“Diospa sonqonpi kaqkunatapas” Yachanapaq reqsisunchik

“Espirituqa tukuy chaykunata yachaspanmi reqsintaq Diospa sonqonpi kaqkunatapas.” (1 CORINTIOS 2:10.)

1. Rimariy imakunam kanman wakin yachachikuykuna chayllaraq Biblia estudiaqkunata kusichiq.

CRISTIANOKUNAQA yaqa llapallanchikmi yuyarinchik Bibliamanta chayllaraq cheqapta yachaspanchik kusikusqanchikta. Yachanchikmá imanasqam Jehová Diospa sutinqa aswan allin kasqanta, imanasqataq runakuna ñakarisqankuta Diosqa manaraq tukuchisqanta, imanasqam wakin runakunalla hanaq pachaman rinankupaq suyakuynin kanman hinaspa imataq suyakuynin kanqa Diosman sonqo wakin runakunapaq. Bibliataqa estudiaqpaschá karqanchik ichaqa kay tiempopi wakin runakuna hina manamá kaykunamantaqa entienderqanchikchu. Ñoqanchikqa karqanchik karullamanta yunkata otaq montañata qawaq runa  hinam. Karullamantaqa manam qawanchu imakuna chaypi kasqanta. Chayman chayaruspan chaynataq monte ukuman yaykuruspam ichaqa mana haykapipas piensasqan kaqkunatam qawan: machullay-machu sachakunata, tukuy rikchaq waytakunata, tukuy clase purun animalkunata hinaspa urukunata chaynataq admirakunapaq tukuy imakunatapas. Chaynallamá ñoqanchikpas karqanchik: Bibliamanta yachananchikpaq yanapawaptinchikqa chayllaraqmi “Diospa sonqonpi kaqkunatapas” yachaspanchik reqsirqanchik (1 Corintios 2:8-10).

2. ¿Imanasqataq Diospa Palabranmanta yachaspanchikqa wiñaypaq kusikusunchik?

² Hinaptinqa, ¿contentakuchwanchu Bibliamanta “pisillata yachaspanchik”? Bibliapiqa “Diospa sonqonpi kaqkunatapas” nispanqa Diospa yachayninmantam willachkan, chayqa runakunapaq pakasqa hina kachkaptinpas cristianokunamanmi ichaqa chuya espirituqa revelarqa (1 Corintios 2:7). ¡Mana tukuy atinamá Diospa yachachikuyninkunamanta yachayqa! Mana tukuy atina kaptinmi, Jehová Diospa imayna piensasqanta chaynataq rurasqantapas manam haykapipas llapallanmantaqa yachayta atisunchu. Bibliamanta yachanapuni kaq yachachikuykunamanta chayllaraq yachaspa kusikusqanchikman hina wiñaypaqchá kusikusunchik

3. ¿Imanasqataq allinta yachananchik imapi creesqanchikta?

³ Hinaspaqa ¿imanasqataq ‘Diospa sonqonpi kaqkunamantaqa’ yachananchik? Iñiyninchikta kallpanchanapaqqa manam creesqanchikmanta yachaylla-yachananchikchu, aswanqa yachananchikpunim imanasqataq chayna kasqanta. Cristianokunataqa Bibliam kallpanchan “sonqoykichikmantapuni otaq allin piensayninkuwan” kawsanankupaq chaymi “yachan[qaku] Diospa munasqanta, imam allin rurayta, imam agradonpaq kasqanta hinaspa imam allinpuni kasqanta” (Romanos 12:1, 2). Chaymantapas Jehová Diospa mañawasqanchikta imapaq kasqanta entiendespaqa chayllapunim kasukusunchikpas. Chaynaqa, ‘Diospa sonqonpi kaqkunamanta’ yachasqanchikqa kallpanchawasunchikmi mana huchallikunanchikpaq chaynataq “allinkuna ruray munaqllaña kananchikpaq” (Tito 2:14).

4. ¿Imaynatataq Bibliata allinta estudiana?

⁴ Hinaptinqa, Diospa sonqonpi kaqkunata yachananchikpaqqa estudiananchikmá. Estudiaspaqa manam leeyllachu-leena, aswanqa entiendenapaq hinam leena yachasqanchikkunamanta chay  leesqanchikpi imakunam astawan yachanapaq kaqpi reparaspa (2 Timoteo 1:13). Leesqanchikpa imamanta willasqantam entiendenanchik. Bibliata estudiaspanchikqa piensananchikmi imaynatam yanapawanchikman allinta kawsananchikpaq chaynataq runamasinchikta yanapananchikpaqpas. Hinaptin ‘Bibliapi llapallan qellqasqa kaqkunaqa Diospa Espiritunpa qosqan kaspan allinmi’, chaymi ‘Jehová Diospa llapa rimasqankunatam’ estudiananchik (2 Timoteo 3:16, 17; Mateo 4:4). Cheqapmá Bibliata estudianapaqqa anchata kallpanchakuna, chayna kaptinpas kusichiwanchikmanmi. Chaymantapas ‘Diospa sonqonpi kaqkunata’ entiendeyqa manamá llumpay sasachu.

