Diospa chaskisqan Serviqninmanta yachasun

“Kayqa ñoqapa serviqniymi [. . .]. Paytam ñoqaqa akllakurqani.” (ISA. 42:1.)

1. Jesuspa wañukusqanta Yuyarinapaq punchaw hichpallapiña kasqanrayku, ¿imatam rurananchik, hinaspa imaynatam yanapawasun Diosta servisqanchikpi?

JESUCRISTOPA wañukusqanta Yuyarinapaq punchaw hichpallapiña kasqanraykum, apostol Pablopa kayna nisqanta kasukunanchik: ‘Kallpasunqa iñichiwaqninchik hinaspa qespichiwaqninchik Jesusta [allinta] qawaspayá [. . .]. Tukuypi contrakuq huchasapa runakunata aguantaq Jesuspiyá yuyaymanaychik chaynapi [mana] pisipaspa sonqoykichikpi mana hukmanyarunaykichikpaq’ (Heb. 12:2, 3). Ñoqanchikrayku wañunankama Jesuspa imayna kasukusqanmanta allinta yachaspaqa, hanaq pachaman riy suyaqkunapas hinaspa kay Pachapi kawsakuy suyaqkunapas mana pisipaspam Jehová Diosta hinalla servisun (tupachiy Galatas 6:9).

2. Isaiaspa willakusqanman hina, ¿imatam yachachwan Diospa Churinmanta?

² Jehová Diospa yanapakuyninwanmi Isaiasqa ñawpaqmantaraq achka willakuykunata nirqa Jesucristomanta. Kay willakuykunam yanapawasunchik ‘iñichiwaqninchik hinaspa qespichiwaqninchik Jesusta [allinta] qawanapaq’. * Estudiaspanchikmi yachasun imayna kasqanmanta, ñakarisqanmanta hinaspa Reyninchik chaynataq Salvaqninchik kasqanmantapas. Chaymantapas allintam entiendesun Jesuspa wañukusqanta Yuyarinapaq huñunakuymanta, kay watapiqa kanqa abril killapa 9 kaq punchawpim, inti seqaykusqan qepata.

¿Pitaq Diospa Serviqnin?

3, 4. a) ¿Pikunamantam rimachkan Isaias libropi “serviqniy” nispan Bibliapa nisqanqa? b) Isaias libropi 42, 49, 50, 52 hinaspa 53 capitulokunapi nisqanman hina, ¿pitaq Diospa Serviqninqa, hinaspa imanasqam chaynata ninchik?

³ “Serviqniy” niq rimayqa achka kutitam Isaias libropi rikurin. Wakin kutipiqa kikin Isaiasmantam rimachkan (Isa. 20:3; 44:26). Wakinpiñataqmi ‘Jacobmanta’ otaq Israel nacionmanta (Isa. 41:8, 9; 44:1, 2, 21). Ichaqa 42, 49, 50, 52 hinaspa 53 capitulokunapiqa manam paykunallamantachu riman. Hinaptinqa, ¿pimantataq rimachkan? Chaypaqqa griego rimaypi qellqasqa Bibliatam qawananchik, chaypim sutillata qawachin Isaias libropa capitulonkunapi rimasqanchik Jehová Diospa Serviqnin pi kasqanmanta. Ejemplopaq, Hechos libropim willawanchik Etiopia nacionpi kamachikuq runa Isaiaspa qellqasqan librota leechkaptin, Felipe chuya espiritupa yanapasqan carretanman asuykusqanmanta. Chay runaqa leechkarqam Isaias 53:7, 8 versiculokunapa nisqanta, hinaptinmi chay kamachikuq tapurqa Felipeta:  “Niykuway ¿pimantataq kay willakuqqa rimachkan, kikinmantachu icha pimantataq?”, nispa. Chaymi Felipeqa willarqa Jesusmanta Isaias rimasqanta (Hech. 8:26-35).

