¿Preparasqachu kachkanki Jehová Diospa punchawninpaq?

“Chayaykamuchkanñam [Jehová] Diospa castiganan hatun punchawqa. Hichpaykamuchkanñam apurawman.” (SOFONIAS 1:14.)

1-3. a) ¿Imatam Biblia nin Jehová Diospa castiganan hatun punchawmanta? b) Jehová Diospa, ¿ima ruranan punchawtaq apurawman hichpaykamuchkan?

JEHOVÁ DIOSPA castiganan hatun punchawqa manam huk punchawllachu. Aswanqa unay tiempom, chaypim mana allin runakunata Jehová Dios puchukachinqa. Chay punchawtaqa manam yanqachu manchakunqaku, chay punchawqa tutayaymi, sasachakuymi, Diospa pasaypaq piñakuyninmi hinaspa purmachiywan chunnichiyllañam kanqa (Isaias 13:9; Amos 5:18-20; Sofonias 1:15). Diosmanta willakuq Joelmi nin: “iAchachalláw imaraq pasakunqa chay punchawpiqa! Chayaykamuchkanñam Tayta Diospa castiganan punchawqa. Chayaykamuchkanñam Tukuy Atiyniyoq Diospa puchukachiyninqa.” (Joel 1:15.) Chayna kaptinpas, Diosmi ichaqa Salvanqa paypa munasqanman hina kawsaqkunata (Salmo 7:10).

² Jehová ‘Diospa castiganan hatun punchawmanta’ Biblia rimaspaqa, nichkanmi Diospa lliw juicionkuna rurasqanmanta. Ejemplopaq, 607 watapi manaraq Jesus nacechkaptinmi, Jerusalen llaqta pasarqa ‘Diospa castiganan hatun punchawta’ Babilonia llaqta purmachiptin (Sofonias 1:4-7). Chaynallataqmi 70 watapipas, Churinta mana chaskisqankurayku Jehová Diosqa judiokunata Roma nacionwan puchukachirqa (Daniel 9:24-27; Juan 19:15). Bibliaqa willachkantaqmi ‘Diospa castiganan hatun punchaw’ huktawan kananmanta, chaypim Jehová Dios lliw ‘nacionkunapa contranpi [. . .] peleanqa’ (Zacarias 14:1-3). Chuya espiritunwan Dios yanapaptinmi, apostol Pablo chay punchawta tupachirqa Jesucristopa kamachinan tiempoman, chayqa qallaykurqa Jesucristo 1914 watapi Rey kananpaq churasqa kaptinmi (2 Tesalonicenses 2:1, 2). Jehová Diospa castiganan punchaw sutilla apurawman hichpaykamusqanraykum, Sofonias 1:14 NM, nisqanman hina kay 2007 watapaq texto allin horqosqa karqa, chaypim nin: “Chayaykamuchkanñam [Jehová] Diospa castiganan hatun punchawqa”, nispa.

³ Chay hatun punchaw hichpallapiña kasqanraykum, listollaña kasqaykita kunan qawachinayki. ¿Imaynatam chay punchawpaq preparakuwaq? ¿Imayna kasqaykita cambianaykiraqchu kachkan?

Listo kasqaykita qawachiy

4. ¿Ima hatun pruebapaqmi Jesus preparakurqa?

⁴ Tukupay tiempomanta Jesus rimaspanmi qatiqninkunata kaynata nirqa: “Listollayá kaychik”, nispa (Mateo 24:44). Jesus kaynata nispanqa, kikinpas hatun pruebapaqmi listo kachkarqa: paymi ñoqanchikrayku wañunan karqa (Mateo 20:28). ¿Imaynatam Jesus preparakurqa, hinaspa imatam ejemplon yachachiwanchik?

