MAQUINAKUNATA ruwaq ingenierokunam ancha admirasqa kanku sisipa tukuy ima apasqanmanta, kay sisim kikinpa llasayninmanta mastaraq siminpi tukuy imakunata apan. Chay sisimanta allinta yachanankupaqmi Ohio (Estados Unidos) llaqtapi kaq universidadpi ingenierokuna sisipa cuerpon imayna kasqanmanta qawanankupaq huk maquinata ruwarqaku. Chay maquinawanmi qawarqaku imaynatam chay sisipa kunkan kikinpa llasayninmantapas tukuy ima apasqanmanta (microtomografía computarizada, utaq micro TC nisqa maquinawan).

Sisipa kunkachanmi cuerponpaq ancha allin, chay kunkachanmi yanapan simichanpi llumpay llasaqta apaptin, ¿imanasqa? Kunkachanpim kachkan ankuchakuna, chay ankuchakunam cuerpochantawan umachanta sumaqta hapinachin. Chaymanta yachaspanmi huk ingeniero nirqa: “Chayna sumaq hapinachisqa kasqanmi yanapan kunkachan maymanpas kuyunanpaq. Kunkachanpi ankuchakuna sumaq hapinasqa kasqanqa yanapantaqmi llumpay llasaqta siminpi imatapas apananpaq”, nispa. Sisi uruchakunamanta yachaq runakunam astawan estudiachkanku sisipa kunkachanmanta, chaynapi robot maquina nisqankuta aswan allintaña ruwanankupaq.

¿Ima ninkitaq? Sisipa kunkachan sumaq hapinasqa kaspan llumpay llasaqta siminpi apasqanqa, ¿kikillanmantachu rikurirqa icha unanchasqachu karqa?