Anam * nin: “Ñuqaqa piensarqanim paywan wiñaypaq kawsakuyta. Ichaqa casarakunaypaq rimanakusqaykumanta iskay killa pasayllatam payta saqirurqani. Manam chayna tukunantaqa haykapipas piensarqanichu”.

Elenapas willakunmi: “Ima munayniykupas iskayniykupam allinta tuparqa. Chaymi paywan casarakuspay kusisqa kawsakusqaykupi piensaq kani. Tiempo pasasqanman hinam cuentata qukurqani mana entiendenakusqaykumanta. Musyakurqanitaqmi paywan casarakuspayqa sasachakuypi tarikunaymantapas, chaymi saqirurqani”.

Qampas kayna tarikuptikiqa, qatiqninpi yachachikuymi yanapasunkiman.

Saqinakuspankuqa iskayninkum llakisqa tarikunku. Saram casarakunanpaq qariwan suqta killaña rimanakurqa, saqinakusqankuwan imayna tarikusqanmantam nin: “Llumpay llakisqam tarikurqani kuyasqay runata saqirusqaymanta. Paywan uyarisqay takikunata uyarispaymi llakisqa tarikurqani. Purisqayku lawman riptiypas sunquymi nanawaq. Chaynam tarikurqani kikiy saqiruspaypas”.

Llakikuptikipas saqinakusqaykichikqa allinpaqmi kanman. Elenam nin: “Manam llakichiyta munaspachu saqinaykipaqqa tanteanki. Aswanqa hamuq tiempopi iskaynikichik llakipi mana tarikunaykichikpaqmi”. Sarapas ninmi: “Casarakunaykipaq kaqwan riqsinakusqayki tiempopi mana entiendenakuspaqa casarakuspapas manam kusisqachu kawsakunki. Chaymi casado vidaman manaraq chayachkaspa saqinakuyqa allin kanman”.

¿Mana kuyakuq kasqaykitachu qawachinki? Riqsinakusqanku tiempoqa imayna kasqankuta yachanankupaqmi, chaymi wakinpiqa casarakuyman mana chayankuchu. Imayna kasqankumanta iskayrayaspaqa allinmi kanman saqinakuyninku. Casarakunaykipaq tanteasqayki mana allinpi tukuptinpas ama hukmanyaychu. ¡Qamqa hinallayá allin ruwaykunapi kallpanchakuy!

Kallpanchakuy ama llumpay llakisqa kanaykipaq. Elenam nin: “Saqinakurusqaykuwanqa allin amistadniykum tukururqa”. Kuyanakusqanchikwan saqinakuyqa ancha llakikunapaqmi kanman”. Adanpas ninmi: “Allinnikipaq kasqanmanta yachaspapas kuyasqaykita saqispaqa llakisqam tarikunki”. Qampas yaqapaschá ñawpaq tiempopi kamachiq David hina tarikunki, paymi nirqa: ‘Ñuqallayqa amirunim llumpa-llumpay waqaytapas. Sapa tuta waqaspaymi nuyurachini sawnaytapas’, nispa (Salmo 6:6). Llakisqa kaspapas kallpanchakunam hawkalla kanapaq. Chaymi yanapawasun sunqunchikta tiyachinapaq (Bibliapa yachachisqan: Salmos 4:4).

Kuyakuq amistadnikikunawan kay. Ichapas munawaq sapallayki kayta. Anam nin: “Qallariypiqa manam piwanpas rimaytaqa munarqanichu. Imanasqa saqinakusqaykumanta cuentata qukunaypaqmi sapallay kayta munarqani, chayqa yanapawarqam mana llumpayta hukmanyaspay ima ruwayniytapas hinalla ruwanaypaq”. Anaqa tiempopa pasasqanman hinam musyakurqa amistadninkunawan kayninqa allinninpaq kasqanmanta. Chaymi nin: “Kunanqa manañam llumpay llakisqachu tarikuni casarakunaypaq rimanakusqaywan saqinakusqaymantaqa” (Bibliapa yachachisqan: Proverbios 17:17).

Yuyaymanay allinnikipaq kasqanpi. Kayna pasasusqaykiwanqa ichapas cuentata qukurunki casarakunaykipaq manaraq allin yuyayniyuq kasqaykimanta. Yuyaymanaytaq casarakunaykipaq yapamanta piwanpas rimanakuspaqa allinpi tukunanpaq imata ruwanaykipaq kasqanpipas. Marciam nin: “Tiempo pasasqanman hinam manaña llumpay llakisqachu tarikurqani. Ichaqa chayna kanaypaqmi yanapawarqa sunquypa munasqallanpi mana piensasqay”. Adanpas ninmi: “Huk watam llakisqa tarikurqani. Ichaqa allinniypaq kasqanmanta entiendenaypaqmi unay wata pasarqa. Yanapawarqataqmi kikiy imayna kasqayta riqsikunaypaqpas hinaspa warmikuna imayna piensasqankumanta yachanaypaqpas. Tiempo pasasqanman hinam manaña llakisqachu tarikurqani”.

Yanapasunaykipaq Diosta mañakuy. Bibliapim nin: ‘Payqa llakisqa sunquyuqkunatam consuelaykun. Payqa heridankunatapas hampiykunmi’, nispa (Salmo 147:3). Jehova Diosqa manam maskapuwanchikchu piwanpas casarakunapaqqa, manataqmi pitapas rakinachinchu. Payqa kusisqa kawsakunanchiktam munan, payman asuykuy hawkayayta qusunaykipaq (Bibliapa yachachisqan: 1 Pedro 5:7).