Contranchikpi churakusqankuqa yanqapaqmi kanqa

“Ichaqa manam pipas, contraykipi atirqachu arma rurayta. Manam atirqachu wañuchisunaykipaq arma rurayta.” (ISAIAS 54:17.)

1, 2. ¿Imaynatam Isaias 54:17 nisqan cumplikurqa Albania nacionpi Jehová Diospa testigonkunapi?

YAQA 1940 watamanta 1990 watakamam, Diospi mana iñiq gobierno tukuy imata rurarqa Europa lawpi taksa nacionpi kaq cristianokunata chinkarachinanpaq. Manam ñakarichisqankuwanpas, presochaspa llumpayllataña llamkachisqankuwanpas nitaq paykunamanta yanqa rimasqankuwanpas atirqakuchu chinkarachiyta. ¿Pikunam paykuna karqaku? Albania nacionpi Jehová Diospa  testigonkunam. Huñunakunankupaq hinaspa predicanankupaq llumpay sasallaña kaptinpas, hinalla rurasqankum cheqap cristiano kasqankuta allinta reqsichirqa hinaspa Jehová Diospa sutintapas hatuncharqa. Albaniapi 2006 watapi mosoq sucursalta qespirachiptinkum, unay wataña Jehová Diosta serviq huk wawqenchik nirqa: “¡Maynataña Satanas munaspanpas, Jehová Diospa llaqtantaqa manam chinkachiyta atinchu!”, nispa.

² Chay cristianokunam qawachinku Isaias 54:17 nisqanpi Diospa prometesqan cumplikusqanta, chaypim nin: “Ichaqa manam pipas, contraykipi atirqachu arma rurayta. Manam atirqachu wañuchisunaykipaq arma rurayta. Juzgadopi llapallan acusaqnikikunam juiciopi vencesqa kanqa”, nispa. Albaniapi hina ñawpa tiempopi pasakusqanmi qawachin, Satanaspa controlasqan mana allin runakuna imataña ruraspankupas cristianokunapa Jehová Dios yupaychasqankuta saqerachiyta mana atinankuta.

Chinkachiyta munaspapas Satanasqa manam atinchu

3, 4. a) ¿Imakunatam Satanas servichikun Dios serviqkunapa contranpi kaspa? b) ¿Imanasqataq nichwan Diospa llaqtanpa contranpi Satanaspa churakusqan yanqapaq kasqanta?

³ Diospa serviqninkunapa contranpim churakurqaku, predicanankuta harkakuspanku, maqanankupaq hatarispanku, presochaspanku hinaspa paykunapa contranpi leykunata horqospankupas (Salmo 94:20). Chaynataqmi kunallanpas kay yachachikuyta estudiachkaptinchik, wakin nacionkunapiqa cristianokunapa Dios kasukuyninkum “pruebasqa” kachkan (Apocalipsis 2:10).

⁴ Ejemplopaq, Jehová Diospa llaqtanpi huk sucursalmi willakamun imaynam huk watallapi, 32 wawqe-paninchikkuna predicachkaptinku maqasqa kasqankumanta. Chaymantapas 59 kutitam wawqe-paninchikkunata —yuyaqkunata, mozo-sipaskunata hinaspa qarikunatawan warmikunatapas— policiakuna presocharqaku predicachkaptinku. Wakinkunataqa wañuchiq runakunata hina qawaspankum: huellakunata churarachirqaku, fotokunata horqorurqaku hinaspa presocharurqaku. Wakinkunatañataqmi amenazarqaku. Huk nacionpim documentokunapi qellqasqa kachkan Jehová Diospa testigonkuna waranqa pachak masninraq presochasqa, multasqa hinaspa maqasqa kasqankumanta. Paykunamanta iskay pachak masnin cristianokunatam chaynata rurarqaku señorninchik Jesucristopa wañukusqan punchawta yuyarinankupaq huñunakuptinku. Ichaqa, kay nacionpi hinaspa huk nacionkunapipas Jehová Diosqa servichikunmi chuya espiritunta sasallaña hina kaptinpas llaqtanta salvananpaq (Zacarias 4:6). Jehová Diospa serviqninkunataqa maynataña enemigonku upallarachiyta munaspankupas manam atinqakuchu. Arí, segurom kachkanchik Diospa munaynin cumplikunantaqa manam pipas harkayta atinqachu.

