Santiagom * nin: “Warmiywanmi sasachakuypi tarikurqaniku, chaymi payqa tayta-mamanwan rimarurqa. Chayraykum taytan ima ruwanaymanta niwananpaq qayaramuwarqa. Chaywanmi llumpayta hukmanyarurqani”, nispa.

Natasham nin: “Suegraymi sapa kuti niwan: ‘¡Llumpaytam wawaymanta llakikuni!’, nispan. Willawantaqmi huk hinalla kasqankumanta, chaymi casarakusqaywan rakirusqaymanta piensaspay hukmanyasqa tarikuni”, nispa.

¿Imatam ruwawaq suegroykikunawan hukmanyasqayki casado vidaykita mana sasachananpaq?

Casarakuspaqa sapaq aylluñam kanchik. Bibliam nin qari casarakuptinqa tayta-mamanta saqispan warminmanña hukllawakunanmanta. Chaynallataqmi warmiwanpas pasan. Casarakuptinkuqa ‘huk runa hinallañam kanku’. Arí, sapaq aylluñam kanku (Mateo 19:5).

Warmiki utaq qusaykim puntapi kanan. Casado vidamanta rimaq John Gottman sutiyuq runam nin: “Casado vidapi warmi-qariqa huk sunqulla kanankupaqmi kallpanchakunanku. Chaypaqqa iskayninkum tayta-mamankumanta rakikunanku”, nispa. *

Wakin tayta-mamakunam llumpayta llakikunku. Chayllaraq casarasqa mozom nin: “Manaraq casarakuspaykum warmiyqa tayta-mamanpa munasqanta puntapi churaq. Casarakusqayku qipamanmi ichaqa warmiypa mamanqa musyakururqa ñuqapa munasqaytaña puntapi churasqanta. Chaywanmi mamanqa llumpayta llakikurqa”, nispa.

Chayllaraq casarakuqkunamanta wakinpas llumpaytam hukmanyanku. Santiagom nin: “Amistadniykitaqa akllankim, suegroykikunatam ichaqa mana. Pipas kaynata nisuchkankimanpas hinam: ‘Kayqaya iskay amistadnikikuna, allin utaq mana allin kaspankupas amistadnikikunam’, nispa. Arí, llumpayta hukmanyachisuptikipas ayllukiñam”, nispa.

Suegroykikunamanta imapas hukmanyachisuptikiqa, warmikiwan utaq qusaykiwan rimaspaykichik chayta allichaychik. Bibliam nin hawka kawsayta maskananchikpaq (Salmo 34:14).

Chaypaqqa qatiqninpi yanapakuykunapi yuyaymanay. Chayqa warmipapas utaq qusapapas imayna piensasqankuman hinam kachkan. Iskaynikichik chayna sasachakuypi tarikusqaykichikraykum, kaypi yanapakuykunaqa imayna allichanaykichikpaq yanapasunkichik.

Warmikim nisunkiman mamanwan allinlla apanakunaykipaq munasqanta. Qampaqmi ichaqa chayqa sasa.

Kayta ruwanaykipaq kallpanchakuy: Chay sasachakuynikimanta warmikiwan rimariy hinaspa munasqanta ruwanaykipaq kallpanchakuy. Aswan allinqa manam suegraykiwan imayna tarikusqaykichu aswanqa warmikiwan imayna kasqaykim, payta kuyanaykipaqmá nirqanki. Warmikiwan kuska tanteay imakunata ruwaspayki suegraykiwan aswan allinta apanakunaykipaq hinaspa nisqaykiman hina ruway. Kallpanchakusqaykita qawaspanmi warmikiqa astawan respetasunki. (Bibliapa yachachisqan: 1 Corintios 10:24).

Qusaykim nisunkiman paymantaqa tayta-mamaykipa munasqanta puntapi churasqaykita.

Kayta ruwanaykipaq kallpanchakuy: Qusaykiwan rimaspa imayna tarikusqanpi piensay. Manamá tayta-mamaykita kuyasqaykiwanqa qusaykiqa hukmanyananchu (Proverbios 23:22). Chayna kaptinpas munanqachá kuyasqaykita ninaykita hinaspa pay puntapi kasqanta qawachinaykitapas. Chayta ruwaptikiqa hawkam tarikunqa. (Bibliapa yachachisqan: Efesios 5:33).

Warmikim imatapas tanteananpaq qampa yanapakuynikita mañakunanmantaqa tayta-mamanta mañakunman.

Kayta ruwanaykipaq kallpanchakuy: TPaywan rimaspa ninakuychik imakunata tapunamanta hinaspa imakunata mana tapunamanta. Allinllata tanteanaykipaq kallpanchakuy. Imapas llakichisuptikiqa, ¿llapanpichu mana allin kanman tayta-mamaykiwan rimayqa? ¿Haykapitaq rimayta atiwaq? Iskaynikichik entiendenakuptikichikqa manam chaypiqa sasachakunkichikchu. (Bibliapa yachachisqan: Filipenses 4:⁠5).