Chaypitaqmi tantiarqaku qipa punchawkunata guerra manaña kananpaq tukuyta ruwanankupaq. Religionpi punta apaqkunapas, chay huñunakuypim karqaku. Huk kaqnin religionmi nirqa chay tantiasqankuqa Diospa munasqan kasqanmanta. Chay huñunakuypi kaq huk kaqnin punta apaqpas, nirqam chaymantapuni enteron pachapi lliw runakuna allinña kawsakunankumanta.

1919 watapitaqmi, Jehova Diospas runankunata yanaparqa, chaynapi paymanta astawan allinta willakunankupaq. Qawasunyá 1919 watapi imakuna pasasqanmanta.

Iñiqmasinchik Joseph Rutherfordmi Diospa llaqtanpi punta apaq karqa qanchis yanapaqninkunapiwan. Ichaqa presocharurqakum. Chayraykum iñiqmasinchikkunaqa tantiananku karqa paykunapa rantinpi hukkunataña churanankupaq utaq paykuna lluqsinankukama suyanankupaq. Chayta tantianankupaqmi huñunakurqaku 1919 watapa 4 punchaw enero killanpi.

Iñiqmasinchik Joseph Rutherfordqa llakikurqam Diospa llaqtan imayna kananmanta. Chaymi carcelmanta cartata qillqarqa iñiqmasinchikkunaman. Chay qillqasqanpim nirqa Diospa llaqtanpi punta apaq kananpaq iñiqmasinchik Evander Cowardta akllanankupaq, payqa llampu sunqu hinaspa Diosta kuyaq runam karqa. Wakin iñiqmasinchikkunañataqmi nirqaku suqta killa suyanankupaq hinaspa chaymantaña imatapas tantianankupaq. Chayraykum iñiqmasinchikkunaqa mana ima ruwaytapas atirqakuchu.

Chayna kachkaptinkum, huk kaqnin iñiqmasinchik nirqa: “Ñuqaqa manam abogadochu kani, ichaqa yachanim Diosman sunqu kayqa allin kasqanmanta hinaspa paypa akllasqan runapi hapipakuypas allin kasqanmanta. Chaymi allin kanman iñiqmasinchik Joseph Rutherfordta kaqllamanta  punta apaq kananpaq akllayqa”, nispa (Sal. 18:25).

Paqarinnintintam iñiqmasinchik Joseph Rutherfordman cartata qillqarqaku pay hinalla punta apaq hina chaynataq qanchis iñiqmasinchikkunapas yanapaqnin hina kanankumanta. Chay cartatam iñiqmasinchik Joseph Rutherfordqa haywaykurqa waklaw waqtanpi kaq iñiqmasinchik Alexander Macmillanman, chaynapi paypas chaymanta yachananpaq.

Iñiqmasinchik Joseph Rutherfordwan qanchis yanapaqninkunaqa hinam preso kachkarqaku. Chayraykum iñiqmasinchikkunaqa, 700.000 runakunapa firmanta huñurqaku iñiqmasinchikkunata carcelmanta hurqunankupaq. Chay firmakunata juezman manaraq apachkaptinkum, iñiqmasinchik Joseph Rutherfordwan qanchis yanapaqninkunaqa lluqsiramurqaku.

Iñiqmasinchik Joseph Rutherfordqa suyaqnin iñiqmasinchikkunatam kaynata nirqa: “Kay sasachakuykunapi tarikusqanchikqa, yanapawasunmi qipa punchaw sasachakuykuna kaptin. [...] Qamkunam tukuyta ruwarqankichik carcelmanta lluqsinaykupaq. [...] Chay kallpanchakusqaykichikwanqa Jehova Diosmi hatunchasqa karqa. Chayraykum qamkunataqa Dios kuyasunkichik”, nispa.

1919 watapa mayo killanpim huk juez kaynata nirqa: “Joseph Rutherfordtawan qanchis yanapaqninkunataqa, yanqamantam juzgarqaku”, nispa. Chayraykum manaña ima papelpipas karqachu presochasqa kasqankuqa. Chayna nisqankuqa allinmá karqa iñiqmasinchik Joseph Rutherford hinalla abogado kananpaq. Chaynapi iñiqmasinchikkuna juezkunaman apasqa kaptin yanapananpaq.

