Hamuy, hinaspayá qatiway
Hamuy, hinaspayá qatiway
“Pipas qatiwayta munaspaqa, amaña kikillanpaq kawsaspayá sapa punchaw ñakaristinpas qatiwachun.” (LUC. 9:23.)
1, 2. a) ¿Imatam Jesusqa runakunaman nirqa? b) ¿Qampas Jesuspa qatiqninñachu kanki icha manaraqchu?
KAY Pachapi ima rurananta manaraq tukuchkaspanmi, Jesusqa predicachkarqa Perea sutiyoq llaqtapi, kay llaqtaqa tarikurqam Jordanta pasaspa intipa qespimunan lawpi. Chaypim huk mozo asuykuspan tapurqa wiñay kawsayta tarinanpaq ima rurananmanta. Diospa qosqan Leyta cumplisqanta Jesus qawaspanmi kaynata nirqa: “Rispaykiyá rantikaramuy tukuy kapuqnikita, hinaspayá chay qollqeta wakchakunaman qoykariy chaynapim hanaq pachapi kapuqnikikuna kanqa, chaymanta kutimuspañam ñoqawan rinki”, nispa (Mar. 10:21). ¡Mayna allinchá karqa Diospa sapallan Churinta qatiyqa!
2 Kay mozo mana qatiptinpas, hukkunaqa qatirqakum. Puntataraqmi Jesusqa Felipeta kaynata nirqa: “Hakuchik [qatiway]”, nispa (Juan 1:43). Payñataqmi qatirqa, hinaspam tiempopa risqanman hina apostolnin karqa. Chaymantapas Mateotam qatiqnin kananpaq nirqa, hinaptinmi paypas qatirqa (Mat. 9:9; 10:2-4). Arí, Jesusqa llapallantam kaynata nirqa: “Pipas qatiwayta munaspaqa, amaña kikillanpaq kawsaspayá sapa punchaw ñakaristinpas qatiwachun”, nispa (Luc. 9:23). Chaynaqa, allin ruraqkunaqa llapallanchikmi munaspaqa Jesuspa qatiqnin kayta atichwan. ¿Qampas munankichu? Ñoqanchikmantaqa yaqa llapallanchikñam Jesuspa qatiqninkuna kachkanchik, chaymi predicaspaqa runakunata nichkanchik payta qatinankupaq.
3. ¿Imataq yanapawasun Jesusta hinalla qatinapaq?
3 Llakikunapaqmi ichaqa, Bibliamanta yachay munaqkunamanta wakinqa astawan yachananku kachkaptin hinaspa Jesusta qatinanku kachkaptinpas karunchakurunku (Heb. 2:1). Ñoqanchikqa, ¿imaynatam Jesusta hinalla qatichwan? Kaypaqqa yanapawasunmi kay tapukuykunata rurakuy: ¿Imataq qallariypiqa kallpanchawarqa Jesusta qatinaypaq? ¿Ima ninantaq Jesusta cheqaptapuni qatiyqa?, nispa. Kay tapukuykunata kutichisqanchikmi kallpanchawasun Jesusta hinalla qatinanchikpaq chaynataq paypa qatiqnin kanankupaq hukkunata yanapanapaqpas.
¿Imanasqataq Jesusta qatinchik?
4, 5. ¿Imanasqataq ninchik Jesusqa allin preparasqam kachkan kamachiwananchikpaq nispa?
4 Diosmanta willakuq Jeremiasmi kaynata nirqa: “Dios Taytalláy, yachanim runaqa mana kikillanmanta kawsasqanta. Yachanim runaqa mana kikillanmanta purisqanta”, nispa (Jer. 10:23). Ñawpa tiempomantaraq tukuy imakunapa pasasqanmi qawachiwanchik Bibliapa chayna nisqan cheqap kasqanta. Astawanmi kunanqa rikunchik runakunapa kikinkupura kamachinakusqanku mana allin kasqanta. Ichaqa Jesusmi preparasqa kachkan kamachiwaqninchik kananpaq, chayraykum qatinanchikpaq niwasqanchikta kasukunchik. Qawasunchikyá imanasqam Jesuslla allin kamachiq kasqanmanta.
