Diospa munasqanman hina Kawsasunchik

“Cristoqa wañurqa llapallanchikpaqmi chaynapi kawsaqkunapas manaña kikillanchikpaq kawsa[nanchikpaq].” (2 CORINTIOS 5:15.)

1. ¿Imataq pasanman kasqa huk predicadorta willakusqan sitiopi?

AARON * sutiyoq predicadormi Africa lawpi uku llaqtachaman chaqwanakuypa qepata chayarusqakumanta yuyarin. Paymi nin: “Chay lawpi wawqe-paninchikkunamanta mana imatapas yacharqanikuchu, hinaspa imayna kasqankuta yachayta munarqaniku. Mikuytawan pachata chaynataq Bibliamanta qellqakunata apaspaykupas aparqanikutaqmi Los testigos de Jehová... la organización tras el nombre * nisqan videota. Chay llaqtachapi hatun chukllapi kasqa ‘videota’ qawanapaq televisionninku hinaptin chaypim chay videota qawachirqaniku hinaspa achkallaña runakuna qawakuq hamuptinku llapanku qawanankupaq iskay kutikamam qawachirqaniku. Qawasqanku qepataqa achkam Biblia estudiayta munarqaku. Chayman rinaykupaq kallpanchakusqaykuqa manamá yanqapaqchu karqa” nispa.

2. a) ¿Imanasqataq cristianokunaqa Diosman qokunku servinankupaq? b) ¿Ima tapukuykunamantam qatiqninpi yachasunchik?

² ¿Imanasqataq Aaronqa willaqmasinkunapiwan chay sasa kaqta rurarqaku? Jesucristo ñoqanchikta salvawananchikpaq wañusqanta agradecekuspanku Diosman qokuykusqaku hinaspa munasqanman hina kawsayta munarqaku. Paykuna hinam Diosman qokusqa serviqninkunaqa kallpanchakunchik “manaña kikillanchikpaq kawsaspa”, aswanqa ‘tukuy imatam ruranchik Cristomanta allin noticia willakunanchikpaq’ (2 Corintios 5:15; 1 Corintios 9:23). Yachanchikmá kay pacha puchukaptin qollqepas chaynataq ancha reqsisqa kaypas mana imapaqpas kananta. Chaymi kallpanchik largawasqanchikman hina kallpanchakuspa Diospa munasqanman hinam kawsayta munanchik (Eclesiastes 12:1). ¿Imaynatam chaytaqa rurachwan? ¿Imaynatataq kallpanchakusunchik chaynataq qarinchakusunchikpas Diosta servinanchikpaq? ¿Imakunatam Diosta servispa ruraytaqa atichwan?

¿Imakunatam rurananchik?

3. Willay imakunatam rurana Diospa munayninta ruranapaq.

³ Cheqap cristianokunaqa kawsananchikkama Diospa munaynintaqa rurananchikpaqmi hapinchik. Chaypaqqa puntatam Diosmanta Willanapaq Yachachiq Escuelapi discurso qonapaq qellqachikuna, sapa punchawpas Bibliata leena, Diosmanta willakuqpas lloqsina chaymanta bautizakunapaqpas kallpanchakunam. Diosta serviypi ñawparisqanchikman hinam apostol Pablopa nisqantam yuyarinanchik, paymi nirqa: “Chaytaqa  sonqoykipiyá allinta takyachiy, chaynapim llapallanku qawanqaku imaynam aswan-aswan ñawpaqman risqaykita” nispa (1 Timoteo 4:15). Chay ñawparisqanchikqa manam alabakunanchikpaqchu aswanqa manaña kikinchikpaq ruraspa Diospa munasqanta rurasqanchikta qawachinanchikpaqmi. Ñawparisqanchikwanqa qawachinchik Diosña ñoqanchikpi nanachikusqanta. Chaymantapas manam pipas neganmanchu Diosqa aswan allinta kawsachiwasqanchikmanta (Salmo 32:8).

