1. Filipos llaqtapi yachaq runakunaman, ¿pikunam Diosmanta yachachirqa?

FILIPOS llaqtapi runakunaqa Diosmanta yachaytam munarqaku, chaymi Pablo, Silas, Lucas hinaspa Timoteo Diosmanta willaptinku allinta uyarirqaku. Tawankum yanapakurqaku chay llaqtapi huñunakuykuna ruwakunanpaq. Diosta yupaychaqkunaqa yaqapaschá huñunakurqaku Lidiapa wasinpi, payqa chay llaqtapi Diosta yupaychaqkunamanta huk kaqninmi karqa, chaymantapas qukuykuqllañam karqa (Hech. 16:40).

2. Filipos llaqtapi Diosta yupaychaqkunaqa, ¿ima sasachakuypim tarikurqaku?

² Diosta chayraq riqsiqkunapaqqa sasachá karqa Diosta hinalla yupaychayqa. Satanaswan runankuna Diosmanta willakuyninkuta harkakusqankurayku. Autoridadkunapas Pablotawan Silastam maqaparuspa carcelman hinarurqaku. Paqarintinta kachaykuptinkuñataqmi iñiqmasinkunata kallpanchaq chaylla pasarqaku. Chaymantam Pablo, Silas hinaspa Timoteoqa huk lawmanña pasakurqaku, Lucasñataqchusmi qipakurqa. ¿Imaynam tarikurqaku Filipos llaqtapi iñiqkuna pasakusqanku qawa? Diospa yanapakuyninwanmi hinalla Diosta yupaycharqaku (Filip. 2:12). Chaywanqa Pablopas anchatam kusikurqa.

3. Filipenses 1:9-11 nisqanman hinaqa, ¿Filipos llaqtapi iñiqkuna imayna kanankupaqmi Pablo Diosta mañakurqa?

³ Yaqa chunka wata pasaytam Pablo qillqarqa Filipos llaqtapi iñiqkunaman. Qillqasqanpim nirqa: ‘Cristo Jesus hinam  tukuy sunqumanta kuyaykichik’, nispa. Chay nisqanwanmi sutillata qawachirqa paykuna kuyasqanta (Filip. 1:8). Nirqataqmi paykunapaq Diosta mañakusqanmanta. Diosta mañakuspanqa mañakuqtaqmi kuyakuyninku astawan wiñananpaq, aswan allin kaqkunata imamantapas puntapi churanankupaq, mana huchayuq hinaña kanankupaq, imapas ruwasqankuwan hukkunata mana urmarachinankupaq, hinaspa allin kaqkunata aswan-aswan ruwanankupaq. Kunanpas allinninchikpaqmi Pablopa nisqankunaqa (qaway Filipenses 1:9-11). Chaymi kay yachachikuypi yachasun Pablopa nisqankunata ruwayman churanapaq.

4. (1) 1 Juan 4:9, 10 nisqanman hinaqa, ¿imatam Jehova Diosqa ruwarqa kuyawasqanchikrayku? (2) ¿Simillamantachu Diosta kuyananchik?

⁴ Taytanchik Jehova Diosqa ancha-anchata kuyawasqanchikraykum kay pachaman churinta kachamurqa huchanchikrayku wañunanpaq (qaway 1 Juan 4:9, 10). Kayqa Diosninchikta astawan kuyanapaqmi kallpanchawanchik (Rom. 5:8). Chaynaqa, ¿rimasqallanchikwanchu kuyasqanchikta qawachinanchik? Manam. Kikin Jesusmi chaymanta rimaspan fariseo runata nirqa: “Jehova Diosnikitam kuyanayki tukuy sunquykiwan, tukuy vidaykiwan hinaspa tukuy yuyaynikiwan”, nispa (Mat. 22:36, 37). Chaynaqa, Diostaqa manam simillanchikwanchu kuyananchik, aswanqa tukuy sunqunchikwanmi. Chaymi sapa punchaw kallpanchakunanchik Diosninchikta astawan kuyanapaq, Pablopas Filipos llaqtapi kaq iñiqkunatam nirqa Jehova Diosta astawan kuyanankupaq. Chaynaqa, ¿imatawanraqmi ruwachwan Jehova Diosninchikta astawan kuyanapaq?

5. ¿Imatam ruwananchik Jehova Diosta astawan kuyananchikpaq?

