1. ¿Imakunamantam kusikunchik 3 Juan 3, 4 nisqanman hinaqa?

APOSTOL Juanqa mayna-maynataraq kusikurqa yanapasqan iñiqmasinkuna hinalla taytanchik Jehovapa munasqanman hina kawsakusqankuta qawaspanqa. Apostol Juanpaqqa chay iñiqmasinkunaqa churinkuna hinam karqaku. Chaymi sasachakuypi tarikuptinkupas taytanchik Jehovata hinalla kuyanankupaq tukuy imata ruwaspa yanaparqa. Ñuqanchikpas ancha-anchatam kusikunchik churi-wawanchikkuna utaq yachachisqanchik runakuna hinalla taytanchik Jehovata yupaychasqankuta qawaspanchikqa (qaway 3 Juan 3, 4).

2. ¿Imapaqmi Juanqa kimsa kutikama iñiqmasinkunaman qillqarqa?

² Isqun chunka pusaqniyuq watapaqqa apostol Juanqa yaqapaschá yacharqa Efeso llaqtapi utaq hichpan llaqtachakunapi, chaymanqa yaqapaschá astakurqa Patmos islapi preso kasqanmanta qipataña. Chaypi kachkaspanmi taytanchik Jehova yanapaptin kimsa kutikama iñiqmasinkunaman qillqarqa. Qillqarqaqa iñiqmasinkunata kallpanchananpaqmi hinaspa hinalla taytanchik Jehovapa munasqanman hina kawsakunankupaqmi.

3. ¿Imakunamantam kunan yachasun?

³ Chay watakunapiqa apostolkunamantaqa Juanllañam kawsakuchkarqa. Hina chay watakunapitaqmi mana allin runakunapas iñiqkunata pantachiyta qallaykurqaku (1 Juan 2:18, 19, 26). * Chayraykum apostol Juanqa ancha llakisqallaña tarikurqa. Kay mana allin runakunaqa yanqallam taytanchik Jehovamanta yachaq tukurqaku. Paykunaqa taytanchik Jehovapa kamachisqankunataqa manam kasukurqakuchu. Chayraykum kunan yachasun apostol Juanpa qillqasqankunamanta. Yachasuntaqmi imaynata taytanchik Jehovapa munasqanman hina kawsakunamantapas, imakunawan sasachakusqanchikmantapas hinaspa imaynata  yanapanakuspa hinalla taytanchik Jehovapa munasqanman hina kawsakunamantapas.

4. Juanpa qillqasqanman hinaqa, ¿imatam ruwananchik taytanchik Jehovapa munasqanman hina kawsakunapaqqa?

⁴ Taytanchik Jehovapa munasqanman hina kawsakunapaqqa paymantaraqmi imam kaqta yachananchik. Chayqa bibliallapim tarikun. Chaymantapas taytanchik Jehovapa kamachiwasqanchikkunatam kasukunanchik (qaway 1 Juan 2:3-6; 2 Juan 4, 6). Jesuspas tukuy imapim kasukurqa, chaymi taytanchik Jehovata kasukunapaqqa churinta qatipakunanchik (Juan 8:29; 1 Ped. 2:21).

5. ¿Imakunamantam mana iskayrayananchikchu?

⁵ Taytanchik Jehovapa munasqanman hina kawsakunapaqqa manam iskayrayananchikchu taytanchik Jehovapa rimasqankunamantaqa. Paypa bibliapi nisqankunaqariki chiqapmi. Manataqmi iskayrayananchikchu taytanchik Jehova churin Jesusta kamachinanpaq akllaykusqanmantapas. Kunan punchaw runakunaqa ninkum: “Jesusqa manam kamachiqchu”, nispa. Chayna runakuna rikurinanmantam apostol Juanqa nirqaña. Nirqataqmi taytanchik Jehovamantawan Jesusmanta iskayrayaqkunata pantachinanmantapas (2 Juan 7-11). Chayraykum apostol Juanqa qillqarqa: “¿Pitaq llullaqa? ‘Pipas Jesusqa manam Cristochu’ niqmi llullaqa”, nispa (1 Juan 2:22). Ñuqanchiktapas mana pantarachiwananchikpaqqa biblianchiktam allinta ñawinchananchik. Bibliata allinta ñawinchaspallam taytanchik Jehovamantawan Jesusmantaqa imam kaqta yachasun. Biblianchikta allinta ñawinchaspaqa manam iskayrayasunchu taytanchik Jehovamantawan Jesusmantaqa (Juan 17:3).

6. ¿Imakunawanmi musu-sipaskunaqa sasachakunku?

