¿Huchallikurunkichu chuya espiritupa contranpi?

“Kanmi wañuyman apakuq huchapas.” (1 JUAN 5:16.)

1, 2. ¿Imaynatam yachanchik Diospa chuya espiritunpa contranpi huchallikurunanchikmanta?

“CHUYA espiritupa contranpipaschá huchallikuruni nispaymi llakisqallaña tarikuni”, chaynatam Alemania nacionniyoq warmi qellqarqa. Kay nisqanqa mana creenapaqpas hinam, Diosta serviq warmim payqa karqa. Chaynaqa, ¿atinmanchu cristianopas Diospa chuya espiritunpa otaq kallpanpa contranpi huchallikuyta?

² Bibliaqa niwanchikmi kay huchataqa rurarunchikmanmi nispa. Jesucristom nirqa: ‘Diosqa pampachanqam llapallan huchallikuqkunata chaynataq kamiqninkunatapas, chuya espirituta kamiqkunatam ichaqa mana haykapipas pampachanqachu’, nispa (Mateo 12:31). Niwanchiktaqmi “yachachkaspaña huchapiraq kawsaptinchikqa manañam hucharayku huk ofrendaqa kanñachu, aswan mancharikuypaq juicio suyayllañam” (Hebreos 10:26, 27). Apostol Juanpas nirqataqmi: “Kanmi wañuyman apakuq huchapas”, nispa (1 Juan 5:16). Ichaqa hatun huchata pipas ruraruspanqa, ¿kikin huchallikuq runachu tanteakunan huchan “wañuyman apakuq” kasqanmanta?

Wanakuspaqa pampachasqam kasun

3. ¿Imatam qawachinman huchallikurusqanchikmanta llumpay llakisqa tarikusqanchik?

³ Jehová Diosmi huchallikuqkunapa mana igualay atina allin Juezninqa. Chaymi llapallanchik cuentata qosunchik, yachanchiktaqmi Payqa haykapipas allin ruraqlla kasqanta (Genesis 18:25; Romanos 14:12). Jehová Diosllam ninman rurarunchikchu icha manachu mana pampachay atina huchataqa, chayraykum paylla chuya espirituntapas qechuruwanchikman (Salmo 51:11). Yuyarinanchiktaqmi sichu huchallikurusqanchikmanta llumpay llakisqa tarikuspanchikqa, yaqapaschá cheqapta huchanchikmanta wanakurunchik. Ichaqa, ¿ima ninantaq cheqaptapuni wanakuyqa?

4. a) ¿Imataq wanakuyqa? b) Salmo 103:10-14 nisqan, ¿imanasqam consuelawanchik?

⁴ Wanakuyqa mana allin ruraykunata hinaspa mana allinkuna ruranapaq piensaykunata tikraymi. Chaynataq huchanchikkunamanta pesakuspa mana allin rurasqanchikkunata saqeymi. Sichu hatun huchata rurarunchik  hinaspa sonqomantapuni wanakuruptinchikqa, consuelawanchikmi salmistapa kayna qellqasqan: Jehová Diosqa “manam huchanchikman hinachu castigawanchik. Manam mana allin rurasqanchikman hinachu pagawanchik. Imaynam cielokuna allpamanta alto-altopi kachkan, chaynam respetaqninkunapaq kuyapayakuyninpas hatu-hatun kachkan. Intipa qespimunantam intipa seqaykunanmanta karuncharun. Chaynam mana kasukusqanchiktapas ñoqanchikmanta karuncharun. Imaynam tayta churinkunata llakipayan, chaynam Tayta Diospas respetaqninkunata llakipayan. Payqa yachanmi imamanta rurasqa kasqanchikta. Payqa yuyanmi allpamanta rurasqa kasqanchikta” (Salmo 103:10-14).

5, 6. Pisillapi rimariy 1 Juan 3:19-22 nisqanmanta hinaspa willay kay textopa ima niy munasqanta.