5, 6. a) Diospa castiganan hatun punchawpaq listollaña kananchikpaq, ¿imaynatam yanapawanchik Diosta hinaspa runakunata kuyasqanchik? b) ¿Ima ejemplotam Jesus qowarqanchik runamasinchikta kuyanapaq?

 ⁵ Jesusqa tukuy sonqonwanmi Jehová Diosta hinaspa kamachikuyninkunatapas kuyarqa. Jesusmantam Hebreos 1:9 nin: “Qamqa allin kaqtam kuyarqanki. Mana allin ruraytañataqmi cheqninki. Chayraykum Diospas akllasurqanki. Qampa Diosnikim akllasurqanki. Wakinmantapas qam kaqtaraqmi kusikuywan huntaykusurqanki. Miski asnaq aceitewan tallichkaq hinam kusikuywan huntaykusurqanki”, nispa. Jesusqa Taytanman hapipakuspanmi kasukurqa kuyasqanrayku. Ñoqanchikpas Jesus hina, Diosta kuyaspa chaynataq kamachisqanman hina kawsaptinchikqa, payqa waqaychawasunmi (Salmo 31:23). Chayna kuyakuyniyoq hinaspa kasukuq kasqanchikmi yanapawanchik Jehová Diospa punchawninpaq listo kanapaq.

⁶ Jesusqa runakuna kuyaqmi karqa. Paymi “llakipayarikurqa wischusqa, cheqesqa hinaspa mana michiqniyoq ovejakuna hina kasqankumanta” (Mateo 9:36). Chayraykum Diosmanta sumaq noticiata paykunaman willarqa. Ñoqanchiktapas chayna kuyakuyninchikmi kallpanchawanchik Diospa Gobiernonmanta willakunanchikpaq. Diosta hinaspa runakunata kuyasqanchikmi yanapawanchik hinalla predicananchikpaq hinaspa castiganan hatun punchawpaq listollaña kananchikpaqpas (Mateo 22:37-39).

7. Jehová Diospa punchawnin manaraq chayamuchkaptinpas, ¿imanasqam kusisqa kachwan?

⁷ Jesusqa anchatam kusikurqa Taytanta kasukuspan (Salmo 40:8). Pay hina kasukuspa chaynataq qokuykuq kasqantapas qatipakuspaqa, Dios serviyninchikpim kusisqa kasunchik (Hechos 20:35). Chaynaqa, Jehová “Diospa kusikuyninqa amparawaqninchik wasi hinam”, chaymi waqaychawasun hinaspa yanapawasun Jehová Diospa punchawninpaq listollaña kananchikpaq (Nehemias 8:10).

8. ¿Imanasqataq mañakuspa Jehová Diosman asuykunanchik?

⁸ Tukuy sonqonwan Diosta mañakusqanmi, Jesusta yanaparqa iñisqanrayku pruebakunata aguantananpaq. Payqa mañakuchkarqam Juan bautizaptinpas, chaynataq tukuy tutam Taytanta mañakurqa apostolninkunata akllananpaqpas (Lucas 6:12-16). ¿Manachu admirakunchik, wañuchinankupaq hapisqanku tutapi tukuy sonqowan Jesuspa mañakusqanmanta Bibliapi leespanchik? (Marcos 14:32-42; Juan 17:1-26.) Qampas, ¿Jesus hinachu sonqomanta mañakunki? Astawan mañakuspayki Jehová Diosman asuykuy hinaspa tiempota qokuy mañakusqaykipi. Mañakuytaq Diospa chuya espiritun yanapasunaykipaq hinaspa yanapasusqaykita musyakuspaykiqa chayman hinataq ruray. Kay sasallaña tiempopi Jehová Diospa castiganan hatun punchaw apurawman hichpaykamuchkaptinqa, allinpunim Jehová Dioswan allin kayninchikqa. Chaynaqa ama qonqaspayá Jehová Diosman astawan mañakuspa asuykusunchik (Santiago 4:8).

9. ¿Imanasqataq interesakunanchik Jehová Diospa sutin chuyanchasqa kananpaq?

