¿Yanapankichu Jehová Diospa llapallan kamachiq kasqanta?

“[Jehová] Diosmi gobiernachkan, nispayá willakuychik. Nacionkunapi runakunamanyá chaynata willakuychik.” (SALMO 96:10.)

1, 2. a) ¿Imam pasarqa 29 watapi? b) 29 watapi pasasqan, ¿ima rurananpaqmi Jesusta yanaparqa?

OCTUBRE killapim 29 watapi Jesus bautizakuptin, kay pachapi mana haykapipas pasakusqan rikukurqa. Ancha valorniyoqmi karqa, chaymi Bibliapi rikurin Jesuspa vidanmanta astawan willaq tawa librokunapi. Mateom kaynata willakun: ‘Jesusmi bautizarachikuspan yakumanta lloqsimurqa hinaptinmi hanaq pacha qonqayta kicharikuykuptin [. . .] [bautizaq Juan] rikururqa Diospa espiritunta paloma hina [Jesusman] uraykamuchkaqta. Hinaptinmi hanaq pachamanta nimurqa: Paymi kuyasqay Churiy. Payraykum kusisqa kachkani’, nispa (Mateo 3:16, 17; Marcos 1:9-11; Lucas 3:21, 22; Juan 1:32-34).

² Runa rikuchkaptin Diospa chuya espiritunta Jesus chaskisqanmi qawachirqa, kamachinanpaq Akllasqa kasqanta, huk rimaypiqa Cristo otaq Mesias kasqanta (Juan 1:33). ¡Chaynatam rikuriramurqa prometesqa ‘miray’! Chaypim bautizaq Juanpa qayllanpi Jesus kachkarqa, paytam talonninpi Satanas kachunan karqa, payñataqmi llapallan kamachiq Jehová Diospa enemigon Satanasta umanta chamchaspa chinkachinqa (Genesis 3:15). Chay tiempomantam Jesusqa allinta yacharqa ima rurananta: Diospa munasqanman hinam, Jehová Diospa llapallan kamachiq kasqanmantawan Gobiernonmanta cumplinan karqa.

3. ¿Imaynatam Jesus preparakurqa Diospa kamachisqanta rurananpaq hinaspa Diospa llapallan kamachiq kasqanta yanapananpaq?

³ Jordanmantam Jesus lloqsichkarqa Taytanpa kamachisqanta rurananpaq preparakuq, hinaptinmi  chuya espiritu purunman pusarurqa (Lucas 4:1; Marcos 1:12). Tawa chunka punchaw sapallan kasqanpim, anchata yuyaymanarqa Jehová Diospa llapallan kamachiq kasqanta Diablo yanqachasqanpi hinaspa Diospa kamachisqanta imayna defiendenanmantapas. Satanaspa kayna yanqachasqanmantaqa yacharqakum hanaq pachapi angelkunapas hinaspa kay Allpapi runakunapas. Chaynaqa allinmi kanman Jesuspa kasukusqanmanta yachayninchik hinaspa yuyaymanayninchik, chaynapi Jehová Dios llapallan kamachiq kasqanta imayna yanapanapaq hinaspa defiendenapaqpas (Job 1:6-12; 2:2-6).

Satanasmi Diospa llapallan kamachiq kasqanta yanqachan

4. ¿Satanaspa imayna tentasqanmi Jesusta astawan churarqa llapallan kamachiq Diospa contranpi kananpaq?

