1. ¿Imaynam kanku yaqa llapallan runakuna?

 KUNAN tiempopi yaqa llapallan runakunam kikillankupaq munaqkuna kanku. Chaymi internetpi churanku imakuna ruwasqankuta, rantisqankuta hinaspa haypasqankuta lliw runa yachananpaq. Ichaqa as runakunallam Jehova Diostaqa hatunchanku. Chayraykum kay yachachikuypi yachasun Jehova Dios hatunchay imayna kasqanmanta hinaspa imakunarayku hatunchanamanta. Yachasuntaqmi Jehova Diosta hatunchanapaq imakuna ruwanamantapas chaynataq kikin imaynata sutinta hatunchananmantapas.

¿IMAKUNATA RUWASPAM JEHOVA DIOSTA HATUNCHACHWAN?

2. ¿Imaynatam Jehova Dios Sinai urqupi qawachikurqa hatunchanapaq kasqanta? (Qawaytaq dibujotapas).

² Bibliapim willawanchik Jehova Diosqa admirakuypaq hinaspa hatunchanapaq kasqanmanta. Chayna kasqantam astawanraq qawachikurqa Israel runakunata Egipto nacionmanta hurqumusqan qipallata. Chay kutipim millonnintin Israel runakuna Sinai urqupa sikinpi huñunasqa kachkarqaku Diospa ima nisqanta uyarinankupaq. Chay urqutam yanay-yanay puyu tapaykurqa, allpapas katkatatarurqam, urqum nina hina qusnikurqa, manchakuypaqta tunrururumuptinmi llipyaykuna karqa, hinaspapas carneropa waqranpa waqasqanmi uyarikurqa (Ex. 19:​16-18; 24:17; Sal. 68:8). Tukuy chaykuna pasasqanwan hatunchanapaq kasqanta Dios qawachikuptinqa mayna admirasqachá karqaku.

3. ¿Imakunata ruwaspam Jehova Diosta hatunchachwan?

 ³ Chayna admirakuypaq kasqanraykum hukkunatapas yanapachwan Diosta hatunchanankupaq. Chaypaqmi yachachinanchik ancha atiyniyuq hinaspa imayna sunquyuq Diosninchik kasqanmanta. Diostaqa hatunchachwantaqmi atiyninwan yanapawaptillanchik imapas ruwasqanchik allin lluqsisqanmanta hukkunaman willaspanchikpas (Is. 26:12). Chaynata ruwaspam kamachiq Davidta qatipakunchik, paymi llapallan Israel runakunapa qayllanpi Diosta mañakuspan nirqa: “Hanaq pachapiwan kay pachapi tukuy ima kaqkunapas qampam Jehova Dioslláy. Qamqa kanki mayna hatunmi, mayna atiyniyuqmi, mayna suma-sumaqmi, mayna kanchariqmi hinaspa mayna hatunchanapaqmi”, nispa. Mañakuyta tukuruptinmi “llapallan runakuna [ . . . ] Jehova Diosta hatuncharqaku” (1 Cron. 29:​11, 20).

4. ¿Imaynatam Jehova Diosta Jesus hatuncharqa?

⁴ Jesuspas kay pachapi kachkaspanmi tukuy imapi taytanta hatuncharqa. Ima milagrotapas ruwaspanqa taytanpa atiyninwan ruwasqantam nirqa (Mar. 5:​18-20). Taytantaqa hatunchaqtaqmi paymanta rimasqanwanpas hinaspa hukkunawan imayna kasqanwanpas. Huk kutipim Jesusqa huñunakuna wasipi yachachichkarqa, chaypim kachkarqa 18 wataña demoniopa ñakarichisqan warmi. Paymi derechakuyta mana atispan kurkunpalla karqa. Chayna kasqanqa ancha llakikuypaqmi karqa. Chaymi Jesusqa llakipayaykuspan kuyakuywan nirqa: “Mamáy, chay unquynikimantam sanoña kanki”, nispan. Makinkunata payman churaykuptinmi warmiqa chaylla derechakuruspan “Diosta hatunchayta qallaykurqa” (Luc. 13:​10-13). Chay warmiqa Jehova Diostam anchata agradecekurqa kaqmanta sano hinaspa kallpayuq kasqanmanta. ¿Imakunaraykum ñuqanchikpas Jehova Diosta hatunchachwan?

¿IMAKUNARAYKUM JEHOVA DIOSTA HATUNCHANCHIK?

5. ¿Imakunaraykum Jehova Diosta respetanchik?