⁹ Taytanpa chuya sutin hatunchasqa kananta munasqanpas, Jesustaqa yanaparqam hamuq sasachakuykunapaq listo kananpaq. Chaymi qatiqninkunata yachachirqa kaynata mañakunankupaq: “Sutiki yupaychasqa kachun”, nispa (Mateo 6:9). Diospa sutin chuyanchasqa kananta cheqaptapuni munaspanchikqa, kallpanchakusunmi ima rurasqanchikwanpas mana qachachanapaq. Chaynapim listollaña kasunchik Jehová Diospa castiganan hatun punchawpaq.

¿Imapipas kallpanchakunaykiraqchu kachkan?

10. ¿Imanasqam allin kanman imayna kawsasqanchikta qawakuyninchik?

¹⁰ Sichu paqarin chayaramunman Jehová  Diospa castiganan hatun punchaw, ¿listochu kachkawaq? Llapallanchikmi qawakunanchik imayna kawsasqanchikta, chaynapi imayna kasqanchik otaq portakusqanchikpas mana allin kaptinqa cambiananchikpaq. Pisi tiempolla kawsasqanchikta hinaspa imapas qonqaymanta pasaruwananchikta yachakuspanchikmi, sapa punchaw kallpanchakunanchik Jehová Dioswan amistadninchik aswan allin kananpaq (Eclesiastes 9:11, 12; Santiago 4:13-15). Chaypaqyá qawasunchik imakunapim ichapas astawan kallpanchakuchwan.

11. Biblia leeymanta, ¿imatam tanteakurunki?

¹¹ ‘Yuyayniyoq confianza sirvientem’ kallpanchawanchik Bibliata sapa punchaw leenanchikpaq (Mateo 24:45). Ichapas tanteakuwaq huk watallapi enteron Bibliata leenaykipaq hinaspa tiempochakuspa yuyaymananaykipaqpas. Yaqa tawa capitulokunata sapa punchaw leespaykiqa, huk watallapim leerunki Bibliapa 1.189 capitulonkunata. Israel nacionpi reykunam ‘sapa punchaw leenanku’ karqa Jehová Diospa Leyninta, Josueypas chaynatachá rurarqa (Deuteronomio 17:14-20; Josuey 1:7, 8). Chaynaqa, ¡mayna allinmi congregacionpi ancianokunapa Bibliata sapa punchaw leeyninkuqa! Kaymi yanapanqa “allin yachachikuyman” hina yachachinankupaq (Tito 2:1).

12. ¿Imatam ruranayki Jehová Diospa castiganan hatun punchaw hichpaykamusqanrayku?

¹² Jehová Diospa punchawnin hichpallapiña kasqanmi kallpanchasunayki huñunakuykunaman mana faltakuspa rinaykipaq, chaynataq atisqaykiman hina congregacionpi rimanaykipaqpas (Hebreos 10:24, 25). Chaynapim, Diosmanta aswan allin yachachiq kanki allin sonqoyoq runakunata yanapanaykipaq maskaspa (Hechos 13:48). Chaymantapas munachkankipaschá iñiqmasinchikkunata imakunapipas yanapayta, ichapas yuyaqkuna yanapayta hinaspa mozo-sipaskunata kallpanchaytapas. ¡Mayna kusisqachá kanki chayta ruraspaykiqa!

Hukkunawan imayna kanaykimanta

13. ¿Imatam tapukuchwan ñawpa vidanchik saqesqanchikmanta?