⁴ Jesuspa rurasqankunamanta Satanas yachaspanmi, “warmipa” ‘miraynin’ Jesusta pantachinanpaq utqayllaman contranpi churakurqa (Genesis 3:15). Chaymi Satanas kimsa kutikama tentaspan, Jesusta tanqarqa Taytanpa munasqanta qepancharuspan kikinpa munasqallantaña rurananpaq. Kimsa kaq tentasqanmi astawanqa Diospa llapallan kamachiq kasqanpa contranpi churakunanpaq karqa. Chaypaqmi Diablo “qawachirqa kay pachapi llapallan nacionkunata, qawachirqataqmi chay nacionkunapa sumaq kaynintapas”, hinaspam mana penqakuspa kaynata nirqa: “Tukuy kaykunatam qosqayki qonqorakuykuspa adorawaptikiqa”, nispa. Jesusqa yacharqam “kay pachapi llapallan nacionkunata” Diablo controlasqanmanta. Chaymi munachisqanta mana chaskirqachu, chaynatam qawachirqa llapallan kamachiq Diospa favorninpi kasqanta. Jesusmi nirqa: “Pasaway kaymanta Satanas, Bibliam nin: ‘Señor [Jehová] Diosllaykitam adoranki, payllatataqmi servinkipas’ ”, nispa. (Mateo 4:8-10.)

5. ¿Ima sasa kamachikuytataq Jesusqa ruranan karqa?

⁵ Señorninchik Jesucristoqa puntatam Jehová Diospa llapallan kamachiq kasqanta defiendenan karqa, kaytaqa sapa punchawmi rurarqa. Payqa allintam yacharqa Jehová Dios Llapallan kamachinanpaq derechoyoq kasqanta, chayta qawachinanpaqmi wañukunankama kasukunan karqa, otaq profeciapa nisqanman hina warmipa ‘mirayninta’ Satanas talonninpi kachunankama (Mateo 16:21; 17:12). Chaymantapas willananmi karqa imaynatam Jehová Diosqa Gobiernonwan  Satanasta chinkachinanmanta, hinaspa qallariyninpi hina hawkayay chaynataq sumaq kawsakuy kananmantapas (Mateo 6:9, 10). ¿Imaynatataq Jesus cumplinman karqa kay sasa kamachikuyta?

“Diospa munaychakunan tiempom hichparamunña”

6. ¿Imaynatam Jesus qawachirqa Jehová Dios Gobiernonta servichikuspan ‘Diablopa rurasqankunamanta librawananchikta’?

⁶ Chay kamachikuyta rurananpaqmi, ‘Jesusqa Galilea lawman rirqa Diospa munaychakusqanmanta allin noticiakunata willakustin, paymi nirqa: Tiempom chayaramunña. Diospa munaychakunan tiempom hichparamunña’, nispa (Marcos 1:14, 15). Nirqataqmi: ‘Diospa munaychakusqanmanta allin noticiataqa [. . .] willakunaymi, chaypaqmi ñoqataqa kamachimuwarqa’, nispa (Lucas 4:18-21, 43). Chaynatam rurarqa: lliw Israel llaqtapim “Diospa munaychakunanmanta willakustin purirqa” (Lucas 8:1). Chaymantapas achka milagrokunatam rurarqa: runakunata mikuchirqa, llumpay wayra-parata hawkayachirqa, onqosqakunata hampirqa hinaspa wañusqakunatapas kawsarichirqa. Chayna rurasqanwanmi Jesus qawachirqa, Eden huertapi Adanwan Eva mana kasukusqankurayku lliw ñakariykunata Dios chinkachinanmanta, chaynapi ‘Diablopa rurasqankunamanta librawananchikpaq’ (1 Juan 3:8).

7. ¿Ima ruranankupaqmi qatiqninkunata Jesus yachachirqa? ¿Imaynataq rurasqanku karqa?

⁷ Diospa Munaychakusqanmanta allin noticia runakunaman chayananpaqmi, Jesusqa qatiqninkunata imayna ruranankupaq yachachirqa. Puntatam chunka iskayniyoq apostolninkunata akllarqa hinaspam ‘kamachirqa Diospa munaychakusqanmanta willakamunankupaq’ (Lucas 9:1, 2). Chaymantañataq kamachirqa 70 qatiqninkunata kaynata willamunankupaq: “Diospa munaychakusqanqa hichpallaykichikpiñam kachkan”, nispa (Lucas 10:1, 8, 9). * Predicamusqankumanta kutiramuspa Jesusman kusisqallaña willakuptinkum, payñataq kaynata nirqa: “Arí, Satanastam rikurqani rayo hina cielomanta wichimuqta”, nispa (Lucas 10:17, 18).