Llulla kasqankutam qawachinchik

5. Punta pachak watapi, ¿ima yanqa rimaykunatam Jehová Diospa serviqninkunapa contranpi rimarqaku?

⁵ Diosmanta willakuq Isaiasmi nirqaña Diospa serviqninkunaqa qawachinmankum karqa paykunapa contranpi rimasqanku yanqa kasqanmanta. Punta pachak watapim cristianokunapa contranpi yanqakunata rimarqaku, nirqakutaqmi mana allin ruraqkunam nispanku. Hechos 16:20, 21 nisqanpim ejemplopaq qawanchik chayna yanqa rimasqankuta, chaypim nin: “Kay judio runakunam llaqtanchikpi chaqwakunata rurachkanku. Paykunaqa yachachichkan paykunapa costumbrenkutam. Ñoqanchikqa Roma llaqtayoqmi kanchik”, nispa. Huk kutipiñataq cristianokunapa enemigonkuna autoridadkunata hikutarqaku Jesuspa qatiqninkunapa contranpi kanankupaq. Nirqakum: “Kay runakunaqa llapa llaqtakunatam chaqwanku hinaspam kaymanpas hamurunkuraq [. . .]. Llapallankum Roma reyninchikpa kamachikuyninkunapa contranpi rimachkanku”, nispa (Hechos 17:6, 7). Apostol Pablotañataqmi nirqaku “peste onqoy hinam”  nispa, chaynataqmi tumparqaku ‘tukuy hinastinpi judiokunata rakinachiqmi’ nispanku (Hechos 24:2-5).

6, 7. ¿Imaynatam ‘vencenchik’ contranchikpi yanqakuna rimasqankuta?

⁶ Chaynaqa manam admirakunchikchu kunan tiemponchikpipas cheqap cristianokunapa contranpi llullakuspa mana allinkunata rimasqankuwanqa. Hinaptinqa, ¿imaynatam ‘vencenchik’ contranchikpi yanqakuna rimasqankuta? (Isaias 54:17.)

⁷ Sapa kutim allin portakusqanchik qawachin yanqachawananchikpaq contranchikpi rimaqkuna llulla kasqankuta (1 Pedro 2:12). Chaynallataqmi, llaqtapi leykuna kasukusqanchikta, allin kawsakusqanchikta hinaspa huk runakunapi interesakuspa yanapasqanchiktapas runakuna qawaspanku, yachanku yanqa rimasqankumanta. Allin kawsakusqanchikmi sutillata qawachin allin runakuna kasqanchikta. Allin rurasqanchikkunata qawaspankum, wakin runakunaqa hanaq pachapi Taytanchikta alabayta munanku, chaynataq cuentatam qokunku imayna kawsasqanchik paykunamantaqa allin kasqanta (Isaias 60:14; Mateo 5:14-16).

8. a) ¿Imam allin kanman Bibliapa yachachisqankunapi iñisqanchikta defiendenapaq? b) Jesus hina, ¿imaynatam qawachinchik contranchikpi kaqkunapa yanqa rimasqankuta?

⁸ Allinta kawsakuspanchikpas, wakinpiqa allinmi kanman Bibliapa yachachisqankunapi iñisqanchikta valorwan defiendeyqa. Kaytaqa ruranchikmanmi autoridadkunaman rispanchikpas (Ester 8:3; Hechos 22:25-29; 25:10-12). Kay Pachapi Jesus kachkaspanmi, wakinpiqa paymanta yanqa rimaqkunawanpas atipanakurqa. ¿Imanasqa? Paymanta rimasqanku, llulla kasqanta qawachinanpaq (Mateo 12:34-37; 15:1-11). Jesus hinam ñoqanchikpas listo kanchik creesqanchikkunamanta pipas tapuwaptinchik clarota entiendechinapaq (1 Pedro 3:15). Amayá haykapipas Diospa cheqap Palabranmanta willakuytaqa saqesunchu: escuelapi estudiaqmasinchikkunapa, llamkaqmasinchikkunapa hinaspa mana iñiq ayllunchikkunapa burlakusqanwanqa (2 Pedro 3:3, 4).