5 Puntataqa chaynatam ninchik, kikin Jehová Dios Jesusta Kamachiwananchikpaq akllasqanrayku. ¡Manamá pipas Dios hina allin akllaqqa kanmanchu! Chaymantapas, Jesuspa imayna kasqanqa admirakunapaqmi hinaspa qatipakunapaqmi (leey Isaias 11:2, 3). Payqa llapallanchikpaqmi ancha allin ejemplo qowaqninchik (1 Ped. 2:21). Chaynataq, Jesusqa qatiqninkunapim interesakun, chaytam qawachirqa qatiqninkunarayku vidanta qospan (leey Juan 10:14, 15). Payqa ovejankunapi interesakuq allin michiqmi, chaymi yanapawanchik kunan kusisqa kawsanapaq hinaspa hamuq tiempopiñataq wiñaypaq kawsanapaq (Juan 10:10, 11; Apo. 7:16, 17). Kaykunamanta hinaspa hukkunamanta yachasqanchikmi kallpanchawarqanchik Jesuspa qatiqnin kananchikpaq. Chaynaqa, ¿ima ninantaq Jesuspa qatiqnin kayqa?
6. ¿Imaynam kananchik Jesuspa qatiqninkunaqa?
6 Jesuspa qatiqnin kayqa, manam cristianom kani nispa rimayllachu. Kunan tiempopiqa yaqa iskay waranqa millon runakunam ninku cristiano kasqankuta, ichaqa imayna kawsasqankuwanmi qawachinku Diospa kamachisqanta mana kasukusqankuta, chaymi ‘mana allin ruraq’ runakuna kanku (leey Mateo 7:21-23). Hinaptinqa, imaynam Jesuspa qatiqnin kay munaqkunam yachachinchik, chaynam cheqap cristianokuna kananchikpaqpas kallpanchakunanchik Jesuspa ejemplonta hinaspa yachachisqanta tukuy tiempopi qatipakunapaq. Kunanñataq qawasunchik Jesuspa imayna kasqanmanta hinaspa imaynata qatipakunamantapas.
Jesuspa yachayniyoq kasqanta qatipakusun
7, 8. a) ¿Imataq yachayniyoq kayqa, hinaspa imanasqam Jesusqa ancha yachayniyoq karqa? b) ¿Imaynatam Jesus qawachirqa yachayniyoq kasqanta, hinaspa imaynatam qatipakuchwan?
7 Jesusta qatipakunapaq sumaq kayninkunaqa achkam, ichaqa qawasunmi tawallamanta: yachayniyoq kasqanmanta, humilde kasqanmanta, tukuy sonqowan rurasqanmanta hinaspa kuyakuyninmantapas. Puntataqa rimasun yachayniyoq kasqanmanta; yachayniyoq kayqa yachasqanchikman hina chaynataq entiendesqanchikman hina imatapas ruraymi. Apostol Pablom kaynata qellqarqa: “[Jesuspim] pakasqa kachkan qori-qollqe hina tukuy yachayniyoq kaypas chaynataq entiendeypas”, nispa (Col. 2:3). ¿Pitaq Jesusmanqa chay yachaytaqa qorqa? Paymi kaynata nirqa: “Taytaypa yachachiwasqallantam ñoqaqa willaykichik”, nispa (Juan 8:28). Yachaynintaqa Jehová Diosmi qorqa, chaymi allinta tanteaspa yachaywan imatapas rurarqa.
8 Ejemplopaq, Jesusqa yachaywanmi tantearqa imayna kawsananpaq. Payqa Taytanpa munayninta rurananpaqmi tukuy kapuqniyoq kaytaqa mana munarqachu. Chaynataq yachaywanmi kallpantawan tiemponta servichikurqa Diospa Munaychakuyninta puntapi churananpaq. Imayna kawsasqanta qatipakunapaqqa, manam kapuqniyoq kanapaqqa afanakunachu nitaq chaykunapi tukuy kallpanchiktaqa usuchinachu (Mat. 6:22, NM). Astawan tiempoyoq kanankupaqmi achka cristianokunaqa ima rurasqankupi manaña llumpaytaqa afanakunkuchu, chaynapim wakinkuqa precursor kanku. Sichu qampas chayna kanki, hinaspaqa allintam rurachkanki. ‘Diospa munaychakusqanta’ puntata maskaspaqa kusisqam tarikusunchik (Mat. 6:33).
Jesus hinayá humilde kasunchik
9, 10. ¿Imaynatam Jesus qawachirqa humilde kasqanta?