Jehová Diosqa llampu sonqokunamanmi yachachin

5. ¿Pikunataq “Diospa sonqonpi kaqkunatapas” entiendenman?

⁵ Manamá pipas piensananchu ‘Diospa sonqonpi kaqkunata’ mana haykapipas entiendey atinanmanta escuelapi sasachakuq otaq estudiayta mana gustaq kaptinpas. Kay Pachapi Jesus kanankama, ¿pikunamanmi Jehová Diosqa munayninta yachachirqa? Manam yachayniyoqkunatawan entiendeqkunatachu, aswanqa ‘mana ancha educacionniyoq kasqankunamanmi’ paykunaqa Serviqnin Jesuspa yachachisqanta humillakuykuspa kasukuqkunam karqaku. Paykunamá allin educacionniyoq runakunapa qayllanpiqa warmachakuna hina karqaku (Mateo 11:25; Hechos 4:13). ‘Diosqa kuyaqninkunapaq alistasqanmanta’ willaspanmi apostol Pabloqa iñiqmasinkunata nirqa: “Tukuy chaykunatam Dios reqsichiwarqanchik Espiritunwan. Espirituqa tukuy chaykunata yachaspanmi reqsintaq Diospa sonqonpi kaqkunatapas” nispa (1 Corintios 2:9, 10).

6. 1 Corintios 2:10 nisqanpiqa, ¿imamantam chaypi willakuchkan?

⁶ ¿Imaynatataq Diospa espiritunqa “tukuy chaykunata yachaspanmi reqsintaq Diospa sonqonpi kaqkunatapas”? Bibliamanta yachachikuyninkunata sapakama cristianokunaman yachachinanmantaqa, Jehová Diosqa chuya espiritunwanmi llaqtanta nanachikun, chaymi chaynintakama hukllawasqa llaqtanta Bibliamanta yachachin (Hechos 20:28; Efesios 4:3-6). Allpantinpim congregacionkunaqa Bibliamanta estudianankupaq huk arreglota qatikunku, chaymi chayman hina iskay-kimsa watallapi Bibliamanta yachachikuykunata yuyarinku. Chaynatamá chuya espirituqa congregacionpi runakunata yanapan humillakuq kayta hatallinankupaq  hinaspa “Diospa sonqonpi kaqkunatapas” entiendenankupaq (Hechos 5:32).

Imakunataq kanman ‘Diospa sonqonpi kaqkunaqa’

7. ¿Imanasqataq achka runakuna “Diospa sonqonpi kaqkunatapas” mana entiendenkuchu?

⁷ ‘Diospa sonqonpi kaqkunataqa’ manamá sasa entiendena kaqpaqchu hapinanchik. Cheqapmá yaqa lliw runakunapaqmi pakasqa hina kachkan. Kayqa manam Diospa yachaynin sasa tarina kaptinchu, aswanqa Satanaspa engañasqan kaspanku Jehová Dios llaqtanwan yanapasqanta wischupakunku (2 Corintios 4:3, 4).

8. Diospa sonqonpi kaqkunamantaqa, ¿imakunamantam apostol Pabloqa Efeso congregacionman cartaspan 3 kaq rakiyninpi willarqa?

⁸ Apostol Pabloqa Efeso congregacionman cartaspanmi 3 kaq rakiyninpi qawachiwanchik ‘Diospa sonqonpi kaqkunaqa’ Jehová Diospa yaqa llapallan serviqninkunapa Bibliamanta suti reqsiylla yachachikuykuna kasqanta, wakinqa kanman pitaq prometesqa Miray kasqanmanta, Diospa Munaychakusqanpi Jesus gobiernasqanmanta chaynataq runakunamanta sapaqchasqa hanaq pachaman rinankupaq kaqkunamanta yachaypas. Pablom nin: “Kaykunataqa ñawpaq tiempopi runakunamanqa Diosqa manam reqsichirqachu, kunanmi ichaqa akllasqan apostolninkunaman hinaspa paymanta willakuqkunaman Espirituntakama reqsichin. Pakasqa kaqkunaqa kaymá: Jesucristomanta allin noticiawanmi mana judio kaqkuna judiokunapa herencia chaskiqmasinña rikurirun, paykunawan hukllaña kasqankuraykum Cristo Jesuspi Diospa promesan chaskiqmasinña karunku” nispa. Chaymanta Pabloqa willarqataqmi “tukuy imapas unanchaq Diosmi qallariymantapuni kikillanpaq waqaychakusqanta yachaykachiwarqa, pakasqa kaqtam kunawarqa llapallanman willakunaypaq” nispa (Efesios 3:5-9).