⁵ Anchata respetasqanchikraykum hatunchanchik. Respetanchikqa tukuy atiyniyuq kasqanraykum hinaspa kallpan mana tukuq kasqanraykum (Sal. 96:​4-7). Tukuy ima unanchasqankunapim ancha yachayniyuq kasqan qawakun, paytaqmi quwarqanchik vidatapas hinaspa tukuy ima necesitasqanchikkunatapas (Apoc. 4:11). Payqa serviqninkunaman nisqanman hina ruwaqmi (Apoc. 15:4). Paypa imapas ruwasqankunaqa allinmi lluqsin, hinaspapas prometekusqankunata cumpliqmi (Jos. 23:14). Chayraykuchá paymanta willakuq Jeremiaspas nirqa: “Nacionkunapi yachayniyuqkunamantaqa hinaspa llaqtakunapi yachayniyuqkunamantaqa manam pipas qam hinaqa kanchu”, nispa (Jer. 10:​6, 7). Diosmanta tukuy imakunata yachasqanchikkunaraykum paytaqa anchata respetanchik. Ichaqa manam respetayllachu-respetanchik, aswanqa imayna kasqanta yachaspam anchata kuyanchik.

6. ¿Imanasqam Jehova Diosta kuyanchik?

⁶ Tukuy sunquwan kuyasqanchikraykum hatunchanchik. Imayna sunquyuq kasqanta yachasqanchikraykum paytaqa anchata kuyanchik. Bibliam niwanchik llakipayakuq kasqanta (Sal. 103:13; Is. 49:15). Imawanpas llakisqa kaptinchikqa paypas anchatam llakikun (Zac. 2:8). Payman asuykuspa amistadnin kanapaqmi yanapawanchik (Sal. 25:14; Hech. 17:27). Chaymantapas humilde kasqanraykum ‘kurkuykamun puyukunapa kasqantawan allpa pachata qawamunanpaq, payqa kurkuykamun mana imayuq runata allpamanta  sayariykachinanpaqmi’ (Sal. 113:​6, 7). ¿Pitaq chayna Diosta mana hatunchanmanchu? (Sal. 86:12).

7. ¿Imapaqmi hukkunata yanapachwan?

⁷ Hukkuna riqsinankuta munasqanchikraykum hatunchanchik. Satanasmi Diosmanta llullakunata chiqirachin, hinaspapas runakunapa yuyaynintam tutayarachin (2 Cor. 4:4). Chaymi achka runakuna ninku imapas ruwasqanchikmanta Jehova Dios castigawasqanchikta hinaspa paypa huchanrayku tukuy mana allinkuna pasasqanta. Ñuqanchikmi ichaqa mana chayna kasqanta yachaspanchik runamasinchikkunata yanapachwan imayna Dios kasqanta yachanankupaq, chayta ruwaspanchikmi Diosta hatunchachkanchik (Is. 43:10). Qatiqninpim rimasun Salmos 96 capitulopa wakin versiculonkunamanta, chaykunapim rimachkan Jehova Diosta hatunchaymanta. Chaymi yanapawasun tukuy ruwasqanchikwanpas Diosta hatunchanapaq.

¿IMAKUNATA RUWASPARAQTAQ JEHOVA DIOSTA HATUNCHACHWAN?

8. ¿Imaynatawanraqmi Jehova Diosta hatunchachwan? (Rimarimuytaq Salmos 96:​1-3 nisqanmantapas).

⁸ (Leey Salmos 96:​1-3). Rimasqanchikwanmi Diosta hatunchachwan. Chay versiculokunapim niwanchik Jehova Diospaq takinapaq, sutinta hatunchanapaq, libraykuwaqninchik kasqanmanta allin willakuyta willakunapaq hinaspa ancha riqsisqa kasqanmanta nacionkunapi willakunapaq. Bibliata qillqasqanku tiempopipas Diosman sunqu judiokunawan Jesuspa qatiqninkunam Diospa sutinta defienderqaku hinaspa paykunarayku allin kaqkunata Dios ruwasqanmanta rimarqaku (Dan. 3:​16-18; Hech. 4:29). ¿Imakunatam paykunamanta yachachwan?

9, 10. ¿Imatam yachanchik Angelinamanta? (Qawaytaq fototapas).

⁹ Rimarisun Estados Unidos nacionmanta iñiqmasinchik Angelina a llamkayninpi mana manchakuspa Diospa sutinta defiendesqanmanta. Chayllaraq llamkayman yaykuruptinmi wakinkunatawan kuskata nirqaku huñunakuypi riqsichikunankupaq. Chaymi payqa Jehova Diospa testigon kasqanwan kusisqa kasqanmanta yachanankupaq wakin fotokunata akllarurqa pantallapi qawachinanpaq. Ichaqa pay manaraq rimachkaptinmi huknin llamkaqmasin willakurqa tayta-maman testigo kasqanta, hinaspapas imapi creesqanchikmantam burlakurqa. Angelinam nin: “Paypa  ima nisqanta uyariruspaymi ima ninaymanta manchakuywan karqani, ichaqa nikurqanim: ‘Manam munanichu Jehova Diosmanta ima nisqanta creenankutaqa. Manam upallakusaqchu. Jehova Dios imayna kasqanmantapunim imam kaqta nisaq’”, nispa.