⁵ Diosta kuyanapaqqa imayna kasqantam yachananchik. Bibliapas ninmi: “Pipas mana kuyakuqqa Diostaqa manam riqsinchu. Diosqa kuyakuymi”, nispa (1 Juan 4:8). Apostol Pablopas nirqam Dios imayna kasqanmanta yachay hinaspa yuyaywan tantiasqankunata riqsiy pay kuyanapaq yanapawasqanchikta (Filip. 1:9). Palabranmanta yachayta qallaykuspaqa Jehova Dios imayna kasqanmantam yachayta qallaykurqanchik, chayraykum kuyayta qallaykurqanchik. Astawanraqmi kuyarqanchik imayna sunquyuq kasqanta yachaykuspanchikqa. Chayraykum sapa punchaw Diospa palabranta ñawinchaspa yuyaymanayninchikqa allinpuni (Filip. 2:16).

6. 1 Juan 4:11, 20, 21 nisqanman hinaqa, ¿pikunatam kuyananchik?

⁶ Jehova Dios ancha kuyawasqanchikmanta yachaymi yanapawasunchik iñiqmasinchikkunata kuyanapaq (qaway 1 Juan 4:11, 20, 21). Chayrayku, ichapas nichwan Diosta yupaychasqanchikrayku hinaspa Jesusta qatipakusqanchikrayku iñiqmasinchikkunata kuyayqa mana sasa kasqanmanta. Ichaqa, wakinpim sasachakuchwan iñiqmasinchikkunawan kuyanakuytaqa. Chaypaqyá Filipos llaqtapi iñiqkunawan ima pasasqanmanta yachasun.

7. ¿Imatam yachachwan Pablopa anyasqanmanta?

⁷ Evodiawan Sintiqueqa apostol Pablowan kuskam Diospaq llamkarqaku. Chaywanpas, tantiasqanku mana tupasqanraykum Evodiawan Sintiqueqa karunchanakururqaku. Chayraykum Pabloqa carta qillqasqanpi paykunata nirqa huklla kanankupaq (Filip. 4:2, 3). Qillqasqanpim chay llaqtapi iñiqkunamanpas nirqa: “Hinallayá tukuy imatapas ruwaychik ama rimapakuspa hinaspa ama  kutipakuspa”, nispa (Filip. 2:14). Pablopa anyasqanmi Evodiatawan Sintiqueta hinaspa chay llaqtapi iñiqkunata kuyanakunankupaq yanaparqa.

8. ¿Imataq sasachawachwan iñiqmasinchikkunata kuyanapaq? Chayna tarikuspaqa, ¿imatam ruwachwan?

⁸ Evodiawan Sintiqueta pasasqanmi qawachiwanchik iñiqmasinchikkunapa pantasqallanta qawayqa kuyanakunapaq sasachawasqanchikmanta. Llapallanchikmi sapa punchaw pantanchik. Ichaqa, iñiqmasinchikkunapa pantasqallanta qawaptinchikqa kuyakuyninchikmi chiriyarunqa. Ichapas, iñiqmasinchik huñunakuna wasi pichaypi mana yanapawasqanchikta qawaspa hukmanyanchik, utaq imapipas chaynalla kasqanta qawaspa piñapakunchik. Chayna kaptinchikqa kuyakuyninchikmi chiriyarunqa. Chaynaqa, ¿imatam ruwachwan? Jehova Diostam qatipakuchwan. Payqa llapallanchikpa pantasqanchiktam qawan, chaywanpas llapallanchiktam kuyawanchik. Ñuqanchikpas chaynayá kuyanakusun hinaspapas amayá pantasqallankutaqa qawasunchu. Astawan kuyanakunapaq kallpanchakuspaqa huk sunqullam kasunchik (Filip. 2:1, 2).

9. Pablopa nisqanman hina, ¿imakunam allin kaqkunaqa?

⁹ Diospa yuyay qusqanwanmi, Filipos llaqtapi kaq iñiqkunata apostol Pablo nirqa aswan allin kaqkunata imamantapas puntapi churanankupaq (Filip. 1:10). Chay aswan allin kaqkunaqa Diospa sutinta hatunchaymi, munayninta puntapi churaymi, iñiqmasinchikkunawan hawka hinaspa huk sunqulla kawsakuymi (Mat. 6:9, 10; Juan 13:35). Kaykunata imamantapas puntapi churaspaqa Jehova Dios kuyasqanchiktam qawachichkanchik.

