“Diospa hatun favorninkuna aypuq allin mayordomo hinayá” iñiqmasinchikkunata yanapasun

“Wawqe-panintin hinayá lliwchaykichik sumaqllataña kuyanakuychik. Respetanakuspayá wakinnikichikta imapipas aswan allinpaq hapiychik.” (ROM. 12:10.)

1. ¿Imatam segurawanchik Diospa Palabran?

BIBLIAQA achka kutipim segurawanchik hukmanyasqa tarikuptinchik Jehová Dios yanapawananchikmanta. Qawasunchik Bibliapa kayna sumaqllaña nisqanta: “Tayta Diosmi takyachin llapallan wichiqkunata. Paytaqmi hoqarin wichisqakunata”. “Payqa llakisqa sonqoyoqkunatapas consuelaykunmi. Payqa heridankunatapas hampiykunmi.” (Sal. 145:14; 147:3.) Hanaq pachapi Taytanchikqa niwanchiktaqmi: “Ñoqa Tayta Diosmi alleq makikichikmanta hapiqnikichik kani. ‘Ama manchakuychikchu, ñoqam yanapasqaykichik’ niqnikichikmi kani”, nispa (Isa. 41:13).

2. ¿Imaynatam Jehová Diosqa serviqninkunata yanapan?

² Jehová Dios hanaq pachapi kachkaspanqa, ¿imaynatataq hukmanyasqa kaptinchik makinchikmanta hapiwanchikman hinaspa hoqariwanchikmanpas? Chaytaqa ruran yanapawananchikpaq tukuyta ruraspanmi. Ejemplopaq, kallpanchasqa kanapaqmi chuya espiritunta qowanchik (2 Cor. 4:7; Juan 14:16, 17). Palabranwanpas kallpanchawanchikmi (Heb. 4:12). Ichaqa manam chaykunallawanchu kallpanchawanchik. Hinaptinqa, ¿imaynatawanraqmi kallpanchawanchik? Kay tapukuyta kutichinapaqqa, qawasunchik apostol Pedropa punta cartasqanpi ima nisqanta.

“Diospa hatun favorninkuna”

3. a) ¿Imatam nin apostol Pedro sasachakuykunamanta? b) ¿Imatam apostol Pedro seguran punta cartanpa tukuyninpi?

³ Chay cartasqanpim Pedroqa hanaq pachaman riy suyaqkunaman nirqa, sumaq bendicion chaskinankumanta kusisqa kanankupaq. Ichaqa ninmi: ‘Pisi tiempollapas achka sasachakuykunatam ñakarichkankichik’, nispa (1 Ped. 1:1-6). Qawasqanchikman hina, Pedroqa manam huk sasachakuyllamantachu rimachkan, aswanmi “achka” sasachakuykunamanta. Hanaq pachaman riqkunaqa, ¿atinmankuchu chay sasachakuykuna aguantayta? Pedroqa manam iskayrayasqataqa saqenchu, aswanmi seguran tukuy sasachakuykunata aguantanankupaq Jehová Dios yanapananmanta. Chayna nisqanmi rikurin chay qellqasqan cartapa tukuyninpi, ‘tukuy imapa puchukayninmanta’ rimasqanpi (1 Ped. 4:7).

4. ¿Imanasqataq kallpanchawanchik 1 Pedro 4:10 versiculopa nisqanqa?

⁴ Apostol Pedrom kaynata nin: “Diospa qosusqaykichikman hinayá sapakama yanapanakuychik. Qamkunaqa kaychik Diospa hatun favorninkuna aypuq allin mayordomo hinayá”, nispa (1 Ped. 4:10). Qawasqanchikman hinaqa apostol Pedroqa ninmi Diospa “favorninkuna” nispa. Chaynata nispanmi Pedroqa qawachin achka sasachakuykuna kaptinpas, Diospa favorninpas otaq ima qowasqanchikpas achka kasqanmanta. ¿Imanasqataq Pedropa kayna  nisqanqa anchata kallpanchawanchik? Kallpanchawanchikmi kayrayku; ima sasachakuypi tarikuptinchikpas Jehová Diosqa chay sasachakuyta aguantanapaqmi tukuy tiempopi qowasun favorninta otaq necesitasqanchikta. ¿Cuentata qokunkichu pikunatam Jehová Diosqa servichikun favorninta qawachiwananchikpaq? Payqa servichikun iñiqmasinchikkunatam.

‘Sapakamayá yanapanakusunchik’

5. a) Yanapakuymanta rimaspa, ¿imatam cristianokuna rurananchik? b) ¿Ima tapukuykunam kanman?