9. ¿Imanasqataq anchata kusikunapaq kanman “Diospa sonqonpi kaqkunatapas” entiendeyqa?

⁹ Pabloqa willarqataqmi Diospa munasqanqa “altokunapi [. . .] iñiqkunata hukllamanña huñunasqata qawaspanku yachanqaku Diosninchikqa mana haypay atina yachayniyoq kasqanta” nispa (Efesios 3:10). Jehová Diosqa llaqtanta nanachikusqanta qawaspankum angelkunapas Diospa yachayninmanta aswan allintaraq yachanku. ¡Maynataraqmá kusikunchikqa angelkunapa yachay munasqankumanta yachaspanchik! (1 Pedro 1:10-12.)  Chaymantapas Pabloqa kallpanchawanchikmi “llapallan iñiqkunawan kuska [. . .] mayna anchoch, mayna largoch, mayna ukuch hinaspa mayna hatuncha” Cristopi iñiyqa kasqanta entiendenanchikpaq (Efesios 3:11, 18). Chaynaqa Diospa sonqonpi kaqkunamanta manaraq yachasqanchikmanta wakillantapas yachasunchikyá.

Diospa sonqonpi kaqkunamanta wakin yachachikuykuna

10, 11. Bibliapi nisqanman hina, ¿haykapimantataq Diospa hanaq pachapi kaq ‘warmipa’ ‘mirayninmanta’ sapaqchasqa churin Jesus karqa?

¹⁰ Yachanchikmá Genesis 3:15 nisqanman hina Diospa hanaq pachapi kaq ‘warmipa’ ‘mirayninmanta’ sapaqchasqa kaqnin Jesus kasqanta. Chayta astawanraq entiendenanchikpaq tapukuchwanpaschá: “¿Haykapimantataq Jesusqa prometesqa Miray karqa? ¿Hanaq pachallapiraq kachkaspanraqchu icha kay pachapi runa hina nacespanchu icha bautizakuruspanchu icha wañusqanmanta kawsarimuspanchu?” nispa.

¹¹ Diosqa prometerqa hanaq pachapi kaq llaqtanman tupanaykachisqan ‘warmipa’ miraynin kananta hinaspa chay mirayqa culebrapa umanta chamchananta. Ichaqa waranqantin waranqantin wata qepataqa hanaq pachapi kaq ‘warmipaqa’ manaraqmi mirayninmanta chullallapas Satanasta chaynataq rurasqankunatapas chinkachiy atiq karqaraqchu. Chaymi willakuq Isaiasqa “mana wachakuq” chaynataq “llakisqa sonqoyoq” warmiwan tupanaykachirqa (Isaias 54:1, 5, 6). Tiempollampim ichaqa Belen sutiyoq llaqtachapi Jesus nacerqa. Chayna kaptinpas bautizakuspan chuya espiritupa akllasqan chaynataq Diospa sapaqchasqan churin kaptinña Jehová Diosqa nimurqa: “Paymi kuyasqay Churiy” nispa (Mateo 3:17; Juan 3:3). Chayraqmi warmipa ‘mirayninmanta’ sapaqchasqa kasqan rikuriramusqa. Chaymantañam Jesuspa qatiqninkunatapas chuya espirituqa akllaruspa sapaqcharurqa Diospa churinkuna hina kanankupaq. Una-unayña mana wachakuq kaspa llakikuchkaptinmi, Jehová Diospa hanaq pachapi kaq ‘warmiqa’ ‘kusikuywanña qaparinman’ karqa (Isaias 54:1; Galatas 3:29).

12, 13. Bibliapi ¿ima textokunataq qawachin sapaqchasqa cristianokuna kay Pachapi kawsanankukama “allin yuyayniyoq confianza sirviente” kasqanta?