⁴ Jesus wawachallaraq kachkaptinmi Simeon sutiyoq allin runa chuya espiritu yanapaptin Isaias 42:6 hinaspa 49:6 nisqanman hina willarqa, chay wawacha “mana Israel castamanta kaqkunatapas” kancharinanta (Luc. 2:25-32). Chaymantapas, Isaias 50:6-9 nisqanpim qellqasqaña karqa juzgasqanku tutapi Jesusta tukuy mana allin ruranankumanta (Mat. 26:67; Luc. 22:63). 33 watapi Pentecostes fiesta pasaruptinmi, apostol Pedro sutillata qawachirqa Jehová Diospa ‘Serviqninqa’ Jesus kasqanta (Isa. 52:13; 53:11; leey Hechos 3:13, 26). ¿Imatam yachanchik Jesusmanta rimaq willakuykunamanta?

Jehová Diosmi yachachin Serviqninta

5. ¿Pitaq yachachirqa Diospa Serviqnin Jesusta?

⁵ Isaiaspa huk kaqnin willasqanmi, Diospa Serviqninmanta allinta yachachiwanchik kay Pachaman manaraq hamuchkaspan Taytanwan allin amistad kasqankumanta (leey Isaias 50:4-9). Kikin Jesusmi Jehová Diosmanta yachay chaskisqanmanta kaynata nirqa: “Sapa tutamantam rikchachiwan uyarinaypaq. Rinriypim uyarichiwan yachaq sonqoyoq kanaypaq”, nispa (Isa. 50:4). Chay tiempopim Taytanta uyarirqa, paymanta yacharqa hinaspa tukuypi kasukurqa. ¡Mayna allinchá karqa tukuy ima unanchaq Diosmanta yachay chaskisqanqa!

6. ¿Imaynatam qawachirqa Diospa Serviqnin Jesusqa Taytanta tukuy imapi kasukusqanta?

⁶ Kay willakuypa nisqanman hinaqa Jesusmi Taytanta nirqa ‘[“Llapallan Kamachiq”, NM] Señor Dios’ nispa, kaywanqa qawachirqam Taytan lliwpi munaychakuq kasqanta. Tukuy imapi kasukusqanqa sutillam qawakun kayna nisqanpi: “[Llapallan kamachiq] Señor Diosmi rinriyta kichariwan kasukuq kanaypaq. Rinriytamá kicharin mana qepaman kutinaypaq”, nispa (Isa. 50:5). Jehová Dios tukuy imata unanchaptinmi Churinqa ‘ruraysiq maestro hina’ karqa. Chay ‘ruraysiq maestroqa’ tukuy tiempom Diospa ‘ñawpaqninpi kusikurqa. Diospa unanchasqan kay pachamantam kusikurqa. Runakunaraykum [. . .] anchata kusikurqa’ (Pro. 8:22-31).

7. ¿Imaynatam yachanchik tukuy sasachakuypi kaptin Taytan yanapananmanta Jesus seguro kasqanta?

⁷ Diosmanta yachay chaskisqanmi hinaspa runakunata kuyasqanmi Jesustaqa yanaparqa kay Pachaman hamuptin. Qatikachasqa kaspanpas payqa kusikuywanmi Taytanpa munayninta rurarqa (Sal. 40:8; Mat. 26:42; Juan 6:38). Jesusqa manam iskayrayarqachu Taytan yanapananmanta nitaq favorecenanmantapas. Isaiaspa willakusqanman hinam payqa kaynata nirqa: “Hichpallaypim kachkan mana huchayoqña kasqay declaraqniyqa. ¿Maypitaq kachkan ñoqawan churanakuy atiqqa? [. . .] Señor Diosmi yanapawaqniyqa”, nispa (Isa. 50:8, 9). Diosta kay pachapi servispanqa tukuy tiempom Taytanpa yanapakuyninta chaskirqa, chaytam qawachiwanchik Isaiaspa huknin willakusqan.

Diospa Serviqnin kay Pachapi rurasqanmanta

8. ¿Imaynatam yachanchik Isaias 42:1 nisqanpi Jehová Diospa ‘akllasqanqa’ Jesus kasqanta?