⁵ Consuelawanchiktaqmi apostol Juanpa kayna nisqanpas: ‘Kaynatam yachanchik cheqap kaqpi kasqanchikta chaymi paypa ñawpaqninpi confianzallawanña kasunchik. Conciencianchik acusawaptinchikqa [. . .] payqa lliwtam yachan. Kuyasqallaykuna, conciencianchik mana acusawaptinchikqa Diosninchikpa qayllanpiqa manam manchakunchikchu. Payñataqmi tukuy ima mañakusqanchikta qowasunchik, payqa qowasunchik kamachikuyninkunata kasukuspa paypa munasqanta rurasqanchikraykum’ (1 Juan 3:19-22).

⁶ Wawqe-paninchikkunata kuyaspanchikmi hinaspa huchallikuyllapiña mana purispanchikmi yachanchik “cheqap kaqpi kasqanchikta” (Salmo 119:11). Imamantapas sonqonchik acusawaptinchikqa, yuyarisun Diosmi sonqonchikmantaqa “lliwtam yachan”. Payqa yachanmi “cheqaptapuniña wawqe-paninchikkunawan” kuyanakusqanchikta, mana huchallikunapaq chaynataq munayninta ruranapaq kallpanchakusqanchiktapas, chayraykum llakipayawanchik (1 Pedro 1:22). Wawqe-paninchikkunata kuyaspa chaynataq yachachkaspa mana huchallikuspa Jehová Diospi confiakuptinchikqa, sonqonchikqa manam acusawasunchu. Chaynapim ‘mana manchakusunchu’ Diosninchikta mañakuspapas. Payñataqmi uyariwanchik kamachikuyninkunata kasukuptinchik.

Chuya espiritupa contranpi huchallikuqkuna

7. ¿Imaynatam yachanchikman runapa huchallikusqan pampachasqa otaq mana pampachasqa kananta?

⁷ ¿Ima huchakunataq mana pampachay atina? Kay tapukuyta kutichisun Bibliapi kaq ejemplokunawan. Kaykunam consuelawasunchik hatun hucha rurasqanchikmanta wanakuruspapas hinalla llumpay llakisqa tarikuptinchikqa. Runapa huchallikusqan pampachasqa otaq mana pampachasqa kananta yachanapaqqa manam huchallikusqallantachu yachananchik, aswanqa imarayku rurasqanta hinaspa sonqonpi imayna kasqanta chaynataq yachachkaspa maykama huchallikusqantawanmi.

8. ¿Imaynatam Judiokunapa sacerdotenkuna chuya espiritupa contranpi huchallikurqaku?

 ⁸ Jesuspa tiemponpim Judiokunapa sacerdotenkuna mana allinta munaspanku Jesucristopa contranpi hatarirqaku, chaynatam chuya espiritupa contranpi huchallikurqaku. Paykunaqa rikurqakum Diospa espiritunwan Jesuspa milagrokuna rurasqanta, chay milagrokunam Jehová Diosta hatuncharqa, chay milagrokuna rurasqantañataqmi Satanaspa atiyninwanmi rurachkan nirqaku. Jesuspa nisqanman hinaqa, Diospa chuya espiritunpa contranpi kamispa huchallikuqkunaqa “kay tiempopipas nitaq hamuq tiempopipas” mana pampachay atina huchatam rurarurqaku (Mateo 12:22-32).

9. ¿Imataq kamiyqa, hinaspa imatam Jesusqa nirqa chaymanta?

⁹ Kamiyqa mana allinta qawachiyta munaspa, insultaspa, runapa otaq chuya kaqkunapa contranpi rimaymi. Diosmi chuya espiritutaqa qon chaymi chuya espiritupa contranpi rimayqa Diospa contranpi rimay. Chay huchata ruraspanku mana wanakuqkunaqa manam pampachasqachu kanku. Mana pampachay atina huchamanta nispanqa, Jesusqa rimachkarqam Diospa espiritunwan imakunatapas rurasqanta yachachkaspanku contranpi kaqkunamantam. Jehová Diospa espiritunwan Jesuspa imakunatapas rurasqantam, Cristopa contranpi kaqkunaqa Diablopa atiyninwanmi rurachkan nirqaku. Chaynatam chuya espiritupa contranpi kamispa huchallikurqaku. Chaymi Jesus nirqa: ‘Chuya espiritu kamiqkunatam ichaqa mana haykapipas pampachanqachu, paykunaqa wiñaypaq huchayoqmi kanqaku’, nispa (Marcos 3:20-29).