¹² Chaymantapas Diospa sonqonpi kaqkunamanta revelawarqanchiktaqmi runakunamanta 144.000 runakunallata Diosqa akllasqanmanta (Apocalipsis 14:1, 4). Jehová Diospa testigonkunaqa  yachanchikmi sapaqchasqa cristianokunaqa kay Pachapi kawsanankukama “allin yuyayniyoq confianza sirviente” kasqankuta, paykunamantamá Jesusqa imam horapi sirvientemasinkunata “mikuchinanpaq” churasqanmanta nirqa (Mateo 24:45). Hinaptinqa, ¿Bibliapi qawachichwanchu kay nisqanchik chayna kasqanta? ¿Manachu kaynata nispanqa iñiqmasinkunaman yachachiq wakin cristianokunamantapas Jesusqa rimachkanman karqa?

¹³ Israel nacionmanmi Diosqa nirqa: “Qamkunam testigoy kankichik. Akllakusqay serviqniykunam kankichik” nispa (Isaias 43:10). Ichaqa tiemponchikpi 33 kaq watapi nisan sutiyoq killapa 11 kaq punchawninpim Jesusqa kay nacionta Diosqa wischupakusqanmanta willakurqa, chaymi paykunaqa manaña serviqninñachu karqaku. Chaymanta Israel nacionpi punta apaqkunaman nirqa: “Diospa munaychakusqanmanqa manam yaykunkichikñachu, chaymanqa yaykunqaku paypa munasqanman hina kawsaqkunañam” nispa. Runakunamanpas nirqataqmi: “Wasikichikpas chunninqaña” nispa (Mateo 21:43; 23:38). Chaynamá Israelpa mirayninkunaqa Jehová Diospaqa manamá allin yuyayniyoq confianza sirviente hinachu karqaku (Isaias 29:13, 14). Chaymá hina chay punchawllapi allin yuyayniyoq confianza sirvientemanta rimaspanmi Jesusqa yachachichkarqa huk nacionña Israel nacionpa rantinpi Diospa allin yuyayniyoq confianza sirvientenña kananmanta. Apostol Pedroñataq chaymanta sapaqchasqa cristianokunaman qellqaspanmi nirqa: “Qamkunam ichaqa kankichik akllasqa runakuna [. . .], Diosllapaqña kawsaq nacion hinaspa Diospa runankuna” nispa (1 Pedro 1:4; 2:9). Chaynaqa ‘Diospa cheqap akllasqankunam’ Jehová Diospa sirvientenña karqaku (Galatas 6:16). Ñawpaq Israel nacion huk ‘sirviente’ hinalla kasqankuman hinam, sapaqchasqa cristianokunapas kay Pachapi kawsanankukamaqa ‘allin yuyayniyoq confianza sirvientellam’ kanku. ¡Mayna kusikunapaqmi Diospa sirvientenkuna ‘mikuchiwachkanchikman’ hina yachachiwasqanchikqa!

Bibliata estudiayqa kusichiwanchikmanmi

14. ¿Imanasqataq Bibliata leeylla-leenamantaqa estudiayqa kusichiwanchikman?

¹⁴ Bibliamanta imatapas yachasqanchikmanta aswan allintaraq entiendespanchikqa kusikunchikmi iñiyninchik aswan allinta takyasqanta qawaspanchik. Chaymi Bibliataqa leeylla-leenamantaqa estudiaspam kusikuchwan. Chaynaqa  Bibliamanta qellqanchikkunata leespaqa kaynata tapukuwaqmi: “Yachasqaymantaqa, ¿imallatapas kay leesqayqa yachachiwanchu? ¿Bibliapi wakin textokunata otaq ima yachachikuytapas kay leesqaymanta astawan yachanaypaq yuyariymanchu?” nispa. Leesqaykiman hina imamantapas astawan yachanaykipaq tapukuspaykiqa, qellqaruspa qepa punchawtaña tiempochakuspayki chaymanta astawan estudiay.

15. ¿Imakunamanta allinta estudiaymi astawan kusichiwanchikman? Hinaptin, ¿imakunataq yanapawasun estudiasqanchik allinnichikpaq kananpaq?

