1. ¿Imanasqataq ancha allin Jesuspa wañukusqanta sapa wata yuyariyninchik?

 ÑUQANCHIKRAYKU Jesuspa wañukusqanqa Jehova Diospa ancha valorniyuq regalo quwasqanchik hinam (2 Cor. 9:15). Jesus wañukusqanraykum Dioswan allin amistad kayta hinaspa wiñaypaq kawsakuyta atichwan. Diostam anchata agradecekunanchik ñuqanchikrayku wañunanpaq churin Jesusta kachamusqanmanta. Chaytaqa ruwarqa anchata kuyawaspanchikmi (Rom. 5:8). Ñuqanchikrayku Diospa ruwasqanmanta hinalla agradecekunanchikpaqmi hinaspa mana qunqananchikpaqmi Jesusqa kamachirqa wañukusqanta sapa wata yuyarinapaq (Luc. 22:​19, 20).

2. ¿Imamantam kay yachachikuypi yachasun?

² Kay 2025 watapim Jesuspa wañukusqanta yuyarisun sabado 12 de abrilta. Llapallanchikmá chaypi kaytaqa munanchik. Chayraykum ancha allin kanqa Jesuspa wañukusqanta yuyarinapaq semanakuna Dioswan Jesus ñuqanchikrayku ima ruwasqankupi yuyaymanayninchik. a Chaymi kay yachachikuypi yachasun ñuqanchikrayku Jesuspa wañukusqan Jehova Diosmantawan Jesusmanta ima yachachiwasqanchikta. Qatiqnin yachachikuypiñataqmi yachasun ñuqanchikrayku Jesuspa wañukusqanwan ima bendicionkuna chaskisqanchikmanta hinaspa imata ruwaspa agradecekusqanchikta qawachinamanta.

¿IMATAM ÑUQANCHIKRAYKU JESUSPA WAÑUKUSQAN YACHACHIWANCHIK JEHOVA DIOSMANTA?

3. ¿Imaynatam huk runapa wañukusqallanwan millonnintin runakuna librasqa kananku karqa? (Qawaytaq dibujokunatapas).

³ Jesuspa wañukusqanmi yachachiwanchik Jehova Dios allin  ruwaq kasqanta (Deut. 32:4). ¿Imanasqam chaynata ninchik? Diosta Adan mana kasukusqanraykum llapallan mirayninkunapas huchayuq hinaspa wañuqlla kanchik (Rom. 5:12). Chaymi Diosqa churin Jesusta kachamurqa huchamantawan wañuymanta librawananchikpaq. Ichaqa, ¿imaynatam chullalla runapa wañukusqanqa millonnintin runakunata librawachwan? Chaymantam apostol Pablo nirqa: “Imaynam chullalla runapa [utaq Adanpa] mana kasukusqanwan achkallaña runakuna huchayuq rikurirurqaku, chaynallataqmi chullalla runapa [utaq Jesuspa] kasukusqanwan achkallaña runakuna mana huchayuqña rikurinqaku”, nispa (Rom. 5:19; 1 Tim. 2:6). Huk rimaypiqa, Adanmi mana pantaq kachkaspan Diosta mana kasukurqachu, chaymi huchapawan wañuypa sirvienten rikurirurqanchik. Chaymanta librasqa kananchikpaqmi mana pantaq huk runa Diosta kasukunan karqa.

4. ¿Imanasqataq Diosqa mana saqiykurqachu Adanpa kasukuq mirayninkuna wiñaypaq kawsakunankutaqa?

⁴ ¿Jesusraqchu wañunan karqa salvasqa kananchikpaq? ¿Manachu Diosqa Adanpa kasukuq mirayninkunata saqinman karqa wiñaypaq kawsakunankuta? Pantaq kasqanchikraykum piensachwan chayna tantiaynin allin kasqanta. Ichaqa yuyarinanchikmi mana pantaq kasqanrayku Diosqa imatapas allinta ruwaq kasqanta. Adanpa mirayninkunata wiñaypaq kawsakunankuta hinalla saqispanqa manamá allintachu ruwachkanman karqa. Chaywanqa Adanpa hatun hucha ruwasqantam mana kaqpaqta hina hapichkanman karqa.

5. ¿Imanasqam mana iskayrayachwanchu Jehova Diosqa haykapipas allin kaqta ruwananmanta?