10. ¿Imanasqataq Jesusqa Judasta nirqa ‘chinkananpaq kaqmi’, nispa?

¹⁰ Piensarisuntaq Jesusta traicionaq Judaspi. Judasqa mana allin ruraq kaspanmi waqaychananpaq qosqanku qollqeta suwakurqa (Juan 12:5, 6). Chaymantañataq Judiokunapa kamachiqninkunawan tanteanakurqa 30 qollqepaq Jesusta traicionananpaq. Traicionasqanmantaqa llakikururqam, ichaqa manam haykapipas yachachkaspa huchallikusqanmantaqa wanakurqachu. Chayraykum Judasqa manaña kawsarimunqañachu, chaymi Jesusqa payta nirqa, ‘chinkananpaq kaqmi’ nispa (Juan 17:12; Mateo 26:14-16).

Chuya espiritupa contranpi mana huchallikuqkuna

11-13. ¿Ima huchakunatam David rurarurqa Betsabeyta bañakuchkaqta qawaruspan? ¿Imaynatam consuelawanchik paykunapa huchankuta Jehová Diospa pampachasqan?

¹¹ Wakinpiqa kaymi pasakunman, huk cristianom congregacionpi ancianokunaman hatun huchanta willakuruspan yanapakuyta chaskiruspanpas hinallaraq llakisqa kachkanman (Santiago 5:14). Chayna pasawaptinchikqa Bibliapa willakusqanmanta yuyariymi allinpuni kanman, chaypim huchallikuq runakuna pampachasqa kasqankumanta willawanchik.

¹² Rimayta qallaykusun rey Davidmanta,  paymi Uriaspa warmin Betsabeywan Diospa contranpi hatun huchata rurarurqa. Davidmi wasinpa qatanmanta chay buenamoza warmita bañakuchkaqta rikururqa, chaymi runankunata kamachirqa palacionman pusamunankupaq hinaspam David paywan puñururqa. Wiksayakurusqanta yacharuspanmi, Davidqa tantearurqa imaynatapas Uriasta warminwan puñurachinanpaq, chaynapi huchanta pakananpaq. Ichaqa tanteasqanman hina mana lloqsiptinmi, Davidqa kamachirqa peleasqanpi Urias wañuchisqa kananpaq. Chaymi Urias wañuruptin Betsabeywan casarakurqa, payñataqmi wachakurqa qari wawata hinaptinmi chay wawa pisi tiempollamanta wañukurqa (2 Samuel 11:1-27).

¹³ Kunanñataq qawasun imaynatam Jehová Dios allicharqa Davidwan Betsabey huchallikusqankuta. Diosmi Davidpa huchanta pampachaykurqa, sonqomanta wanakusqanta qawaspan hinaspa Gobiernonpaq contratota paywan rurasqanrayku (2 Samuel 7:11-16; 12:7-14). Betsabeypas wanakusqantachá qawachirqa, chaymi Salomonpa maman karqa chaynataq paypa mirayninmanta Señorninchik Jesucristopas hamurqa (Mateo 1:1, 6, 16). Yuyarisun, huchallikuruspa huchanchikmanta wanakuruptinchikqa Jehová Diosqa yachanmi.

14. ¿Imaynatam Jehová Dios qawachirqa maykama hucha pampachaq kasqanta, Juda nacionpi kamachikuq Manasespa huchanta pampachaspan?