⁸ Bibliam willawanchik 29 watapi Jesus bautizakuptin ima pasasqanmanta, ninmi: ‘Chuya espiritum sutillata paloma hina Jesuspa hawanman tiyaykurqa. Hinaptinmi hanaq pachamanta nimurqa: “Qanmi kanki kuyasqay Churiy, qamraykum kusisqa kachkani”’, nispa (Luc. 3:21, 22). Kaynatam Jehová Dios allinta qawachirqa Isaiaspa willakusqanman hina ‘akllasqan’ runa pi kasqanta (leey Isaias 42:1-7). Jesusqa Isaiaspa nisqantam kay Pachapi Diospa munayninta ruraspan allinta cumplirqa. Mateopas, qellqasqan libropim qawachirqa Isaias 42:1-4 versiculokunapi kaq willakuy Jesuspi cumplikusqanta (Mat. 12:15-21).

9, 10. a) ¿Imaynatam Jesusqa kay Pachapi kaspan cumplirqa Isaias 42:3 nisqanta? b) ¿Imaynatam qawachirqa imam allin ruray kasqanta? c) ¿Ima pasaptinmi imapas allin arregloman hina kay Pachapi kanqa?

⁹ Jesuspa tiemponpi religionkunapi punta apaqkunaqa, runamasinkutam mana allinta qawaqku (Juan 7:47-49). Ñakarichisqankuraykum  chay runakunaqa ‘qewisqa soqos’ hina chaynataq ‘tumpalla rupaq mechero’ hina karqaku. Jesusmi ichaqa wakchakunata hinaspa llakisqa kaqkunata kuyapayarqa (Mat. 9:35, 36). Paykunatam nirqa: “Hamuychik ñoqaman llapallan pisipasqakuna hinaspa qepichkaq hina ñakariqkuna, ñoqam samachisqaykichik”, nispa (Mat. 11:28). Chaymantapas, imam allin ruray kaqtam qawachirqa Diospa kamachikuyninman hina imam allin otaq mana allin kasqanmanta yachachispan (Isa. 42:3). Yachachirqataqmi Diospa qosqan Leyta allinta hinaspa kuyakuywan servichikunankupaq (Mat. 23:23). Chaymantapas, wakchamanpas chaynataq apumanpas predicaspanmi allin kaqta rurarqa (Mat. 11:5; Luc. 18:18-23).

¹⁰ Isaiaspa willakusqanman hinaqa, Diospa serviqninmi ‘nacionkunapi allin arreglotaqa ruranan’ karqa (Isa. 42:4). Chaytam ruranqa pisi tiempollapiña, Diospa Gobiernonpi Reynin kasqanrayku kay Pachapi gobiernokunata puchukachispan chaynataq paykunapa rantinpi munaychakuspan. Chaynapim kay Pachapiqa “tukuy imapas allin arregloman hina rurasqa kanqa” (2 Ped. 3:13; Dan. 2:44).

‘Kanchaq’ hinaspa “contrato” hina kasqanmanta

11. Punta cristianokunapa tiemponpi, ¿imaynatam Jesusqa ‘nacionkunaman kanchariq’ karqa? ¿Imaynatam kunanpas hinalla kancharichkan?

¹¹ Isaias 42:6 nisqan cumplikusqanman hinaqa, Jesusmi ‘nacionkunata kanchariq’ karqa. Diospa munayninta ruraspanmi astawanqa judiokunata kancharirqa (Mat. 15:24; Hech. 3:26). Ichaqa nirqataqmi: “Ñoqam kani runakunapa achkiynin”, nispa (Juan 8:12). Arí, payqa judiokunatawan huk nacionniyoq runakunata yachachispanmi chaynataq paykunarayku wañuspanmi kancharirqa (Mat. 20:28). Kawsarimusqan qepatapas qatiqninkunatam nirqa kay “pachapa cantonkama” paymanta willakunankupaq (Hech. 1:8). Chayraykum, Pablowan Bernabeypas: “Achkiyta hinaraqmi churaruyki nacionkunapaq” nispankuqa, qawachichkarqaku mana judio runakunaman predicasqankuta (Hech. 13:46-48; tupachiy Isaias 49:6). Kunan tiempopiqa chaytam rurachkanku kay Pachapi qepaq hanaq pachaman riy suyaqkuna hinaspa kay Pachapi kawsay suyaqkunapas. Paykunam runakunata Diosmanta yachachichkanku hinaspa ‘nacionkunaman kanchariq’ Jesuspi iñinankupaq yanapachkanku.

