IMATAQ SASACHAN

Enteron allpa pachapim runakunaqa astawan chiqninakunku nacionninkuman sayapakusqanrayku, huk castamanta kasqankurayku utaq sapaq religionniyuq kasqankurayku.

IMATAM BIBLIA NIN

Jesucristo kay pachapi kaptinpas chiqninakuyqa karqam. Judio castakunam samariamanta kaqkunawan chiqninakuqku (Juan 4:9). Chaymantapas qarikunam warmikunata qawaqku mana valeqta hina. Religionpi punta apaqkunapas wakcha runakunatam mana valeqta hina qawarqaku (Juan 7:49). Jesucristom ichaqa mana paykuna hinachu karqa. Chaymi paypa contranpi niqku: “Kay runaqa huchasapakunawan juntanakuspanmi paykunawan mikun”, nispa (Lucas 15:2). Jesusqa llampu sunquyuq, pacienciakuq hinaspa entiendeqmi karqa, runakunata kuyasqanraykum Diosmanta yachachirqa (Juan 3:17; 13:34).

Kuyakuyniyuq kasqanchikmi yanapawasun runamasinchik pantaq kaptinkupas pacienciakuspa aguantanapaq. Chaymi biblia nin: “Pipapas quejan kaptinqa aguantanakuspayá pampachanakuykuychik”, nispa (Colosenses 3:13).

“Tukuy imamantapas llalliriqtaqa kuyanakuychikyá, kuyanakuyqa maynaña huchatapas chinkachinmi” (1 Pedro 4:8).

MANA ALLINTA RUWAPTINKU

Autoridadkunam leykunata hurqunku mana allin ruwaqkunata controlanankupaq.

IMATAM BIBLIA NIN

Kuyakuqqa ‘manam pinqaypaq ruwaqchu’ (1 Corintios 13:5). Jesusqa pacienciakuq kaspanpas manam allinpaqchu qawarqa iskay uya runakunapa millakuypaq utaq pinqaypaq kaqkuna ruwasqankutaqa. Payqa chayna kasqankumantam mana manchakuspa rimarqa (Mateo 23:13). Chaymi nirqa: ‘Mana allin ruwaqkunaqa chiqninmi [achkiypi hina allin ruwaykunataqa]’ nispa (Juan 3:20).

Apostol Pablom nirqa: ‘Mana allin kaqkunata chiqnispayá imapas allin kaqkunata ruwaychik’, nispa (Romanos 12:9). Chayna nisqanman hinam payqa kawsakurqa. Huk kutipim qawarqa judio castamanta kaq iñiqkuna huk castayuq iñiqmasinkunata mana allinpaq hapisqankuta. Chaymi payqa judio castamanta kaspanpas chay iñiqmasinkunata sumaqllata consejarqa (Galatas 2:11-14). Chaymantapas apostol Pabloqa yacharqam Diosqa pimanpas mana sayapakuq kasqanta, payqa manachá allinpaqchu qawanman karqa yupaychaqninkuna chiqninakuyninkutaqa (Hechos 10:34).

Jehova Diospa testigonkunaqa bibliapa kamachisqanman hina kawsakunaykupaqmi kallpanchakuniku (Isaias 33:22). Chaymi mayqin testigopas mana allin ruwasqanmanta mana wanakuptinqa bibliapa kayna nisqanta kasukuniku: “Qamkuna ukupi kaq chay mana allin runataqa wischuychikyá”, nisqanta (1 Corintios 5:11-13). Chayna nisqanta kasukuspaykum qawachiniku Jehova Diospa llaqtanqa chuya kasqanta.

‘Tayta Dios kuyaqkuna, chiqniychikyá mana allinta’ (Salmo 97:10).

¿IMATAM RUNAKUNA NINKU?

Achka runakunam ninku mana allin ruwaq kasqanchikmanta, chaymi piensanku mana allin ruwayqa hinalla kananmanta.

¿IMATAM BIBLIA NIN?

Diosman sunqu Habacuc sutiyuq runam Diosta tapurqa: ‘¿Imanasqataq qawachiwachkanki mana allin ruwaykunataqa? [...] Ñuqapa ñawpaqniypiqa tukuy imam purmaypaq-purmachkan. Tukuy imam dañaypaq dañanakuchkan. Quejanakuyllam hatarichkan’, nispa (Habacuc 1:3). Habacuc hinalla mana hukmanyasqa kananpaqmi Dios prometerqa runakunata juzgaspan mana allinkunata chinkachinanmanta, chaymi nirqa: ‘Unamuptinpas suyaykuyá. Chayamunqapunim chay punchawqa’, nispa (Habacuc 2:3).

Chay punchaw manaraq chayamuchkaptinmi runakunaqa huchankumanta wanakuspa Diosman asuykuyta atinmanku. Chayraykum Dios nin: ‘Ñuqaqa manapunim munanichu mana allin ruwaq runa wañunantaqa, aswanqariki munachkani mana allin ruwasqanmanta wanakuspa kawsakunantam’, nispa (Ezequiel 18:23). Huchankumanta wanakuspa Jehova Diosman asuykuqkunatam nin: ‘Segurom kawsakunqa pipas uyariwaqniyqa. Mana allintapas manam manchakunqachu’, nispa (Proverbios 1:33).

‘Mana allin ruwaqkunaqa chayllapunim kanqañachu [...]. Ñakariqmi ichaqa dueñoyanqa allpa [pachata]. Paykunaqa kusikuywanmi hawkayaypi kawsakunqaku’ (Salmo 37:10, 11).