¹⁴ Jehová Dios maykama hucha pampachaq kasqanqa qawakuntaqmi, Juda nacionpi kamachikuq Manases runapipas. Kay kamachiqmi Jehová Diospa qayllanpi mana allinkunata rurarqa. Baal sutiyoq taytachapaqmi altarkunata rurarqa, yupaycharqataqmi “cielokunapi llapa lucerokunata”, hatarichirqataqmi templopa iskaynin pationpi taytacha-mamachakunata yupaychanapaq altarkunatapas. Churinkunatapas taytachapaqraqmi kañapurqa, espiritistakunatapas qallarichirqam hinaspa Juda nacionpi chaynataq Jerusalen llaqtapi runakunatam Diospa “chinkachisqan runakunamantapas astawanraqmi mana allinkunata rurachirqa”. Diosmanta willakuqkunapa rimasqankunatapas manam kasukurqachu. Tiempo risqanman hinam Manasesta Asiria nacionpa reynin presocharurqa. Preso kachkaspanmi huchanmanta wanakurqa hinaspam humillakuykuspan achka kutita Diosta mañakurqa. Chaymi Jehová Diosqa pampachaykurqa hinaspa Jerusalenpi kaqllamanta kamachikunanpaq churaykurqa, chaymantam kaqllamanta kallpancharqa cheqap yupaychayta (2 Cronicas 33:2-17).

15. ¿Apostol Pedropa ima rurasqanmi qawachin Jehová Diosqa huchata ancha ‘pampachaq’ kasqanta?

¹⁵ Chaynataq Jesuspa tiemponpipas, apostol Pedrom Jesusta negarusqanwan hatunta huchallikururqa (Marcos 14:30, 66-72). Jehová Diosmi ichaqa anchata ‘pampachaykurqa’ (Isaias 55:7). ¿Imanasqa? Sonqomantapuni  wanakusqanrayku (Lucas 22:62). Pichqa chunka punchaw pasaruptinmi Pentecostespi, Diospa pampachasqan sutilla qawakurqa chaymi Señorninchik Jesucristomanta willakunanpaq sumaq llamkayta chaskirqa (Hechos 2:14-36). Jehová Diosqa Pedropa huchanta pampachachkaspan, ¿manachu kunan tiempopi cristianokunatapas pampachaykunman tukuy sonqomanta wanakuptinkuqa? Salmistam takispan nirqa, Jehová Diosnilláy “mana allin rurasqaykuta yuyaptikiqa llapallaykuchiki castigasqa kallaymanku karqa. Ichaqa qamllam pampachaykuwankikuqa”, nispa (Salmo 130:3, 4).

Huchallikuchwanpas hina manchakuyta imaynatam chinkachichwan

16. ¿Imatam rurananchik huchanchikta Dios pampachawananchikpaq?

¹⁶ Chuya espiritupa contranpi huchallikuchwanpas hina manchakuptinchikqa, qawasqanchik ejemplokunam hawkayayta qowananchik, yachachiwanchiktaqmi sonqomanta wanakuqkunataqa Jehová Dios pampachasqantapas. Kaypaqqa allinpunim tukuy sonqowan Diosman orakuy. Huchallikuruspanchikqa, Jehová Diosta mañakusunchik pantaq runa kasqanchikta, hayka wataña servisqanchikta qawaspa, Jesuspa wañukusqanpi chaynataq llakipayakuq kasqanpi pampachaykuwananchikpaq. Jehová Dios ancha llakipayakuq kasqanraykum, huchanchikta pampachaykuwananchikpaq mañakuchwan (Efesios 1:7).

17. ¿Imatam huchallikuq cristiano ruranman espiritualpi yanapakuyta chaskinanpaq?

¹⁷ ¿Imatam ruranman pipas huchallikusqanwan espiritualpi hukmanyaruspan manaña mañakuytapas atispaqa? Chayna cristianomantam Santiago qellqarqa: Iñiqkuna ukupi ancianokunatayá qayaychik chaynapi Diosta mañapususpaykichik sutinpi aceitewan untasunaykichikpaq. Confiakuspa mañakuptinkuqa Jehová Diosmi onqoqta sanoyachispa sayarirachinqa, huchapi kaptinqa pampachaykunqam, nispa (Santiago 5:14, 15).

