3 KAQ YACHACHIKUY
35 KAQ TAKI Aswan allin kaqkunatayá ruwasun
Diospa munasqanman hinayá imapaqpas tantiasun
“Jehova Diosta manchakuyqa yachayniyuq kaypa qallariyninmi, chuyay-chuyay Diosmanta imam kaqta yachayqa allin yuyayniyuq kaymi” (PROV. 9:10).
¿IMAMANTAM YACHASUN?
Kay yachachikuypim yachasun yachaywan hinaspa yuyaywan imapaqpas allinta tantianamanta.
1. ¿Imakunapaqmi sapa punchaw tantiananchik? ¿Imanasqam wakinpiqa allinta piensarispa tantiananchik?
SAPA punchawmi imapaqpas tantiananchik. Tantiananchikmi imata mikunapaq utaq imay hora puñunapaqpas. Chaykunapaq tantiayqa manamá sasachu. Ichaqa allinta piensarispam tantiananchik kanqa saludninchikmanta, kusisqa kananchikmanta, familianchikmanta hinaspa Diosta serviyninchikmantaqa. Munanchikmi chay tantiasqanchikkuna familianchikta hinaspa ñuqanchikta kusichiwananchikta, astawanraqmi Jehova Diosta kusichinantaqa (Rom. 12:1, 2).
2. ¿Imakunam yanapawasun imapaqpas allinta tantianapaq?
2 Imapaqpas allinta tantianapaqmi yanapawasun tantiay munasqanchikmanta estudiaspa hinaspa tapukuspa allinta yachaykuyninchik, chay tantiasqanchikmanta Dios ima piensasqanta yachayninchik hinaspa ima ruway aswan allin kasqanta akllayninchik. Chaymantapas, ¿imatam ruwachwan allin tantiaq kananchikpaq? (Prov. 2:11). Chaykunamantam kay yachachikuypi yachasun.
TANTIAY MUNASQANCHIKMANTAM ALLINTA YACHAYKUNANCHIK
3. ¿Imanasqataq ancha allin tantiay munasqanchikmanta allintaraq yachaykuyninchik? Rimarimuy doctorpa ima ruwasqanmanta.
3 Yachaywan imapaqpas tantianapaqqa chay tantiay munasqanchikmantam allinta yachaykunanchik. ¿Imanasqa? Kaypi piensarisun: Pipas doctorman riptinqa, ¿yaqachu doctorqa mana tapuykuspan utaq imayna kasqanta mana yachaykuspan imatapas recetaykunqa? Manamriki. Chay doctor hinam imapaqpas allinta tantianapaqqa allintaraq yachaykunanchik. ¿Imatam chaypaq ruwananchik?
4. Proverbios 18:13 nisqanman hinaqa, ¿imaynatam imamantapas allinta yachaykuchwan? (Qawaytaq fotokunatapas).
4 Imamantapas allinta yachaykunapaqqa tapukunanchikmi. Kaypi piensarisun: Pipas niwachwan fiesta kananmanta. Chay fiesta ruwaqta allinta mana riqsispanchikqa utaq chay fiesta imayna kananmanta allinta mana yachaspanchikqa kaynakunatam tapukuchwan: “¿Maypitaq hinaspa haykapitaq chay fiestaqa kanqa? ¿Hayka runataq rinqa? ¿Pitaq encargakunqa imapas mana pasarunanpaq? ¿Pikunataq rinqaku? ¿Imakunatataq ruwanqaku? ¿Tragotachu tomanqaku?”, nispa. Chaykunamanta yachaykuyninchikmi yanapawasun chay fiestaman rinapaq utaq mana rinapaqpas (leey Proverbios 18:13).
Tapukuspanchikmi tantiay munasqanchikmanta allinta yachaykunanchik. (Qaway 4 parrafota). a
5. ¿Imatawanraqmi ruwananchik tantiay munasqanchikmanta allinta yacharuspaqa?
