“Kaymi ñan, chayninta puriychik”

Emilia Pederson Paninchikpa Vidanmanta

Ruth E. Pappas paninchikmi willakun

MAMAYMI nacerqa 1878 watapi, sutinmi karqa Emilia Pederson. Escuelapi profesoram karqa, ichaqa Diosman asuykunankupaq runakunata yanapaytam munarqa. Manaraq Jehová Diospa testigon kachkaspanpas China nacionmanmi misionera hina riyta munarqa. Chaymi imankunatapas apananpaq baulta conseguikurqa. Wiñasqay wasipim achka watakuna chay baulta waqaycharqa, chay wasiykuqa kachkan Estados Unidos nacionpi Jasper llaqtapim. Ichaqa abuelitay wañukuptinmi huklaw nacionman riy munasqanta saqerurqa sullkankunarayku. Tayta-mamaymi casarakurqaku 1907 watapi hinaspam qanchis wawa-churiyoqkuna karqaku, taytaypa sutinmi Theodore Holien. Ñoqam kani llapankupa sullkan, nacerqanim 1925 watapi diciembre killapa 2 punchawninpi.

Bibliamanta tapukuyninkunam mamaypaqa achka karqa, hinaspam chaykunamanta yachaytapuni munarqa. Huk punchawmi wasiykuman Iglesia Luterana nisqa religionpi pastor visitakamuptin tapukurqa, Bibliapi mayqan textom yachachichkan infierno ñakarichina sitio kasqanta, nispa. Pastorñataqmi nirqa Biblia imaynata yachachiptinpas infiernomantaqa yachachinapunim nispa.

Yachaytam qallarirqa Diospa cheqap yachachikuyninmanta

Mamaypa ñañanmi Emma, paymi 1900 watapi Northfield llaqtaman rirqa musicata estudiananpaq. Hinaspam Milius Christianson sutiyoq profesorninpa wasinpi samapakurqa. Paypa señoranmi Biblia Estudiaq otaq Jehová Diospa testigon karqa. Chaymi Emma willasqa mamaytapas Biblia leeyqa gustasqanta, hinaptinmi chay señoraqa mamayman chaylla cartata qellqaramurqa Bibliamanta tapukuyninkunata contestaspa.

Huk punchawmi iñiqmasinchik Lora Oathout trenpi viajamurqa Sioux Falls (Dakota del Sur) llaqtamanta Jasper llaqtakama chaypi predicananpaq. Bibliamanta qellqakuna qosqantam mamayqa estudiarqa, hinaspam 1915 watapi predicayta qallarirqa, chaynataq Bibliamanta qellqakunatapas runakunaman qorqa.

Llaqtaykumantam Sioux City (Iowa) llaqtaqa 160 kilometropiraq kachkan, chay llaqtapim asamblea rurakurqa 1916 watapi, chaypiqa Charles Taze Russell iñiqmasinchiktam suyarqaku. Pichqa wawayoq kaspanpas mamayqa chay asambleamanmi riytapuni munarqa, sullkakaqpa sutinmi Marvin, payqa pichqa killachayoqllam karqa. Chayna kaptinpas trenpim viajarqa lliw warmachantinkuna. Russell sutiyoq iñiqmasinchikpa discursonkunatam uyarirqa, qawarqataqmi “Foto-Drama de la Creación” nisqatapas hinaspam bautizakurqa. Asambleamanta kutiramuspanmi qellqarqa chaypi uyarisqankunata hinaptinmi chay qellqasqanqa periodicopi lloqsimurqa.

Cedar Point sutiyoq llaqtapi mana qonqanapaq kaq asambleamanmi mamay rirqa 1922 watapi, chaypim huñunakurqaku 18.000 runakuna. Chaypi kallpanchasqa kaspanmi mana haykapipas  saqerqachu Diospa Gobiernonmanta willakuyta. Chaymi sapakuti niwarqaku ‘kaymi ñan, chayninta puriychik’, nispa (Isa. 30:21).

Predicasqankum achkata yanaparqa

Familiaymi 1920 watakunapi huk llaqtaman astakurqaku. Taytayqa allin negocioyoqmi karqa, mantienenantaqmi karqa familiantapas. Bibliataqa manam mamay hinachu llumpayta estudiarqa, ichaqa predicaciontam anchata yanaparqa, hinaspam congregacionkunata watukuq hermanokunatapas wasipi samachirqa. Paykuna wasiykupi discursota qoptinkum pachaknintin runakuna hamuqku uyarinankupaq. Tiyachiqmi kaniku visitakuna chaskinaykupi, cocinaykupi chaynataq puñunayku cuartopipas.

