1. ¿Imaynanpitaq Diosllapaqña kawsakunanchik?

JEHOVA DIOS unanchawasqanchikraykum hinaspa kawsakuyta quwasqanchikraykum payllapaqña kawsakunanchik (Apoc. 4:11). Ichaqa, Jehova Diosta kuyachkaspa hinaspa yupaychachkaspa imamanpas qukuruspaqa sasachakuchwanmi Diosllapaqña kawsakuytaqa. Chaymi, sumaqta yachananchik imaynata chaykuna sasachawasqanchikmanta. Ichaqa, puntatayá qawasun Diosllapaqña kawsakuy imayna kasqanmanta.

2. Exodo 34:14 nisqanman hinaqa, ¿pillatam yupaychananchik?

² Bibliam nin Jehova Diosta kuyayninchikqa payllapaqña kawsakuywan tupasqanmanta. Chaynaqa, payllapaqña kawsakuyqa payllata yupaychaymi. Chayraykum mana saqikunanchikchu imapas utaq pipas payllata yupaychanapaq sasachawananchiktaqa (qaway Exodo 34:14).

3. ¿Imaynanpitaq Diosllapaqña kawsakunchik?

³ Jehova Diosllapaqñaqa kawsakunchik paymanta tukuy imata yachasqanchikraykum. Yacharunchikmi imayna kasqanta, imam munasqanta hinaspa imam chiqnisqanta. Yacharunchiktaqmi ñuqanchikpaq ima ruwananmantapas, hinaspapas munaynin ruwakunanpaqmi yanapakunchik paypa munasqanman hina kawsakuspa. Anchatam kusikunchik paypa kuyasqan kasqanchikrayku (Sal. 25:14). Paymanta tukuy ima yachasqanchikmi yanapawanchik astawan asuykunapaq (Sant. 4:8).

4. (1) ¿Imakunawanmi satanasqa intuwanchik? (2) ¿Imakunamantam kunan qawasun?

 ⁴ Satanasqa kay pacha makinpi kasqanraykum, kay pachapi kaqkunawan intuwanchik hinaspapas aychanchikpa munasqanman hina imapas ruwananchiktam munan (Efes. 2:1-3; 1 Juan 5:19). Munanmi, imamanpas qukuruspa Diosta qunqarunanchikta. Chayraykum kunan qawasun, tukuy imayuq kayta munachiwasqanchikwan chaynataq mana allin kaqkunawan kusirikunapaq intuwasqanchikwan sasachawasqanchikmanta.

5. ¿Imaynanpitaq allinta qawarikunanchik qullqi maskayllamanña mana qukurunapaq?

⁵ Llapallanchikmi munanchik allin mikusqa kayta, allin pachasqa kayta hinaspa sumaq wasiyuq kayta. Ichaqa, allintam qawarikunanchik qullqi maskayllamanña mana qukurunapaq. Kunan punchawkunaqa, yaqa llapallan runakunam qullqi maskayllapi kanku (2 Tim. 3:2). Jesusqa yacharqam qatiqninkunapas chaywan aysachikunankumanta, chaymi nirqa: “Manam pipas iskay patrontaqa servinmanchu, hukninta chiqnispanchá huknintañataq kuyanqa, utaq hukninman ratakuruspanchá huknintañataq chiqninqa. Qamkunaqa manam serviwaqchikchu Diostawan qullqitaqa”, nispa (Mat. 6:24). Pipas Diosta yupaychachkaspan qullqilla maskayman qukuruspanqa iskay patronpaqpas llamkachkanman hinam. Chayta ruwaspanqa manam Diosllapaqñachu kawsachkan.

6. ¿Imatam yachachwan Laodicea llaqtapi iñiqkuna Jehova Diospaqwan Jesuspaq imayna kasqankumanta?