⁶ Runakuna imapas nisqankuwan mana pantarachiwananchikpaqmi anchata kallpanchakunanchik, astawanraqmi musu-sipaskunaqa (1 Juan 2:26). 25 watanpi iñiqmasinchik Susanapas * ninmi: “Escuelaypiqa kikillanmanta imapas rikurisqantam hinaspa runakunapa yachaynintam yachachiwaqku. Chayraykum taytanchik Jehovamantawan Jesusmantaqa iskayrayayta qallaykurqani, chay escuelaypi yachasqaytañam allinpaq hapiyta qallaykurqani, ichaqa tantiakururqanim taytanchik Jehovamanta astawan yachaykunaypaq”, nispa. Iñiqmasinchik Susanaqa kikinmantam yachayta qallaykurqa “La vida... ¿cómo se presentó aquí? ¿Por evolución, o por creación?” niq qillqanchikta. Chay qillqanchikpa ima nisqanta yacharuspanqa manañam  iskayrayarqañachu taytanchik Jehovamantawan Jesusmantaqa. Hina kikin Susanam kaynata nin: “Bibliapa tukuy ima nisqanmantaqa manañam iskayrayarqaniñachu. Taytanchik Jehovata kasukuspayqa kusisqam hinaspa hawkallam kawsakusaq”, nispa.

7. ¿Imaman mana wichiykunapaqmi uchuy-hatun kallpanchakunanchik, imaynanpi?

⁷ Uchuy-hatunmi kallpanchakunanchik pakallapi imatapas ama ruwanapaq. Apostol Juanpas nirqañam taytanchik Jehovata yupaychachkaspa huchapi kakuyqa mana allin kasqanta (1 Juan 1:6). Taytanchik Jehovawan kuyachikuyta munaspaqa paypa munasqanman hinam sapa punchaw kawsakunanchik. Taytanchik Jehovaqa tukuy ima ruwasqanchiktam qawachkan, paymantaqa manam imatapas pakachwanchu (Heb. 4:13).

8. ¿Imaman mana wichiykunapaqmi uchuy-hatun kallpanchakunanchik?

⁸ Uchuy-hatuntaqmi kallpanchakunanchik hawa runakuna hina mana kanapaq. Paykunaqa huchatapas allinpaqñam hapinku. Apostol Juanpa nisqanman hinapas kay allpa pachapi runakunaqa huchallikuchkaspankum “mana huchayuqmi kani” ninku (1 Juan 1:8). Apostol Juanpa tiempopipas Diosta yupaychaq tukuqkunaqa allinpaqmi hapiqku Diosta yupaychachkaspa huchapakuytaqa. Kunanpas achkaqmi “Diostam yupaychani” ninku, ichaqa huchallapim kawsakunku. Paykunaqa mana allinkunatam “allinmi” ninku, allin kaqkunatañataqmi “mana allinmi” ninku.

9. ¿Imaynam tarikunkichik musu-sipaskuna taytanchik Jehovapa munasqanman hina kawsakuspaykichikqa?

⁹ Hawa runakunaqa manam taytanchik Jehovapa munasqanman hinachu kawsakunku. Chayraykum taytanchik Jehovata yupaychaq musu-sipaskunaqa kallpanchakunanku hawa runakuna hina mana kanankupaq. Iñiqmasinchik Matiaspas ninmi: “Achka sipaskunam hikutawarqaku paykunawan puñunaypaq. Niwaqkum ‘qamqa manataq mayqin warmitapas qawarinkichu, qaritachiki munanki’”, nispa. Musu-sipas, ichapas  qampas chayna sasachakuypi tarikuchkanki. Ichaqa hinallam kallpanchakunayki taytanchik Jehovata kasukunaykipaq. Taytanchik Jehovata kasukuptikiqa runakunapas allintam qawasunki, unquykunawanpas manam ñakarinkichu, hawkam kawsakunki. Taytanchik Jehovawanpas kuyachikunkitaqmi. Sapa kuti mana allinkunata qipanchaspaykiqa, ima sasachakuypiña tarikuspaykipas manam sasachakunkichu taytanchik Jehovata kasukunaykipaqqa. Amayá qunqaychu satanas kay allpa pachata munaychakusqantaqa. Kay allpa pachata munaychakusqanraykum hawa runakunaqa huchallapi kawsakunku. Chaynaqa musu-sipaskuna kallpanchakuychikyá hawa runakuna hina mana kanaykichikpaq. Hawa runakuna hina mana kaspaykichikqa taytanchik Jehovapa sunquntam kusichinkichik (1 Juan 2:14).

10. ¿Imaynatam yanapawanchik Juanpa nisqanqa sunqunchikpi hawka tarikuspa taytanchik Jehovata kusisqa yupaychananchikpaq?