12. ¿Ima ninantaq llaqtanmanmi Jehová Diosqa ‘contratota’ hina Serviqninta qorqa nisqan?

¹² Hina chay willakuypim Jehová Diosqa akllasqan Serviqninta nirqa runankunapaq contrato kananmanta (Isa. 42:6). Satanasqa tukuytam rurarqa Jesusta wañuchinanpaq chaynapi Taytanpa munasqanta mana cumplinanpaq, ichaqa Jehová Diosmi Churintaqa wañunankamapas ampararqa (Mat. 2:13; Juan 7:30). Hinaptinmi kawsarichispan ‘contratota’ hina llaqtanman qorqa. Chay contratom otaq chay promesam qawachirqa Diospa serviqnin Jesusqa ‘nacionkunata [hinalla] kancharinanmanta’ hinaspa Diosmanta mana yachaspanku tutayaypi hina kaqkunatapas libreyachinanmanta (leey Isaias 49:8, 9). *

13. ¿Imaynatam Jesusqa kay Pachapi kachkaspan tutayaypi kaqkunata librarqa, hinaspa imaynatam kunan tiempopas chayta rurachkan?

 ¹³ Kay willakuypa nisqanman hinam Diospa akllasqan Jesusqa ‘ñawsakunapa ñawinta kichanman’ karqa, “carcelpi kaqkunata” hinaspa ‘tutayay calabozopi tiyaqkunatapas horqonan’ karqa (Isa. 42:7). Chaykunatam rurarqa, Diospa Palabranpa contranpi mayqen costumbrekuna kasqanta qawachispan chaynataq Diospa Munaychakuyninmanta predicaspapas (Mat. 15:3; Luc. 8:1). Arí, chaynata ruraspanmi tutayaypi hina kaq achka judiokunata yanaparqa, hinaptinmi paykunaqa qatiqninkunaña karqaku (Juan 8:31, 32). Jesusqa yanaparqataqmi millonninpi mana judio kaqkunatapas. Qatiqninkunatam kaynata kamachirqa: “Llapallan nacionpi runakunaman rispayá willamuychik qatiqniykunaña kanankupaq”, nispa. Chaymantapas prometerqam “kay pacha puchukanankama” paykunawan kananmanta (Mat. 28:19, 20). Jesusqa hanaq pachamantam yanapamuchkan Diospa Munaychakuyninmanta enteron Pachapi willakuyta.

Jehová Diosqa Serviqnintam hatunchan

14, 15. ¿Imaynatam Jehová Diosqa Serviqninta hatuncharqa, hinaspa imanasqam chayta rurarqa?

¹⁴ Huk willakuypiñataqmi, Serviqninmanta rimaspan Jehová Diosqa kaynata nin: “Serviqniymi ancha yuyaywan ruranqa. Paymi ancha hatunchasqa kanqa. Ancha-ancha reqsisqam kanqa. Llumpay hatunllañam kanqa”, nispa (Isa. 52:13). Chaynatam Jehová Diosqa Churinta hatuncharun, llumpay sasachakuypi kaspanpas kasukusqanrayku hinaspa llapallan kamachiq kasqanta respetasqanraykupas.

