‘Mana allin ruwayqa Diosmanta karunchasqayá kachun’ (Job 34:10).

¿IMATAM RUNAKUNA NINKU?

Wakin runakunam ninku tukuy ima pasakusqanqa Diosmanta kasqanta. Chayraykutaqmi ninku ñakariykunapas paymanta hamusqanta. Chaymi hatun ñakariykuna pasakuptin runakunaqa ninku Diospa castigon kasqanta.

¿IMATAM BIBLIA NIN?

Bibliaqa sutillatam willawanchik Diosqa mana pitapas ñakarichisqanta. Chaymi hatun sasachakuykunapi kaspaqa mana ninanchikchu: “Diosmi castigawachkan”, nispaqa. ¿Imanasqa? Diosqa ‘manam atinchu ima mana allinmanpas aysasqa kaytaqa, nitaqmi pitapas chaymanqa aysanmanchu’ (Santiago 1:13, Sagrada Biblia, escritura actualizada). Huk rimaypiqa Diosqa manamá ñakariykunataqa quwanchikchu. Ñakarichiwaptinchikqa mana allin ruwaychá kanman. Bibliaqa ninmi: ‘Mana allin ruwayqa Diosmanta karunchasqayá kachun’, nispa (Job 34:10).

Chaynaqa, Dios mana ñakarichiwaptinchikqa ¿pitaq ñakarichiwanchikqa? Wakinpiqa runamasinchikkunam (Eclesiastes 8:9). Ñakarinchiktaqmi Bibliapa nisqanman hina qunqaymanta ima sasachakuypas pasawaptinchik (Eclesiastes 9:11, NM). Chayna kaptinpas, ‘kay pachapi kamachikuq Diablom’ aswan huchayuqqa ñakarinanchikpaqqa. Bibliaqa ninmi ‘kay pachapi mana allin kaqkunaqa Diablopa makinpi kasqanmanta’ (Juan 12:31; 1 Juan 5:19). Hinaptinqa, manam Dioschu ñakarichiwanchik, aswanqa Satanasmi.

“Runankunapa tukuy ñakarisqankunapim paypas ñakarirqa” (Isaias 63:9).

¿IMATAM RUNAKUNA NINKU?

Wakin runakunam ninku Diosqa ñakarisqanchikta mana kaqpaqpas hapisqanta. Huk runam nirqa: “Pipas ninmanmi Diosqa ñakarisqanchikta qawamuspan mana llakipayakuq kasqanta”, nispa. Nintaqmi Dios kaspanqa runakunapa ñakarisqanta kusikuywan qawasqantapas.

¿IMATAM BIBLIA NIN?

Bibliaqa ninmi runakuna ñakariptinkuqa Diosqa llumpay llakikusqanmanta hinaspa chay ñakariykunata chinkachinanmantapas. Chaymantayá qatiqninpi qawasun.

Diosqa yachanmi ñakarisqanchikta. Punta tayta-mamanchikmantapacham Jehova * Diosqa allintapuni yachan ñakarispa waqasqanchikta. Payqa lliw runakunapa imayna tarikusqankutam qawamuchkan (Salmo 11:4; 56:8). Ñawpaq tiempopim Diosqa serviqninkunapa ñakarisqanta qawaspan nirqa: “Qawachkanim [...] runaykunapa ñakarisqanta”, nispa. Ichaqa manam ñakarisqantaqa qawayllachu-qawarqa. Payqa ‘yacharqataqmi nanaypi kallasqankutapas’ (Exodo 3:7). Achka runakunam sunqunkuta tiyachinku ñakariyninchikta Dios qawasqanmanta yachaspanku, wakinkuqa manapaschá ñakarisqanchiktaqa musyakunkuchu (Salmo 31:7; Proverbios 14:10).

Diostaqa nananmi ñakariptinchik. Diosqa manam qawayllachu-qawan ñakarisqanchiktaqa, paytaqa nananmi ñakarisqanchikkunaqa. Ñawpaq tiempopi Diospa serviqninkuna llumpayta ñakariptinmi, paypas chayta qawaspan llumpayta ñakariq (Isaias 63:9). Diosqa ñuqanchikmanta aswan hatunllay-hatun kaspanpas llakipayawanchikmi. Nichwanmi ñakariyninchikkuna sunqunta nanachisqanta. Arí, Diosninchikqa “kuyapayakuqmi hinaspa llakipayakuqmi” (Santiago 5:11). Manam chayllachu, Diosqa yanapakuynintam quwanchik llakinchikta atipanapaq (Filipenses 4:12, 13).

Diosqa chinkachinqam lliw ñakariykunata. Arí, payqa sumaq kawsakuytam apamunqa kay allpa pachaman, chaytaqa ruwanqa munaychakuyninwanmi. Bibliam willawanchik lliw runakunapa ñakarisqanqa wiñaypaq chinkachisqa kananmanta. Nintaqmi: ‘Diosmi pichanqa paykunapa wiqinta, manañam kanqachu wañuypas, [...] waqaypas nitaq nanaypas. Ñawpaq kaqkunaqa pasarunñam’, nispa (Apocalipsis 21:4). Chaymantapas, ¿ima suyakuytaq kanqa wañuqkunapaq? Diosmi wañuqkunata kawsarichimunqa kay allpa pachapi manaña ñakarispa kawsakunankupaq (Juan 5:28, 29). Ñawpaqpi ñakarisqanchikmanta yuyarisqanchikpas manañam hukmanyachiwasunchu. Jehova Diosmi nin: ‘Punta kaqkunaqa kanqa qunqasqañam chaynataq mana pipapas yuyarisqanñam’, nispa (Isaias 65:17). *