18. Congregacionmanta qarqosqa kaqkunapa huchallikusqanku, ¿mana pampachay atinachu kanman?

¹⁸ Chaynataq pipas huchallikuruspanqa congregacionmantam qarqorachikunman chay tiempokama huchanmanta mana wanakusqanrayku. Chayna kaptinpas manam chay hucha rurarusqanqa mana pampachay atinachu. Corinto llaqtapi ungido huchallikusqanrayku qarqorachikuqmantam apostol Pablo qellqarqa: “Chay runa corregisqaykichikqa chayllapaqñam. Chaynaqa pampachaykuspayá kallpanchaykuychik manaña llumpa-llumpay llakisqa kananpaq” (2 Corintios 2:6-8; 1 Corintios 5:1-5). Chaynaqa Jehová Dioswan allin kananpaqqa, chay huchallikuqmi Bibliawan ancianokunapa yanapasqankuta chaskinan hinaspa sonqomantapuni cheqapta wanakunan. Chaynataqmi vidanta tikraspa qawachinan huchanmanta wanakusqantapas (Lucas 3:8).

19. ¿Imatam rurananchik iñisqanchikpi allinta takyananchikpaq?

 ¹⁹ ¿Imataq chuya espiritupa contranpi huchallikusqanchikta piensachiwanchikman? Wakinpiqa piensachiwanchikmanmi, imawanpas onqosqanchik otaq imatapas allintapuni ruray munasqanchikpas. Chayna kaptinqa yanapawanchikmanmi allinta samasqanchik hinaspa orakusqanchikpas. Amayá haykapipas saqekusunchu Satanas hukmanyachiwaspanchik Dios servisqanchikta saqerachiwananchiktaqa. Jehová Diosqa manamá kusikunchu mana allin ruraq runakuna wañuptinqa, aswanraqchá serviqnin chinkaptinqa. Chaynaqa, chuya espiritupa contranpi huchallikuchwanpas hina manchakuspanchikqa, sapa kutiyá Bibliata estudiasun astawanraq consuelakuq Salmos librota. Chaynataq hinalla huñunakuykunaman hinaspa Diospa Munaychakusqanmanta predicaqpas risun. Chaynapim ‘iñisqanchikpipas [. . .] allinta takyasunchik’, manataq hukmanyachiwasunchu mana pampachay atina huchata ruraruchwanpas hina piensasqanchik (Tito 2:2).

20. ¿Imayna piensaymi yanapasunkiman Diospa chuya espiritunpa contranpi mana huchallikusqaykita?

²⁰ Chuya espiritupa contranpi huchallikunmankupas hina piensaqkunaqa kikinkum tapukunmanku: “¿Chuya espiritupa contranpi kamirqanichu? ¿Cheqaptachu huchaymanta wanakuruni? ¿Iñinichu hucha pampachaq Diospi? ¿Diospa llaqtanmanta lloqsiruspaychu Diospa yachay qosqanpa contranpi churakuruni?” Kaykunata tapukuspaykichikqa, cuentatachá qokunkichik Diospa chuya espiritunpa contranpi mana huchallikusqaykichikta nitaq Diospa llaqtanmanta lloqsispa contranpi mana churakusqaykichiktapas. Wanakuruspaykichik chaynataq Diosqa hucha pampachaq kasqanpi iñispaykichikqa, manam Jehová Diospa chuya espiritunpa contranpiqa huchallikunkichikchu.

21. ¿Ima tapukuykunatam qatiqnin estudiopi kutichisunchik?

²¹ ¡Mayna hawkayaypim tarikunchik chuya espiritupa contranpi mana huchallikusqanchikta yachaspaqa! Ichaqa kaymantam achka tapukuykunata rurakuchwan, kaykunam wakinkuna: “¿Yanapachikunichu Diospa chuya espiritunwan? ¿Chuya espirituman hinachu kawsachkani?” Kaykunam kutichisqa kanqa qatiqnin estudiopi.

¿Ima niwaqtaq?

• ¿Imanasqam nichwan chuya espiritupa contranpiqa huchallikuruchwanmi nispa?

• ¿Ima ninantaq wanakuyqa?

• Jesuspa tiemponpi, ¿pikunataq chuya espiritupa contranpi huchallikurqaku?

• ¿Imataq hawkayachiwasun mana pampachay atina huchata ruraruchwanpas hina manchakuptinchikqa?

[Kay yachachikuypa tapukuyninkuna]