Jesuspa qatiqnin kanankupaq yachachiyqa anchatam kusichiwanchik

“Llapallan nacionpi runakunaman rispayá willamuychik qatiqniykunaña kanankupaq.” (MAT. 28:19.)

1-3. a) ¿Imaynatam achka iñiqmasinchikkuna qawanku Bibliamanta estudio qoyta? b) ¿Ima tapukuykunatam kutichisunchik?

ESTADOS UNIDOS nacionpi hindi rimayniyoqkunata yanapaq iñiqmasinchikmi kaynata qellqarqa: “Yaqa kimsa killañam Pakistán nacionniyoq familiata Bibliamanta yachachichkani, hinaspam allin amistadta armaruniku. Weqeypas sutunraqmi llaqtankuman kutikuptinku paykunawan manaña tupaykunaymanta piensaptiy. Mayna kusikunapaqmi karqa Jehová Diosmanta paykunaman yachachiyqa”, nispa.

² Qampas kusikurqankichá pimanpas Bibliamanta estudiota qospaykiqa. Jesuspas chaynataq qatiqninkunapas kusikurqakum runakunata Diospa serviqnin kanankupaq yachachispanku. Ejemplopaq, 70 qatiqninkuna kusikuyllawanña kutimuspanku tukuy rurasqankumanta willakuptinkum, Jesuspas ‘kusikurqa’ (Luc. 10:17-21). * Kunan tiempopipas achka cristianokunam kusisqallaña Diosmanta yachachichkanku.  Arí, 2007 watapim yaqa soqta millon pichqa waranqa runakunaman, sapa killa Bibliamanta estudiota qorqaku.

³ Ichaqa wakin iñiqmasinchikkunam Bibliamanta estudiotaqa mana haykapipas qorqakuchu. Wakinkunañataqmi unay tiempoña mana qonkuchu. ¿Imakunataq harkawanchikman chayta ruranapaq? ¿Imatam rurachwan Bibliamanta estudiota qonapaq? ¿Imanasqataq Jesuspa ‘qatiqnin kanankupaq’ kamachiwasqanchikta cumpliyqa ancha allin? (Mat. 28:19.)

¿Ima sasachakuykunam hukmanyachiwanchikman?

4, 5. a) ¿Imaynatam wakin nacionkunapi runakunaqa predicasqanchikta qawanku? b) ¿Ima sasachakuykunam kan wakin nacionkunapi predicaqkunapaq?

⁴ Wakin nacionkunapi runakunaqa Bibliamanta qellqanchikkunatam kusikuywan chaskiwanchik hinaspam estudiaytapas munanku. Australia lawmanta casarasqa iñiqmasinchikkunam Zambia nacionpi predicasqankumanta kaynata qellqarqaku: “Callekunapi predicayqa admirakunapaqmi. Runakunam kikinkumanta asuykamuwanku, wakinqa revistakunapi ima yachay munasqankumantam mañakunku”, nispa. Chay nacionpim pasaq watakunallapi 200,000 masnin runakunaman Bibliamanta estudiota qorqaku, chayqa chay nacionpi llapallan predicaqkunamantapas masninraqmi.

⁵ Wakin lawkunapim ichaqa Bibliamanta qellqanchikkuna leey munaqkunata hinaspa Biblia estudiay munaqkunatapas mana tarinchikchu. ¿Imanasqa? Predicaptinchik wasinkupi mana tarikusqankurayku otaq Diosmanta rimayta mana munasqankurayku. Yaqapaschá paykunataqa tayta-mamankupas Diosmantaqa mana rimapayarqakuchu, wakinqa hukmanyasqam kanku pantaq religionkunapi kaqkuna iskay uya kasqankuwan. Wakintañataqmi Diosmanta yachachiq tukuqkuna engañaruptinku, wischusqa hinaspa mana michiqniyoq ovejakuna hina tarikunku (Mat. 9:36). Chayraykuchá Bibliamanta willaptinchik mana uyariyta munankuchu.