¹³ Jehová Diospa punchawnin hichpaykamusqanraykum, kallpanchakuna ‘mosoqwan pachakuchkaq hina mosoq runaña kanapaq [. . .], chayna runatam Diosqa unancharqa cheqaptapuni mana huchallikuq justo kananpaq’ (Efesios 4:20-24). Cristiano hina sumaq kayninchikkunata wiñachiptinchikqa, yaqapaschá hukkuna cuentata qokunqaku ‘chuya espirituman’ hina kawsasqanchikta (Galatas 5:16, 22-25). Niwaqchu, ¿imam qawachinman qampas hinaspa aylluykipas ñawpaqpi imayna kawsasqaykichikta saqerusqaykichikmanta? (Colosenses 3:9, 10.) Ejemplopaq, wawqe-paninchikkunawan hinaspa hukkunawanpas, ¿sumaq sonqo kasqaykiwanchu reqsichikunki? (Galatas 6:10.) Sapa kuti Bibliata estudiasqaykim yanapasunki cristiano hina sumaq kayniyoqkuna kanaykipaqpas, chaynapim Jehová Diospa punchawninpaq listollaña kanki.

14. Controlakuq kayta munaspaqa, ¿imanasqam Diosta mañakunanchik chuya espiritunta qowananchikpaq?

¹⁴ ¿Imatam rurawaq utqayllaman piñakuq hinaspa mana controlakuq kasqaykita musyakuspaykiqa? Chuya espiritupa rurunmi controlakuq kayqa chaymi yanapasunki controlakuq kanaykipaq. Chaynaqa Jehová Diosmanta chuya espiritunta mañakuy. Yuyariy Jesuspa kayna nisqanta: ‘Mañakuptikichikqa Diosqa qosunkichikmi. Maskaychik, tarinkichikmi, qayaychik, kichasunkichikmi. Mañakuqqa chaskinmi, maskaqqa tarinmi, qayakuqqa kichaykachikunmi. [. . .] Qamkunaqa mana allin runakuna kachkaspam churikichikmanqa allin kaqkunata qonkichik ¿chaychu mañakuqkunamanqa hanaq pachapi kaq Taytaykichik mana qosunkichikman chuya espirituta?’ (Lucas 11:9-13).

15. ¿Imatam rurananchik iñiqmasinchikwan mana allin kaspanchikqa?

¹⁵ Piensarisun kaypi, ichapas mana allinchu kachkanki huk iñiqmasikiwan. Chayna  kaptinqa, kallpanchakuy allichanaykipaq chaynatam yanapanki congregacion hawkalla hinaspa huñulla kananpaq (Salmo 133:1-3). Mateo 5:23, 24 otaq Mateo 18:15-17 versiculonkunapi Jesuspa nisqankunata kasukuy. Inti seqaykunankama hinallaraq piñasqa tarikuspaykiqa, amayá unay tiempotaraqchu suyay chay sasachakuyta allichanaykipaqqa. Wakinpiqa pampachaykuspallam allicharuwaq. Kaymantam apostol Pablo qellqarqa: “Sumaq sonqo kaspayá kuyapayanakuychik, Diospas Cristoraykum pampachasurqankichik, chaynayá qamkunapas pampachanakuychik”, nispa (Efesios 4:25, 26, 32).

16. ¿Imakunapim casado kaqkuna, ‘sumaq sonqo kaspa kuyapayanakuq’ kananku?

¹⁶ Casarasqa kaqkunam ‘sumaq sonqo kaspa kuyapayanakuq’ kananku hinaspa kallpanchakunankum pampachanakuq kanankupaqpas. Sichu qosaykita otaq warmikita mana ancha kuyapayaq nitaq mana llakipayaq kaspaykiqa, Diospa yanapakuyninta Bibliapi maskaspa kallpanchakuy astawan kuyapayakuq hinaspa llakipayakuq kanaykipaq. Imayna kawsasqayki allinyananpaq hinaspa huchapakuypi mana wichinaykipaq, ¿imapipas kallpanchakuwaqchu 1 Corintios 7:1-5 nisqanman hina kawsanaykipaq? Allinmi kanman warmi-qari kawsakuyninkupi aswanraq ‘sumaq sonqo kaspa kuyapayanakuq’ kayninkuqa.