⁶ Jesuspa wañukusqanmanta watakuna qipatam, Laodicea llaqtapi iñiqkuna hatun tukuspa nirqaku: “Apum kaniku, tukuy imaykum kapuwanku manataqmi imaykupas pisipuwankuchu”, nispa. Jehova Diospaqwan Jesuspaqmi ichaqa, llakisqa, llakipayanapaq hina,  wakcha, ñawsa, hinaspa qalalla hina karqaku. Paykunataqa manam apu kasqankuraykuchu Jesusqa rimapayarqa, aswanqa qullqi maskayllamanña qukurusqankurayku Dioswan kuyachikunankupaq manaña kallpanchakusqankuraykum (Apoc. 3:14-17). Ñuqanchikpas, tukuy imata munapayasqanchikmanta musyakuruspaqa, chaypunillam kallpanchakunanchik mana chaykuna maskayllamanña qukurunapaq (1 Tim. 6:7, 8). Chayta mana ruwaptinchikqa, sunqunchikmi rakinasqa kanqa hinaptinmi Jehova Diosqa manaña chaskiwasunchu, payqariki munan payllapaqña kawsakunanchiktam (Deut. 4:24). ¿Imaraykutaq qullqi maskayllamanña qukuruchwan?

7-9. ¿Imatam yachachwan iñiqmasinchik Davidmanta?

⁷ Qawasunyá punta apaq iñiqmasinchik Davidmanta, payqa Estados Unidosmantam. Payqa, imatapas allintam ruwan. Llamkayninpipas, allinta llamkasqanraykum, huk kaqnin ruwaykunamantaña nanachikunanpaq nirqaku, chayraykum nacionninpi llapallan llamkaqkunamanta allin llamkaq kasqanta nirqaku. Davidmi willakun: “Nirqanim chaykunata Jehova Dios quwasqanmanta”, nispa. Ichaqa, ¿chaynachu karqa?

⁸ Davidqa, musyakururqam chay llamkaynin Diosmanta karunchasqanta, willakunmi: “Huñunakuykunapiwan Diosmanta willakuypiqa, llamkayniypi umayuqllañam kaq kani. Chay llamkaypi llamkasqayrayku qullqisapa kaspaypas llumpay pisipasqam tarikurqani hinaspa warmiywanpas manañam allinñachu karqani”, nispa.

⁹ Chaywanmi, Davidqa kaqmanta tantiakurqa. Ninmi: “Allintam tantiakurqani imata  puntapi churanaypaq”, nispa. Payqa tantiarurqam ima punchawkuna llamkananpaq hinaspam chay tantiakusqanmanta patronninman willarqa. Ichaqa, chay llamkaymantam wischururqaku. ¿Imatam ruwarqa? Davidmi willakun: “Paqarinnintintam, 50 horata Diosmanta willakunapaq papelta qillqarqani”, nispa. Pisipuqninku kaqkunata rantichakuykunankupaqmi, llamkanku wasita pichaspa. Chaymanta killakuna qipallatam, Davidqa 70 horataña Diosmanta willakuyta qallaykurqa, hina tumpa unayllanmantaqmi warmichanpas 70 horataña Diosmanta willakurqa. Paykunaqa llamkarqaku mana pipa munasqan llamkaypim, ichaqa manam chayraykuchu hukmanyarqaku. Manañam ñawpaqta hina qullqisapañachu kanku, chaywanpas manam imankupas pisinchu. Paykunaqa Jehova Diostam imamantapas puntapi churayta munanku hinaspapas sutillatam qawanku munayninta puntapi churaqkunata Jehova Dios yanapasqanta (Mat. 6:31-33).

10. ¿Imapaqmi llapallanchik kallpanchakunanchik?

¹⁰ Kapuqniyuq kaspa utaq wakcha kaspapas, llapallanchikmi kallpanchakunanchik qullqilla maskayman mana qukurunapaq hinaspa llamkayllamanña mana qukurunapaq. Imata puntapi churasqanchikta musyakunapaqqa kaykunapim yuyaymanachwan. ¿Llamkaypi umayuqllañachu kani huñunakuypi kaspay utaq Diosmanta willakuspay? ¿Qullqiyuq kanaypaqchu tukuy imata ruwani? ¿Qullqiraykuchu utaq imapasraykuchu warmiywan piñanakuni? ¿Llamkaymanchu ima llamkaychallapiñapas, chaynapi Jehova Diospaq kaqkunata puntapi churanaypaq? (1 Tim. 6:9-12). Kaykunapi yuyaymanaspaqa, yuyarisunyá Jehova Dios kuyawasqanchikta hinaspa “manapunim ñuqaqa haykapipas qunqasqaykichu nitaqmi saqisqaykichu”, niwasqanchikta. Chaynaqa, apostol Pablopa nisqanman hinapas “amayá qullqilla maskaymanqa” qukurusunchu (Heb. 13:5, 6).