⁵ Apostol Pedrom congregacionpi kaqkunata kaynata nin: “Tukuy imamantapas llalliriqtaqa kuyanakuychikyá”, nispa. Nintaqmi: “Diospa [regalon] qosusqaykichikman hinayá sapakama yanapanakuychik”, nispa (1 Ped. 4:8, 10). Arí, sapakamam iñiqmasinchiktaqa kallpanchananchik. Jehová Diosqa ancha valorniyoq kaqtam sapakamaman qowarqanchik, chaytam servichikunanchik hukkunata yanapanapaq. ¿Imataq chay ancha valorniyoq qowasqanchikqa? Pedropa nisqanman hinaqa Diospa regalo qowasqanchikmi. ¿Imataq chay regaloqa? ¿Imaynatam hukkunata yanapanapaq servichikuchwan?

6. ¿Ima regalokunatam Jehová Dios qowarqanchik?

⁶ Diospa Palabranmi kaynata niwanchik: “Diosmantam chaskinchik llapa ima allin kaqkunataqa”, nispa (Sant. 1:17). Arí, Jehová Diosqa favornintam qawachiwanchik llapa ima allin kaqkunata qowaspanchik. Chaykuna qowasqanchikmanta aswan valorniyoqqa chuya espiritunmi. Kay regalo qowasqanchikmi yanapawanchik kuyakuq, sumaq sonqo hinaspa hawkalla kananchikpaq, chaynapi iñiqmasinchikkunata kuyanapaq hinaspa yanapanapaqpas. Chuya espirituqa yanapawanchiktaqmi yachayniyoq hinaspa yuyayniyoq kanapaqpas (1 Cor. 2:10-16; Gal. 5:22, 23). Imapas ruray atisqanchikpas chaynataq sumaq kayninchikkunapas Diospa qowasqanchik regalom, chaykunatam payqa qowarqanchik alabanapaq hinaspa hatunchanapaqpas. Diosqa munanmi tukuy chaykunata servichikunanchikta, chaynapi iñiqmasinchikkuna Diospa hatun favorninkunata qawanankupaq.

¿Imaynatam Diospa regalo qowasqanchikta servichikunanchik?

7. a) ¿Ima ninantaq “Diospa [regalo] qosusqaykichikman hinayá sapakama yanapanakuychik” nispa Bibliapa nisqanqa? b) ¿Ima tapukuykunatam rurakunanchik, hinaspa imanasqa?

⁷ Diospa qowasqanchik regalokunamanta rimaspanmi apostol Pedro kaynata nirqa: “Diospa [regalo] qosusqaykichikman hinayá sapakama  yanapanakuychik”, nispa. Kaypi nisqanman hinaqa, manam llapallanchikchu chaynalla kanchik imayna kasqanchikpi hinaspa imakuna ruray atisqanchikpipas. Chayna kaptinpas, llapallanchiktam kallpanchawanchik Diosmanta regalo chaskisqanchikman hina ‘yanapanakunanchikpaq’. Qawasqanchikman hinaqa, ‘yanapanakuychik [. . .] allin mayordomo hina’ nispa Pedropa rimasqanqa, huk kamachikuy hinam qellqasqa kachkan. Chaymi tapukunanchik: ¿Iñiqmasiykunata yanapanaypaqchu Diosmanta regalo chaskisqaykunata servichikuchkani? (tupachiy 1 Timoteo 5:9, 10.) Icha, ¿apu kanaypaqchu, allin reqsisqa kanaypaqchu hinaspa kikiypaq imatapas maskanaypaqchu?, nispa (1 Cor. 4:7). Jehová Diosqa kusikunmi paymanta regalo chaskisqanchikkunata yanapanakunanchikpaq servichikuptinchik (Pro. 19:17; leey Hebreos 13:16).

8, 9. a) ¿Imakunata ruraspankum cristianokunaqa iñiqmasinkuta yanapanku? b) ¿Imaynatam congregacionnikipi iñiqmasikikuna yanapanakunku?

⁸ Bibliaqa willawanchikmi punta cristianokuna tukuyta ruraspa iñiqmasinkuta yanapasqankumanta (leey Romanos 15:25, 26 hinaspa 2 Timoteo 1:16-18). Kunan tiempopi cristianokunapas, Diospa kamachisqanta kasukuspankum, paymanta chaskisqanku regalota servichikunku iñiqmasinkuta yanapanankupaq. Qawasunchikyá imaynata chay rurasqankuta.