¹⁵ Apostol Pedrom Jesusmanta kaynata nirqa: “Paymi wicharirqa hanaq pachaman hinaspam kachkan Diospa alleqninpi, paytam kasukun angelkunapas, autoridadkunapas chaynataq atiyniyoqkunapas”, nispa (1 Ped. 3:22). Chaynallataqmi apostol Pablopas kaynata nirqa: “[Jesusmi] humillakuykurqa, Diosta kasukuspanmi wañurqa penqaypaq cruzpi [“qerupi”, NM]. Chayraykum Dios llumpa-llumpayta hatuncharuspan llapallanmanta suma-sumaq sutiwan sutichaykurqa, chaynapim Jesuspa sutinta uyarispanku hanaq pachapi hinaspa uku pachapi kaqkuna qonqorakuykunqaku. Llapallan runakunapas ‘Jesucristoqa Señormi’ nispam ninqaku, chaynataqa ninqaku Dios Taytata yupaychaspankum” (Fili. 2:8-11).

16. a) ¿Imaynatam Jesusqa ‘ancha hatunchasqa karqa’ 1914 watapi? b) ¿Imakunatam rurarun chay tiempomantaqa?

 ¹⁶ Jesusqa 1914 watapim ‘ancha hatunchasqa karqa’, hanaq pachapi Rey kananpaq Jehová Dios churaruptin (Sal. 2:6; Dan. 7:13, 14). Chay tiempomantam ‘enemigonkunapa munaychakusqanpa’ chawpinpi kamachichkan (Sal. 110:2). Puntataqa Satanastawan angelninkunata venceruspanmi kay Pachaman wischuramurqa (Apo. 12:7-12). Hinaspam Rey Ciromantapas aswan atiyniyoq kaspan, kay Pachapi tarikuq hanaq pachaman riy suyaqkunata ‘hatu-hatun Babiloniamanta’ otaq pantay yachachikuykunamanta librarqa (Apo. 18:2; Isa. 44:28). Kunanñataqmi enteron Pachapi predicacionta yanapachkan, chayraykum huñurun kay Pachapi qepaq hanaq pachaman riy suyaqkunata chaynataq millonninpi ‘sapaq ovejakunatapas’ otaq kay Pachapi kawsakuy suyaqkunatapas (Apo. 12:17; Juan 10:16; Luc. 12:32).

17. ¿Imatam Isaiaspa willakuyninkuna yacharachiwanchik Diospa Serviqnin Jesusmanta?

¹⁷ Isaias libropi admirakuypaq profeciakunamanta yachasqanchikqa, yanaparuwanchikchá Reyninchik hinaspa Salvaqninchik Jesucristota astawan chaninchanapaq. Kay Pachapi kachkaspa kasukusqanmi allinta qawachirqa hanaq pachapi Taytanwan allin yachachisqa kasqanmanta. Chaymantapas, predicaspan hinaspa kunan tiempopi qatiqninkunapa predicasqankuta yanapaspanmi qawachirqa ‘nacionkuna kanchaq’ kasqanta. Qatiqnin yachachikuypim qawasunchik Diospa Serviqninmanta Isaias imatawanraq willakusqanta, willakurqam ñakarinanmanta hinaspa ñoqanchikta salvawananchikpaq wañunanmantapas. Kaykunapim allinta “yuyaymanananchik”, astawanraqmi Jesucristopa wañukusqanta Yuyarinapaq punchaw hichpallapiña kasqanrayku (Heb. 12:2, 3).

[Willakuykuna]

Yuyarisun

• Isaiaspa willakusqanman hina, ¿pitaq Diospa ‘serviqnin’ kanman hinaspa imanasqataq chaynata ninchik?

• ¿Pitaq Diospa Serviqnintaqa yachachirqa?

• ¿Imanasqataq nichwan Jesusqa ‘nacionkunata kanchaqmi’ nispa?

• ¿Imaynatam Diospa Serviqninqa ancha hatunchasqa karqa?

[Kay yachachikuypa tapukuyninkuna]

[21 kaq paginapi dibujo]

Felipeqa allintam yacharqa Isaiaspa willakusqan Diospa ‘serviqninqa’ Jesus kasqanmanta

[23 kaq paginapi dibujo]

Diospa akllasqan Jesusqa llakipayarqam wakchakunata chaynataq ñakariqkunatapas

[24 kaq paginapi dibujo]

Jehová Diosqa Jesustam hatuncharurqa hinaspam Gobiernonpi rey kananpaq churarqa