Qanchis watayoq kachkaptiymi Lettie sutiyoq tiay qayamuwarqaku vecinon Ed Larson sutiyoq runa señoranpiwan Biblia estudiay munasqankuta willawanankupaq. Chaymi paykunaqa chaylla Biblia estudiayta qallarirqaku, hinaspam Martha van Daalen vecinantapas invitarqaku paykunawan kuska estudiananpaq. Martha, qosan hinaspa pusaq warmankunapas Jehová Diospa testigonñam karqaku. *

Chay tiempokunapim Gordon Kammerud sutiyoq mozo llamkayta qallarirqa papaypaq. Hinaptinmi runakunañataq nirqaku llamkapakusqan runapa churinkunaqa hukman religionniyoq kasqankuta, nirqakutaqmi cuidakunanpaqpas. Chaywanpas payqa Biblia estudiaytam qallaykurqa hinaspam cheqap yachachikuy tarisqanmantapas seguro karqa. Kimsa killa pasaruptillanmi bautizakururqa, chaynataqmi tayta-mamanpas Jehová Diospa testigonkunaña karqaku. Ñoqayku, Kammerud hinaspa Van Daalen familiakunam allin amistad karqaniku.

Asambleakunam kallpanchawarqaku

Cedar Point asambleawan ancha kallpanchasqa kaspanmi mamayqa huk asambleakunamanpas riytapuni munarqa. Warmacha kachkaspay asambleaman rinaykupaq karu-karu viajasqaykutam yuyachkani, ejemplopaq 1931 watapim rirqaniku Columbus (Ohio) llaqtapi asambleaman, chaypim Jehová Diospa testigon nisqa sutita chaskirqaniku (Isa. 43:10-12). Chaymantapas yuyachkanim 1935 watapi Washington (E.U.) llaqtapi asamblea apakusqanta, chaypim allinta entiendechirqa Apocalipsis libropi ‘achkallaña runamanta’ rimasqan pikuna kasqanta (Apo. 7:9). Chay asambleapim pusaq pachak masnin bautizakurqaku chaynataq ñañay Lilian hinaspa Eunicepas.

Rirqanikutaqmi 1937 watapi Columbus (Ohio) llaqtaman, 1938 watapi Seattle (Washington) llaqtaman, chaynataq 1939 watapi Nueva York llaqtapi asambleakunamanpas. Rirqanikum Van Daalen familiakunawan, Kammerud familiakunawan hinaspa huk wawqe-paninchikunawanpas. 1940 watapim Eunice casarakurqa Leo van Daalen iñiqmasinchikwan hinaspam precursor hina servirqaku. Chay watallapitaqmi Lilian casarakurqa Gordon Kammerud iñiqmasinchikwan hinaspam paykunapas precusor hina serviyta qallarirqaku.

 1941 watapi San Luis (Misuri) llaqtapi asambleam ñoqataqa anchata yanapawarqa. Chaypim waranqantin mozo-sipaskuna Hijos nisqa librota chaskirqaniku. 1 de septiembre de 1941 watapim 15 wataypi kachkaspay turiy Marvin hinaspa Joyce señoranwan kuska precursor hina serviyta qallarirqaniku.

Campopim yacharqaniku hinaptinmi congregacionpi iñiqmasinchikkunapaq sasa karqa asambleakunaman riyninku cosecha tiempowan tupasqanrayku. Chaymi asambleamanta kutiramuspayku, mana riqkunawan wasiykupa pationpi huñunakurqaniku asambleamanta willanaykupaq. Kusisqallañam karqaniku.

Galaad nisqa Escuela hinaspa huklaw nacionpi predicasqaykumanta

Precursorkuna huklaw nacionpi misionero hina servinankupaqmi 1943 watapi Galaad nisqa Escuela qallaykurqa. Punta kaq escuelamanmi Van Daalen familiamanta rirqaku: Emil, Arthur, Homer, Leo (paykunaqa wawqepuram karqaku), hinaspa Donald (paykunapa primon) chaynataq Leopa warmin ñañay Eunicepas. Paykunamanta despedikuspaykum llumpayta llakikurqaniku haykapi tupanaykuta mana yachaspayku. Galaad escuelamanta lloqsiruspanku llapanku Puerto Rico nacionman rirqaku, chaypiqa soqtallam Jehová Diosmanta willakuq testigokunaqa karqaku.