⁵ Ichaqa, ¿imam pasanman karqa Adanpa pantaq mirayninkuna wiñaypaq kawsakunankuta Dios saqiykuspan ñuqanchikrayku wañunanpaq Jesusta manaña kachamuptinqa? Chayta ruwaspanqa imam allin hinaspa imam mana allin kasqanmanta kamachikuyninkunatam mana kaqpaqta hina hapichkanman karqa. Chayrayku ichapas runakunaqa ninmanku karqa Diosqa huk asuntokunapipas chaynata ruwananta. Yaqapaschá ninmanku: “Ichapas wakin promesankunataqa Diosqa manapas cumplinqachu”, nispanku. Ichaqa chaymantaqa manam preocupakunanchikchu. Jehova Diosqa ancha kuyasqan churin wañunan kaptinpas allin ruwaq kasqanraykum imam kaqta ruwarqa. Chayraykum manapuni iskayrayanchikchu haykapipas allin kaqta ruwananmantaqa.

6. ¿Imaynatam ñuqanchikrayku Jesuspa wañukusqanwan yachanchik anchata Dios kuyawasqanchikta? (Rimarimuytaq 1 Juan 4:​9, 10 nisqanmantapas).

⁶ Ñuqanchikrayku Jesuspa wañukusqanwanmi Diosqa astawanraq qawachiwanchik anchata kuyawasqanchikta (Juan 3:16; leey 1 Juan 4:​9, 10). Payqa munan wiñaypaq kawsakunanchiktam hinaspa familianpa parten kananchiktam.  Chaymi churinta kachamurqa ñuqanchikrayku wañunanpaq. Adan huchallikuruspanqa manañam Diospa familianpa partenñachu karqa. Chayraykum lliw mirayninkunapas manaña familianpa partenchu kanchik. Ichaqa Jesuspa wañukusqanwanmi Diospi iñispa kasukuqkunaqa kaqmanta familianpa parten kasun. Kunanpas huchanchikkunata Dios pampachaykuwaptinchikmi paywan hinaspa iñiqmasinchikkunawan allin amistad kayta atinchik. ¡Maynataraq Jehova Diosqa kuyawanchik! (Rom. 5:​10, 11).

7. ¿Imaynatam Jesuspa ñakarisqanpi piensay yanapawanchik Dios anchata kuyawasqanchikta entiendenapaq?

⁷ Dios anchata kuyawasqanchiktaqa astawanraqmi entiendechwan llumpayta llakikunan kaptinpas librawananchikpaq churin Jesusta kachamusqanpi piensaspanchik. Satanasmi nin Diospa mayqin serviqninpas sasachakuypi kaspanqa mana Diosman sunqu kananta. Chayna nisqan llulla kasqanta qawachinanpaqmi Diosqa saqirqa churinta manaraq wañuchichkaspanku ñakarichinankuta (Job 2:​1-5; 1 Ped. 2:21). Jesusta burlakuptinkuqa hinaspa soldadokuna maqaspanku qiruman takaptinkuqa Diosqa lliwtam qawamuchkarqa. Qawamurqataqmi ñakarispa wañukusqantapas (Mat. 27:​28-31, 39). Payqa tukuy chaykuna pasanantaqa atinmanmi karqa harkaruyta. Arí, payqa yanapaykunmanmi karqa ‘Diosyá librachun kuyaspanqa’ nispa runakuna niptinkuqa (Mat. 27:​42, 43). Chaynata ruwaptinqa manachá Jesusqa librawananchikpaqqa mana pantaq vidantaqa qunmanchu karqa, nitaq wiñaypaq kawsakuytapas haypachwanchu karqa. Ichaqa anchata kuyawasqanchikraykum saqirqa Jesus ñakarispa wañukunanta.

8. ¿Imaynatam yachanchik churin ñakarisqanta qawaspan Dios anchata llakikusqanta? (Qawaytaq fototapas).

⁸ Arí, Jehova Diosqa tukuy atiyniyuq kaspanpas saqirqam churin ñakarinantaqa, ichaqa manam chaywanqa nichwanchu mana llakipayakuq kasqantaqa. Bibliapim niwanchik runakunata payman rikchakuqta unanchawasqanchikmanta. Unanchawarqanchikqa pay hina sentimientoyuqtam. Chaymi bibliapipas niwanchik wakin runakuna Diosta ‘llakichisqankumanta’ (Sal. 78:​40, 41). Chaynaqa, ¡maynataraq llakikurqa churin Jesus ñakarisqanta qawaspanqa! Chaypaq rimarisun Abrahanmantawan Isaacmanta. Diosmi Abrahanta nirqa churin Isaacta wañuchispa kañapunanpaq (Gen. 22:​9-12; Heb. 11:​17-19). Segurochá Abrahanqa sapallan churinta wañuchinanpaq tukuy imata alistaspanqa llumpay llakisqa tarikurqa churin chaylla wañurunanta yachaspanpas. Aswan llakisqaraqchá Diosqa tarikurqa tukuyta ruwaspanku wañukunankama churin Jesusta ñakarichiptinkuqa. (Qaway jw.org nisqapi Iñiyninkuta qatipakunapaq: Abrahan [iskay kaq video] niqta).