10. ¿Imatam ruwananchik mana huchayuqta hinaña Jehova Dios qawawananchikpaq?

¹⁰ Pabloqa nirqataqmi mana huchayuq hinaña kananchikpaq. Chaywanqa manam Jehova Dios hinaña kanamantachu nichkarqa. Aswanqa kuyakuq hinaspa Diospa munayninta imamantapas puntapi churanapaq kallpanchakunamantam. Chaypaq kallpanchakuspam Diospa qayllanpiqa mana huchayuq hinaña kanchik. Chaykunamanta huk kaqninmi pitapas mana urmachinapaq kallpanchakuy.

11. ¿Imanasqataq mana pitapas urmachinanchikchu?

¹¹ Urmachiymanta bibliapa rimasqantaqa manam mana kaqpaqta hinachu qawananchik. Chaymi pitapas mana urmarachinapaqqa qawarikunanchik imawan kusirikusqanchikta, imayna pachakusqanchikta hinaspa imapi llamkasqanchikta. Ñuqallanchikmantaqa yaqapaschá ruwasqanchikkunaqa allin, ichaqa manach allinchu kanman chay ruwasqanchikkuna wakin iñiqmasinchikkunata urmarachiptinqa. Chayna kaptinqa Jesuspa nisqanman hinapas aswan allinmi kanman molino rumita kunkanchikman watakuykuspa lamar quchaman wischuykachikuyninchik (Mat. 18:6).

12. ¿Imatam yacharunchik 70 horata willakuq iñiqmasinchikkunamanta?

¹² 70 horata Diosmanta willakuq casarasqa iñiqmasinchikkunam kallpanchakurqaku iñiqmasinchikkunata mana imawanpas urmachinankupaq. Paykunawan kuskam huñunakurqa chayllaraq bautizasqa iñiqmasinchikkuna. Paykunaqa mana allinpaqmi hapiqku peliculakuna qawaytaqa. Chaymi 70 horata willakuq casarasqa iñiqmasinchikkunapa pelicula qawasqankuwan hukmanyarurqaku. Pelicula qawasqankuwan, chayllaraq bautizasqa iñiqmasinchikkuna hukmanyasqankuta  yacharuspankum casarasqa iñiqmasinchikkunaqa tantiarurqaku peliculakunata manaña qawanankupaq, chayllaraq bautizasqa iñiqmasinchikkuna iñiyninkupi allinta takyanankukama (Heb. 5:14). Chay ruwasqankuwanmi iñiqmasinchikkunaqa qawachirqaku sunqumanta kuyasqankuta (Rom. 14:19-21; 1 Juan 3:18).

13. ¿Imaynatam iñiqmasinchikkunata urmarachichwan imapas ruwanankupaq hikutaspanchik?

¹³ Iñiqmasinchikkunataqa urmarachichwantaqmi imapaqpas hikutaspanchik. Rimarisunchik manaraq testigo kachkaspan sinkakuyllapi kaq iñiqmasinchikmanta. Payqa tomaymantawan upyakuymanta bibliapa nisqanta yacharuspanmi saqirurqa. Chay sasa kaptinpas kallpanchakurqam bautizakunanpaq. Ichaqa, wasinchikman qayaykuspa ichapas puqusqa aqachata tomaykunapaq hikutachwan, yaqapaschá nichwan: “Aschallam, maytas sinkarunki aqallawan, chaymantapas bautizasqañam kanki, Diosmi yanapasunki, kutinkichuqaya”, nispa. Chayna hikutayninchikqa, ¿allinchu kanman? Manamá.

14. Filipenses 1:10 nisqanman hina ruwanapaq, ¿imaynatam huñunakuykuna yanapawanchik?

¹⁴ Filipenses 1:10 nisqanta ruwayman churanapaqmi huñunakuykuna yanapawanchik. Yuyarichiwanchikmi Jehova Diospaq ima aswan allin kasqanmanta. Yachachiwanchiktaqmi Diospa qayllanpi mana huchayuq hinaña kananchikpaq, nisqankunata ruwayman churanapaq, kuyakuqllaña kanapaq hinaspa hukkunapa allinninta maskanapaq (Heb. 10:24, 25). Arí, llapallanchikmi kusisqa tarikunchik pipas kallpanchawaptinchikqa. Chayqa  anchatam kallpanchawanchik Jehova Diostawan iñiqmasinchikkunata kuyanapaq. Jehova Diostawan iñiqmasinchikkunata kuyaspanchikqa imawanpas mana urmachinapaqmi kallpanchakusun.

