1. ¿Imaynatam Jehova Diosta kusichichwan?

 KAYPI piensarisun: Kuyasqanchik amistadninchikman imapas necesitasqanta regalaykuchwan. ¡Llakikuchwanchá mana servichikuspan guardarayachiptinqa! Ichaqa anchatam kusikuchwan agradecekuspan servichikuptinqa. Yaqa chaynam Jehova Diospas necesitasqanchikta qawamuspan churin Jesusta kachamurqa ñuqanchikrayku wañunanpaq, kachamurqaqa anchata kuyawasqanchikraykum. Chaymi anchata kusikun chaymanta agradecekuptinchikqa (Juan 3:16; Rom. 5:​7, 8).

2. ¿Imamantam kay yachachikuypi yachasun?

² Tiempopa pasasqanman hinam ñuqanchikrayku Jesuspa wañukusqanmantaqa manaña anchatachu agradecekuchwan. Chayqa kanman regalawasqanchikwan kusisqa kaspapas guardarayachiy hinam. Chay mana pasaruwananchikpaqmi sapa kuti yuyaymanananchik Jehova Dioswan Jesus ñuqanchikrayku ima ruwasqankupi. Chaymi kay yachachikuypi yachasun Jesuspa wañukusqanwan kunanpas hinaspa hamuq tiempopipas ima bendicionkunata chaskinamanta. Yachasuntaqmi Dios kuyawasqanchikmanta imakunata ruwaspa agradecekusqanchikmantapas. Agradecekusqanchikqa astawanraqmi qawakunan Jesuspa wañukusqanta yuyarinapaq semanakunapi.

¿IMA BENDICIONKUNATAM KUNAN CHASKINCHIK?

3. ¿Ima bendiciontam kunan chaskinchik Jesus wañukusqanrayku?

³ Jesus wañukusqanraykum Diosqa huchanchikkunata pampachawanchik. Ichaqa manam obligasqachu, aswanqa pampachaykuyta munawasqanchikraykum. Davidmi anchata agradecekuspan huk kutipi nirqa: “Jehova Dioslláy, qamqa allin Diosmi kanki. Qamqa pampachakuykuqmi kanki”, nispan (Sal. 86:5; 103:​3, 10-13).

4. ¿Pikunarayku wañunanpaqtaq Jehova Diosqa churinta kachamurqa? (Rimarimuytaq Lucas 5:32; 1 Timoteo 1:15 nisqanmantapas).

 ⁴ Wakiqninchikqa ichapas piensachwan Dios mana pampachawananchikpaq hina kasqanchikta. Llapallanchikmá Dios mana pampachawananchikpaq hinaqa kanchik. Chaymi apostol Pablopas nirqa: “Ñuqaqa manam ‘apostol’ nispa sutichasqa kanaypaq hinachu kallani”, nispan. Nirqaraqmi: ‘Mana kuyasqa kanaypaq hina kachkaptiypas Dios anchata kuyawasqanraykum kay ruwasqaytaqa ruwani’, nispan (1 Cor. 15:​9, 10). Huchanchikmanta wanakuptinchikqa Diosqa pampachaykuwanchikmi. Pampachaykuwanchikqa manam imapas allin kaqta ruwasqanchikraykuchu, aswanqa kuyawasqanchikraykum. Chaymi mana hukmanyananchikchu Dios mana pampachawananchikpaq hina kasqanchikta piensaspaqa. Diosqa churintaqariki kachamurqa manam mana pantaq runakunarayku wañunanpaqchu, aswanqa huchankumanta wanakuq pantaq runakunaraykum (leey Lucas 5:32; 1 Timoteo 1:15).

5. ¿Imanasqam mana nichwanchu pampachawananchikpaq Dios obligasqa kasqantaqa?

⁵ Manam haykapipas piensananchikchu unay wataña Diosta servisqanchikrayku pampachawananchikpaq obligasqa kasqantaqa. Payqa churin Jesus wañunanpaqqa kachamurqa manam servisqanchikrayku pagawananchikpaqchu, aswanqa anchata kuyawasqanchikraykum. Jehova Diosqa anchatam valoran servispanchik tukuy ima ruwasqanchikkunataqa (Heb. 6:10). Chaywanpas manam nichwanchu pampachawananchikpaq obligasqa kasqantaqa. Chaynata nispaqa ñuqanchikrayku Jesus wañukusqanta mana necesitasqanchiktam nichkanchik (tupachiy Galatas 2:21 nisqanwan).