9. ¿Imatam Romanos 8:​32, 38, 39 nisqan yachachiwanchik maynata Dios kuyawasqanchikmanta?

⁹ Ñuqanchikrayku Jesuspa wañukusqanwanmi  yachanchik Jehova Diosqa pi amistadninchikmantapas utaq familianchikmantapas astawanraq kuyawasqanchikta (leey Romanos 8:​32, 38, 39). Diosqa kikinchik kuyakusqanchikmantapas astawanraqmi kuyawanchik. Kaypi yuyaymanasun: ¿Wiñaypaq kawsakuytachu munanchik? Diosqa astawanraqmi munan wiñaypaq kawsakunanchikta. ¿Huchanchikmanta pampachasqa kaytachu munanchik? Diosqa astawanraqmi munan. Payqa kamachiwanchik Jesuspa wañukusqanmanta agradecekuspa kasukunallanchiktam hinaspa paypi iñinallanchiktam. Ñuqanchikrayku Jesuspa wañukusqanmanta astawan yachaspanchikqa manam iskayrayachwanchu Dios anchata kuyawasqanchikmantaqa. Hamuq tiempopim astawanraq yachasunchik anchata kuyawasqanchikrayku Dios imakunata ruwasqanmanta (Ecl. 3:11).

¿IMATAM JESUSMANTA YACHACHIWANCHIK ÑUQANCHIKRAYKU WAÑUKUSQAN?

10. (1) ¿Imam Jesusta astawan llakichirqa manaraq wañukuchkaptin? (2) ¿Imaynatam Jesusqa taytanpa sutinta hatuncharqa? (Qawaytaq “ Diosman sunqu kasqanwanmi Jesusqa qawachirqa satanas llulla kasqanta” niqtapas).

¹⁰ Jesusqa munan taytanpa imayna kasqanmanta imam kaqta runakuna yachanankutam (Juan 14:31). Payqa maynatachá llakikurqa mana allin ruwaqta hina wañuchinankuwan taytanpa sutinta pinqayman churarunanta piensaspanqa. Chayraykum nirqa: “Taytalláy, atikuptinqa kay vasotayá ñuqamanta asuriykachiy”, nispa (Mat. 26:39). Jesusqa wañukunankama Diosman sunqu kasqanwanmi taytanpa sutinta hatuncharqa satanaspa nisqan llulla kasqanta qawachispan.

11. ¿Imaynatam yachanchik Jesus runakunata kuyasqanta? (Rimarimuytaq Juan 13:1 nisqanmantapas).

¹¹ Ñuqanchikrayku Jesuspa wañukusqanmi yachachiwanchik Jesusqa lliw runakunamanta anchata llakikusqanta, astawanraqmi qatiqninkunamantaqa (Prov. 8:31; leey Juan  13:1). Jesusqa yacharqañam kay pachapi kachkaspa achka sasachakuykunapi kananta hinaspa ñakarichispa wañuchinankuta. Ichaqa manam cumplinanraykullachu taytantaqa kasukurqa, aswanqa runakunata kuyasqanraykum tukuy sunquwan willarqa, yachachirqa hinaspa yanaparqa. Wañukunan punchawpas tiempochakurqam apostolninkunapa chakinta mayllananpaq, yachachinanpaq, kallpanchananpaq hinaspa consuelaykunanpaq (Juan 13:​12-15). Qirupiña kaspanpas waqtanpi kaq suwatam nirqa hamuq tiempopi wiñaypaq kawsakunanmanta, Juanmanñataqmi encargakurqa maman Mariata cuidananpaq (Luc. 23:​42, 43; Juan 19:​26, 27). Jesusqa runamasinkunata anchata kuyasqantaqa qawachirqa manam wañukusqallanwanchu, aswanqa paykunapaq tukuy imata ruwasqanpiwanmi.

12. ¿Imakunatam Jesusqa ñuqanchikrayku hinalla ruwachkan?

¹² Jesusqa ‘huk kutillatam’ wañukurqa, ichaqa hinallam yanapawachkanchik (Rom. 6:10). Arí, hinallam tukuyta ruwachkan wañukusqanrayku allin kaqkunata quwananchikpaq. Payqa reymi, sacerdotekunapa kamachiqninmi hinaspa iñiqkunapa umanmi (1 Cor. 15:25; Efes. 5:23; Heb. 2:17). Chayraykum hanaq pachapaq kaqkunatawan kay pachapaq mana yupay atina achkallay-achka runakunata huñuchkan. Chaytaqa tukunqa llumpa-llumpay ñakariy punchawkuna manaraq tukuchkaptinmi (Mat. 25:32; Mar. 13:27). b Kay tukupay tiempopipas Diospa llaqtanpi punta apaqkunawanmi sumaq yachachikuykunata quwanchik hinalla Diosman sunqu kananchikpaq (Mat. 24:45). Waranqa wata kamachimuspanpas tukuytam ruwanqa yanapawananchikpaq. Arí, Diosqa churintaqa kachamurqa manam wañukunallanpaqchu, aswanqa ñuqanchikrayku tukuy imata ruwananpaqwanmi.