8. ¿Imatam Jesus sutillata qawachirqa imayna kawsasqanwan?

⁸ Jesusqa Diospa Gobiernonpaqmi tuta-punchaw mana samaykuspa llamkarqa. Chaynataq imaymana  kapuqniyoq kaytapas saqerqa. Chaymi nirqa: “Kanmi atoqkunapa uchkun, kantaqmi alton pawaq urpikunapapas qesan, Diosmanta Hamuq Runapaqmi ichaqa mana kapuwanchu maypim puñuykunaypas”, nispa. (Lucas 9:58; Marcos 6:31; Juan 4:31-34.) Chaymantapas, tiempontaqa manam usuchirqachu. Ejemplopaq, wañukunan hichpaykamuchkaptinmi Poncio Pilatoman kaynata nirqa: “Chaypaqtaqmi hamurqani kay pachamanpas chaynapi cheqapmanta rimanaypaq”, nispa (Juan 18:37). Imayna kawsasqanwanmi Jesus qawachirqa imarayku kay Allpaman hamusqanta, payqa manam allin yachachiq kanallanpaqchu, milagrokuna ruranallanpaqchu otaq ñoqanchikrayku wañunallanpaqchu hamurqa. Aswanmi hamurqa Jehová Dios llapallan kamachiq kasqanta qawachinanpaq hinaspa imaynatam Dios munasqanta Gobiernonwan rurananmanta yachachinanpaqpas (Juan 14:6).

“¡Tukusqañam!”

9. ¿Imaynatam warmipa ‘mirayninta’ talonninpi Satanas kachurqa?

⁹ Diospa Gobiernonpaq Jesuspa rurasqanqa, enemigon Satanastam mana gustarqachu. Chaymi Satanas kay pachapi ‘mirayninkunawan’ yanapachikuspa —Politicawan chaynataq religionwan— warmipa ‘mirayninta’ chinkarachiyta munarqa. Nacesqanmanta wañukunankamam Jesusqa Satanaspa chaynataq runankunapa cheqnisqan karqa. Chaymi 33 watapi Jesusta Enemigon talonninpi kachurqa otaq wañuchirqa (Lucas 18:31-33). Bibliapi Jesusmanta astawan rimaq tawa librokunam willakun imaynam Satanasqa servichikurqa —Judas Iscarioteta, sacerdotekunapa jefenkunata, Diospa leynin yachachiqkunata, fariseokunata hinaspa Roma nacionniyoq runakunata chaynataq huk runakunatapas— Jesusta kaspipi warkuspa wañuchinankupaq (Hechos 2:22, 23, NM).

10. ¿Ima allintam Jesus wañukusqanwan rurarqa?

¹⁰ ¿Imatam yuyarinchik Jesus llumpayta ñakarispa wañusqanmanta? Ichapas piensanchik huchasapa runakunarayku vidan qosqanpi (Mateo 20:28; Juan 15:13). Chaynataq admirakunchikpaschá Jehová Dios anchallataña kuyawaspanchik churinta ñoqanchikrayku wañunanpaq qosqanwanpas (Juan 3:16). Otaq Roma llaqtayoq soldadokunapa jefen hina nichwanpas: “Cheqaptapunim payqa Diospa Churin kasqa”, nispa (Mateo 27:54). Chayna piensasqanchikkunaqa allinmi. Ichaqa yuyarisunchik  wañunanpaqña kachkaspa Jesuspa kayna nisqanta: “¡Tukusqañam!” (Juan 19:30). ¿Imataq tukusqaña karqa? Arí, Jesus kawsaspanqa achkatam rurarqa, chaynataq wañukusqanpas runakunapa allinninpaqmi karqa. Hinaptinqa, ¿manachu Jesusqa Allpaman hamurqa Jehová Dios llapallan kamachiq kasqanta qawachinanpaq? ¿Manachu Bibliapa nisqanman hina warmipa ‘mirayninqa’ Diablopa ñakarichisqan kanan karqa, chaynapi Jehová Diospa sutinta chuyanchananpaq? (Isaias 53:3-7.) Chaynatam Jesusqa Diospa kamachisqanta allintapuni rurarqa. ¡Mayna allinpimá tukurqa Jesuspa kayna rurasqanqa!