6. ¿Imanasqataq Pabloqa anchata kallpanchakurqa tukuy sunqunwan Diosta servinanpaq?

⁶ Pablopas yacharqam imataña ruwaptinpas pampachananpaq Dios mana obligasqa kasqantaqa. Chaynaqa, ¿imanasqataq anchata kallpanchakuspan tukuy sunqunwan Diosta servirqa? Pantaq kachkaptinpas Dios anchata kuyasqanmanta agradecekusqanraykum (Efes. 3:7). Pablo hinam ñuqanchikpas anchata kallpanchakunchik Diosta servinapaq. Ichaqa manam servisqanchikrayku pampachawananchikta munaspachu, aswanqa pampachawasqanchikmanta anchata agradecekuspam.

7. ¿Ima bendiciontawanmi chaskinchik ñuqanchikrayku Jesuspa wañukusqanwan? (Rimarimuytaq Romanos 5:1 hinaspa Santiago 2:23 nisqanmantapas).

⁷ Ñuqanchikrayku Jesuspa wañukusqanwantaqmi Jehova Dioswan allin amistad kaytapas atinchik. a Pasaq yachachikuypi yachamusqanchikman hinam mana nacesqanchikmantachu Dioswan amistadqa kanchik. Ichaqa ñuqanchikrayku Jesuspa wañukusqanwanmi ‘Dioswan hawkayaypi kayta’ hinaspa payman asuykuyta atinchik (leey Romanos 5:1; Santiago 2:23).

8. ¿Imanasqataq Diosta anchata agradecekunchik payta mañakuyta atisqanchikmanta?

⁸ Jehova Dioswan allin amistad kaspanchikmi payta mañakuytapas atinchik. Payqa manam huñunakuykunapi mañakuykunallatachu uyarin, aswanqa sapakamapa mañakusqanchiktapas uyarinmi. Diosta mañakuy hawka kanapaq yanapawaptinchikpas astawanqa yanapawanchik Diosman asuykuspa astawan kuyachikunapaqmi (Sal. 65:2; Sant. 4:8; 1 Juan 5:14). Jesuspas kay pachapi kachkaspanmi taytanta sapa kuti mañakuq uyarisqanta hinaspa astawan kuyachikunanta yachasqanrayku (Luc. 5:16). ¡Anchatamá agradecekunchik Jesuspa wañukusqanwan Diospa amistadnin kaspa payta mañakuyta atisqanchikmantaqa!

 ¿IMA BENDICIONKUNATAM HAMUQ TIEMPOPI CHASKISUN?

9. ¿Ima bendiciontam Diosman sunqu serviqkuna chaskisun?

⁹ ¿Ima bendiciontam Diosman sunqu serviqkuna chaskisun ñuqanchikrayku Jesuspa wañukusqanwan? Jehova Diosmi wiñaypaq kawsakuyta quwasun. Runakuna waranqantin wataña wañusqanraykum achkaq piensanku wiñaypaq kawsakuyta mana atinanchikta. Ichaqa Jehova Diosmi runakunata unanchaspan munarqa wiñaypaq kawsakunankuta. Wiñaypaq kawsakuyta haypay mana creenapaq hina kaptinpas yuyarinanchikmi chayta haypanapaq ancha kuyasqan churinta Dios kachamusqanta (Rom. 8:32).

10. ¿Imatam kusikuywan suyachkanchik hanaq pachapaq chaynataq kay pachapaq kaqkunapas?

¹⁰ Kunan tiempopi wiñaypaq mana pipas kawsakuptinpas Jehova Diosqa munanmi chay wiñaypaq kawsakuyta kusikuywan suyananchikta. Hanaq pachapaq kaqkunaqa kusikuywanmi suyachkanku hanaq pachaman rispa Jesuswan kuska kamachimunankuta (Apoc. 20:6). Kay pachapaq kaqkunapas kusikuywanmi suyachkanku manaña ñakariykunapa kanan sumaq huertapi kawsakuyta (Apoc. 21:​3, 4). ¿Qampas kay allpapi wiñaypaq kawsakuytachu suyachkanki? Amayá piensaychu hanaq pachapi sumaq kawsakuymanta menos kananmantaqa. Runakunaqa kay pachapi wiñaypaq kawsakunapaqmi unanchasqa karqanchik. Chaymi wiñaypaq kawsakuspaqa anchata kusikusun.

