Tayta-mamakuna wawa-churikichikta yachachiychik hinaspa corregiychik, yachachiychiktaq respetakuq kanankupaq hinaspa kuyakuq kanankupaqpas, chaynata yanapaptikichikqa yuyayniyuq kaspankum allinta tantianqaku.

Kunan tiempopi tayta-mamakunaqa “warmaytam sientirachisaq” nispankum mana corregiyta munankuchu. Kuyakuq tayta-mamakunam ichaqa mana chaynataqa piensanankuchu, aswanqa warmankunata corregispam uywananku.

Pamelam nin: “Warmakunata taksankumanta allinta uywaptinchikqa yuyayniyuq kaspankupas allintam kawsakunqaku, mana chaynata uywaptinchikmi ichaqa ima sasachakuymanpas chayarunmanku”, nispa.

Ama amiychikchu. Warmaykichik mana allinta ruwaruptinqa ama amiruspayá hinalla rimapayaychik, allinta ruwaruptinñataq alabaykuychik.

Cristinmi nin: “Kunan tiempopi warmakunaqa mana kasukuqllañam kanku chaymi warmaykuna ima nisqaytapas kasukuptinkuqa alabaykuni, chayta ruwasqayraykum wawaykunaqa rimapayaptiypas uyarikunku”, nispa.

BIBLIAPIM NIN: “Runaqa imapas tarpusqantam cosechanqa”, nispa (Galatas 6:7).

Allinta tantiaychik. Tayta-mamakuna churi-wawaykichiktaqa correginaykichik watankuman hinam hinaspa imapas ruwasqankuman hinam. Manataqmi warmaykichiktaqa yanqapas-yanqaqa qaqchachkanaykichikchu. Warmaykichik celularllamanña utaq pukllayllamanña qukuruptinqa niwaqchikmi: “Celulartaqa hapinkichik utaq pukllankichikqa kay horamanta kay horakamallam”, nispaykichik.

Wendelmi nin: “Warmay mana allinta ruwaruptinqa yachaykuniraqmi llullanta utaq pantaruspan mana allin ruwarusqanta, chaynapi llullanta ruwaruptinqa corregiykunaypaq”, nispa.

BIBLIAPIM NIN: “Taytakuna, amayá churikichiktaqa piñachiychikchu, chaynapi sunqunkupi mana hukmanyarunankupaq”, nispa (Colosenses 3:21).

Kuyakuq kaychik. Kuyakuywan warmaykichikta rimapayaptikichikqa kasukusunkichikmi.

Danielmi nin: “Warmayku pantaruptinqa kallpanchakunikum sunqunta tiyaykachinaykupaq, hinaspapas rimapayaykuspaykum manaña kaqmanta ruwananpaq niniku”, nispa.

BIBLIAPIM NIN: ‘Pipas kuyakuqqa pacienciakuqmi, hinaspa allin sunquyuqmi’, nispa (1 Corintios 13:4).