6. ¿Ima sasachakuykunawanmi wakin cristianokuna tarikunku?

⁶ Wakinkunam ichaqa huk sasachakuykunarayku hukmanyanku. Ejemplopaq, wakin iñiqmasinchikkunam onqosqankurayku otaq yuyaqña kasqankurayku manaña ñawpaqpi hinachu Diosta servinku. Wakinñataq ichapas piensanku, Bibliamanta estudio qoyta mana atisqankuta. Ichapas Moises hina sientekunku, paytam Faraonwan rimananpaq Jehová Dios kamachirqa. Chaymi Moises nirqa: “¡Ay Señorlláy! Ñawpaqpas-kunanpas ñoqaqa manam rimaysapa runachu kani”, nispa (Exo. 4:10). Wakinqa Bibliamanta estudio qoytam mana munankuchu yachachisqanku yanqapaq kasqanta piensaspanku. Ichapas mana allin yachachiq kasqanchikta piensaspa, ninchikman pitapas bautizakunanpaq mana yanapay atisqanchikta. Chaynata piensaspam wakinkuqa Bibliamanta estudio qoytaqa qallariyllapas qallarinkuchu. ¿Imaynatam chay sasachakuykunata atipachwan?

Sonqomantam interesakunanchik

7. ¿Imanasqataq Jesusqa kallpanchakurqa runakunata yachachinanpaq?

⁷ Puntataqa sonqomantam munananchik runakunata yanapaytaqa. Jesusmi nirqa: “Runaqa riman sonqonpi llimpariqmantam”, nispa (Luc. 6:45). ¿Imataq Jesuspa sonqonpi llimparirqa? Payqa sonqomantam munarqa runakuna allin kanankuta. Chaymi kallpanchakurqa runakunata Diosmanta yachachinanpaq. Ejemplopaq, judiomasinkuna Diosmanta karunchasqa kasqankuta qawaspanmi llakipayaspan qatiqninkunata kaynata nirqa: ‘Achkallañam kachkan cosechanapaqqa [. . .]. Chaynaqa mañakuychikyá chakrayoqta cosechaqkunata kachamunanpaq’, nispa (Mat. 9:36-38).

8. a) ¿Imapim piensananchik Diosmanta yachachisqanchik allin kasqanta qawanapaq? b) ¿Imatam yachachiwanchik Biblia estudiaq señorapa nisqan?

⁸ Sapakamam kaypi piensananchik; mayna allinninchikpaqmi karqa pipas tiempochakuspan Bibliamanta yachachiwasqanchikqa. Kayna piensasqanchikmi qawachiwasun predicasqanchik lawpi runakunapaq Diosmanta yachachisqanchik mayna allinninkupaq kasqanta. Huk señoram, nacionninpi Jehová Diospa testigonkunapa oficinanman kaynata qellqarqa: “Ancha kusisqam kachkani Jehová Diospa testigonkuna  Bibliamanta yachachiwananpaq watukamuwasqankumanta. Achka tapukuykunata rurasqayraykum piensasqayku tiempopiqa estudiayta mana tukunikuchu. Chayna kaptinpas paykunaqa pacienciawanmi lliw yachasqankumanta yachachiwan. Anchatam agradecekuni Jehová Diosta chaynataq Jesustapas paykunata reqsisqaymanta”, nispa.

9. ¿Imapitaq Jesusqa astawan piensarqa, hinaspa imaynatam ejemplonta qatipakuchwan?

⁹ Ichaqa kaytam yachananchik; manam Jesusta lliw uyariqkunachu paypa qatiqninkunaqa karqa (Mat. 23:37). Wakinmi ichaqa qatiqnin kaspankupas, tiempopa risqanman hina yachachisqanwan hukmanyaruspanku karunchakururqaku (Juan 6:66). Chayna kaptinpas Jesusqa manam piensarqachu yachachisqan yanqapaq kasqantaqa. Yachachisqan runakunamanta achka mana kasukuptinkupas, willakusqan ancha allin kasqanpim astawan piensarqa. Payqa qawarqam Diosmanta yachay munaq runakuna cosechanapaq hina achka kasqankuta, chaymi kusikuywan yachachirqa (leey Juan 4:35, 36). Chaynallataqmi ñoqanchikpas, yachachisqanchik runakunamanta wakillan kasukusqanpi piensanamantaqa, astawanmi piensananchik predicananchik lawpi achka runakunaraq Diosmanta yachay munasqankupi. ¿Imatam rurachwan chayna allinta piensanapaq?