15. ¿Imam allin kaqta ruwayqa?

¹⁵ Apostol Pablom Diosta mañakurqa Filipos llaqtapi kaq iñiqmasinkuna ‘allin kaqkunata aswan-aswan ruwanankupaq’ (Filip. 1:11). Chay allin kaqkunaqa Jehova Diostawan iñiqkunata kuyaymi hinaspa Jesuspi iñikusqankumantawan suyakuyninkumanta hukkunaman willakuymi karqa. Chayraykum Pablo nirqa Diosta yupaychaqkunaqa runakunapa qayllanpi inti hina ‘kancharisqankumanta’ (Filip. 2:15). Jesuspas nirqam qatiqninkunaqa ‘runakunapa achkiynin’ kasqankumanta (Mat. 5:14-16). Jesustaqmi kamachirqa kay pachapa cantonmanta cantonkama rispanku runakunata yachachinankupaq, chaynapi qatiqninña kanankupaq (Hech. 1:8; Mat. 28:18-20). Runakunaman Diosmanta yachachispanchikmi imamantapas aswan allin kaqta ruwachkanchik.

16. Filipenses 1:12-14 nisqanman hinaqa, ¿imaynatam runapa qayllanpi inti hina kancharichwan? (Qaway qaranpi kaq dibujota).

¹⁶ Imaña-haykaña kaptinpas runakunapa qayllanpi inti hina kanchariytaqa atichwanmi. Apostol Pablopas Filipos llaqtayuq iñiqkunapaq cartata qillqaspanqa yachasqan wasipim carcelpi hina kachkarqa. Chayna tarikuchkaspanpas watukuqninkunamanwan guardiakunamanmi mana manchakuspa Diosmanta willakuq. Chay ruwasqanta qawasqankum iñiqkunatapas kallpancharqa ‘Diospa palabranmanta mana manchakuspa willakunankupaq’ (qaway Filipenses 1:12-14; 4:22).

17. Willarimuy iñiqmasinchikkunapa ruwasqankumanta.

 ¹⁷ Kunan punchawpas, iñiqmasinchikkunaqa Pablo hinam tukuyta ruwaspa Diospa munaychakuyninmanta willakuchkanku. Astawanraqmi Diosmanta willakuyninchikta harkakuq nacionkunapiqa (Mat. 10:16-20). Diosmanta willakuyninchikta harkakusqanku nacionpi wasin-wasin willakuyta mana atisqankuraykum, llaqtan-llaqtan watukuq iñiqmasinchik nirqa ayllunkuman, llaqtamasinkuman, estudiaqmasinkuman, llamkaqmasinkuman hinaspa riqsinakusqanku runakunaman Diosmanta willakunankupaq. Chayta ruwasqankuraykum iskay watallapi mirarurqaku. ¿Imatam kay iñiqmasinchikkunamanta yachachwan? Iñiqmasinchikkuna hinam tukuyta ruwananchik taytanchik Jehova Diosmanta willakunapaq, yachasqanchik lawpi autoridadkuna Diosmanta willakuyninchikta mana harkakuptinkupas. Chayta ruwaptinchikqa Jehova Diosmi yanapawasun ima sasachakuykunatapas atipananchikpaq (Filip. 2:13).

18. ¿Imapaqmi kallpanchakunanchik?

¹⁸ Tukupay punchawkunapi kasqanchikraykum llapallanchik Pablopa qillqasqanman hina kawsakunapaq kallpanchakunanchik. Hinallam kallpanchakunanchik aswan allin kaqkunata imamantapas puntapi churananchikpaq, mana huchayuq hinaña kanapaq, ruwasqanchikwan hukkunata mana urmarachinanchikpaq, hinaspa allin kaqkunata aswan-aswan ruwananchikpaq. Chaykunapaq kallpanchakuptinchikqa kuyakuyninchikmi astawan wiñanqa, hinaspapas Jehova Diospa sunquntam kusichisun.