¹⁰ Llamkaqmasin rimayta tukuruptinmi Angelinaqa sunqullanpi Diosta mañakurqa. Chaymantam kuyakuywan nirqa: “Ñuqapa tayta-mamaypas Jehova Diospa testigonmi, warmacha kasqaymantaraqmi Diosmanta yachachiwarqaku. Kunankamapas hinallaraqmi testigo kani”, nispa. Llamkaqmasinkuna imataña niptinkupas payqa hawkallam karqa. Puntatam iñiqmasinchikkunawan kuska Diosta servisqanmanta akllasqan fotokunata qawachirqa, hinaspanmi creesqanchikmanta respetowan defienderqa (1 Ped. 3:15). Angelina rimayta tukunanpaqqa testigokunamanta burlakuq llamkaqmasinqa hawkayarurqam, hinaspam paypas nirqa testigokunawan kaspan kusisqa kasqanta yuyarisqanmanta. Angelinam nin: “Pipas llullakunata niptin Jehova Diosta defiendeyqa ancha kusikunapaqmi”, nispa. Ñuqanchikpas kusikuywanmi Diosta hatunchanchik hukkuna paymanta mana allinkunata niptinkupas.

11. ¿Imaynatam Diosta serviqkunaqa ñawpaqmantaraq Salmos 96:8 nisqanta kasukurqaku?

¹¹ (Leey Salmos 96:8). Imapas kapuqninchikwanmi Diosta hatunchachwan. Ñawpaqmantaraqmi Diosta serviqkunaqa chayta ruwarqaku (Prov. 3:9). Israel runakunam qurita hinaspa qullqita qurqaku Diospa wasinta ruwanankupaq hinaspa cuidanankupaq (2 Rey. 12:​4, 5; 1 Cron. 29:​3-9). Jesuspa wakin qatiqninkunapas paytawan apostolninkunatam yanaparqaku “kapuqninkuwan” (Luc. 8:​1-3). Apostolkunapa tiemponpi iñiqkunapas sasachakuypi tarikuq iñiqmasinkutam yanaparqaku imapas kapuqninkuwan (Hech. 11:​27-29). Kunanpas kapuqninchikmanta imallatapas quspanchikmi Diosta hatunchachwan.

12. ¿Imaynatam kapuqninchikwan Jehova Diosta hatunchanchik? (Qawaytaq fototapas).

¹² Rimarisunyá qullqi churasqanchikwan Jehova Diosta imayna hatunchasqanchikmanta. 2020 watapim Zimbabue nacionpi mana para kasqanrayku millonnintin runakuna yarqaypi karqaku. Priscam chayna yarqay kachkaptinpas sapa miercoles hinaspa viernes Diosmanta willakuq. Chaytaqa manam saqirqachu tarpuy tiempopas. Diosmanta willakusqanta qawaspankum vecinonkunaqa burlakuspa niqku: “¡Mana tarpukusqaykiraykum  yarqaymanta wañurunki!”, nispanku. Paymi ichaqa niq: “Jehova Diosqa manam serviqninkunataqa haykapipas saqinchu”, nispa. Chaymanta qipallatam iñiqmasinchikkunaqa qullqi churasqanchikwan chay nacionman yanapakuyta chayachirqaku. Chay yanapakuyta Prisca chaskiruptinmi vecinonkunaqa admirakuspa nirqaku: “Ciertotamiki Diosnikiqa mana saqisusqankichu. Paymantayá astawan yachaykachiwayku”, nispa. Chaymi qanchis vecinonkuna huñunakuykunaman riyta qallaykurqaku.