Iñiqmasinchik Alexander Macmillanmi chay yuyarispan nirqa: “Imallatapas ruwanaykum karqa Diospa munasqanta yachanaykupaq”, nispa.

Iñiqmasinchikkuna Diospaq astawan ruwayta munaptinkupas, manam imapas karqachu qillqanchikkunata ruwanankupaq. Carcelpi kanankukama autoridadkuna qillqanchikkunata ruwanapaq kaqkunata chinkarachisqankurayku. Chaywanmi iñiqmasinchikkunaqa hukmanyasqa tarikurqaku,  hinaspam nirqaku: “¿Kayllapichu tukun Diosmanta willakuy?”, nispa.

¿Karqaraqchu Diosmanta yachay munaq runakuna? Chayta yachanankupaqmi iñiqmasinchik Joseph Rutherford hatun huñunakuy ruwakunanpaq nirqa hinaspa chaymanta llapallan runaman willamunankupaq. Iñiqmasinchik Alexander Macmillanpas nirqam: “Runakuna huñunakuyman mana hamuptinkuqa, chaywanchá yachasun Diosmanta willakuy tukusqanta”, nispa.

Unqustinpas iñiqmasinchik Joseph Rutherfordqa chay huñunakuypim yachachirqa. Chayqa karqa 1919 watapa 4 punchaw mayo killanpim. Chay huñunakuymanqa 3.500 runakunam rirurqaku, wakinqa qawallapiñam karqaku huntay-huntay kasqanrayku. Chaymi iñiqmasinchikkunaqa tantiarurqaku paqarinnintinpas chay huñunakuy kananpaq, chaypim huñunakurqaku 1.500 runakuna. Chaywanmi yacharurqaku achka runakunaraq Diosmanta yachay munasqankuta.

Iñiqmasinchikkuna Diosmanta willakunankupaq tukuy ima ruwasqankum, kunanpas yanapawanchik Diosmanta willakunanchikpaq.

1919 watapa punta punchaw agosto killanpi lluqsimuq Willakuq qillqapim (ingles rimaypi), nirqa hatun huñunakuy Cedar Point (Ohio) lawpi kananmanta. Chay willakuyta qawaruspanmi iñiqmasinchik Clarence Beaty nirqa: “Chay huñunakuymanqa rinanchikpunim”, nispa. Chay huñunakuymanqa suqta waranqa masnin iñiqmasinchikkunam rirqaku. Chaypim bautizakurqaku  iskay pachak masnin runakuna. Chayqa kusikunapaqmi karqa.

Chay huñunakuyqa achka punchawmi karqa. Chaypim iñiqmasinchik Joseph Rutherford nirqa The Golden Age * qillqatapas aypunankumanta. Chay qillqaqa bibliapa nisqanman hinam enteron pachapi tukuy ima pasakusqanmanta yachachirqa.

Llapallan iñiqmasinchikkunatam kallpancharqaku mana manchakuspanku chay qillqawan Diosmanta willakunankupaq. Punta apaq iñiqmasinchikkunam kaynata qillqarqaku: “Llapallan bautizasqa iñiqmasinchikkunaqa, yuyarinankum willakusqankuwan Diosta kusichisqankuta. Chaynaqa, enteron pachapi runakunamanyá Diosmanta willakusun”, nispa. Chaywanmi iñiqmasinchikkunaqa Diosmanta astawan willakurqaku. Chay willakusqankuwanmi yaqa tawa killallapi 50.000 runakunaña qillqanchikta ñawincharqaku.

1919 wata tukunanpaqqa Diosmantam tukuyta ruwaspa willakurqaku. Malaquias 3:1-4 nisqanman hinam, Diospa llaqtanqa chuyanchasqaña karqa. Chaymantapas Diospa llaqtanqa manañam pantay religionpa munaychakusqanñachu karqa. Hinaspa “allin ruwaq yuyayniyuq sirvientepas” akllasqañam karqa * (Apoc. 18:2, 4; Mat. 24:45). Iñiqmasinchikkunaqa kusisqallaña Diosmanta willakunankupaqmi kachkarqaku.