AMAYÁ SAQISUNCHU HINALLA YACHAYTAQA

13. ¿Imaynatam yuyaymanay yanapawasun Dioswan Jesus kuyawasqanchikmanta hinalla yachanapaq?

¹³ Yuyaymanaymi yanapawasun Jehova Diospawan Jesuspa kuyawasqanchikmanta hinalla yachanapaq. Chaypaqqa Jesuspa wañukusqanta yuyarinapaq tiempopi ichapas leechwan Jesuspa vidanmanta bibliapi rimaq huk utaq iskay librota. Amayá apurawllamanñaqa leerusunchu, aswanqa Diostawan Jesusta imakunaraykuraq kuyanapaq razonkunatayá pacienciawan maskasun. Amataqyá qunqasunchu yachasqanchikkunata hukkunaman willaytapas.

14. Salmos 119:97 nisqanman hinaqa, ¿imatam ruwananchik Jesuspa wañukusqanmantawan huk yachachikuykunamanta hinalla yachanapaq? (Qawaytaq dibujotapas).

 ¹⁴ Unay wataña bautizasqa kaspanchikqa ichapas nichwan: “¿Hinallaraqchu yachanay Diospa allin ruwaq kasqanmanta, kuyakuyninmanta hinaspa Jesus wañukusqanmanta?”, nispa. Ichaqa hinallam chaykunamantaqa mana yachasqanchikkunata yachasun. ¿Imataq yanapawasun hinalla yachanapaq? Qillqanchikkunapi yachachikuykunata estudiaymi. Chaymi bibliapi mayqin textotapas mana entiendespanchikqa qillqanchikkunapi maskananchik. Hinaspam punchaw yuyaymanachwan Diosmanta, Jesusmanta hinaspa paykunapa kuyawasqanchikmanta ima yachasqanchikpi (leey Salmos 119:97).

15. ¿Imanasqataq bibliapi sumaq yachachikuykunataqa hinalla maskananchik?

¹⁵ Bibliata leespa utaq estudiaspa mana yachasqanchik kaqkunata mana tarispaqa amayá hukmanyasunchu. Biblia estudiaytaqa qurita maskaywanmi tupachichwan. Quri maskaqkunaqa achka horam utaq achka punchawmi maskanku uchuychallata tarinanku kaptinpas. Bibliapi sumaq yachachikuykunaqa qurimantapas aswan valorniyuqmi (Sal. 119:127; Prov. 8:10). Chaymi pacienciakuspa bibliataqa hinalla leenanchik hinaspa estudiananchik (Sal. 1:2).

16. ¿Imaynatam Diostawan Jesusta qatipakuchwan?

¹⁶ Bibliata estudiaspanchikqa yuyaymanananchikmi yachasqanchikkunata imayna kasukunanchikpi. Jehova Dios mana pimanpas sayapakuq kasqanmanta yacharuspam kallpanchakuchwan maylawmantaña runamasinchikkuna kaptinpas kuyanapaq. ¿Imaynatam qatipakuchwan taytantawan runamasinkunata Jesuspa kuyasqanta? Diospa sutinta defiendenapaq imatapas aguantaspam, sasa kaptinpas iñiqmasinchikkunata yanapaspam hinaspa Diosmanta willakuspam, chaynapi runamasinchikkunapas Jesuspa wañukusqanwan achka bendicionkunata chaskinankupaq.

17. ¿Imamantam qatiqnin yachachikuypi yachasun?

¹⁷ Ñuqanchikrayku Jesuspa wañukusqanta astawan entiendespaqa hinaspa valoraspaqa astawanmi Jehova Diostawan churin Jesusta kuyasun. Paykunapas astawantaqmi kuyawasun (Juan 14:21; Sant. 4:8). Chaynaqa, hinallayá bibliatawan qillqanchikkunata estudiasun, chaynapi ñuqanchikrayku Jesuspa wañukusqanmanta astawan yachanapaq. Qatiqnin yachachikuypim yachasun ñuqanchikrayku Jesuspa wañukusqanwan ima bendicionkunata chaskisqanchikmanta. Yachasuntaqmi kuyawasqanchikrayku churinta kachamusqanmanta Jehova Diosta imayna agradecekunamantapas.