13. Salmos 96:9 nisqanman hinaqa, ¿imayna kawsakuspam Jehova Diosta hatunchachwan?

¹³ (Leey Salmos 96:9). Imayna kawsakusqanchikwanmi Diosta hatunchachwan. Sacerdotekunaqa Diospa wasinpi servinankupaqqa limpiom kananku karqa (Ex. 40:​30-32). Ñuqanchikpas pachanchikpiwan cuerponchikpi limpio kanapaqmi kallpanchakunanchik, astawanmi kawsakuyninchik Diospa munasqanman hina kananpaqqa (Sal. 24:​3, 4; 1 Ped. 1:​15, 16). Tukuytam ruwananchik ‘ñawpaq vidanchikta’ saqispa ‘musuq runa hinaña’ kananchikpaq. Huk rimaypiqa, Diospa chiqnisqan kaqkunata saqispam pay hina piensanapaq hinaspa munasqanman hina imatapas ruwanapaq kallpanchakunanchik (Col. 3:​9, 10). Diospa yanapakuyninwanqa huchallapi purikuq hinaspa piña-piña runakunapas cambiaspankum musuq runa hinaña kanmanku.

14. ¿Imatam Yackmanta yachachwan? (Qawaytaq fototapas).

¹⁴ Kunanñataq rimaykusun Yackmanta. Paytaqa piña-piñallaña hinaspa manchakuypaq kasqanraykum “demoniowan” sutichaqku. Llumpay mana allinkunata ruwasqanraykum wañunanpaq sentenciarurqaku. Ichaqa wañuchisqa kananta suyaspanmi carcelpi yachachiq iñiqmasinchikwan biblia estudiayta qallaykurqa. Yackqa imayna kasqanta cambiaspanmi bautizakururqa. Qalaypaq cambiaruptinmi carcelpi guardiakunapas paytaqa allinpaqña hapirqaku. Chaymi wañuchisqa kanan punchaw chayaramuptinpas waqarqakuraq. Chaypi llamkaq soldadom nirqa: “Yackqa llapallan presokunamantapas aswan manchakuypaqmi karqa, kunanmi ichaqa llapallan presokunamantapas allin qawasqaña”, nispa. Wañurachisqankumanta qatiqnin semanatam iñiqmasinchikkunaqa huñunakuyta ruwaspanku cuentata qukururqaku  mana haykapipas riq preso chaypi kasqanta. Chay presoqa Yackpa cambiasqanmanta anchata admirakuruspanmi Diosta servinanpaq ima ruwananmanta yachayta munarqa. Arí, imayna kawsakusqanchikwanmi Diostaqa hatunchachwan (1 Ped. 2:12).

¿IMAYNATAM KIKIN DIOS SUTINTA HATUNCHANQA?

15. ¿Imatam Jehova Diosqa ruwanqaña kay pachapipas chaynataq hanaq pachapipas sutinta hatunchananpaq? (Rimarimuytaq Salmos 96:​10-13 nisqanmantapas).

¹⁵ (Leey Salmos 96:​10-13). Salmos 96 capitulopa tukuyninpim nin Jehova Dios allin ruwayman hina juzgaq kamachiq kasqanta. ¿Imaynatam Diosqa sutinta hatunchanqaña? Allin ruwaq kasqanrayku enemigonkunata chinkachispanmi. Payqa sutinta pinqayman churaq pantay religionkunatam chinkachinqa (Apoc. 17:​5, 16; 19:​1, 2). Chayta qawaqkunamanta wakinqa ichapas ñuqanchikwan kuska Diosta serviyta munanqaku. Chaymantam Diosqa Armagedonpi tukuy mana allinkunata chinkachinqa. Chay punchawmi payta chiqniqkunata hinaspa sutinta pinqayman churaqkunata chinkachinqa. Ichaqa salvaykunqam payta kuyaqkunataqa, kasukuqkunataqa hinaspa sutinta hatunchaqkunataqa (Mar. 8:38; 2 Tes. 1:​6-10). Chaymantam waranqa wata Jesus kamachiyta qallaykunqa. Kamachiyta tukuruptinñataqmi satanaspas, mana allin runakunapas wiñaypaq chinkachisqaña kanqaku. Chaymi Diosqa sutinta hatunchanqa kay pachapipas chaynataq hanaq pachapipas. Chay tiempopiqa “imaynam lamar quchatapas yaku pampaykun, chaynam kay allpa pachatapas atiyniyuq Jehova Diospa yachaynin pampaykunqa” (Hab. 2:14).

16. ¿Imatam ruwayta munanki sutinta Dios hatunchanan punchaw chayamunankama? (Qawaytaq dibujotapas).

¹⁶ ¡Mayna kusikuypaqraq kanqa llapallanchik Diospa sutinta hatunchayninchikqa! Chaykamaqa kunanpas tukuytam ruwananchik rimasqanchikwan chaynataq ruwasqanchikwan Diosta hatunchanapaq. Chayta sapa kuti yuyarinanchikpaqmi Diospa llaqtanpi punta apaqkunaqa tantiarunku Salmos 96:8 nisqan 2025 watapaq texto kananpaq. Chaypim nin: “Jehova Diospa sutintayá hatunchaychik”, nispa.