⁹ Sapa killam achka iñiqmasinchikkuna discursota qonankupaq unay tiempo preparakunku, chaynapi wawqe-paninchikkunata allinta yachachinankupaq. Chayna sumaq preparakusqankum congregacionpi kaqkunata yanapan sasachakuykunata aguantanankupaq (1 Tim. 5:17). Wakin iñiqmasinchikkunaqa reqsisqam kanku kuyakuq hinaspa llakipayakuq kasqankuwan (Rom. 12:15). Hukkunañataqmi llumpay llakisqa kaqkunata watukuyta hinaspa paykunapaq orakuyta mana qonqankuchu (1 Tes. 5:14). Wakinñataqmi sumaq cartata qellqanku sasachakuypi kaqkunata kallpanchanankupaq. Hukkunañataq onqoywan sasachakuqkunata huñunakuykunaman pusamunku. Waranqantin cristianokunañataqmi hatun desgraciakuna kaptin iñiqmasinchikkunapa wasinkuta allichaspa otaq kaqllamanta hatarichispapas yanapakunku. Kayna kuyakuywan iñiqmasinkuta yanapasqankum qawachin ‘Diospa hatun favorninkunata’ (leey 1 Pedro 4:11).

¿Predicaychu icha iñiqmasinchikta yanapaychu aswan allin kanman?

10. a) ¿Ima iskay ruraypim apostol Pablo kallpanchakurqa? b) ¿Imaynatam Pablopa rurasqanta qatipakuchwan?

¹⁰ Iñiqmasinchikta yanapanapaq kamachikuyta chaskispapas, chaskirqanchiktaqmi allin noticiamanta runakunaman willanapaq kamachikuytapas. Kaykunamantam apostol Pabloqa allinta yacharqa. Efeso llaqtapi cristianokunamanmi nirqa, ‘paykunaman willananpaq [otaq paykunata yanapananpaq]’ Dios kamachisqanmanta (Efe. 3:2 ). Ichaqa kaynatawanmi nirqa: “Diosmá allinpaq chaskiwaspanku kunawarqaku allin noticiata willakunaykupaq”, nispa (1 Tes. 2:4). Pablo hinam ñoqanchikpas runakunaman Diospa Gobiernonmanta willakunanchikpaq kamachikuyta chaskirqanchik. Payqa tukuy tiempom predicarqa, ñoqanchikpas tukuy sonqowan predicaspam chayna rurasqanta qatipakunchik (Hech. 20:20, 21; 1 Cor. 11:1). Allintam yachanchik Diosmanta willakusqanchikqa runakunata salvananmanta, yachanchiktaqmi ‘chuya espiritupa qowasqanchikta’ iñiqmasinchikkunaman Pablo hina qonamantapas (leey Romanos 1:11, 12; 10:13-15).

11. ¿Imaynatam qawananchik predicanapaq hinaspa iñiqmasinchikkunata yanapanapaq kamachikuyta?

¹¹ ¿Predicaychu icha iñiqmasinchikkunata yanapaychu aswan allin kanman? Iskayninmi ancha valorniyoq. Kay ruraykunaqa alton pawaq animalpa raprankuna hinam. Imaynam alton pawaq animalpas iskaynin rapranta pawananpaq necesitan, chaynam ñoqanchikpas cabal cristiano kanapaqqa iskayninta rurananchik. Chaymi, predicanapaq hinaspa iñiqmasinchikta yanapanapaq kamachikuykunataqa iskaynin ancha valorniyoq kasqanta qawanchik, chaynatam apostol Pedrowan Pablopas qawarqaku. ¿Imanasqataq chaynata ninchik?

12. ¿Imaynatam Jehová Diospa servichikusqan runakuna kachwan?

 ¹² Predicaspaqa tukuy yachasqanchikkunatam servichikunchik runakunata yachachinapaq, chaynataq Diospa willakuyninkunawan sonqonkuman chayanapaqpas. Chaynatam yanapanchik Jesuspa qatiqnin kanankupaq. Tukuy yachasqanchikkunatawan sumaq kayninchikkunataqa servichikunanchiktaqmi iñiqmasinchikkunata kallpanchanapaqpas. Iñiqmasinchikkunata kallpanchasqanchik hinaspa kuyakuywan yanapasqanchikqa qawachinmi Diospa favorninta (Pro. 3:27; 12:25). Chaynatam Jesusta hinalla qatinankupaq yanapanchik. Chaynapim, predicaspapas otaq iñiqmasinchikkunata yanapaspapas Jehová Diospa servichikusqan runakuna kanchik (Gal. 6:10).

‘Lliwchaykichikyá [. . .] kuyanakuychik’

13. ¿Imataq pasanman iñiqmasinchikkunawan mana yanapanakuptinchik?

¹³ Pablom iñiqmasinkunata kallpanchaspam kaynata nirqa: “Wawqe-panintin hinayá lliwchaykichik sumaqllataña kuyanakuychik. Respetanakuspayá wakinnikichikta imapipas aswan allinpaq hapiychik”, nispa (Rom. 12:10). Iñiqmasinchikkunata kuyasqanchikmi kallpanchawanchik Diospa hatun favorninkuna aypuq mayordomo hina sonqomanta yanapananchikpaq. Satanasqa manam munanchu yanapanakunanchikta, mana yanapanakuptinchikqa huñulla kasqanchikmantam rakinakuyta qallaykuchwan (Col. 3:14). Mana huk sonqolla kaspanchikqa hukmanyasunmi predicananchikpaqpas. Alton pawaq animalpa huknin rapran mana allin kaptinqa wichiykunmi, chaynam pasawachwan predicayta otaq iñiqmasinchikkuna yanapayta saqeruptinchikqa, chaytaqa allintamá Satanasqa yachan.