Jerusalenqa ‘llasa-llasaq rumi hinam’

9. Zacarias 12:3 nisqanpi Jerusalen llaqtata “llasa-llasaq rumiman” tupachispan, ¿imamantam rimachkan, hinaspa pikunataq paykunapa rantinpi Allpapiqa kachkanku?

⁹ Zacariaspa huknin profecianmi qawachiwanchik imanasqam cristianokunapa contranpi nacionkuna churakusqankumanta. Qawasunchik Zacarias 12:3 ima niwasqanchikta: “Llapallan nacionkuna Jerusalen llaqtapa contranpi hatariruptinmi chay tiempopiqa llasa-llasaq rumiman hinaña tikrarusaq Jerusalen llaqtata”. ¿Ima Jerusalen llaqtamantataq kaypiqa rimachkarqa? Hanaq pachapi Jerusalenmantam, chayqa hanaq pachapi Diospa Gobiernonmi chaymanmi ungidokuna rinqaku (Hebreos 12:22). Jesuswan hanaq pachamanta Kamachimunankupaq ungidokunaqa puchuchkanraqmi kay Allpapiqa. Paykunam ‘sapaq ovejakunawan’ otaq kay pachapi kawsay suyaqkunawan, runakunata kallpanchanku tiempo kachkaptinraq Diospa Gobiernonmanta yachaspa kasukunankupaq (Juan 10:16; Apocalipsis 11:15). ¿Imaynatam runakuna chaskinku? Hinaspa, ¿imaynatam Jehová Dios yanapachkan kunan tiempopi serviqninkunata? Chayta yachanapaqyá allinta qawasunchik Zacarias libropi 12 capitulonpa nisqanta. Chaynapim seguro kasunchik hanaq pachaman riq ungidokunapa chaynataq kay pachapi wiñaypaq kawsakuy suyaqkunapa contranpi kaspankupas mana vencey atinankumanta.

10. a) ¿Imanasqataq nacionkuna Jehová Diospa llaqtanpa contranpi churakunku? b) ¿Imataq pasarun ‘llasa-llasaq rumita’ chinkachiy munaqkunata?

¹⁰ Zacarias 12:3 nisqanpim qawachiwanchik nacionkuna ‘kikillanku ikipakurusqankumanta’. ¿Imaynatam chayqa cumplikun? Qawasunchik, Diosmi kamachirqa Gobiernonmanta sumaq noticia willakusqa kananpaq, chaymi Jehová Diospa testigonkunaqa chayta ruranankupaq kallpanchakunku. Ichaqa Diospa  Gobiernonmanta sumaq suyakuy willakusqankum, runakunapaq yaqa ‘llasa-llasaq rumi’ hina rikurirun. Chayraykum chinkarachiyta munaspanku, imakunatapas ruraspanku Diospa Gobiernonmanta willakuqkunapa contranpi churakunku. Chayta ruraspankum ‘kikillanku ikipakurunku’ hinaspa kuchupasqallaña hina kachkanku. Imayna kasqankupas yanqachasqam qeparun, chaykunata ruranankupaq kallpanchakusqankuwanmi kikinku penqayllapiña rikurirunku. Dios serviqkunataqa manam upallachiyta atinkuchu, paykunaqa chaninchankum manaraq puchukachiy chayamuchkaptin Diospa Gobiernonmanta ‘wiñaypaq kaq allin noticiamanta’ willakuyta (Apocalipsis 14:6). África lawpi presokunata cuidaqmi, Jehová Diospa serviqninkunata imayna ñakarichisqankuta qawaspan kaynata nirqa: “Kay runakunata qatikachaspaqa manam imatapas haypanqakuchu. Testigokunaqa manam haykapipas upallanqakuchu. Aswanmi yapakuchkanku”, nispa.

11. ¿Imaynatam Jehová Dios cumplirqa Zacarias 12:4 nisqanta?