17. ¿Imakunatam ruranan pipas hatun huchata ruraruspanqa?

¹⁷ ¿Imatam ruranayki hatun huchata ruraruspaykiqa? Utqayllamanmi chayta allichanayki. Ama manchakuspa ancianokunata maskay yanapasunaykipaq, qampaq mañakusqanku hinaspa consejokuna qosusqaykim yanapasunki espiritualpi allinyanaykipaq (Santiago 5:13-16). Wanakuspayki tukuy sonqoykiwan Jehová Diosta mañakuy, mana chayqa culpayoqmi sientekunki hinaspa concienciaykipas manam allinchu kanqa. Chaynam Davidpas sientekurqa ichaqa, ¡hawkayaytam tarirqa Jehová Diosman huchanmanta willakuspan! Chaymi kikin kaynata qellqarqa: “¡Mayna kusisqam mana kasukusqanmanta Diospa pampachaykusqan runaqa! ¡Mayna kusisqam tukuy huchallankunapas Diospa pakaykullasqan runaqa! ¡Mayna kusisqam mana huchallikuqpaqña Tayta Diospa hapisqan runaqa! ¡Mayna kusisqam tukuy piensasqankunapi mana engañakullaq runaqa!” (Salmo 32:1-5). Arí, Jehová Diosqa pampachanmi tukuy sonqomanta wanakuq runataqa (Salmo 103:8-14; Proverbios 28:13).

Mana allin ruraqkunamanta karunchakuy

18. ¿Imaynatam qawanayki kay pachapi mana allin ruraykunata?

¹⁸ Munachkankichá Diospa prometesqan mosoq allpapi kawsakuyta. Ichaqa, ¿imatam piensanki Diosmanta karunchasqa mana allin ruraq runakunamanta? “Kay pachapi kamachikuq” Satanasqa manamá Jesucristotaqa venceyta atirqachu (Juan 12:31; 14:30). Qampas manam munankichu Satanaswan kay pachapi qatiqninkuna controlasunaykitaqa. Chaynaqa apostol Juanpa kayna nisqantayá kasukuy: “Amayá kuyaychikchu kay pachapi mana allin ruraykunataqa nitaq kay pachapi mana allin kaqkunatapas”. Kay nisqanta kasukuyqa allinpunim, yachasqanchikman hinam “kay pachapi mana allin ruraykunawan mana allin munaykunaqa tukuruqllam, Diospa munasqanman hina ruraqmi ichaqa wiñaypaq takyanqa” (1 Juan 2:15-17).

19. Congregacionpi mozo-sipaskunata, ¿imakuna haypanankupaqmi kallpanchanchik?

¹⁹ Tayta-mamakuna, ¿yanapachkankichikchu churi-wawaykichikta ‘kay pachapi mana allin ruraykunawan mana chaqrukunankupaq’? (Santiago 1:27.) Imaynam challwirupas qaytunta kururan challwakunata asuykachimunanpaq, chaynallataqmi Satanaspas munan wawa-churikichik payman asuykunanta. Chaypaqmi servichikun organizacionkunatapas, chaynapi mozo-sipaskuna Satanaspa runankuna hina kanankupaq. Jehová Diosta  serviqkunam ichaqa Diospa llaqtanpiña kachkanchik, kay llaqtallam puchunqa mana allin ruraqkunata puchukachiptin. Chaymi congregacionpi mozo-sipaskunata llapallanchik kallpanchananchik “Señorpa rurayninpi” astawan llamkanankupaq (1 Corintios 15:58). Aswanraqmi tayta-mamakuna churi-wawankunata yanapananku espiritualpi munasqankuta haypanankupaq, chaynapi Jehová Diospa punchawninpaq listo kanankupaq. Chayta ruraspankum kusisqa kawsakusqankuwan Diosta hatunchanqaku.