11. Mana allin kusirikuykunaqa, ¿imamanmi tanqawachwan?

¹¹ Jehova Diosqa kusisqa kawsakunanchiktam hinaspa kusirikuykunawan kusikunanchiktam munan. Bibliapas ninmi: “Runapaqqa allinqa kanman mikukuspa tomakuspa llamkayninpa rurunwan kusikuymi”, nispa (Ecl. 2:24). Ichaqa, yaqa llapallan kusirikuykunam mana allinlla, runakunatam  yanqachan hinaspapas mana allinkunata ruwanankupaqmi tanqan.

12. 1 Corintios 10:21, 22 nisqaman hinaqa, ¿imanasqataq allinta akllananchik kusirikunapaq kaqkunata?

¹² Ñuqanchikqa Jehova Diosllapaqña kawsakuytam munanchik, chayraykum “Jehova Diospa mesanmanta” mikuchkaspaqa mana mikuchwanchu “demoniokunapa mesanmantaqa” (qaway 1 Corintios 10:21, 22). Piwanpas kuskaqa mikunchik riqsinakusqanchikraykum. Chaynaqa, Diospa chiqnisqan runakunawan mikuchkachwanpas hinam kanman, maqanakuyta utaq wañuchinakuyta, layqa ruwaqkunata hinaspa millakuypaq kaqkunata qawayqa. Chaykunata qawaspaqa sasachakuypim tarikuchwan, hinaspapas manañam Dioswanqa kuyachikusunchu.

13, 14. (1) ¿Imaynanpitaq kusirikuyqa mikuywan tupan? (2) Santiago 1:14, 15 nisqanman hinaqa, ¿imaynanpitaq mana allinkunawanqa mana kusirikunachu?

¹³ ¿Imaynanpitaq imapas kusirikuyqa tupanman mikuywan? Manaraq mikuchkaspaqa sumaqtam akllanchik ima mikuyta mikunapaq. Millpuruspam ichaqa manaña ima ruwaytapas atinchikchu. Allin mikuyta mikuyqa mana unqunapaqmi yanapawanchik, mana allin mikuymi ichaqa mana yanapawanchikchu. Imapas mikusqanchikqa tiempopa risqanman hinam yanapawasun utaq manapas.

¹⁴ Yaqa chaynam kusirikuykunawanpas, puntataqa allintam akllanchik imawan kusirikunapaq. Qawasqanchikmanta utaq imawanpas kusirikusqanchikmanta qipamanmi ichaqa manaña ima ruwaytapas atinchikchu. Allin kusirikuykunaqa anchatam kusichiwanchik, mana allin kusirikuykunañataqmi yanqachawanchik (qaway Santiago 1:14, 15). Mana allin kusirikuykunaqa tiempopa risqanman hinam sasachawasun. Chayraykum biblia niwanchik: “Amayá qamkunaqa engañakuychikchu, Diosmantaqa manam pipas burlakunmanchu, runaqa imapas tarpusqantam cosechanqa. Aychapa munasqanman hina tarpuqqa aychaman hinallam wañuyta cosechanqa. Espirituman hina tarpuqmi ichaqa espirituman hina wiñay kawsayta cosechanqa”, nispa (Gal. 6:7, 8). Chaynaqa, qipanchasunyá mana allin kusirikuykunataqa (Sal. 97:10).

15. ¿Ima yanapakuytaq kapuwachkanchik?

