LLUMPAY wayra utaq para kananmanta estudiaq runakunaqa, yachankum haykapi llumpa-llumpayta wayramunanmanta utaq paramunanmanta. Chaymi runakuna allinlla kanankupaq willanku haykapi chay wayra utaq para chayamunanmanta.

Yaqa chaynam Jehova Diospas piñakuynin punchawmanta llapallan runakunaman willachkan. ¿Imaynatataq chayta ruwachkan? ¿Yaqachu Jehova Diosqa llapallan runakuna paymanta yachanankuta suyachkan? Chaykunamanta yachanapaqyá qawasun ñawpaq tiempopi Jehova Dios ima ruwasqanmanta.

Ñawpaq tiempopi runankunamanpas Jehova Diosqa willarqam manaraq chinkarachichkaspan (Jer. 30:23). Payqa tiempowanmi willachiq llapallan runakunaman piñakuynin punchaw manaraq chayamuchkaptin. Willachiqtaqmi runakuna allin kaqkunata ruwanankupaqpas (2 Rey. 17:12-15; Neh. 9:29, 30; Amos 3:7).

Chaytam ruwarqa Noeypa tiemponpipas. Noeywanmi mana allin runakunaman willachirqa sinchi para kananmanta (Gen. 6:9-13, 17). Willachirqataqmi mana wañunankupaq ima ruwanankumantapas. Noeyqa Diosta kasukuspam llapallan runakunaman willakurqa (2 Ped. 2:5).

Noey willakuchkaptinpas, manam kasukurqakuchu. Chayraykum ‘sinchi para chayaramuptin llapallanku chinkarurqaku’ (Mat. 24:39; Heb. 11:7). Chaynaqa, chay runakunaqa yacharqakum ima pasakunanmantaqa.

Wakinpiñataqmi willachirqa huk punchawllaña piñakuynin chayamunanpaq kachkaptin. Chaytam ruwarqa Egipto nacionpi runakunawan. Manaraq runtu parata chayachichkaspanmi, Moiseswan hinaspa Aaronwan willachirqa faraonman hinaspa runankunaman. Chaynaqa, ¿atinmankuchu karqa uywanku huñuyta hinaspa lluptiyta? Bibliam nin: ‘Faraonpa wakiqnin serviqninkunallam Jehova Diospa nisqanta manchakuspanku serviqninkunata chaynataq animalninkutapas wasi ukuman pusaykurqaku. Wakiqninmi ichaqa Jehova Diospa nisqanta mana kasukuspanku serviqninkutawan animalninkuta hina campopi saqiramurqaku’, nispa (Ex. 9:18-21). Jehova Diosqa runtu para manaraq chayamuchkaptinmi willachirqa, chaymi wakin runakunaqa mana ñakarirqakuchu.

Jehova Diosqa willachirqam faraonpa hinaspa runankunapa piwi churin mana wañunanpaq ima ruwanankumantapas (Ex. 4:22, 23). Chaywanpas paykunaqa manam kasukurqakuchu, chayraykum llapallan piwi churinku wañurqa. Chayqa llakikunapaqmi karqa (Ex. 11:4-10; 12:29). Ichaqa, ¿yaqachu tiempo karqa Jehova Diospa nisqanta kasukunankupaq? Arí. Israel runakunapapas Diospa nisqanta ruwasqankuraykum piwi churinkuqa mana wañurqachu (Ex. 12:21-28). Chaymantapas, Israel runakunaqa Diosta kasukusqankuraykum Egipto nacionmanta kimsa  millon masnin lluqsirqaku, Egipto nacionniyuq runakunapas, kasukuq kaqkunaqa paykunawan kuskam rirqaku (Ex. 12:38).

Tukuy kaykunawanmi yachanchik, Jehova Diosqa tiempowan imapas ruwananmanta willasqanta (Deut. 32:4). ¿Imaynanpitaq manaraq imapas kachkaptin willachin? ‘Pipas chinkarunanta mana munaspanmi, payqa munan llapallan runakuna huchankumanta wanakunankutam’ (2 Ped. 3:9). Jehova Diosqa anchatam llakikun runakunamanta. Chaymi munan huchankumanta wanakunankuta hinaspa pay kasukunankuta (Is. 48:17, 18; Rom. 2:4).

Kunanpas, Jehova Diosqa llapallan runakunamanmi willachkan piñakuynin punchawmanta. Jesuspas kay pachapi kachkaspanmi nirqa kay allpa pachapi mana allinkuna hinaspa mana allin ruwaqkunaqa ‘llumpa-llumpay ñakariy punchawkunapi’ chinkananmanta (Mat. 24:21). Willakurqam chay punchaw manaraq chayamuchkaptin imakuna kananmanta (Mat. 24:3-12; Luc. 21:10-13).

Chayraykum Jehova Diosqa munan pay kasukunankuta hinaspa pay yupaychanankuta. Munanmi kasukuqninkunaqa kay tiempopi allin kawsakunankuta, hinaspa hamuq tiempopi wiñaypaq kawsakunankuta (2 Ped. 3:13). Nisqankunapi runakuna hapipakunankupaqmi Jehova Diosqa munan “munaychakuyninmanta” willakunanchikta. Jesusmi nirqa: “Kay sumaq willakuymi willakusqa kanqa enterollan kay pachapi llapallan nacionpi runakuna yachanankupaq”, nispa (Mat. 24:14). Jesuspa nisqanman hinam, kunanqa 240 nacionkunapiña willakuchkanchik. Jehova Diosqa munan lliw runakuna payta kasukuspa wiñaypaq kawsanankutam (Sof. 1:14, 15; 2:2, 3).

Chaynaqa, kaykunawanmi yachanchik manaraq imapas kachkaptin tiempowanraq runakunaman willasqanmanta. Ichaqa, ¿yaqachu runakunaqa kasukunqaku piñakuynin punchaw manaraq chayamuchkaptin? Chaynaqa ñuqanchikmi, kallpanchakunanchik Diospa piñakuynin punchaw kayllapiña kasqanmanta runakunaman willanapaq, chaynapi chayta yachaspanku mana chinkanankupaq.