5 Tantiay munasqanchikmanta allinta yachaykuspapas kaykunapiraqmi piensarinanchik: ¿Imatam ruwachwan fiestaman Diosta mana serviqkuna riptinkuqa utaq achka trago kananmanta yachaspanchikqa? ¿Mana pipapas controlasqan kasqankuraykuchu munasqankutaña ruwayta qallaykunqaku? (1 Ped. 4:3). ¿Imatam ruwachwan chay fiesta apakusqan hora huñunakuyninchik utaq Diosmanta willakuyninchik kaptinqa? Chaykunapi piensariymi yanapawasun allinta tantianapaq. Tantiay munasqanchikmanta kikinchik yacharuspapas yachananchiktaqmi chaymanta Jehova Dios ima piensasqanta (Prov. 2:6).
DIOS IMA PIENSASQANTAM YACHANANCHIK
6. Santiago 1:5 nisqanman hinaqa, ¿imanasqam Diosta mañakunanchik yanapaykuwananchikpaq?
6 Jehova Diostayá mañakusun tantiay munasqanchikmanta ima piensasqanta entiendenapaq. ‘Payqa mana piñakuspan tukuy sunqunmanta achkanpi [yachayta] qukuqmi’ (leey Santiago 1:5). Chay yachay quwasqanchikwanmi yachasun tantiasqanchik paypa munasqanman hina utaq mana munasqanman hina kasqanta.
7. ¿Imaynatam yachachwan Jehova Diospa ima piensasqanta? Rikchanachiywan rimarimuy.
7 Diosta mañakuruspañataqyá contestawasqanchikmanta cuentata qukunapaq listo kasun. Kaypi piensarisun: Maytapas rispanchik pantaruspaqa chaypi yachaqtam tapukunchik. Ichaqa, ¿tapukuptinchik manaraq imatapas niwachkaptinchikchu pasakunchik? Manamá. Aswanqa ima niwasqanchiktam allinta uyariykunchik. Chaynam ñuqanchikpas yachayta quwananchikpaq Diosta mañakuruspaqa allinta uyarichkaq hina chay tantiasqanchikwan tupaq yachachikuykunata hinaspa bibliapi Diospa niwasqanchikkunata maskananchik. Kaqmanta rimarisun chay fiestaman rinapaq invitawasqanchikmanta. Rinapaq utaq mana rinapaq manaraq tantiachkaspam bibliapa nisqanta yachananchik: ¿Imatam nin fiestakunamanta, Diosta mana serviq amistadkunamanta hinaspa imapas munasqanchikmantaqa Diospa munayninta puntapi churaymanta? (Mat. 6:33; Rom. 13:13; 1 Cor. 15:33).
8. ¿Imatam ruwachwan bibliapi Diospa nisqanta tarinapaq? (Qawaytaq fototapas).
8 Chaywanpas yaqapaschá munasun bibliapi Diospa nisqanta tarinapaq pipas yanapaykuwananchikta. Chaypaqqa allin iñiyniyuq iñiqmasinchiktam nichwan consejaykuwananchikpaq. Ichaqa allinmi kanman chaykunamanta qillqanchikkunapi kikinchik estudiayninchik. Chaypaqmi kapuwachkanchik Diospaq hina kawsakunapaq bibliapa nisqankuna hinaspa Jehova Diospa testigonkunapa qillqankunapi maskanapaq niqpi achka yachachikuykuna. Yuyarinanchikmi chay tantiasqanchikwan Diosta kusichiy munasqanchikta.
Jehova Diospa ima piensasqantam yachaykunanchik. (Qaway 8 parrafota). b
9. ¿Imaynatam yachachwan imapas tantiasqanchik Diospa munasqanman hina kasqanta? (Rimarimuytaq Efesios 5:17 nisqanmantapas).