14. ¿Pikunatam yanapan iñiqmasinchikkunata yanapasqanchik? Ejemplowan rimarimuy.

¹⁴ Iñiqmasinchikkunata yanapayqa manam paykunallatachu yanapan, ñoqanchiktapas yanapawanchikmi (Pro. 11:25). Chayna kasqantam qawachin Ryan hinaspa Roni sutiyoq casarasqa iñiqmasinchikkunapa rurasqanku, paykunam Estados Unidos nacionpa Illinois llaqtapi yachanku. Katrina sutiyoq llumpa-llumpay wayra achka iñiqmasinchikkunapa wasinkuta tuñirachisqanmanta yacharuspankum, paykunaqa llamkayninkumanta lloqsikuspanku hinaspa yachasqanku wasinta saqespanku yanapaq rirqaku. Hinaspam rantirurqaku wasiman rikchakuq huk carrota, chayta allicharuspankum karu-karuta rirqaku Luisiana lawman. Chay lawpim huk wata masnin qeparqaku, hinaspam tiemponkuta, kallpankuta chaynataq kapuqninkutapas servichikurqaku wawqe-paninchikkunata yanapanankupaq. 29 watayoq Ryanmi nin: “Kayna  yanapakusqaymi Jehová Diosman astawan asuykachiwarqa. Qawarqanitaqmi llaqtanpi kaqkunata Jehová Dios allinta waqaychasqanmanta.” Nirqataqmi: “Experienciayoq iñiqmasinchikkunawan llamkasqaymi yachachiwarqa wawqe-paninchikkunata allinta cuidanaypaq. Yachachiwarqataqmi mozo-sipaskunapaq Jehová Diospa llaqtanpi achka llamkay kasqanta”, nispa. 25 watanpi kaq Roniñataqmi nin: “Ancha agradecesqam kachkani hukkunata yanapasqayrayku. Manam haykapipas kayna kusisqaqa tarikurqanichu. Kay yanapasqaymanta tukuy yachasqaykunaqa achka watakunapaqmi yanapawanqa”, nispa.

15. ¿Imanasqataq hinalla yanapakunanchik Diospa favornin chaskiq mayordomo hina?

¹⁵ Qawasqanchikman hinaqa, predicanapaq hinaspa iñiqmasinchikkunata yanapanapaq kamachikuyta kasukuyqa llapallanchiktam yanapawanchik. Yanapasqanchik wawqe-paninchikkunaqa iñiyninkupim kallpanchasqa tarikunku, ñoqanchikñataq ancha kusisqa sientekunchik yanapasqanchikmanta (Hech. 20:35). Llapallanchik yanapanakuq kaptinchikqa, congregacionpas kanqa runakunapa riy munasqanku sitio hinam. Chaymantapas kuyanakusqanchikwanmi reqsichikunchik cheqap cristianokuna kasqanchikta. Jesusmi nirqa: “Kuyanakuptikichikqa llapallan runakunam yachanqa discipuloykuna kasqaykichikta”, nispa (Juan 13:35). Astawanmi kuyakuq Taytanchik Jehová Diosta agradecekunchik, paymi necesitaqkunata kallpanchan ñoqanchikta servichikuspa. Chaynaqa achka razonkunam kachkan ‘Diospa hatun favorninkuna aypuq allin mayordomo hina’ chaskisqanchik regalota servichikuspa yanapanakunanchikpaq. ¿Hinallachu qampas chaykunata ruranki? (Leey Hebreos 6:10.)

¿Yuyachkankichu?

• ¿Imaynatam Jehová Diosqa serviqninkunata yanapan?

• ¿Ima ruranapaq kamachikuytam chaskirqanchik?

• ¿Imaynatam iñiqmasinchikkunata yanapanchikman?

• ¿Imataq kallpanchawasun Diospa regalo qowasqanchikta servichikuspa iñiqmasinchikkunata yanapanapaq?

[Kay yachachikuypa tapukuyninkuna]

[13 kaq paginapi dibujo]

¿Kikillanchikpaqchu icha hukkunata yanapanapaqchu tukuy ruray yachasqanchikkunata servichikunchik?

[15 kaq paginapi dibujo]

Predicananchikmi hinaspa iñiqmasinchikkunatapas yanapananchikmi

[16 kaq paginapi dibujo]

Anchatam agradecekunanchik imatapas saqespanku iñiqmasinchikkunata yanapaqkunataqa