Predicasunchik Bibliamanta estudiota qallariyta munaspa

10, 11. ¿Imatam rurawaq predicaspayki kusikuyta hinalla tarinaykipaq?

¹⁰ Chakrapi llamkaqqa allinta cosechayta munaspanmi tarpun. Chaynataqmi ñoqanchikpas, Bibliamanta estudio qallariyta munaspa predicananchik. Ichaqa, predicanapaq otaq kaqmanta watukunapaq allinta kallpanchakuspanchikpas wakin runakunallata ichapas tarisun, chayraykum hukmanyachwan. ¿Chayraykuchu wasin-wasin predicayta saqerunanchik? Manapunim. Achka runakunaraqmi  Diosmanta willakuytaqa chayllaraq uyarichkanku wasin-wasin predicaptinchik.

¹¹ Runakunata yachachispanchik kusikuyta hinalla tarinapaqqa manam wasin-wasinllachu predicananchik. Ejemplopaq, ¿kallpanchakurqankichu callekunapi otaq mercadokunapi predicanaykipaq? ¿Atiwaqchu telefonowan predicayta otaq rimasqayki runakunapa telefononta mañayta, chaynapi paykunawan hinalla rimanaykipaq? Hinalla kallpanchakuspa chaynataq maypipas predicaspaqa, tarinkim Diospa Gobiernonmanta uyariy munaqkunata, hinaspam anchata kusikunki.

¿Imatam rurachwan uyariyta mana munaptinku?

12. ¿Imatam rurachwan predicasqanchik lawpi runakuna Diosmanta mana uyariyta munaptinku?

¹² ¿Imatam rurachwan predicasqanchik lawpi runakuna Diosmanta mana uyariyta munaptinku? Chayna kaptinqa, yachay munasqankumantam rimachwan. Pablom Corinto llaqtapi iñiqmasinkunaman kaynata qellqarqa: “Judiokunawan kaspayqa judio hinam kani [. . .]. Moisespa leynin mana kasukuqkunata gananayraykum ley mana kasukuq hina kani [. . .], sapakamawanmi paykuna hina kani”, nispa (1 Cor. 9:20-22). Ñoqanchikpas runakunapa yachay munasqankumantam yachachichwan. Achka runakunam familianpi allin kawsakuyta munanku. Wakinqa ichapas munanku imapaq kawsasqankumanta yachayta. Hinaptinqa, ¿atichwanchu atencionwan uyarinankupaq hina Diospa Munaychakusqanmanta allin noticia willayta?

13, 14. ¿Imatam rurachwan Diosta servispanchik hinalla kusisqa kananchikpaq?

¹³ Wakin lawkunapiqa manam uyariyta munankuchu predicasqanchiktaqa, chayna kaptinpas achka predicaqkunam hinalla kusikunku Diosta servispanku. ¿Imatam chaypaq ruranku? Tanteakurunkum huk rimayta yachanankupaq. Ejemplopaq, casarasqa 60 masnin watayoqña iñiqmasinchikkunam, cuentata qokururqaku predicasqanku lawpi, China nacionniyoq estudiaqkuna aylluntin chaypi yachasqankumanta. Qosanmi nin: “Tantearurqanikum paykunapa rimayninkuta yachanaykupaq. Chaypaqqa sapa punchawmi estudianayku karqa, chay rurasqaykuqa allinpimá tukurqa, Bibliamanta achka estudiokunatam qallaykurqaniku”, nispa.