¹⁰ Taytanchik Jehovaqa niwanchikmi mana allinkunata mana ruwanapaq. Chayraykum kallpanchakunchik mana allinkunata mana ruwanapaq. Ichaqa pantaq kasqanchikraykum huchallikunchik. Huchallikuruspaqa taytanchik Jehovamanmi willakunanchik (qaway 1 Juan 1:9). Huchapakuruspapas punta apaqkunamanmi willakunanchik paykuna yanapaykuwananchikpaq. Paykunataqariki taytanchik Jehovam churaykun ñuqanchikta yanapaykuwananchikpaq (Sant. 5:14-16). Chaynaqa amayá hukmanyasunchu ñawpaqpi imapas ruwasqanchikmantaqa. Taytanchik Jehovaqariki pampachaykuwanchikñam, payqa chayna pampachaykuwananchikpaqmi churin Jesusta ñuqanchikpa rantinchikpi wañunanpaq kachamurqa. Chaynaqa, taytanchik Jehovaqa pampachaykuwananchikpaq niwaspanchikqa pampachaykuwanchikñam. Chaynaqa ñawpaqpi imapas ruwasqanchikwan ama hukmanyaspayá sunqunchikpi hawka tarikuspa kusisqa taytanchik Jehovata yupaychasun (1 Juan 2:1, 2, 12; 3:19, 20).

11. ¿Imapaqmi llapallanchik kallpanchakunanchik?

¹¹ Llapallanchiktaqmi kallpanchakunanchik  ñuqanchikmanta rakikuruspa yanqa rimaykunata rikurichiq runakunata mana uyarinapaqpas. Ñawpaqmantaraqmi iñiqkuna ukupi mana allin runakunaqa rikurirurqaku. Chay mana allin runakunaqa taytanchik Jehovapi tukuy sunqunkuwan hapipakuqkunata iskayrayachinankupaqmi tukuy imata ruwanku. Chay runakunapa imapas nisqankuwan mana iskayrayanapaqqa, sumaqtam yachananchik imam llulla kasqanta utaq imam chiqap kasqanta. * Chay mana allin runakunaqa, internetpim yanqa rimaykunata rikurichinmanku taytanchik Jehovamanta hinaspa iñiqmasinchikkunamanta iskayrayachiwananchikpaq. Chaynaqa chay yanqa rimaykunataqa amayá uyarisunchu, chaykunaqa hamun satanasmantam (1 Juan 4:1, 6; Apoc. 12:9).

12. ¿Imaynanpitaq kallpanchakunanchik taytanchik Jehovapi tukuy sunqunchikwan hapipakunapaq?

¹² Manam iskayrayananchikchu Jesuspa tukuy ima niwasqanchikmantaqa nitaq kamachiq kasqanmantapas. Manataqmi iskayrayananchikchu taytanchik Jehovapa llaqtanpi punta apaq iñiqmasinchikkunapa niwasqanchikkunamantapas. Mana iskayrayaspa chaylla kasukuptinchikqa satanasqa manam pantachiwasunchu (Mat. 24:45-47). Imapas niwasqanchikmanta mana iskayrayanapaqqa biblianchiktam ñawinchananchik. Biblianchikta ñawinchaspa yuyaymanaspanchikqa manam imamantapas iskayrayasunchu. Allintam sayasun allin sapichasqa sacha hina. Apostol Pablopas nirqam: “Señorninchik Cristo Jesusta chaskisqaykichikman hinayá payta kasukuspa kawsaychik, imayna yachachisqa kasqaykichikman hinayá Jesuspi allin sapichasqa hinaspa pirqasqa hina kaychik”, nispa (Col. 2:6, 7). Taytanchik Jehovapi tukuy sunqunchikwan hapipakuptinchikqa manam iskayrayachiwasunchu satanaspas nitaq mana allin runakunapas (2 Juan 8, 9).

13. ¿Imatam ñuqanchikqa yachanchik, imaynanpi?

¹³ Ñuqanchikqa yachanchikmi Diosta mana yupaychaq runakunaqa imaynapas chiqniwananchikta (1 Juan 3:13). Chiqniwasunqa satanaspa munaychakusqan kasqankuraykum (1 Juan 5:19). Kay pachapi mana allinkunapas chinkananpaqñam kachkan, chayraykum satanasqa piñasqallaña kachkan (Apoc. 12:12). Satanasqa manam huchapakunallapaqchu tanqawanchik. Manataqmi ñuqanchikmanta rakikuruqkunapa yanqakuna rimasqankunallawanchu intuwanchik. Aswanqa tukuy imaymanatam ñakarichiwanchik. Satanasqa yachakunmi chinkachisqaña kananmanta, chayraykum tukuy imata ruwan taytanchik Jehovamanta manaña willakunanchikpaq hinaspa taytanchik Jehovamanta karunchakunanchikpaq. Chayqa ñam qawakuchkanña huk law nacionkunapiqa. Chaywanpas chay nacionkunapi iñiqmasinchikkunaqa hinallam taytanchik Jehovapi tukuy sunqunkuwan hapipakuchkanku. Chaynaqa satanas tukuy imata ruwaspa sasachawaptinchikpas atichwanmi taytanchik Jehovaman sunqu kaytaqa.

