¿IMATAM RUNAKUNA NINKU?

Wakin llaqtakunapim hukwan pierdekuytaqa allinpaq qawanku, warmikunamanta qarikuna chayta ruwaptinkuqa allinpaqraqmi hapinku. Achka runakunañataqmi piensanku casarakuyqa mana wiñaypaq kananmanta.

¿IMATAM BIBLIA NIN?

Bibliapi hukwan pierdekuymanta willakuspaqa rimachkan casarasqa kachkaspa huk qariwan utaq huk warmiwan pierdekusqankumantam (Job 24:15; Proverbios 30:20). Jehova Diosqa llumpaytam chiqnin hukwan pierdekuytaqa. Israel nacionman kamachikuyninkunata qusqanpim nirqa hukwan pierdekuqkuna wañuchisqa kanankupaq (Levitico 18:20, 22, 29). Jesucristopas nirqam qatiqninkuna hukwan mana pierdekunankupaq (Mateo 5:27, 28; Lucas 18:18-20).

¿IMANASQAM CHAYMANTA YACHAYNINCHIKQA ANCHA ALLIN?

Hukwan pierdekuyqa casarakusqan punchawpi prometenakusqankutam yanqachan. Chaymantapas ‘Diospa contranpi huchallikuymi’ (Genesis 39:7-9). Churi-wawakunapas ñakarinkum tayta-maman rakinakuptinku huk kaqnillanwan yachasqankurayku. Chaymi bibliapi kaynata nin: “Hukwan tupakuruqkunatawan huchapakuqkunataqa Diosmi juzganqa”, nispa (Hebreos 13:4).

“Casado vidaqa llapallanpa respetasqanyá kachun, respetasqataqyá kachun puñunankupas” (Hebreos 13:4).

¿IMATAM BIBLIA NIN?

Bibliaqa yachachinmi mayqinninkupas hukwan pierdekuptillan rakinakunankumanta (Mateo 19:9). Mana huchallikuq kaqmi tanteanan hinalla casarasqa kananpaq utaq rakikunanpaqpas. Kaytaqa payllam tanteanan, hukkunaqa manam hikutananchu ima ruwananmantaqa (Galatas 6:5).

Ichaqa yuyarinanchikmi casado vidaqa Jehova Diospaq ancha respetanapaq hinaspa wiñaypaq kasqanta (1 Corintios 7:39). Wakinkum rakinakuyta munanku yanqa kaqkunallamanta, ichapas ñawpaqpi hina manaña kuyanakusqankurayku. Ichaqa Jehova Diosmi chiqnin yanqakunamanta rakikuy munaqkunataqa. Kaymi qawachiwanchik yanqakunallamanta rakinakuyqa mana allin kasqanta (Malaquias 2:16; Mateo 19:3-6).

‘Huk qariwan mana tupakuchkaptin warminmanta rakikuqqa chay warmin huchallikunanpaqmi saqirun’ (Mateo 5:32).

¿IMATAM BIBLIA NIN?

Manam. Bibliaqa willawanchikmi Jehova Dios ñawpaq tiempopi hukwan pierdekuq qarikunatawan warmikunata sunqunmanta wanakuptinku pampachasqanmanta (Hechos 3:19; Galatas 5:19-21). Chayraykum kay runakunaqa Diospa amistadninña karqaku (1 Corintios 6:9-11).

Hukninmi karqa Israel nacionta kamachiq David. Payqa casado runa kachkaspanpas Uriaspa señoranwanmi huchallikururqa (2 Samuel 11:2-4). Chayna huchallikusqanmantam biblia nin: ‘Davidpa chay ruwarusqanmi [Jehova] Diosta mana agradarqachu’, nispa (2 Samuel 11:27). Corregisqa kaspanmi Davidqa wanakurqa, chaymi Diosqa pampachaykurqa. Ichaqa manam librakurqachu huchallikusqanwan ñakarinanmantaqa (2 Samuel 12:13, 14). Watakuna pasaytam kamachiq Salomonpas nirqa: ‘Hukpa warminwan huchallikuq runaqa mana yuyayniyuq runam. Hukpa warminwan huchallikuq runaqa kikillan wañuchikuq runam’, nispa (Proverbios 6:32).

KAYTAM RUWAWAQ

Qampas hukwan pierdekuruptikiqa, mañakuy Jehova Diosta hinaspa señoraykita utaq qusaykita pampachasunaykipaq (Salmo 51:1-5). Dios hinayá qampas chiqniy hukwan pierdekuyta (Salmo 97:10). Karunchakuytaq millakuypaq qalalla qawaymanta, pitapas sunqullapi munapayaymanta, hukkunata asipayaymanta, chaynallataq huk warmita utaq huk qarita munapayanaykipaq tanqasuqnikikunamantapas (Mateo 5:27, 28; Santiago 1:14, 15).

Sichus qusayki utaq señorayki hukwan pierdekuruptinqa, Jehova Diosqa yachanmi imayna tarikusqaykita (Malaquias 2:13, 14). Mañakuy consuelasunaykipaq hinaspa ima ruwanaykipaq yanapasunaykipaqpas, palabranpim kaynata prometewanchik: ‘[Diosmi] cuentallikunqa qanmantaqa’, nispa (Salmo 55:22). Pampachanaykipaq hinaspa mana rakikunaykipaq tantearuspaykiqa, iskaynikichikmi kallpanchakunaykichik casado vidaykichikpi kaqmanta kusisqa kawsakunaykichikpaq (Efesios 4:32). ◼

David hukwan pierdekurusqanmanta wanakuruptinmi, Diosmanta willakuq Natan nirqa: “Tayta Diosqa pampachaykunmi huchaykikunataqa”, nispa (2 Samuel 12:13).