¹⁴ Huk rimayta manaña yachayta atispapas, servichikuchwanmi Buenas nuevas para gente de todas las naciones nisqa folletota, chaynapi huk rimayniyoq runawan tupaspa predicanapaq. Chaymantapas kanmi paykunapa rimayninkupi qellqakunapas. Arí, anchatamá kallpanchakuna huk costumbreyoq hinaspa huk rimayniyoq runakunawan parlanapaqqa. Ichaqa ama haykapipas qonqasunchu Bibliapa kayna nisqanta: “Pipas aslla tarpuqqa asllatam cosechan, achka tarpuqñataqmi achkata cosechan.” (2 Cor. 9:6.)

Llapallanchikmi yanapakunchik

15, 16. a) ¿Imanasqataq ninchik Jesuspa qatiqnin pipas kananpaqqa llapallanchikmi yanapakunchik nispa? b) ¿Imaynatam yuyaq iñiqmasinchikkuna yanapakunku?

¹⁵ Pipas Jesuspa qatiqnin kananpaqqa manam estudio qoqllachu yanapan, aswanmi llapallanchik. ¿Imanasqataq chaynata ninchik? Jesusmi nirqa: “Kuyanakuptikichikqa llapallan runakunam yachanqa discipuloykuna kasqaykichikta”, nispa (Juan 13:35). Chayna kuyanakusqanchiktam runakuna qawanku huñunakuyman hamuspanku. Huk estudiantem nirqa: “Munanipunim huñunakuykunaman riyta. ¡Llapallanmi kuyakuyninkuta qawachiwan!”, nispa. Jesusmi qatiqninkunata nirqa paykunapa ayllunku wakinpiqa contrankupi churakunankumanta (leey Mateo 10:35-37). Ichaqa nisqanman hinam congregacionpi tarinmanku karqa: ‘wawqe-panikunata, turi-ñañakunata, tayta-mamakunata hinaspa churikunatapas’ (Mar. 10:30).

¹⁶ Yuyaq iñiqmasinchikkunapas allintam yanapakunku Biblia estudiaqkuna espiritualpi ñawparinankupaq. ¿Imanasqataq chaynata ninchik? Manaña estudiota qoyta atispankupas, huñunakuypi rimasqankum chayllaraq hamuqkunapa iñiyninta kallpanchan. Chaymantapas, achka wataña ‘allinkunata rurasqankum’ congregacionpi kaqkunata yanapan, kallpanchantaqmi hukkunapas Diosmanta yachanankupaq (Pro. 16:31).

 Ama manchakusunchu

17. ¿Imatam rurachwan estudiota qonapaq mana atisqanchikta piensaspa?

¹⁷ ¿Imatam rurachwan Bibliamanta estudio qoyta mana atisqanchikta piensaspaqa? Jehová Diosmi chuya espiritunwan Moisesta yanaparqa. Chaymantapas wawqen Aaronwan rinanpaqmi nirqa (Exo. 4:10-17). Jesuspas qatiqninkunatam nirqa Diospa chuya espiritun predicanankupaq yanapananmanta (Hech. 1:8). Chaymantapas qawachirqam iska-iskay predicay allin kasqanta (Mar. 6:7). Chaynaqa, Bibliamanta estudio qoyta sasachakuspaykiqa Diosta mañakuy, yachaytawan chuya espiritunta qosunaykipaq hinaspa maskay allin experienciayoq iñiqmasikita yanapasunaykipaq. Jehová Diosqa ‘kay pachapi mana yachayniyoqkunatam’ akllarqa, suma-sumaq munaynin rurasqa kananpaq, kayqa kusichiwanchikmi (1 Cor. 1:26-29).

18. ¿Imatam rurachwan yachachisqanchik yanqapaq kasqanta piensaspaqa?