11, 12. ¿Imaynam kawsakusun kay allpa pachanchik sumaq huertaña kaptin? (Qawaytaq dibujokunatapas).

¹¹ Piensarisun kay allpa pachanchik huerta kaptin imayna kawsakunanchikpi. Manañam unqusunñachu nitaq wañusunñachu (Is. 25:8; 33:24). Tukuy imapas munasqanchiktamá Diosqa quwasun. ¿Imakunatataq chaypi yachayta munawaq? ¿Ima animalkunatataq riqsiyta munawaq? ¿Munawaqchu ima instrumentotapas tocay yachayta? ¿Munawaqchu imatapas dibujaspa pintayta? Chay tiempopiqa necesitakunqam wasi ruwaqkunata, imatapas plantaqkunata, yanukuqkunata, plantakuna  cuidaqkunata, herramientakuna ruwaqkunata hinaspa tukuy imapas ruway yachaqkunata (Is. 35:1; 65:21). ¡Wiñaypaq kawsakusqanchikraykum tiemponchik haypawasun ima munasqanchiktapas yachanapaq!

¹² ¡Mayna kusikuypaqraq kanqa kawsariqkunata chaskiykuypas! (Hech. 24:15). Ancha kusikuypaqtaqmi kanqa Jehova Diosmantawan tukuy ima unanchasqankunamanta yachaypas (Sal. 104:24; Is. 11:9). Ichaqa tukuy imamantapas astawanqa kusichiwasun manaña pantaq kaspanchik Jehova Diosta serviymi. Manamá chay sumaq bendiciontaqa pierderuyta munachwanchu huchallapi kawsaspa huk tiempolla kusirikusqanchikraykuqa (Heb. 11:25). Chay wiñay kawsayta haypanapaq kunan tiempopi imataña saqisqanchikpas manam yanqachu kanqa. Kay allpa pachanchik sumaq huerta kaptinqa manañam suyasunñachu Diospa prometewasqanchikkunataqa. Aswanqa cumplikuruptinmi kusisqaña kawsakusun. Tukuy chayqa cumplikunqa ñuqanchikrayku wañunanpaq churin Jesusta Jehova Dios kachamusqanraykum.

¿IMATAM RUWACHWAN DIOS KUYAWASQANCHIKMANTA AGRADECEKUSPANCHIK?

13. ¿Imatam ruwachwan Jehova Dios kuyawasqanchikmanta agradecekuspanchik? (Rimarimuytaq 2 Corintios 6:1 nisqanmantapas).

¹³ ¿Imakunatam ruwachwan ñuqanchikrayku Jesus wañukusqanmanta Diosta agradecekuspanchik? Paypa munaynintam vidanchikpi imamantapas puntata ruwananchik (Mat. 6:33). Jesusqa wañukurqa ‘manaña kikillanchikpaq kawsanapaqmi aswanqa wañupuwaqninchikpaqña kawsananchikpaqmi’ (2 Cor. 5:15). Amayá qunqasunchu anchata kuyawasqanchikrayku huchanchikta Jehova Dios pampachawasqanchiktaqa. Chayraykuyá tukuyta ruwasun payta servinanchikpaq (leey 2 Corintios 6:1).

14. ¿Imata ruwaspam qawachichwan Diospi hapipakusqanchikta hinaspa niwasqanchikkunata kasukusqanchikta?

¹⁴ Jehova Dios kuyawasqanchikmantaqa agradecekuchwantaqmi paypi hapipakuspa hinaspa tukuy niwasqanchikkunata kasukuspa. Chaytam qawachichwan colegiota tukuruspanchik imata estudianapaq utaq imapi llamkanapaq tantiakuspanchik. Allinta tantianapaqqa ñuqanchikpaq Dios ima munasqanpim piensananchik (1 Cor. 10:31; 2 Cor. 5:7). Allinkuna ruwasqanchikwan iñiyniyuq kasqanchikta qawachispanchikqa Diospim astawan hapipakusun, hinaspapas paywanmi astawan kuyachikusun. Hamuq tiempopaq prometewasqanchikmantapas manataqmi iskayrayasunchu (Rom. 5:​3-5; Sant. 2:​21, 22).

