¿IMATAM RUNAKUNA NINKU?

Achka runakunam ninku leypa nisqanman hina qullqipaq pukllayqa pitapas mana imanasqanta. Wakinpim gobiernokunapas chayna qullqipaq pukllaykunata ruwanku, hinaspam wakin ganasqankutaqa runamasinkuta yanapanankupaq qunku.

¿IMATAM BIBLIA NIN?

Bibliaqa manam qullqipaq pukllaymantaqa rimanchu. Ichaqa, yanapawanchikmi Dios imayna qawasqanmanta yachanapaq.

Qullqipaq pukllaykunaqa imaynatapas qullqita gananapaq pukllaymi. Chayqa manamá tupanchu Jesuspa kayna nisqanwan: ‘Cuidakuychikyá qullqilla kuyaruymanta’ (Lucas 12:15). Kunan tiempopi runakunaqa qullqilla kuyasqankuraykum chay pukllaykunapi kanku. Mana gananapaq hina kaptinpas, chay pukllaykunata ruwaqkunaqa achkallaña qullqita gananapaqmi imaymana willakuykunata ruwanku. Apu runakuna kayta munaspankum, wakinkuqa pukllana wasikunapi achka qullqita gastanku. Chay pukllaykunaqa astawanmi runakunata kallpanchan qullqilla kuyaq kanankupaq.

Arí, kallpanchantaqmi kikillankupi piensaspanku pukllaq runakunapa qullqinta apakunankupaq. Bibliam ichaqa kaynata niwanchik: “Wakinkunapa allinnintam maskananchik, manam kikillanchikpa allinninchiktachu”, nispa (1 Corintios 10:24). Diospa qusqan chunka kamachikuykunapipas ninmi: “Amam munapayankichu [...] runamasikipa imantapas”, nispa (Exodo 20:17). Chay pukllaykunapi pukllaq runakunaqa, imaynatapas munachkanmi huk kaqnin pukllaqmasinpa qullqinta ganarunanpaq.

Bibliaqa niwanchiktaqmi suerteta mana allinpaq qawanamanta, chayqa manamá imakunatapas haypanapaqqa yanapawanchikchu. Ñawpaq Israel nacionpim wakin runakuna Diosta yupaychaspankupas, ‘allin suerte apamuq Gad sutiyuq taytachata’ yupaychayta qallaykurqaku. ¿Imaynatam chayta Diosqa qawarqa? Paymi nirqa: ‘Qawachkaptiymi mana allinta ruwarqankichik. Mana gustasqaytam qamkuna akllarqankichik’, nispa (Isaias 65:11, 12).

Wakin nacionkunapim, chay qullqipaq pukllaykunapi ganasqankuta autoridadkunaqa runamasinkuta imapipas yanapanankupaq qunku. Chay qullqita imayna servichikuspapas, chaytaqa qurqunku qullqillapaq pukllaykunamantam.

“Amam munapayankichu [. . .] runamasikipa imantapas” (Exodo 20:17).

¿IMATAM BIBLIA NIN?

Bibliaqa sutillatam nin ‘apuyaylla munaqkunaqa tentachikuspa pantayllaman hinaspa mana valeq kaqkunallaman wichisqankumanta, chaykunaqa apakun llakillamanmi hinaspa wañuyllamanmi’ (1 Timoteo 6:9). Qullqillata kuyasqankuraykum runakunaqa chay pukllaykunapi kanku. Mana allin kasqanraykum bibliaqa niwanchik chaykunapi mana pukllanapaq (Efesios 5:3).

Arí, qullqipaq pukllayqa astawanmi kallpanchawanchik ‘qullqillata kuyanapaq’. Bibliapa nisqanman hinaqa qullqilla kuyaqqa ‘tukuy mana allin ruwaykunapa mamanmi’. Qullqilla kuyayqa chayllapi afanakunapaqmi inturuwachwan. Hinaspam chayllapiña piensaspa Dioswan amistadninchiktapas yanqacharuchwan. Chaymi bibliaqa nin qullqilla kuyaqkunaqa ‘tuksikuchkaq hina llumpay ñakarisqankumanta’ (1 Timoteo 6:10).

Chaymantapas, manam kusisqatachu tarichiwanchik aswanmi iskayrayasqa tarikunchik. Eclesiastes 5:10 nin: ‘Qullqi kuyaq runaqa maynaña qullqiwanpas manam contentakunmanchu. Achka imayuqpas kayta munaqqa manam contentakunmanchu’, nispa.

Millonnintin runakunam chay pukllaykunaman wichiykuspanku chaymanta lluqsiyta atinkuchu. Estados Unidos nacionpim millonnintin runakuna chaynapi tarikunku.

Proverbios 20:21 nisqanpim niwanchik, qullqilla kuyaqkuna apu runakuna rikuriruspankupas mana kusisqa tarikusqankumanta. Chaymantapas, qullqipaq pukllaqkunaqa llumpayta manuyaruspankum amistadninkunawan, ayllunwan hinaspa llamkayninpipas yanqachakurunman. Bibliapa nisqankunata kasukuymi ichaqa allinta waqaychawanchik.

“Apuyaylla munaqkunaqa tentachikuspam pantayllaman hinaspa mana valeq kaqkunallaman wichiykunku, chaykunaqa apakun llakillamanmi hinaspa wañuyllamanmi” (1 Timoteo 6:9).