¹¹ Leeykuy Zacarias 12:4 nisqanta. Chaypim Jehová Dios rikchanachiywan rimaspan prometen, Gobiernonmanta willaqkunapa contranpi peleaqkunata ñawsayarachispan ‘mancharirachinanmanta’. Rimasqanman hinam Jehová Diosqa cumplirqa. Ejemplopaq, huk nacionpi Dios yupaychayta harkakuchkaspankupas, paykunaqa manam harkayta atirqakuchu Diosta serviqkunaman Bibliamanta qellqakuna chayananta. Kaymanta rimaspanmi huk periodico willarqa, Jehová Diospa testigonkuna globokunata servichikuspanku Bibliamanta qellqakunata nacionman yaykuchisqankumanta. Cheqaptamá Diosqa rimasqanta cumplirqa, paymi nirqa: ‘Nacionkunapa llapallan caballonkunatam ñawsayarachisaq’, nispa. Diospa Gobiernonpa contranpi kaqkunaqa yanqamanta piñakuspankum ima ruraytapas mana atinkuchu. Ñoqanchikmi ichaqa seguro kachkanchik Jehová Dios llaqtanta waqaychanamanta hinaspa yanapananmantapas (2 Reyes 6:15-19).

12. a) Jesus kay Pachapi kachkaspan, ¿ima rurasqanwanmi ninata ratachichkaq hina karqa? b) ¿Imaynatam ungidokunapas ninata ratachichkaq hina karqaku, hinaptin imataq chayrayku pasarqa?

¹² Leey Zacarias 12:5, 6 nisqanta. ‘Juda nacionpi kamachiqkuna’ nispanqa rimachkanmi Diospa llaqtanpi ungido ancianokunamanta. Paykunatam Jehová Dios anchallataña kallpanchan kay Allpapi Gobiernonpaq kaqkunata ganasllawanña defiendenankupaq. Huk kutipim Jesusqa discipulonkunata nirqa: “Ñoqaqa ninatam kay pachaman apamurqani”, nispa (Lucas 12:49). Payqa chaynatamá rurarqa. Ganasllawanña predicasqanwanmi sutillata qawachirqa Diospa Gobiernon defiendey aswan allinpuni kasqanta. Chayraykum judiokunapa enteron nacionninpi nina ratachisqa hina sasachakuykuna karqa (Mateo 4:17, 25; 10:5-7, 17-20). Chaynataqmi kunanpas, Jesucristopa qatiqkunaqa predicasqankuwanmi yaqa ‘yantapa chawpinman sansata wischuykuq’ hina chaynataq “gamillakunapa chawpinpi” nina ratachiq hina kanku. Ejemplopaq, 1917 watapim The Finished Mystery * (El misterio terminado) nisqa sutiyoq libro, sutillata qawachirqa cristianokunam kaniku niqkunapa iskay uya kasqankuta, chayraykum iglesiapi curakuna llumpayllataña piñakururqaku. Chaymantapas qayna watallam Noticias del Reino núm. 37, “¡Se acerca el fin de la religión falsa!” nisqa sutiyoq tratado, achkallaña runakunata qawachirqa Diospa Gobiernonpa favorninpi otaq contranpipas kanankupaq.

‘Juda castakunapa karpanmi’ salvasqa

13. ¿Pikunamantam rimachkan ‘Juda castakunapa karpan’ nispaqa, hinaspa imanasqam Jehová Diosqa salvanqa?

¹³ Leey Zacarias 12:7, 8; NM nisqanta. Ñawpa Israel nacionpi karpakunaqa chakrakunapim karqa, chaytam chakrapi llamkaqkuna hinaspa michiqkunapas servichikurqaku. Paykunam puntataqa waqaychasqa kananku  karqa, Jerusalen llaqtapa contranpi enemigonkuna hamuptin. ‘Juda castakunapa karpan’ nispaqa, qawachichkanmi hanaq pachaman riq ungidokuna kunan tiemponchikpi mana sumaq waqaychasqa llaqtakunapi yachasqankuta. Paykunaqa chakrakunallapi hina yachaspankupas, mana manchakuspankum Diospa Gobiernonta defiendenku. Jehová Diosqa ungidokunatam otaq ‘Juda castakunapa karpantaraqmi puntata salvanqa’, paykunata Satanas puntata chinkarachiyta munasqanrayku.