9 Kunanñataqmi rimasun Jesuspa humilde kasqanmanta. Pantaq kasqanchikraykum, runakunaqa imatapas ruranapaq chaskisqanchikwan hatunchakuyta munanchik. ¡Jesusqa manam chaynachu karqa! Jehová Diospa munaynin cumplikunanpaq ancha allin rurayniyoq kaspanpas, Jesusqa manam haykapipas hatunchakuytaqa munarqachu. Bibliaqa kallpanchawanchikmi Jesus hina humilde kanapaq. Apostol Pablom kaynata qellqarqa: “Jesucristopa piensasqanman hinayá qamkunapas piensaychik. Paymi Dios [hina] kachkaspapas Dios [hina] kasqanta valechiyta mana munarqachu, aswanqa kikinmi menoschakururqa sirviente hinaña kananpaq”, nispa (Fili. 2:5-7). ¿Imatam Jesusmanta yachachiwanchik Pablopa kayna nisqanqa?
10 Jesusqa Taytanwan kuskam hanaq pachapi kawsarqa. Ichaqa ‘kikin menoschakuspanmi’ chaypi kawsasqanta saqemurqa. Diosmi Jesuspa vidanta Mariapa wiksanman churarqa, hinaptinmi 9 killamanta wakin wawakuna hina nacemurqa. Chaymantapas, mana ancha kapuqniyoq carpinteropa wasinpim wiñarqa, chaypim warmacha kasqanmantapacha hatunyanankama karqa. Chay wiñasqan tiempopipas kasukuqmi karqa, tayta-maman pantaq kachkaptinkupas (Luc. 2:51, 52). ¡Mayna humildemá karqa!
11. ¿Imaynatam Jesuspa humilde kasqanta qatipakuchwan?
11 Runakunapa qawasqanman hina mana ancha valorniyoq ruraykunata ruraspanchikmi, Jesuspa ejemplonta qatipakuchkanchik. Ejemplopaq piensasun predicayninchikpi. Wakinkum piensanku predicayqa penqakunapaq hina kasqanta, aswanraqmi predicaptinchik runakuna mana allinta qawawaptinchik otaq contranchikpi imakunata ruraptinkupas. Ichaqa, chay rurasqanchikwanmi runakunapa vidanta salvachkanchik. Chaymi runamasinchikta yanapanapaq hinalla kallpanchakunanchik, Jesuspa nisqanman hina paypa qatiqnin kanankupaq (leey 2 Timoteo 4:1-5). Humilde kasqanchiktaqa qawachisuntaqmi Huñunakunanchik Salonta pichaspa, bañotapas limpiaspa chaynataq pichasqanchiktapas wischuspa. Salonninchikta pichaspaqa Diostam servichkanchik, llaqtapi huk wasikunamantaqa chaypim Diosta yupaychanchik. Chaykunata allinta ruraspam qawachisun humilde kasqanchikta hinaspa Jesucristota qatipakusqanchiktapas.
Jesuspa tukuy sonqowan rurasqanta qatipakusun
12, 13. a) ¿Imaynatam Jesusqa tukuy sonqonwan Diospa munaynin rurasqanta qawachirqa, hinaspa imataq kallpancharqa chayta rurananpaq? b) ¿Imataq ñoqanchiktapas kallpanchawanchik tukuy sonqowan Diospa munayninta ruranapaq?
12 Jesusqa tukuy sonqonmantam Diospa munaynintapas rurarqa. Payqa tukuy imaymanatam rurarqa kay Allpapi kaspanqa: uywaqnin Joseymi carpintero karqa, paywanchá llamkarqa warma kachkaspanqa; predicaspanñataqmi onqosqakunata hampirqa hinaspa wañusqakunatapas kawsarichirqa. Ichaqa, astawanmi kallpanchakurqa runakunaman allin noticiata willananpaq hinaspa yachachinanpaqpas (Mat. 4:23). Hina chay llamkaytam ñoqanchikpas rurananchik. ¿Imataq yanapawasun tukuy sonqonchikmanta pay hina ruranapaq? Qawasunchikyá Diospa munayninta rurananpaq Jesusta ima kallpanchasqanmanta.