4. ¿Imaynatam atipachwan yanqakunamanta preocupakuyta?

⁴ Ichaqa iskayrayaspaqa otaq kikinchikmanta llumpayta preocupakuspaqa Diosta servisqanchikpi ñawparinanchiktam harkawanchikman (Eclesiastes 11:4). Chaymi Diostapas chaynataq runamasinchiktapas kusikuspa servinanchikpaqa, puntatam ima hukmanyachiwasqanchikta atipananchik. Erik sutiyoq wawqenchikmi tanteakuchkarqa huklaw nacionniyoq rimaqkunapa congregacionpi yanapananpaq. Sapa kutim tapukuq: “¿Allinchu paykunawan kasaq? ¿Agradoypaqchu wawqe-panikunaqa kanqaku? ¿Agradonkupaqchu ñoqapas kasaq?” nispa. Yuyarintaqmi: “Chaymantam cuentata qokurqani kikillaypaq preocupakunaymantaqa wawqe-panikunapi astawan piensanayta. Hinaptinmi tantearurqani chaykunamanta preocupakunaymantaqa wakinkunata tukuy ima atisqaypi yanapanaypaq kallpanchakunayta. Yanapawananpaqmi Diosman mañakurqani hinaptin tanteasqayman hina rurarqani. Chay rurasqayqa alli-allinpunim karqa. Chay congregacionpi servispaymi anchata kusikuni” nispa (Romanos 4:20). Chaynamiki, Diosta chaynataq runamasinchikta mana imata suyaspa astawan servinanchikpaq kallpanchakuspanchikqa aswan kusisqachá kasunchik.

5. ¿Imanasqataq allinta tanteakunanchik Diospa munasqanman hina kawsayta munaspaqa? Willay hukpa rurasqanmanta.

⁵ Diospa munasqanman hina kawsananchikpaqa allintam tanteakunanchik imam rurananchikta. Allinmá kanman allillamanta achkata manukuymanta cuidakuyqa, mana chayqa kay pachapi kaqkunaqa sasachawanchikmanmi Diosta servinanchikta manukusqanchik sasa pagana kaptin. Bibliaqa anyawanchikmi: “Prestaq runañataqmi munaychakun prestakuqninpi” nispa (Proverbios 22:7). Allinkunata rurananchikpaqa Jehová Diospim hapipakunanchikqa hinaspa imamantapas llalliriqtaqa paytam servinanchikqa. Guoming sutiyoq wawqepa rurasqanta qawasunchik. Payqa iskay paninwan mamanpiwanmi yachanku arriendomanta achka qollqeta pagana llaqtapi chaynallataqmi llamkay tariypas sasam. Wakin kutikunapiqa mana llapanku llamkayta tariptinkupas yanapanakustinmi mana llumpayta sasachakuspa kawsarqaku kapuqnillankuta allinta servichikuspanku. Guomingqa ninmi: “Wakin kutikunapiqa nadalla qollqeyku kaptinpas, hinallam Diostaqa astawan serviypi kallpanchakurqaniku chaynallataqmi mamaykutapas allinta cuidarqaniku. Mamaykuqa manamá apukunapa kaqninkuta mañakuqchu Diosta servisqaykuta saqenaykuta mana munaspan, chaytam paytaqa anchata agradecekuniku” nispa. (2 Corintios 12:14; Hebreos 13:5.)

6. ¿Pipa rurasqanmi qawachiwanchik Diospa munasqanman hina kawsananchikpaq imam rurana kasqanta?