Piensariy sumaq suyakuyninchikpi

20. ¿Imanasqataq wiñay kawsanapaq suyakuyninchikpi yuyaymanananchik?

²⁰ Pacienciawanmi hawkalla suyanki Jehová Diospa castiganan hatun punchawta, sichu sumaq Huertapi wiñay kawsanapaq suyakuypi sapa kuti yuyaymanaspaykiqa (Judas 20, 21). Chaypi kawsakuytachá munachkanki, mana haykapipas yuyaqyaspa, wiñaypaq kawsaspa Jehová Dios hatunchaq munasqaykikunata haypanaykipaq hinaspa paymanta astawan yachanaykipaqpas. Cheqaptamá Jehová Diosmantaqa wiñaypaq hinalla yachasunchik, kunanqa “rurasqankunapa” qallariyllantam yachanchik (Job 26:14). ¡Mayna suma-sumaq suyakuymá chayqa!

21, 22. ¿Imatam yachasunchik kawsarimuqkunamanta, hinaspa imatam paykunaman yachachisunchik?

²¹ Paraisopi kawsarimuqkunam allinta willawasunchik mana yachasqanchikkunamanta. Chaypim kanqa Enoc, paymi willawasun imaynatam valorchakurqa Jehová Diospa piñakuyninmanta mana allin runakunaman willananpaq (Judas 14, 15). Noeypas willawasunchá hatun buqueta rurananpaq imayna kallpanchakusqanmanta. Abrahanwan Sarapas niwasunchá Ur llaqtankumanta lloqsispa karpakunallapi yachaspanku imayna sientekusqankumanta. Piensarisun Esterpi, paypas allintachá willawasun llaqtanta imayna defiendesqanmanta chaynataq Amanpa tantearusqanta imayna harkarusqanmantapas (Ester 7:1-6). Jonaspas yuyarinqachá hatun challwapa wiksanpi kimsa punchaw kasqanmanta, chaynataq Bautizaq Juanpas niwasunchá Jesusta bautizaspan imayna sientekusqanmanta (Lucas 3:21, 22; 7:28). ¡Imakunamantaraqchá yachasunchik!

²² Waranqa Wata Jesucristo Kamachiptin, ichapas atinki Diosmanta yachachiyta wakin kawsarimuqkunaman (Proverbios 2:1-6). Kunanmi anchata kusikunchik Jehová Diosmanta runakuna yachaspa chayman hina kawsakuptinku. Maynatachá kusikunki ñawpa tiempopi kawsaq runakunata yachachiypi kallpanchakusqaykimanta, Jehová Dios bendicioninta qosuptiki hinaspa kusikuyllawanña yachasqankuman hina kawsaptinkupas.

23. Imaynaña tarikuspapas, ¿imatam hinalla rurananchik?

²³ Kunan tiempopi Jehová Diosmanta bendicionkuna chaskisqanchikqa achkallañam, pantaq runa kaspanchikmi yupayta nitaq entiendeytapas llapantaqa atinchikchu (Salmo 40:5). Aswanraqmi Jehová Diosta agradecesqa kachkanchik espiritualpi tukuy yanapakuykunata qowasqanchikmanta (Isaias 48:17, 18). Chaynaqa, imayna tarikuspapas tukuy sonqonchikwanyá Jehová Diosta servisun castiganan hatun punchawta suyaspanchik.

¿Imaynatam kutichiwaq?

• ¿Imataq Jehová “Diospa castiganan hatun punchawqa”?

• ¿Imaynatam qawachiwaq Jehová Diospa hatun punchawninpaq listo kasqaykita?

• Jehová Diospa castiganan hatun punchawnin hichpallapiña kasqanrayku, ¿ima rurasqanchikkunatam ichapas saqenanchik?

• ¿Ima ruraytam munawaq Jehová Diospa piñakuynin punchaw pasaruptin?

[Kay yachachikuypa tapukuyninkuna]