13 Puntataqa Diosta kuyaspanmi runakunamanqa willarqa hinaspa yachachirqa, chaynataq cheqap yachachisqankunata kuyaspantaqmi chaytaqa rurarqa. Paypaqqa yaqa paka hina ancha valorniyoqmi chaykuna karqa, chaymi yachachiyta munarqa. Ñoqanchikpas pay hina ruraytam munanchik, runakunata yachachiq kasqanchikrayku. Piensasun Diospa Palabranpi ancha valorniyoq cheqap yachasqanchikkunapi. Yachanchikmi Diospa llapallan kamachiq kasqan imayna yanqachasqa kasqanmanta hinaspa imayna allichasqa kananmantapas. Chaymantapas, yachanchikmi wañuqkuna imayna tarikusqankumanta hinaspa mosoq pachapi ima bendicionkuna kananmantapas. Chaykunamanta unay tiempoña otaq chayllaraq yachaptinchikpas, hinallam paka hina ancha valorniyoq kachkan (leey Mateo 13:52). Kusikuywan predicaptinchikqa runakunaqa cuentatam qokunqaku Diospa yachachisqankunata kuyasqanchikta.
14. ¿Imaynatam Jesuspa imayna yachachisqanta qatipakuchwan?
14 Qawasuntaqyá Jesuspa imayna yachachisqanmantapas. Sapa kutim Bibliapa nisqanman hina yachachirqa, payqa nirqam: “Bibliam nin”, nispa (Mat. 4:4; 21:13). Hebreo rimaypi qellqasqa Diospa Palabranmanta achka librokunata servichikuspanmi Jesusqa rimarqa. Pay hinam ñoqanchikpas predicaspaqa Bibliapa nisqanman hina willakunchik, atikuptinqa Bibliata servichikuspam yachachinchik. Chaynata ruraptinchikmi allin sonqoyoq runakunaqa qawanqaku Diosmanta yachachisqanchik kasqanta. Kusikunchikmi Bibliata leeptinchik runamasinchik uyariptinku hinaspa ima ninanmanta yachayta munaptinkupas. Astawanmi kusikunchik uyariwaqninchik runakuna Jesusta qatinankupaq tanteakuptinkuqa.
Jesuspa qatiqninkunaqa runamasintam kuyanku
15. ¿Ima sumaq kayninwantaq Jesusqa astawan reqsichikurqa, hinaspa imaynam tarikunchik chayna kasqanpi piensaspa?
15 Tukunapaq qawasunchik Jesuspa kuyakuq kasqanmanta, kayqa anchatamá kusichiwanchik. Apostol Pablom kaynata qellqarqa: “Cristo kuyawasqanchikraykum kaykunata rurananchik”, nispa (2 Cor. 5:14). Lliw runakunata chaynataq ñoqanchikta Jesus kuyawasqanchikpi piensaspam, kallpanchasqa tarikunchik hinaspa munanchik paypa ejemplon qatipakuyta.
16, 17. ¿Imaynatam Jesusqa qawachirqa runakuna kuyasqanta?
16 ¿Imaynatam Jesus qawachirqa runakuna kuyasqanta? Runakunarayku vidanta qospanmi (Juan 15:13). Ichaqa manam chaynallatachu kuyakuynintaqa qawachirqa. Ejemplopaq, ñakariqkunatam sonqomanta llakipayarqa. Lazaro wañukuptinmi, Mariata hinaspa huk runakunatapas waqaqta qawaspan sonqonpi sinchita llakikurqa. Lazarota kawsarichinanpaqña kachkaspanpas, anchata llakikuspanmi ‘waqayta’ qallaykurqa.
17 Jesus predicachkaptinmi leprawan onqoq huk runa asuykuspan nirqa: “Munaspaykiqa allinyaykachillawayá”, nispa. ¿Imatam Jesusqa nirqa? Bibliam willawanchik ‘paymanta llakipayarikuspan’ admirakunapaq kaqta rurasqanmanta, llapchaykuspanmi nirqa: ‘Arí, munanim, allinyayña nispa. Chaynata rimaruptillanmi onqoynin chinkaruptin allinyarurqa’. Jesusqa yacharqam Leypa nisqanman hina, leprawan onqoqkunaqa mana asuykuna hinaspa mana llapchana kasqankuta. Arí, payqa atinmanmi karqa mana llapchaspalla sanoyarachiyta. Ichaqa manam sanoyayllachu sanoyaykachirqa, aswanmi llapchaykurqa; yaqapaschá kay runataqa achka watakunaña pipas mana llapchaykurqachu. ¡Mayna llakipayakuqmi karqa! (Mar. 1:40-42.)