⁶ Kay pachapa kaqninkunapi, negociopipas  otaq ima ruraypipas afanasqa kaspaqa anchatachiki kallpanchakunanchik kanqa Diospa munasqanman hina kawsananchikpaq. Manamá qonqayllamantaqa chayna rurayta atisunchu, chaymi iskay kimsa kutita pantaruspaqa manamá mana ruray atina kasqanpaqchu hapina. Koichi sutiyoq wawqenchikmi sasachakuchkarqa: kusikuyllapi tiemponta usuchispan. Mozo kayninpi Bibliata estudiaspanpas videopi pukllanapaq vicioman achka watata qokuykusqa. Hinaptinmi huk punchaw tapukuykurqa: “¿Imapitaq rikukuni? 30 watay maspiñam kachkani ichaqa manam imatapas allintaqa ruraniraqchu” nispa. Chaymanta Koichiqa kaqmantam Bibliata estudiayta qallaykurqa hinaspa congregacionpi wawqe-paninkunawan yanapachikurqapas. Allinyananpaqa unaytam kallpanchakurqa, chaywanpas manam atipachikurqachu. Diosman sapa kutilla mañakuspan chaynataq wawqe-panikuna kuyakuywan yanapaptinku vicioman qokusqanta atiparqa (Lucas 11:9). Kunanñataqmi Koichiqa kusisqam kachkan congregacionninpi siervo ministerial nisqan hina servispan.

Cabalta ruraq kaytayá yachasunchik

7. ¿Imanasqataq Diospa munayninta rurananchikpaqqa allin tanteakuq kananchik?

⁷ Jehová Diosta servinanchikpaqqa tukuy imatapas rurananchikmi. Munayninta cabalta rurananchikpaqqa manamá mana munastinqa ruranachu nitaq qellapakunanchikpaschu (Hebreos 6:11, 12). Chayna kaptinpas Jehová Diosqa manam munanchu payta servispanchik pisiparunanchikta, hukmanyarunanchikta nitaq kusikuyninchik menosyarunantapas. Diospa munayninta kikinchikpa kallpanchikwan mana ruray atisqanchikta reqsipakuspanchikqa, qawachikunchikmi allinta tanteakuq kasqanchikta hinaspa astawanraqmi Jehová Diostaqa hatunchanchik (1 Pedro 4:11). Cheqaptamá Jehová Diosqa munayninta rurananchikpaq kallpanchawananchikta prometewanchik, ichaqa manapunim ruraq tukunanchikchu paypa mana mañawasqanchiktaqa (2 Corintios 4:7). Diosta mana pisipaspa hinalla servinanchikpaqqa yachaywanmi imatapas rurananchik.

8. ¿Imaynataq huk paninchikqa kachkarqa Jehová Diostawan kay pachata serviyta munaspan, hinaspa imakunata rurarqa allinña kananpaq?

⁸ Asia lawpi intipa qespimunan lawninmanta Ji Hye sutiyoq paninchikqa iskay watam llumpayta sasachachiq llamkaywan Diosta astawan servinanpaq kallpanchakurqa. Nillanmi: “Anchatam kallpanchakuq karqani Jehová Diosta servinaypaqpas chaynataq llamkaynipipas, ichaqa sapa punchawmi pichqa horasllatam puñuq kani. Tiempopa risqanman hina hukmanyasqallañam rikurirurqani. Pisiparuspaymi Diosta servinaypaq mana kallpaypas karqañachu chaymi Jehová Diosta servispayqa manaña kusikuq kani” nispa. Jehová Diosta ‘tukuy sonqonwan, tukuy vidanwan, tukuy yuyayninwan hinaspa tukuy kallpanwan’ servinanpaqmi paninchikqa llamkayninmanta lloqsikuspan hukta menosta llamkananpaq maskakurqa (Marcos 12:30). Payqa nintaqmi: “Aylluymi achka qollqeta gananaypaq hikutawaq karqa, ñoqam ichaqa Diosta chaynataq munaynintapas puntata maskaypim kallpanchakurqani. Hinallaraqmi mantienekunaypaq chaynataq sumaq pachatapas rantikunaypaq qollqeta ganakuni. ¡Ima allinmá miskita puñuyqa! Kunanqa  kusisqallañam Diostapas servini hinaspa aswan allinraqmi paywanqa kachkani. Chaynam kakuni kay pachapa kusikuyninkunallata chaynataq kuyayllapaq kaqninkunata manaña qawa-qawaptiymi” nispa. (Eclesiastes 4:6; Mateo 6:24, 28-30.)