9 ¿Imaynatam yachachwan imapas tantiasqanchik Diospa munasqanman hina kasqanta? Chaypaqqa Diostam allinta riqsinanchik. Proverbios 9:10 nisqanpim nin: “Chuyay-chuyay Diosmanta imam kaqta yachayqa allin yuyayniyuq kaymi”, nispa. Allin yuyayniyuq kanapaqqa Jehova Diospa imayna kasqanta, ima munasqanta, ima kuyasqanta hinaspa ima chiqnisqantam yachananchik. Nikunanchikmi: “Kunankama Jehova Diosmanta yachasqayman hinaqa, ¿ima tantiasqaytaq payta kusichinqa?”, nispa (leey Efesios 5:17).
10. ¿Imanasqataq ñuqanchikpaqqa Diospa palabranpi nisqankuna aswan allin familianchikpa utaq llaqtamasinchikpa imapas munasqankumantaqa?
10 Wakinpiqa Diosta kusichinanchikraykum familianchikpa utaq amistadninchikkunapa munasqankutaqa mana ruwananchikchu kanqa. Ichapas tayta-mamakunaqa warmankuta hikutanmanku Diosta serviyninpi mana allin kaq qullqisapa qariwan casarakunanpaq. Arí, tayta-mamakunaqa munankum warmanku allin kawsakunankuta. Ichaqa, ¿yaqachu chay runaqa yanapanqa Dioswan astawan kuyachikunanpaq? ¿Imatam Diosqa piensanman chaymanta? Mateo 6:33 nisqanpim niwanchik ‘Diospa munayninta puntata ruwanapaq’. Tayta-mamanchikta kuyaspa kasukuspapas hinaspa llaqtamasinchikkunata respetaspapas aswan allinqa imapas ruwasqanchikwan Jehova Diosta kusichiymi.
IMA RUWAY ASWAN ALLIN KASQANTAM AKLLANANCHIK
11. Filipenses 1:9, 10 nisqanman hinaqa, ¿imaynam kananchik aswan allin kaqta akllanapaq?
11 Wakinpim vidanchikpiqa imatapas ruwana kanqa iskay-kimsa formapi, chaymi bibliapi nisqankunata sumaqta qawaruspa mayqin aswan allin kasqanta akllananchik kanqa (leey Filipenses 1:9, 10). ¿Imaynatam akllachwan mayqin aswan allin kasqanta? Chaypaqqa allin tantiuwanmi cuentata qukunanchik mayqin akllasqanchikpas imapi tukunanmanta. Wakinpiqa chayllam akllarusun aswan allin kaqta, wakinpim ichaqa sasa kanqa mayqin aswan allin kasqanta yachayninchik. Chaymi allin tantiuyuq kananchik chaynapi sasa kaptinpas aswan allin kaqta akllananchikpaq.
12, 13. ¿Imaynatam allin tantiuyuq kay yanapawasun imapi llamkanapaqpas allinta tantianapaq?
12 Kaypi piensarisun: Llamkapakunapaq maskachkaspa tariruchwanchik iskay clase llamkayta. Chaymantam averiguachwan imayna llamkay kasqanta, imay horamanta imay horakama kasqanta hinaspa yachasqanchikmanta mayna karupi kasqanta. Chay llamkaykunaqa manamá bibliapa yachachisqanpa contranpichu. Ichapas hukninta akllayta munachwan gustonchikpaq kasqanrayku utaq maschata pagawananchikrayku. Ichaqa manamá chaykunallapichu piensana mayqin aswan allin kasqanta akllanapaqqa.
13 Allin tantiuyuq kaspayá kaykunapipas piensarisun: ¿Mayqinpi llamkapakuspaypas huñunakuyman faltakuytachu qallaykusaq? ¿Haypawanqachu tiempo aylluywan kuska kanaykupaq hinaspa Diosmanta yachanaykupaq? Chaykunapi piensaymi yanapawasun qullqi maskayllaman qukurunamantaqa Jehova Diospa munayninta puntapi churanapaq hinaspa familianchikpaqpas tiempochakunapaq. Diospa munasqanman hina tantiakuptinchikqa paymi bendeciwasun.
