¿ICHAPAS mana hampiy atina unquywan, rakinakuywan utaq aylluykipa wañukusqanwan llumpay llakisqa tarikunki? Kayna llumpay sasachakuypi tarikuspaykiqa piensankipaschá manaña imapas yanapasunaykimanta. Ichaqa, ¿imatam ruwawaq hawkalla kawsakunaykipaq?

Apostol Pablom Diosmanta willakunanpaq achka kutita huk law llaqtakunaman rirqa. Chayta ruwachkaptinmi yanqamanta acusaspanku wasillanpi iskay wata presocharurqaku. Chaywan hukmanyarunanmantaqa ruway atisqankunapim kallpanchakurqa. Payqa haykam watukuqninkunamanmi Diosmanta willarqa hinaspam kallpancharqa. Chaymantapas cartakunatam qillqarqa, chay cartakunaqa bibliapim kachkan (Hechos 28:30, 31).

Yachamusqanchikman hinam Anja sutiyuq warmiqa wasinmanta manaña lluqsinchu, paymi nin: “Cancer unquywan kasqayraykum llumpay sasachakuypi tarikuni. Huk unquykunawan mana hapirachikunaypaqmi llamkapakuqqa utaq amistadniykunawanqa mana lluqsinichu”. ¿Imatam payqa ruwan chayna sasachakuypi kaspan? Ninmi: “Ruway atisqaykunata ruwanaypaqmi tanteakuni. Hinaspam chayman hina kawsakunaypaq kallpanchakuni. Kaykunam anchata yanapawan kusisqa kawsakunaypaq”.

Sasachakuynikita mana allichayta atispaqa kaykunatam ruwawaq:

• Ruway atisqaykipi kallpanchakuy. Ichapas unquynikimantaqa mana sanoyayta atinkichu, chayna kaptinpas atiwaqmi ejercicio ruwayta, allinnikipaq kaq mikuykuna mikuyta hinaspa necesitasqaykiman hina puñuytapas.

• Ruway munasqaykita pisi-pisimanta sapa punchaw ruwanaykipaq kallpanchakuy.

• Imallatapas ruway: Ichapas mesata limpiawaq platokunata mayllawaq, hinaspa kallpanchakuytaq kikiki allichasqa kanaykipaqpas. Chaymantapas tempranon lawpi ima ruwaynikikunatapas ruway, chaynata ruwaspaqa manam hukmanyankichu.

• Piensay hukkunata imaynata yanapanaykipaq. Qamqa yacharunkipaschá imawan sasachakuyniki atipayta. Chaywanqa, ¿atiwaqchu hukkuna yanapayta?

¿Imatam yacharunchik? Ichapas imawan sasachakuyninchiktaqa mana allichayta atisunchu, ichaqa atichwanmi imakunata ruwaspa hawkalla kawsakuyta.