9. ¿Imaynatam runamansinchikta predicacionman lloqsisqanchikwan yanapanchikman?

⁹ Manamá llapanchikchu Diostaqa precursor hina servichwan. Machuyaspa, onqospa otaq imawanpas sasachakuspa Diosta tumpa menosllata servispaykiqa amayá chaywanqa hukmanyaychu. Jehová Diosqa allinpaqmi hapin tukuy sonqoykimanta kallpanchakuspayki servisqaykita (Lucas 21:2, 3). Chaymantapas amayá yanqapaqa hapisunchikchu predicacionman lloqsispanchik runamasinchikta yanapasqanchikta maskiña rurasqanchik ñoqanchikta asllata hina rikchakuwaptinchikpas. Piensarisunchikyá, icharaqpas huk rato predicachkarqanchik hinaptinqa manam pipas willakusqanchikta uyariyta munanman. Ichaqa predicasqanchik qepatapas otaq qepa punchawkunatapas runakunaqa punkun mana kichaqkunapas hinallam rimanqaku watukusqanchikmanta. Manamá llapallankuchu allin noticia willakusqanchikta uyariwasunchikchu wakinmi ichaqa (Mateo 13:19-23). Wakin runakunachá qepa tiempotaña Diosmanta yachayta munanmanku vidankupi imapas pasaruptin otaq kay pacha imayna kasqantapas qawarispa. Imaynaña kaptinpas predicacionpi kallpanchakuspanchikqa Diospa munaynintam rurachkanchik. Astawanraqpas “Diospa llamkaqmasinmi” kanchik (1 Corintios 3:9).

10. ¿Imatam congregacionpi llapallanchik rurayta atichwan?

¹⁰ Chaymantapas llapanchikmi ayllunchikta chaynataq congregacionpi wawqe-paninchikkunatapas yanapaytaqa atichwanmi (Galatas 6:10). Aswanraqpas rurasqanchikqa paykunata wiñaypaqpas yanapanmanmi (Eclesiastes 11:1, 6). Congregacionpi ancianokuna chaynataq siervo ministerial kaqkunapas kallpanchakuspankuqa wawqe-panikunata yanapankupuni iñiyninkupi. Takyanankupaq, chayna kaptinmi Diosta servisqanchikqa yapanqa. Bibliaqa kallpanchawanchikmi ‘Señorpa rurayninpi’ aswanta llamkaptinchikqa rurasqanchikqa “manam yanqapaqchu kanqa” nispa (1 Corintios 15:58).

Diospa munayninta munayninchikta hinayá hapisunchik

11. Congregacionninchikpi servinanchikmantapas, ¿imakunam ruranapaq kanman Diosta astawan servinanchikpaq?

¹¹ Cheqap cristianokunaqa kawsaytam munanchik chaymi Diosta hatunchaspam kawsakunchik (1 Corintios 10:31). Diospa Munaychakusqanmanta allin noticiata willakuypi chaynataq Jesuspa kamachisqanta kasukunankupaq runamasinchikta yachachiypipas afanakuspanchikqa, astawanraqchá Diosta servinanchikpaq rurana kanqa (Mateo 24:14; 28:19, 20). Congregacionninchikpi yanapananchikmantaqa predicaqkuna mana achka kasqan sitiokunapi otaq huklaw llaqtachakunaman rispapas yanapayta atichwanmi. Soltero kaq ancianokunapas chaynataq siervo ministerial kaqkunapas Sapaqchasqa Kaqkunapi Diosta Servinankupaq Wawqekunata Preparaq Escuelaman riyta atinmanku chaymanta allin qespisqa wawqekuna mana kasqan congregacionkunapi yanapakunmanku nacionninkupipas otaq huklaw nacionpipas.  Jehová Diosta astawan serviypi kallpanchakuq casarasqa wawqe-panikunapas Bibliamanta Astawan Yachanapaq Galaad nisqa sutiyoq Escuelaman riyta atinmanku chaymanta predicadorkuna hina servinmanku. Chaymantapas tukuy sonqonkuwan kikinkumanta yanapakuqkunataqa qayachinmanku Betel wasipi, Salonkunata hatarichiypi otaq allichaypipas yanapanankupaq.