14. ¿Imaynatataq allin tantiuyuq hinaspa kuyakuq kay yanapawasun hukkunata mana urmarachinapaq?
14 Allin tantiuyuq kayqa yanapawasuntaqmi imapas tantiasqanchikwan hukkuna imayna tarikunankupi piensanapaqpas, chaynapi ‘pitapas mana urmarachinapaq’ (Filip. 1:10, qaway willakuyninta). Imayna pachakunapaq hinaspa imayna allichakunapaq sapakama tantiananchik kaptinpas allin tantiuyuq kayqa allintam yanapawasun. Ichapas imayna pachakusqanchikqa iñiqmasinchikkunata utaq hukkunatapas hukmanyachinman. Chaymi allin tantiuyuq kaspaqa paykunapipas piensasun. Kuyakuq kaypas yanapawasuntaqmi “wakinkunapa allinninta” maskaspa imaynata pachakunanchikpaq (1 Cor. 10:23, 24, 32; 1 Tim. 2:9, 10). Arí, allinta tantiakusqanchikwanmi sutilla kanqa hukkunata kuyasqanchik hinaspa respetasqanchik.
15. ¿Imakunapim piensananchik vidanchikpi aswan allin kaqkunamanta tantiaspaqa?
15 Vidanchikpi aswan allin kaqkunamanta tantiaspaqa allin lluqsinanpaq imakuna ruwananchikpim piensananchik. Jesusmi nirqa ‘hayka gastanamanta tantianapaq’ (Luc. 14:28). Arí, ima tantiasqanchikpas allin lluqsinanpaqqa hayka tiempota hinaspa imakuna necesitasqanchikpim piensananchik. Wakinpiqa chaymantam familianchikkunawan rimananchik kanqa, chaynapi tantiasqanchik allin lluqsinanpaq paykunapas yanapawananchikpaq. Tukuy chaykunata ruwaspam cuentata qukuchwan tantiasqanchikpi imachatapas cambiananchikta utaq huk formapi ruway aswan allin kasqanta. Chaymantapas familianchikkunapa ima piensasqankuta tapuspa allinta uyariykuptinchikqa chay tantiasqanchik allin lluqsinanpaqmi paykunapas yanapakuyta munanqaku (Prov. 15:22).
TANTIASQANCHIK ALLIN LLUQSINANPAQQA DIOSTAM MAÑAKUNANCHIK
16. ¿Imakunatam ruwananchik tantiasqanchik allin lluqsinanpaq? (Qawaytaq “ ¿Imakunatam ruwananchik allinta tantianapaq?” niqtapas).
16 Kay yachachikuypi yachamusqanchikman hina ruwaspanchikqa allin yuyaywanmi tantiasun. Chaypaqqa puntatam tantiay munasqanchikmanta estudiaspa hinaspa tapukuspa allinta yachaykunanchik, chaymantañataqmi tantiay munasqanchik Jehova Diospa agradonpaq kasqanta cuentata qukunapaq bibliapa hinaspa qillqanchikkunapa ima nisqanta qawaykunanchik. Chayta ruwaruspañam tantiasqanchik allin lluqsinanpaq Diospa yanapakuyninta mañakunanchik.
17. ¿Imam astawan yanapawasun allinta tantianapaq?
17 Ichapas ñawpaqtaqa imapaqpas allinta tantiarqanchik. Chaywanpas allintaqa tantiasun manam yachayllanchikpi utaq experienciallanchikpi hapipakuspachu, aswanqa Jehova Diospa yachayninta maskaspam. Payllam yachayta, yuyayta hinaspa allin entiendeq kaytaqa quwanchik chaynapi yachaywan tantiananchikpaq (Prov. 2:1-5). Arí, Jehova Diosmá yanapawasun imapas tantiasqanchikwan payta kusichinapaq (Sal. 23:2, 3).
28 KAQ TAKI ¿Piraq Diospa ancha kuyasqan kanman?
