¿IMATAM RUNAKUNA NINKU?

Achka runakunam ninku iñiyqa Diospi creeylla kasqanta. Ichaqa Diospi imanasqa iñisqankumanta tapuykuptinkuqa ninkum warma kasqankumantapacha tayta-mamanku chaynata yachachisqankumanta. Chaymi paykunaqa mana chiqap iñiyniyuq runakuna hina kanku.

¿IMATAM BIBLIA NIN?

‘Iñiyqa suyasqanchikta chiqaptapuni chaskinanchikpaq suyaymi, chaynataq mana rikusqanchik kaqta chiqappaq hapiymi’ (Hebreos 11:1, CQ12). Imatapas mana iskayrayaspa suyanapaqqa allintam yachananchik imarayku suyasqanchikmanta. Chay ninantam bibliaqa nin: ‘suyasqanchikta chiqaptapuni chaskinanchikpaq suyaymi’, nispa. Chaymi iñiyqa, imatapas mana iskayrayaspa yachaywan suyay.

“Diospa mana rikuy atina kaqninkunapas, wiñaypaq atiyninpas chaynataq Dios kayninpas, kay pacha unanchasqa kasqanmantapunim tukuy ima unanchasqankunapi riqsichikun” (Romanos 1:20, CQ12).

¿IMATAM BIBLIA NIN?

‘Mana iñiyniyuq kaspaqa Diostaqa manam agradachwanchu. Diosman asuykuspaqa pay kasqantam creena, creenataqmi maskaqninkunataqa favorecesqanmantapas’ (Hebreos 11:6).

Rimamusqanchikpi hinapas achka runakunam Diospiqa creenku warma kasqankumantapacha tayta-mamanku yachachisqankurayku. Diosmi ichaqa munan paypi iñiqkunaqa llapallanku paymanta sumaqta yachanankuta chaynataq Dios paykunata kuyasqanmanta mana iskayrayanankuta. Chayraykum bibliaqa sapakamata anchata kallpanchawanchik Diosmanta allinta yachananchikpaq.

“Diosman asuykuptikichikqa paypas asuykusunkichikmi” (Santiago 4:8).

¿IMATAM BIBLIA NIN?

“Iñiyqa uyariptinchikmi hamun” (Romanos 10:17, CQ12). Chaymi iñiyniyuq kanapaqqa Diosmanta bibliapi yachachisqankunata allinta “uyarina” utaq yachana (2 Timoteo 3:16). Bibliamanta yachayta qallaykuspaqa allintam yachanki kay tapukuykunamanta: “¿Pitaq Diosqa? ¿Imaynatam yachachwan chiqaptapuni Dios kasqanta? ¿Kuyawanchikchu? ¿Imatataq hamuq punchawkunapi runakunapaq ruwanqa?”.

Jehova Diospa testigonkunaqa munaymankum bibliamanta yachachiytaqa. Chaymi internetpi lluqsiq direccionniykupi nin: “Testigokunaqa munanikum runakuna Jehova Diosmanta imam kaqta yachanankuta, ichaqa manam pitapas hikutanikuchu testigo kanankupaqqa. Aswanmi kuyakuywan qawachiniku bibliapa chiqap yachachiyninkunata. Sapa estudiaqmi tanteakunanku bibliapi yachasqanta ruwayman churananpaq utaq manapas”, nispa.

Chaynaqa imapipas iñisqaykiqa kanan bibliawan sumaqta yachasqaykiman hinam. Chayta ruwaspaqa ñawpaq tiempopi runakuna hinam kasun. Paykunam “gustollawanña Diospa palabranta uyarispanku sapa punchaw bibliata estudiarqaku: ‘¿Chiqapchu kay runakunapa willawasqanchik?’ nispanku” (Hechos 17:11).

‘Chay wiñay kawsayniyuqqa kanku sapallan chiqap Dios kasqaykita riqsiqkunam hinaspa kachamusqayki Jesucristota riqsiqkunam’ (Juan 17:3).