12, 13. a) ¿Imataq yanapasunkiman Diosta astawan servinaykipaq imam ruranaykita akllakunaykipaq? b) Willakuy Diosta servispa wawqe-paninchikkunapa huk sitiopi yachasqankuqa imaynatam yanaparqa huklawpipas allinta yanapanankupaq.

¹² ¿Imaynata hina Diosta astawan servinaykipaq qamqa akllakunki? Jehová Diosman qokusqa serviqnin hina, sapa kutillayá paypa chaynataq llaqtanpa yanapakuyninta maskay. Diospa ‘chuya espiritunpas’ yanapasunkim allin ruraq kanaykipaq (Nehemias 9:20). Diosta servispa imapas rurasqanchikqa huktaña rurananchikpaqmi yanapawanchik, chaymanta imapas yachasqanchikqa chaynataq yachaywan tukuy imata ruraq kananchikpaq huk sitiopi yachasqanchikqa huklawpipas yanapawanchikmi.

¹³ Yachasunchikyá Salonkunata hatarichiypi llamkaq wawqenchik Dennis warmin Jennymanta. Estados Unidos nacionpi sur lawninta Katrina nisqa sutichasqa sinchi wayra-para llaqtata purmarachisqan qepatam paykunaqa yanapana kaqkunata yanapanankupaqmi rirqaku. Dennisqa ninmi: “Salonkuna hatarichiypi yanapasqaykupi yachasqaykuwanmi wawqe-paniykunata yanaparqaniku, chaymi anchata kusichiwaqku. Wawqe-paninchikkunapa kuyapayakuyninmi kusikuymanta waqachiwarqaku. Purmasqa wasikunata kaqmanta hatarichiypi wakin runakuna yanapaypi kallpanchakusqankuqa nadallam karqa. Jehová Diospa testigonkunam ichaqa pichqa waranqa kimsa pachaq tumpa masnin wasikunata chaynataq achka Salonkunatapas allicharqaniku otaq kaqmanta hatarichirqaniku. Runakunaqa kayta qawaspankum Diosmanta willakuptiyku uyariyta munarqaku” nispa.

14. ¿Imatam rurawaq Diosta precursor hina serviyta munaspaqa?

¹⁴ ¿Imanasqataq mana kallpanchakunkichu precursor hina Diosta astawan servispa munayninta ruranaykipaq? Chayta ruraspaqa achka bendicionkunatam chaskikunki. Chayta ruranaykipaq kunan mana atispaykiqa, icha yapapaq arreglokunata ruraruwaqpas. Nehemias hinayá mañakuy, paymi Diospa munayninta rurananpaq nirqa: “Ruegakuykim Señorlláy, [. . .] Kay sirvienteki imapas rurasqay allin lloqsinanpaqyá yanapaykuway” nispa (Nehemias  1:11). Chaymanta ‘mañakuqkunata Uyariykuq’ Diospi hapipakuy, chaymantañataq mañakusqaykiman hina ruray (Salmo 65:2). Ama qonqakuychu: astawan servinaykipaq kallpanchakusqaykita Jehová Diosqa bendecinanpaqqa, kikikim puntataqa kallpanchakunayki. Hinaptin astawan Diosta servinaykipaq tanteakuruspaykiqa amayá imawanpas harkachikuychu. Tiempopa risqanman hina allin yachayniyoq kanki, chaywanmi astawanraq kusikunki.