14. ¿Imayna kasqanchikmi iñiqmasinchikkunata yanapanqa hinalla taytanchik Jehovapa munasqanman hina kawsakunankupaq?

¹⁴ Iñiqmasinchikkuna taytanchik Jehovapa munasqanman hina kawsakunankupaqqa yanapananchikmi, chaypaqqa llakipayarikuqmi kananchik (1 Juan 3:10, 11, 16-18). Imaynaña tarikuspapas llapallanchikmi kuyanakunanchik, kuyanakuspaqa yanapaykusunmi piyninpas wañukuptin llakisqa tarikuq iñiqmasinchikkunata. Yanapaykusuntaqmi qunqayllamanta imapas karuptin mana wasiyuq qiparuq iñiqmasinchikkunatapas. Chaykunapi yanapaykuspaqa sunqumantam kuyachkanchik, manam simillanchikwanchu.

15. ¿Imapaqmi kallpanchawanchik Juanpa nisqanqa?

 ¹⁵ Llapallanchik kuyanakuspaqa kuyakuq taytanchik Jehovatam qatipakuchkanchik (qaway 1 Juan 4:7, 8). Kuyanakuspaqa imaña kaptinpas pampachanakusunmi. Pampachaykusunmi nanay siminkuwan imataña niruwaptinchikpas (Col. 3:13). Rimarisun iñiqmasinchik Gregoriomanta. Kay iñiqmasinchikqa llaqtamasinkunamanta huk kaqnin iñiqmasinchik rimayta qallaykuptinsi hukmanyarusqa. Chayna tarikusqanmantam kikin iñiqmasinchik Gregorio nin: “Ancha-anchatam taytanchik Jehovata mañakurqani kay iñiqmasinchikwan mana piñakurunaypaq”, nispa. Ichaqa manam taytanchik Jehovallatachu mañakurqa. Aswanqa chay iñiqmasinchiktam nirqa kuska willakunankupaq. Hina kikin iñiqmasinchik Gregoriom willakun: “Chay kuska willakuspaykum iñiqmasinchikta nirqani: ‘Llaqtaypi runakunamanta rimasqaykiqa hukmanyarachiwarqam’ nispa. Chaynata niykuptiymi payqa niwarqa: ‘Mana yachastinmi rimarullarqani’, nispa. Chayna niwasqanwanmi musyarurqani mana llullanta rimasqanta. Chaynatam allinyanakururqaniku”, nispa.

16, 17. ¿Imapaqmi kallpanchakunanchik?

¹⁶ Apostol Juanqa ancha-anchatam kuyarqa iñiqmasinkunata. Ancha-anchata iñiqmasinkunata kuyasqanraykum taytanchik Jehovapi hapipakunankupaq yanaparqa. Apostol Juanqa iñiqmasinkunata kuyasqanraykutaqmi, iñiqmasinkunamanpas kimsa kutikama qillqarqa. Chay qillqasqanpim kuyakuywan rimapayarqa. Apostol Juan hina kuyakuqllañam kanqaku hanaq pachamanta Jesuswan kamachimuwaqninchikkunapas. Chayta yachayqa ancha-anchatam kusichiwanchik (1 Juan 2:27).

¹⁷ Kunan yachasqanchikkunataqa ruwaymanyá churasun. Kallpanchakusunyá taytanchik Jehovapa munasqanman hina kawsakunanchikpaq hinaspa tukuy imapi taytanchik Jehovata kasukunanchikpaq. Kallpanchakusunyá biblianchikta ñawinchaspa yuyaymanananchikpaq. Amayá haykapipas iskayrayasunchu imapas yachasqanchikmantaqa. Kallpanchakusunyá Jesuspa nisqankunamantapas ama iskayrayananchikpaq. Kallpanchakusunyá runakunapa yachayninwan ama aysachikunanchikpaq hinaspa ñuqanchikmanta rakikuruqkunapa imapas nisqankuta ama uyarinanchikpaq. Kallpanchakusunyá imatapas ruwaspa taytanchik Jehovata ama qipancharunanchikpaq. Kallpanchakusunyá taytanchik Jehovapa kamachiwasqanchikman hina kawsakunanchikpaq. Kallpanchakusunyá iñiqmasinchikkunata yanapaykunanchikpaq hinaspa pampachaykunanchikpaq. Imapipas yanapaykunata munaptinkuqa yanapaykusunyá. Kaykunapaq kallpanchakuspanchikqa imaña-haykaña kaptinpas taytanchik Jehovapa munasqanman hinam kawsakusunchik.