¹⁵ ¿Imakunamanta astawan estudiaymi yanapawanchikman astawan yachananchikpaq chaynataq kusichiwanchikmanpas? Runakunapa allinninpaq Diospa contratonkuna rurasqanmantam aswan allinta estudiachwan. Chaymantapas Jesucristomanta willamuq willakuykunata otaq Bibliapi willakuqkunapa qellqasqanku librokunamanta hukllatapas qayllasmanta estudiachwanmi. Chaynallataqmi kay tiempopi Jehová Diospa testigonkunapa rurasqankumanta Los testigos de Jehová, proclamadores del Reino de Dios nisqa librota leespa estudiachwan. * Kaqtawanmi leechwanpas ñawpaq qellqakusqan La Atalaya nisqa sutiyoq revistapi “Preguntas de los lectores” (Leeqkunapa tapusqankumanta) nisqa willakuykunata, chaymá yanapawasunchik wakin textokunata alli-allinta entiendenanchikpaq. Chay willakuykunapi Bibliapa textokunawan imayna yachachisqanpiyá allinta reparasunchik. Chaynata ruraspanchikmi ‘entiendeqña kasunchik’ (Hebreos 5:14). Chaymantapas Biblianchikpi otaq sapaq papelchapi yachasqanchikmanta qellqaykuspaqa, estudiasqanchikqa allinninchikpaqmi kanqa chaynataq runamasinchikkunatapas yanapasunchikmi.

Churikichikta yanapaychik Biblia estudiasqankuwan kusikunankupaq

16. ¿Imaynatataq tayta-mamakunaqa churinkuta yanapanmanku Biblia estudiasqankuwan kusikunankupaq?

¹⁶ Tayta-mamakunaqa churinkutam kallpanchanmanku Diospa munayninmanta astawan yachaypi kallpanchakunankupaq. Manam haykapipas warmakunataqa hapinankuchu Diospa sonqonpi kaqkunamanta mana yachay atiqpaq. Churinkutaqa kallpanchanmanku imamantapas allinta estudiaspanku preparakunankupaq chaymanta familiapi estudiaspanku chay yachasqankumanta tapunmanku. Familiapi estudiaspa paykunawanmi  practicanmanku imapi iñisqankuta defiendenankupaq chaynataq yachasqanku cheqap kasqanta Bibliawan qawachinankupaqpas. Chaymantapas Veamos “la buena tierra” * nisqa sutiyoq folletowan yanapachikuspa yachachinmanku Bibliapi ñawpa tiempopi llaqtakuna maylawpim kasqanta willasqanmanta yachanankupaq hinaspa semanapaq Bibliamanta leesqanchikmanta willakuykunata allinta entiedenankupaq.

17. ¿Imanasqataq Bibliata astawan estudiananchikpaq allinta tanteakuspa tiemponchikta hapina?

¹⁷ Cheqaptamá Bibliata estudiananchikpaq kallpanchakuspanchikqa astawanmi iñiyninchikta takyachin. Chayna rurayqa mayna allinña kaptinpas manamá chaypaqqa tiemponchikta hapinanchikchu huñunakuykunapaq preparakunanchikmantaqa, huñunakuykunapimá Jehová Diosqa yachachiwanchik ‘allin yuyayniyoq confianza sirviententakama’. Chaynataq astawan estudiaspaqa huñunakuykunapipas allintam rimarisunchik Aslla Huñunakuspa Bibliamanta Estudiopi otaq Diosmanta Willanapaq Yachachiq Escuelapi semanpaq Bibliamanta leesqanchikmanta discurso qosqankupipas.

18. ¿Imanasqataq allinpuni ‘Diospa sonqonpi kaqkunamanta’ estudianapaq kallpanchakuyqa?

¹⁸ Chaynamá Bibliamanta estudiasqanchikqa yanapawasunmi astawan Jehová Diosman asuykunapaq. Diospa Palabranpunim chayna kasqanta qawachin: “Yachayniyoq runataqa yachayninmi defienden. Chaynataqmi kapuqniyoqtapas qollqen defienden. Chaywanpas yachayniyoq kaymi aswan allinqa. Yachayninmi allinta kawsachin chay runataqa” nispa (Eclesiastes 7:12). Chaynaqa ancha allinmi Diospa yachachikuyninkunamanta entiendenapaq kallpanchakuyqa. Chaymá sasa entiendena kaqkunata yachananpaq kallpanchakuqtaqa Bibliam nin: “Tarinkitaqmi Diospa yachayninta” nispa (Proverbios 2:4, 5).

[Willakuykuna]

¿Imaniwaqtaq?

• ¿Imakunataq kanman ‘Diospa sonqonpi kaqkunaqa’?

• ¿Imanasqataq Diospa sonqonpi kaqkunamantaqa mana haykapipas llapallanmantaqa yachayta atisunchu?

• ¿Imanasqataq cristianokunaqa ‘Diospa sonqonpi kaqkunataqa’ yachayta atichwan?

• ¿Imakunatataq rurachwan ‘Diospa sonqonpi kaqkunamanta’ astawan yachanapaq?

[Kay yachachikuypa tapukuyninkuna]