Allinpaq kawsakuy

15. a) ¿Imaynatam yanapawanchik unay watata Diosta servisqanku wawqe-panikunamanta willakuykuna? b) Wawqe-panikunamanta willakuykuna qellqakusqanmanta hukta qamta kallpanchasusqaykimanta willay.

¹⁵ ¿Imaynataq kawaq Diospa munasqanman hina kawsaspaqa? Jehová Diosta unay watata serviq wawqe-panikunawan rimariy, astawanqa achka watata Diosta astawan serviqkunawan. ¡Ima sumaqmá chaynataq allinraqpas paykunapa rurasqankuqa! (Proverbios 10:22.) Willasunkikuchá Jehová Diosqa imaynatam yanapaykusqanmanta hinaspa imaynam ancha sasachakuypipas mana imatapas pisichipuspan astawanraq masta qosqanmanta (Filipenses 4:11-13). 1955 watamanta 1962 watakama La Atalaya nisqa sutiyoq revistapim Diosman sonqo wawqe-panikunamanta willakuqta qellqakurqa, chaytaqa “Siguiendo tras mi propósito en la vida” (Allinpaq kawsakuspay) nispam sutichasqa karqa. Chay tiempomanta qepataqa achkataraqmi wawqe-paninchikkunamanta willakuykunata qellqakurqa. Chay llapallan willakuykunapim cuentata qokunchik Bibliapi Hechos libropi willasqanman hina tukuy sonqonkuwan chaynataq kusisqapas wawqe-panikunapa servisqankuta. Chay sumaq willakuykunata leespaykichá piensanki: “¡Chaynatamá ñoqallaypas kawsakuyta munani!” nispa.

16. ¿Imatam cristianoqa ruranman astawan kusikuspa allinpaq kawsananpaq?

¹⁶ Qallariyllapi Aaron sutiyoq wawqenchikmanta willasqanchikmi nin: “Africa lawpiqa allinpaq kawsakuyta munaspanku llaqtan-llaqtanta illaq achka mozo-sipaskunatam reqsirqani, yaqa llapallankum ichaqa mana chaynatachu kawsakurqaku. Ñoqaykum ichaqa Jehová Diospa munasqanman hina Munaychakusqanmanta allin noticiata predicaq kaspayku sumaqllataña chaynataq kusisqapas kawsakuq kaniku. Chaymá ñoqaykuqa niymanku ima chaskiqmantapas aswan kusisqaqa imapas qoqmi” nispa (Hechos 20:35).

17. ¿Imanasqataq Diospa munasqanman hina kawsananchik?

¹⁷ Qamqa, ¿imayna kawsakuytataq munanki? Diosta astawan servinaykipaq mana kallpanchakuptikiqa tukuy imaymana ruraykunapiña afanakuyta qallaykuwaq. ¿Imapaqtaq tiempoykita usuchiwaq Satanaspa pachanpi yanqakunata haypaypi kallpanchakuspa? Chaylla “llumpa-llumpay ñakariy” qallaykuptinqa kay pachapi tukuy imayoq kaypas chaynataq ancha reqsisqa kaypas yanqapaqmi kanqa. Chaypiqa Jehová Dioswan allin kayninchikmi aswan allinqa kanqa. Hinaptinqa ¡maynataraqchá kusikusunchik Jehová Diostawan runamasinchikta servisqanchikmanta hinaspa Diospa munasqanman hina kawsasqanchikmantapas! (Mateo 24:21; Apocalipsis 7:14, 15.)

[Willakuykuna]

¿Imaniwaqtaq?

• ¿Imaynatam Jehová Diosqa hapin kallpanchakuspa servisqanchikta?

• ¿Imaynatam Diosta chaynataq runamasinchiktapas servinanchikpaq allin arreglota rurayqa hinaspa allinta tanteakuypas yanapawanchikman?

• ¿Imakuna rurananchikpaqmi Diosta servispa rurananchikpaq kanman?

• ¿Imata ruraspam allinpaq kawsakuchwan?

[Kay yachachikuypa tapukuyninkuna]