15. ¿Imaynatam Jehova Diosta agradecekuchwan Jesuspa wañukusqanta yuyarinapaq semanakunapi?

¹⁵ Jesuspa wañukusqanmanta hinaspa Dios kuyawasqanchikmanta agradecekusqanchiktaqa qawachichwantaqmi Jesuspa wañukusqanta yuyarinapaq semanakunapi tukuyta ruwaspanchikpas. Manam ñuqallanchikchu chay huñunakuymanqa rinanchik aswanqa hukkunatapas invitachwanmi (1 Tim. 2:4). Chay  huñunakuy imayna kananmanta willaspanchikmi qawachichwan jw.org nisqapi ¿Imanasqataq Jesusqa wañukurqa? hinaspa Jesuspa wañukusqantayá yuyarisun sutiyuq videokunata. Punta apaqkunam invitanmanku Diosmanta manaña willakuqkunata. ¡Maynataraq kusikunmanku hanaq pachapi kaqkunapas chaynataq kay pachapi kaqkunapas Diosmanta karunchakuqkuna kutiramuptinqa! (Luc. 15:​4-7). Chay huñunakuypiqa manam testigokunallachu saludanakunanchik. Saludaykunanchiktaqmi chayllaraq hamuqkunatapas utaq unaymantaña hamuqkunatapas. ¡Llapallankutamá kusikuywan chaskiykunanchik! (Rom. 12:13).

16. ¿Imanasqataq Jesuspa wañukusqanta yuyarinapaq semanakunapi Diosmanta astawan willakunapaq tantiakuchwan?

¹⁶ Jesuspa wañukusqanta yuyarinapaq semanakunapiqa astawantaqmi Diosmanta willakuchwan. Chayta ruwaspanchikmi ñuqanchikrayku Jehova Dioswan Jesus tukuy ima ruwasqankumanta agradecekuchwan. Diosmanta astawan willakuptinchikqa Dios yanapawasqanchikmi sutilla kanqa, astawantaqmi paypipas hapipakusun (1 Cor. 3:9). Chaymantapas Jesuspa wañukusqanta yuyarinapaq semanapim Sapa punchaw yuyaymananapaq hinaspa Huñunakuypi yanapawaqninchik qillqapi niwasqanchik textokunata sapa punchaw leenanchik. Chay textokunata allinta entiendenapaqqa servichikuchwantaqmi wakin qillqanchikkunatapas chaynataq videokunatapas.

17. ¿Imata qawamuspanmi Diosqa anchata kusikun? (Qawaytaq “ ¿Imakunatam ruwachwan Jehova Dios kuyawasqanchikmanta agradecekuspanchik?” niqtapas).

¹⁷ Sichum imaraykupas kay yachachikuypi yachamusqanchikman hina mana ruwayta atispanchikqa amayá llakikusunchu. Jehova Diosqa manamá hukkunapa imapas ruwasqankuwanqa tupachiwanchikchu. Payqa sunqunchikta allinta riqsisqanraykum yachan ñuqanchikrayku Jesuspa wañukusqanmanta maynata agradecekusqanchikta, chaymi anchata kusikun (1 Sam. 16:7; Mar. 12:​41-44).

18. ¿Imanasqam Jehova Diostawan Jesusta anchata agradecekunchik?

¹⁸ Ñuqanchikrayku Jesus wañukusqallanwanmi atichwan huchanchikmanta pampachasqa kayta, Diospa amistadnin kayta hinaspa wiñaypaq kawsakuyta. Jehova Diostayá haykapipas agradecekusun anchata kuyawasqanchikrayku chay bendicionkunata quwasqanchikmanta (1 Juan 4:19). Amataqyá qunqasunchu anchata kuyawaspanchik ñuqanchikrayku Jesuspa wañukusqantapas. Chay ruwasqanmanta agradecekusqanchikqa sutillam qawakunqa sapa punchaw tukuy imata ruwasqanchikwan (Juan 15:13).