11. ¿Imatam Jesus ruranqa Genesis 3:15 nisqanta cumplinanpaq?

¹¹ Jehová Diospi confiakusqanrayku chaynataq kasukusqanraykum Jesusqa kawsarichisqa karqa, ichaqa manam runa hinachu aswanqa ‘kawsachikuq espirituñam’ (1 Corintios 15:45; 1 Pedro 3:18). Jehová Diosmi Churinta hanaq pachaman kutiptin nirqa: “Enemigoykikunata saruchinaykamayá alleqniypi tiyaykuy”, nispa (Salmo 110:1). Chay ‘enemigonkunaqa’ Satanasmi hinaspa Satanaspa ‘miraynin’ kaqkunapas. Diospa Gobiernonpi Kamachiq hinam, Jesucristoqa hanaq pachapipas hinaspa kay Pachapipas llapallan mana kasukuqkunata puchukachinqa (Apocalipsis 12:7-9; 19:11-16; 20:1-3, 10). Hinaptinmi Genesis 3:15 nisqan cumplikunqa, chaynataq Jesuspa kayna mañakunapaq yachachisqanpas: “Munaychakusqayki hamuchun. Munasqaykiyá rurasqa kachun kay pachapipas hanaq pachapi hina” (Mateo 6:10; Filipenses 2:9-11).

Jesusmi qatikunanchikpaq ejemplo

12, 13. a) ¿Imaynatam runakuna chaskinku Diospa Gobiernonmanta willakuyta? b) ¿Imatam tapukunanchik Jesuspa rurasqankunata qatipakuy munaqkuna?

¹² Kunan tiemponchikpim Jesuspa nisqanman hina, Diospa Munaychakusqanmanta sumaq noticia willakusqa kachkan achka nacionkunapi (Mateo 24:14). Chayraykum millonnintin runakuna Diosman vidankuta qonku servinankupaq. Paykunam ancha kusisqallaña tarikunku Diospa Gobiernon sumaq bendicionkuna apamunanmanta. Munachkankumá kay Pacha paraiso kaptin hawkayaypi hinaspa wiñaypaq kawsakuyta, chaymi runakunaman kusikuyllawanña willanku sumaq suyakuyninkumanta (Salmo 37:11; 2 Pedro 3:13). ¿Kayna willakuqchu qampas kanki? Chayna kaptinqa, allinpunim  Dios servinaykipaq akllakusqaykiqa. Chaywanpas kaykunapiraqmi piensananchik.

¹³ Apostol Pedrom qellqarqa: “Cristopas ñoqanchikraykum ñakarirqa chaynapi paypa ejemplonta qatinanchikpaq”, nispa (1 Pedro 2:21). Apostol Pedro kay qellqasqanpiqa sutillatam qawachichkan Jesuspa ñakarisqanmanta, ichaqa manam ninchu kusikuywan predicasqanmanta nitaq allin yachachiq kasqanmantapas. Chaynataqa rimarqa Jesuspa ñakarisqanta qawasqanraykum, chayna ñakarisqanta aguantaspanmi Jesus qawachirqa llapallan kamachiq Jehová Dios kasukusqanta hinaspa Satanas llulla kasqantapas. Hinaptinqa, ¿imaynatam Jesuspa rurasqanta qatipakuchwan? Tapukusunchik: “¿Ñakariymanchu Jehová Dios llapallan kamachiq kasqanta qawachinaypaq? Imayna kawsasqay hinaspa Diosta servisqay, ¿qawachinchu Diospa llapallan kamachiq kasqanta defiendesqayta?” (Colosenses 3:17).