¹⁸ ¿Imatam rurachwan yachachisqanchik yanqapaq kasqanta piensaspaqa? Yuyarinanchikmi, Jesuspa qatiqnin pipas kananpaqqa manam estudio qoqllamantachu. Manam mikuyta yanuy hinachu, chay mikuy miski kananpaqqa hukllamantam. Ichaqa, Jesuspa qatiqnin pipas kananpaqqa yaqa kimsamantam kanqa. Puntataqa Jehová Diosmi runakunata llaqtanman pusamun (Juan 6:44). Chaymantapas, wakin wawqe-paninchikkunawan kuskam ñoqanchikpas kallpanchakunchik Biblia estudiaqta yachachiypi chaynataq hinalla ñawparinankupaq yanapaypipas (leey 2 Timoteo 2:15). Chaynallataqmi, kikin estudiantepas kallpanchakunan Bibliapa yachachisqanta kasukunanpaq (Mat. 7:24-27). Arí, llapallanchikmi munanchik Biblia estudiaqkuna Jehová Diosta servinankuta, chaymi pipas estudiayta saqeruptinqa llakikunchik. Ichaqa yachanchikmi ‘Diosninchikman sapakama cuenta qonanchikmanta’ (Rom. 14:12).

Kallpanchakusqanchikqa manam yanqapaqchu

19-21. a) ¿Imaynatam yanapawanchik Bibliamanta estudio qoyqa? b) ¿Imaynatam Jehová Dios qawan llapallan predicaqkunata?

¹⁹ Bibliamanta estudio qoyqa yanapawanchikmi vidanchikpi Diospa Munaychakuyninta puntapi churanapaq. Yanapawanchiktaqmi Bibliamanta yachasqanchikkuna sonqonchikpi hinaspa yuyayninchikpipas allinta takyananpaq. ¿Imaynata? Barak sutiyoq precursormi nin: “Bibliamanta estudio qoyqa yanapasunkim Diospa Palabranta allinta estudianaykipaq. Arí, pitapas yachachinaykipaqqa segurom kanayki iñisqaykimanta”, nispa.

²⁰ Sichu qam Bibliamanta estudiota mana pimanpas qoptikiqa, ¿yanqapaqchu kanman Dios servisqayki? Manapunim. Jehová Diosqa anchatam chaninchan yupaychananchikpaq tukuy ima rurasqanchikta. Predicaqkunaqa lliwmi ‘Diospa llamkaqmasin’ kanchik. Chaymi Bibliamanta estudiota qospanchikqa aswan kusisqa tarikusunchik. ¿Imanasqa? Runakunapa sonqonpi Bibliamanta yachachisqanchikta Jehová Dios wiñachisqanta qawasqanchikrayku (1 Cor. 3:6, 9). Amy sutiyoq huk precursoram kaynata nin: “Biblia estudiaqkunapa ñawparisqankuta qawaspaykim, Jehová Diosta anchata agradecekunki huk sumaq regalota qonaykipaq favorecesqa kasqaykimanta, chayqa Jehová Diosmanta yachasqanku hinaspa wiñay kawsayta haypanankupaq suyakuymi”, nispa.

²¹ Bibliamanta estudio qonapaq kallpanchakuspanchikqa, Jehová Dios serviypim aswan afanasqa kasun, chaymantapas mosoq pachapi kawsanapaq suyakuyninchikmi qaqa hina kanqa. Hinaspapas, Jehová Diospa yanapakuyninwanqa ichapas yanapachwan uyariwaqninchikkuna salvakunankupaqpas (leey 1 Timoteo 4:16). Arí, ¡manam ima ruraypas chaynataqa kusichiwanchikmanchu!

[Willakuy]

¿Yuyachkankichu?

• ¿Imakunataq harkawanchikman Bibliamanta estudiota qonapaq?

• ¿Imatam rurachwan predicananchik lawpi runakuna mana uyariyta munaptinku?

• ¿Imanasqataq Bibliamanta estudio qonapaq kallpanchakuyqa ancha allin?

[Kay yachachikuypa tapukuyninkuna]

[9 kaq paginapi dibujokuna]

¿Kallpanchakunchikchu maypipas predicanapaq, chaynapi allin sonqoyoq runakunata tarinapaq?