¹⁵ Llapallanchikmi kusisqallaña qawanchik internetpi sapa killa lluqsimuq JW Broadcastingtaq^®. Iñiqmasinchik Marilynpas ninmi: “Sapa killa lluqsimuq JW Broadcastingta^® qawasqaymi yanaparuwan aswan kusisqa kanaypaq, hinaspapas chaypi videokunaqa llapallanmi suma-sumaqllaña, manam mana allinqa kanchu. Llakisqa utaq hukmanyasqa tarikuspayqa, kallpanchawaqniy yachachikuykunatam qawani. Chay ruwasqaymi yanapawachkan Jehova Diosta hinaspa llaqtanta astawan kuyanaypaq. Chayqa anchatam kusichiwan”, nispa. ¿Yaqachu ñuqanchikpas chayta ruwachkanchik? Sapa killa lluqsimuq yachachikuyta qawaspapas, qawachwantaqmi munasqanchik horapi chaypi kaq videokunatawan uyarinapaq kaq sumaq yachachikuykunata hinaspa takikunata.

16, 17. ¿Imaynanpitaq hayka unay kusirikusqanchikta qawarikunanchik, hinaspa imatam ruwachwan kusirikuykunallamanña mana qukurunapaq?

¹⁶ Manam imawan kusirikunallapaqchu allintaqa akllananchik. Qawarikunanchiktaqmi hayka unay chaykunawan kusirikusqanchiktapas, mana chayqa, chayllamanña qukuruspam Jehova Diospaqa manaña tiempoyuq kachwan. Achkaqmi chaywan sasachakunku. 18 watanpi iñiqmasinchik Abigailmi willakun: “Tukuy imayta ruwaruspaymi samariq hina televisionta qawani. Hayka unay qawanaypaq mana tantiakuspayqa unallay-unaymi qawakuyman”, nispa. Samuel musupas ninmi:  “Wakinpiqa internetpi videokunata qawaspaymi mana musyaylla kimsa utaq tawa hora nisqaña qawarusqani”, nispa.

¹⁷ ¿Imatam ruwachwan kusirikuykunallamanña mana qukurunapaq? Chaypaqqa yachananchikmi hayka unay kusirikusqanchikta, hinaspam qillqachwan semanapi hayka hora television qawasqanchikta, internetpi kasqanchikta utaq videokuna qawasqanchikta hinaspa celularpi pukllasqanchikta. Kusirikuykunallapiña kasqanchikta musyakuruspaqa, astawan tiempochakunapaqyá qillqasun. Hinaspayá chaypi qillqasun imakunata puntapi churanapaq hinaspañayá churasun hayka unay kusirikunapaq. Chaymantañataqyá Jehova Diosta mañakusun chayman hina ruwanapaq. Chayta ruwaspaqa tiempoyuqmi kasun bibliamanta yachanapaq, ayllunchikwan Diosta yupaychanapaq, huñunakunapaq, Diosmanta willakunapaq hinaspa yachachinapaq. Hinaspapas kusisqam tarikusun tiemponchikta mana usuchisqanchikrayku.

18, 19. ¿Imatam ruwananchik Jehova Diosllapaqña kawsakunapaq?

¹⁸ Kay pachapi mana allin kaqkuna chinkanamanta hinaspa hamuq tiempopi allin kawsakuy kananmanta qillqaruspanmi apostol Pedro kaynata nirqa: “Chaynaqa kuyasqallaykuna, chaykunata suyachkaspaykichikqa tukuy atisqaykichiktayá ruwaychik chuyay-chuyayta Dios tarimusunaykichikpaq, chaynataq mana huchayuqta hinaspa paywan allinlla kaqta tarimusunaykichikpaq”, nispa (2 Ped. 3:14). Kay nisqanta kasukuspa hinaspa Diospa munasqanman hina kawsakuspaqa, Jehova Diosllapaqñam kawsakuchkanchik.

¹⁹ Satanaswan kay pachapi kaqkunaqa tukuytam ruwanqaku imapas ruwayta puntapi churanapaq (Luc. 4:13). Ichaqa, imaña-haykaña kaptinpas hinallayá Jehova Diosta puntapi churasun. Tukuyta ruwaspayá payllapaqña kawsakusun.