14, 15. a) ¿Imatam Jesus rurarqa Diospa contranpi kaqkunata munachiptinku, hinaspa imanasqataq chaynata rurarqa? b) ¿Imapim sapa punchaw piensananchik? (Rimariy, “Jehová Diospim hapipakurqaku” niq recuadromantapas.)

¹⁴ Sapa punchawmi pruebakunapi tarikunchik hinaspa ima ruranapaqpas tanteananchik. ¿Imaynam chaynaqa kananchik? Ejemplopaq, ¿imatam rurasunchik Dios kasukuyninchikta chinkarachinapaq tentasqa kaspanchik? ¿Imatam Jesusqa Pedrota nirqa kikikitayá llakipayakuy niptin? Jesusmi nirqa: “¡Satanas, asuy ñawpaqniymanta!”, nispa. Nirqataqmi: “Piensasqaykiqa manam Diospa piensasqan hinachu aswanqa runakunallapam”, nispa (Mateo 16:21-23). Cristiano hina rurayninchikta qepaman churaspa astawan estudianapaq otaq qollqe gananapaq munachiwaptinchikqa, ¿Jesus hinachu ñoqanchikpas ruranchik? Runakuna Jesuspa milagrokuna rurasqanta qawaspankum rey kananpaq ‘churaruyta munarqaku’, chayta Jesus musyakuruspanmi paykunamanta utqayllaman lluptikurqa (Juan 6:15).

¹⁵ ¿Imanasqataq Jesusqa chaypi hinaspa huk kutikunapipas chaynata rurarqa? Payqa allintam cuentata qokurqa, kikinpa munasqanmanta otaq imapas maskananmantaqa huk ruray aswan allinraq kasqanmanta. Imamantapas puntataqa Taytanpa munasqantam rurayta munarqa hinaspa Diospa llapallan kamachiq kasqanta yanapaytapas (Mateo 26:50-54). ¿Imatam yachachiwanchik kayna rurasqan? Ñoqanchikpas Jesus  hinam sapa punchaw piensananchik Jehová Dios llapallan kamachiq kasqanta Satanas yanqacharusqanmanta, mana chayqa Jehová Diostam qepancharuchwan. Satanaspa toqllankunapim Eva hina utqaylla urmaykuchwan, payqa sacrellañam mana allinkunata munachiwananchikpaq (2 Corintios 11:14; 1 Timoteo 2:14).

16. Bibliamanta runakunata yachachispa, ¿ima yachanankutam puntata munananchik?

¹⁶ Runakunata yachachispanchikmi qawachinchik imaynatam Biblia yanapanman sasachakuyninkunata allichanankupaq, kayna rurayqa allinpunim runamasinchik Bibliamanta yachay munanankupaq. Chaywanpas, manamá munanchikchu runakuna Bibliamanta otaq Diospa Gobiernon ukupi bendicionkuna kananmanta yachanallankutachu. Aswanqa munanchikmi, Jehová Dios llapallan kamachinanpaq derechoyoq kasqanta entiendenankuta. ¿Munankuchu cheqap cristiano kayta hinaspa ‘amaña kikillankupaq kawsaspa’ Diospa Gobiernonrayku ñakariyta? (Marcos 8:34.) ¿Munankuchu Jehová Dios llapallan  kamachiq kasqanta yanapaqkunawan kuska kayta, chaynapi Satanas llulla kasqanta qawachinankupaq? (Proverbios 27:11.) ¡Mayna sumaq ruraymi chayqa! Manamá Jehová Dios llapallan kamachiq kasqallantachu yanapasun, aswanqa hukkunatapas yanapachwanmi paykunapas chaynata ruranankupaq (1 Timoteo 4:16).