14. ¿Imaynatam ‘karpakunallapi’ hina yachaq ungidokunata Jehová Dios defienden hinaspa waqaychan?

¹⁴ Cheqaptamá, ñawpaqmantaraq imakuna pasasqanqa qawachinmi Gobiernonpi kamachinankupaq ungidokunata Jehová Dios defiendesqanta, paykunaqa chakrapi ‘karpakunallapi’ hinam yachanku. * Mana urmanankupaqmi ñawpa tiempopi peleaqllaña rey Davidta hina waqaychaspa kallpanchan.

15. ¿Imanasqataq Jehová Dios ‘llapallan nacionkunata chinkachinanpaq’ kachkan, hinaspa haykapim chayta ruranqa?

¹⁵ Leey Zacarias 12:9 nisqanta. ¿Imanasqataq Jehová Diosqa ‘llapallan nacionkunata chinkarachinanpaq’ kachkan? Diospa Gobiernonpa contranpi kasqankuraykum. Wañuchisqa kanankupaqmi kachkanku Jehová Diospa serviqninkunata qatikachaspa ñakarichisqankumanta. Chayllam hatarinqaku Satanaspa qatiqninkuna cheqap cristianokunata chinkarachinankupaq, hinaptinmi Bibliapa nisqanman hina enteron pachapi Armagedon kanqa (Apocalipsis 16:13-16). Chaymi Juezkunapapas Jueznin Jehová Diosqa serviqninkunata defiendenqa hinaspam enteron nacionpi sutinta hatunchanqa (Ezequiel 38:14-18, 22, 23).

16, 17. a) ¿Imataq Jehová Diospa ‘serviqninkunapa herencian’? b) ¿Imatam qawachin Satanaspa sasachawasqanchikta aguantasqanchik?

¹⁶ Satanasqa manam imawanpas iñiyninchikta chaynataq tukuy sonqomanta Diospaq llamkasqanchiktapas chinkarachinqachu. Espiritualpi hawka kayninchikqa salvaqninchik Dios reqsisqanchikraykum, kayqa Jehová Diospa ‘serviqninkunapa herencianmi’ (Isaias 54:17). Diosta servispa hawkalla hinaspa kusisqa kawsakuyninchiktaqa manam pipas qechuwasunchu (Salmo 118:6). Satanasqa hinallachá contranchikpi harkakuykunata rikurichinqa hinaspa sasachakuykunatapas churawasunchik. Yanqakunamanta rimawaptinchikpas Diosman sonqo kaspa hinalla aguantaspaqa, qawachisunmi chuya espiritunwan Dios yanapawasqanchikta (1 Pedro 4:14). Enteron pachapim Diospa Gobiernonmanta sumaq noticia willakusqa kachkan. Cheqaptamá Jehová Diospa serviqninkunapa contranpi ‘rumikunawan’ chuqawanchikmanpas hina harkakuykuna kachkan. Chayna kaptinpas Jehová Diospa yanapakuyninwanmi aguantanchik (Zacarias 9:15). Kay allpapiraq puchuq ungidokunata hinaspa kay pachapi wiñaypaq kawsakuy suyaqkunatapas, ¡manamá pipas upallachiytaqa atinqachu!

¹⁷ Munachkanchikmi Diablopa ñakarichiwasqanchikmanta librakunapaq punchaw chayamunanta. Chay tiempo chayamunankamaqa, anchatam kallpanchawanchik Jehová Diospa kayna niwasqanchik: “Ichaqa manam pipas, contraykipi atirqachu arma rurayta. Manam atirqachu wañuchisunaykipaq arma rurayta. Juzgadopi llapallan acusaqnikikunam juiciopi vencesqa kanqa”.

[Willakuykuna]

¿Imatam kutichiwaq?

• ¿Imataq qawachin Jehová Diospa llaqtanpa contranpi Satanaspa churakusqan yanqapaq kasqanta?

• ¿Imaynataq ungidokuna kanku “llasa-llasaq rumi” hina?

• ¿Imaynatam Jehová Dios salvan ungidokunata?

• Armagedon manaraq chayamuchkaptinpas, ¿imamantam seguro kanchik?

[Kay yachachikuypa tapukuyninkuna]