18. ¿Imatam rurachwan iñiqmasinchikpa imayna sientekusqanta entiendenapaq?
18 Jesuspa qatiqninkunaqa iñiqmasinchikkunatam kuyananchik, chaytaqa rurasun imayna sientekusqankuta entiendespam (1 Ped. 3:8). Ichapas iñiqmasinchik llumpay llakikuyniyoq hinaspa mana hampiy atina onqoyniyoq kaptin mana entiendeyta atisunchu imayna sientekusqanta, astawanraqmi chaykunata mana haykapipas pasaspaqa. Ichaqa, Jesus mana onqoq kachkaspanpas onqoq runakunataqa entienderqam. ¿Imaynatam Jesuspa ejemplonta qatipakuchwan? Qatipakuchwanmi pi iñiqmasinchikpas llakikuyninta willawaptinchik pacienciawan uyarispa. Tapukuchwanmi: “¿Imaynam sientekuyman pay hina tarikuspay?”, nispa. Imayna sientekusqankumanta cuentata qokuspaqa, atisunmi ‘hukmanyasqakunata kallpanchayta’ (1 Tes. 5:14). Kayta ruraspapas Jesustaqa qatipakuchkanchikmi.
19. ¿Ima ruranapaqmi Jesuspa ejemplon kallpachawanchik?
19 ¡Mayna sumaqmi Jesuspa nisqankunamanta hinaspa rurasqankunamanta yachayqa! Paymanta astawan yachaspam, astawan kallpanchasqa kanchik payta qatipakunapaq hinaspa chaynallata ruranankupaq hukkunata yanapanapaqpas. Chaynaqa, Diospa gobiernonpi Rey Jesustayá kunanpas hinaspa wiña-wiñaypaqpas qatipakusunchik.
¿Imatam niwaq?
• ¿Imaynatam Jesuspa yachayniyoq kasqanta qatipakuchwan?
• ¿Imakunata ruraspam qawachichwan humilde kasqanchikta?
• ¿Imataq yanapawasun tukuy sonqowan Diospa munayninta ruranapaq?
• ¿Imaynatam qatipakuchwan Jesuspa runakuna kuyasqanta?
[Kay yachachikuypa tapukuyninkuna]
[5 kaq paginapi dibujo hinaspa recuadro]
JESUSTA QATIPAKUNAPAQ MOSOQ QELLQA
2007 watapim kimsa punchaw kaq asambleapi lloqsimurqa 192 paginayoq “Ven, sé mi seguidor” nisqa sutiyoq libro. Kay qellqaqa rurasqam kachkan Jesuspa imayna kasqanmanta hinaspa imakuna rurasqanmanta cristianokuna astawan yachanankupaq. Iskay yachachikuykunamanta qallariyninpi qawachispanmi, punta kaq partenpiqa willawanchik Jesuspa wakin sumaq kayninkunamanta: humilde kasqanmanta, mana manchakuq, yachayniyoq hinaspa kasukuq kasqanmantawan sasachakuykunata imayna aguantasqanmantapas.
Iskay hinaspa kimsa kaq parteñataqmi rimachkan, yachachisqanmanta hinaspa predicasqanmanta, chaynataq huk rurasqanwanpas runakuna kuyasqanmanta. Kay libroqa allintam qawachiwanchik kawsakuyninchikpi Jesusta imayna qatipakunamanta.
Segurom kachkanchik kay libro imayna kasqanchikta qawakunapaq yanapawananchikmanta, yanapawasuntaqmi kay tapukuykunapi piensarinapaqpas: ¿Cheqaptapunichu Jesusta qatichkani? ¿Imatam rurayman paypa ejemplonta allinta qatipakunaypaq?, nispa. Chaymantapas yanapanqam ‘wiñay kawsaypaq [. . .] kaqkunata’ Jesuspa qatiqnin kanankupaq (Hech. 13:48).
[4 kaq paginapi dibujo]
¿Imayna kasqantam Jesusqa qawachirqa kay Pachaman hamuspan chaynataq wakin wawakuna hina nacespanpas?
[6 kaq paginapi dibujo]
¿Imataq yapawasunchik tukuy sonqowan predicananchikpaq?