‘Diosña tukuy imakunapipas chaynataq runakunapipas munaychakuptin’

17, 18.Jehová Dios llapallan kamachiq kasqanta yanapaspaqa, ¿ima kusikunapaq kaqtam suyachwan?

¹⁷ Hinallayá kallpanchakusun vidanchikpi hinaspa Dios serviyninchikpi Jehová Dios llapallan kamachiq kasqanta qawachinanchikpaq. Chaynapim confianzawan suyasunchik “Dios Taytanmanña munaychakusqanta” Jesucristo qoykunanta. ¿Haykapim chayqa kanqa? Apostol Pablom nin: ‘Cristo llapallan atiyniyoqkunata, munayniyoqkunata hinaspa autoridadkunata chinkarachispan Dios Taytanmanña munaychakusqanta qoykunqa. Cristoqa munaychakunanpunim llapallan enemigonkunata Dios saruchinankama. Cristo tukuy imata munaychakuruspanñam paypas Taytanpa munaychakusqan kanqa [. . .]. Chaynapim Diosña tukuy imakunapipas chaynataq runakunapipas munaychakunqa’ (1 Corintios 15:24, 25, 28).

¹⁸ ‘Diosña tukuy imakunapipas chaynataq runakunapipas munaychakuptinqa’, mayna kusikunapaqchá kanqa. Chaynaqa Diospa Gobiernonqa manam yanqapaqchu kanqa. Jehová Diospa llapallan enemigonkunam chinkachisqa kanqaku, hinaptinmi qallariypi hina hanaq pachapi hinaspa kay pachapipas hawkayay kanqa. Salmistapa qellqasqanman hinam, llapallan unanchasqankuna takinqaku: “Tayta Diostayá honraychik. Sutinraykuyá payta honraychik [. . .]. Tayta Diosmi gobiernachkan, nispayá willakuychik. Nacionkunapi runakunamanyá chaynata willakuychik”, nispa (Salmo 96:8, 10).

[Willakuy]

¿Yachankichu imayna kutichiyta?

• ¿Imaynatam Jesucristo qawachirqa Diospa llapallan kamachiq kasqan paypaq ancha valorniyoq kasqanta?

• ¿Imatam puntata Jesus qawachirqa Diosmanta yachachisqanwan hinaspa wañukusqanwanpas?

• Jehová Dios llapallan kamachiq kasqanta, ¿imaynatam Jesus hina qawachichwan?

[Kay yachachikuypa tapukuyninkuna]

[31 kaq paginapi recuadro]

JEHOVÁ DIOSPIM HAPIPAKURQAKU

Corea lawpi hinaspa huklaw nacionkunapi iñiqmasinchikkunapa yachasqankuman hinam, sasachakuykunapi tarikuspaqa, yachananchikmi imarayku ñakarisqanchikta.

Huk wawqenchikmi Rusia nacionpi kamachiqkuna presocharuptin kaynata nirqa: “Sasachakuykunata aguantanaykupaqmi yanapawarqaku Diospa kamachikusqan Eden huertapi yanqachasqa kasqanmanta allinta yachasqayku [. . .]. Yacharqanikum llapallan kamachiq Jehová Diosman hapipakunaykuta. [. . .] Chaymi kallpanchawarqaku hinaspa yanapawarqaku Diosta mana qepanchanaykupaq”, nispa.

Chaymantapas huk wawqenchikmi willakun imaynatam paypas hinaspa wakin Testigokunapas aguantarqaku preso kaspa sasallaña llamkaypi tarikuspanku. Paymi nirqa: “Jehová Diosqa manam haykapipas saqewarqakuchu. Llumpay sasachakuypi tarikuspaykupas, espiritualpiqa rikchan-rikchanllam karqaniku. Kikiykupuram yuyachinakuspa kallpanchanakurqaniku llapallan kamachiq Jehová Diosman hapipakusqaykurayku kayna ñakarisqaykumanta”, nispa.