta apaqkunaqa aychankupi chuya kanankupaq tukuyta ruwarqaku, ichaqa kawsakuyninkupiwan Diosta yupaychayninkupim mana chaynachu karqaku (Marcos 7:1-5). Chaymi Jesusqa kaynata nirqa: ‘Sunqunmanta lluqsiqwanmi runaqa huchallikun. Tukuy mana allinkunata piensaspa, suwakuspa, runata wañuchispa, hukwan pierdekuspa, runakunapa imankunatapas munapayaspa, mana allinkunata ruwaspa, engañaspa, qanra vidapi purispa, envidiakuspa, hinaspa loco hina ruwaspa. Kay imaymana huchakuna runapa sunqunmanta lluqsimuqmi runataqa huchallichin’, nispa (Marcos 7:18-23).
Jesuspa nisqanman hinaqa aychanku chuyanchanankupaq tukuy imata ruwachkaspa Diospa kamachikuyninkunata mana kasukuqqa, sunqunkupim qachay-qachay kachkanku (Mateo 23:25, 26).
¿Sasa kasukuychu Bibliapi kamachikuykunaqa?
“Diosta kuyaspanchikqa kamachikuyninkunatapas kasukunchikmi, kamachikuyninkunaqa manam llumpay sasachu.” (1 Juan 5:3)
BIBLIAPA NISQAN:
Miqueas 6:8 nin: ‘Diosqa mañasurqankiñam qanmanta imam munasqantaqa. Qamqa allin arreglotam ruwanayki. Qamqa kuyapayakuytam kuyanayki. Diosnikipaqmi humillakuspa kawsanayki’, nispa. Kay kamachikuyqa kasukuy atinallam. Chaymantapas Diosqa munanmi kuyasqanchikrayku paypaq llamkananchikta. Chayta ruwaspaqa kusisqam tarikusunchik (Salmo 40:8). Pantaptinchikpas kuyapayawananchikmantaqa manam iskayrayachwanchu. Bibliam nin: “Imaynam tayta churinkunata llakipayan, chaynam Tayta Diospas respetaqninkunata llakipayan”, nispa. ¿Imanasqam chayta ruwan? Payqa yuyanmi allpamanta ruwasqa kasqanchikta otaq pantaq runakuna kasqanchikta (Salmo 103:13, 14).
Aychanchikpi, kawsakuyninchikpi hinaspa Dios yupaychayninchikpi chuya kananchikpaq Diospa kamachikuy quwasqanchikqa kuyawasqanchiktam qawachin. Chay kamachikuyta kasukuspaqa ñuqanchikpas pay kuyasqanchiktam qawachisun.