Wata qepallatam Lilian, Gordon, Marvin, hinaspa Joyce kimsa kaq Galaad escuelaman rirqaku, paykunapas Puerto Rico nacionmanmi rirqaku. 1944 watapi setiembre killapim 18 wataypi kachkaptiy tawa kaq Galaad escuelaman rinaypaq invitawarqaku. 1945 watapim febrero killapi escuelamanta lloqsiruptiy hermanoykunapa kasqanku Puerto Rico nacionman ñoqatapas kachawarqaku. Kayqa admirakuypaq experienciam ñoqapaqqa karqa. Castellanota rimanaykupaq sasachakuspaykupas wakinniykuqa 20 mastam Bibliamanta estudiachirqaniku. Chayna kallpanchakusqaykutam Jehová Dios bendiciwarqaku. Kunanqa yaqa 25,000 predicaqkunam kachkanku Puerto Rico nacionpi.

Familiayta desgraciakuna pasasqanmanta

Eunicem 1950 watapi Mark sutiyoq wawachanta wachakurqa. Chaywanpas Puerto Rico nacionpim qepakurqaku. Iskay wata qepatam 1952 watapi 11 abril killapi familiaykuta watukuq rirqaku avionwan, ichaqa manam chayarqakuchu risqankuman. Aeropuertomanta avion hoqarikuruspanmi manapas unaymanta lamar qochaman wichiykurqa. Mark warmachallam salvakururqa botepi kaq runa yakumanta horqoruspa yanapaptin. *

Pichqa wata qepatañataqmi huk desgraciapiwan familiayta pasarqa. Salonpi huñunakuyman tayta-mamay carronkupi richkaptinkum carropa llantan toqyarurqa, chaymi carreterapa patanpi carrota sayaykachispa llantanta cambiachkaptinku hamuq carro taytayta sarururqa hinaptinmi chay ratolla wañukurqa. Kawsasqayku llaqtapi ancha reqsisqa kasqanraykum wañukusqanmanta discurso qosqanku huñunakuyman soqta pachak runakuna hamurqaku.

Huk nacionpi predicasqaykumanta

Manaraq taytay wañukuchkaptinmi Argentina naciopi predicanaypaq cambiaruwarqa. 1957 watapim agosto killapi ritillaña orqopa sikinpi Mendoza llaqtaman chayarqani. 1958 watapiñataqmi chayaramurqa George Pappas, payqa 30 kaq Galaad escuelamantam karqa, paywanmi sumaq amistadta rurarqaniku, hinaspam 1960 watapi abril killapi casarakurqaniku. Qatiqnin  watallapim 83 watanpi mamay wañukurqa. Payqa tukuy sonqonmantam Jehová Diosta servirqa hinaspam achka runakunata yanaparqa Diosta reqsinankupaq.

Chay nacionpiqa, chunka watam achka llaqtakunapi misionerokunawan kuska servirqaniku. Chaymantañataqmi qanchis wata congregacionkunata watukuspa servirqaniku. 1957 watapiñataqmi Estados Unidos nacionman kutirqaniku onqoq familiaykuta cuidanaykupaq. Hinaptinmi 1980 watapi qosayta invitarqaku castellano rimaq congregacionkunata watukunanpaq. Chay tiempopaqqa Estados Unidos nacionpi castellano rimaq congregacionkunaqa 600 karqaku, kunanñataqmi 3,000. Achkallaña congregacionkunatam watukurqaniku 26 watapuni watukusqaykupi.

‘Ñannintam’ purirqaku

Mamaymi kusikurqa ayllunkuna precursor kaspanku Dios servisqankuta qawaspan. Ejemplopaq, mayor kaq ñañay Esterpa Carol sutiyoq wawanmi 1953 watapi precursor hina Dios serviyta qallarirqa. Paymi casarakurqa Dennis Trumbore iñiqmasinchikwan. Iskayninkum hinalla precursor kachkanku. Lois sutiyoq wawanpas casarakurqam Wendell Jensen iñiqmasinchikwan. Paykunam 41 kaq Galaad escuelamanta karqaku, hinaspam 15 wata Nigeria nacionpi misionero hina servirqaku. Avion wichiykuptin Mark warmacha salvakuqtam taytanpa panin Ruth La Londe qosanpiwan uywarqaku. Mark hinaspa Lavonne señoranpas achka watam precursor karqaku, hinaspam tawa warmankunata uywarqaku Diospa kamachisqanman hina (Isa. 30:21).

Orlen turillayñam kawsakuchkan, paymi 90 wata masninpiña kachkaspanpas hinalla Jehová Diosta servichkan. Ñoqapas qosaywanmi hinalla servichkaniku precursor hina.

Mamaypa ejemplo qowasqanku

Kunankamapas mamaypa escritoriontam hinalla waqaychachkani. Taytaymi regalarqa mamayman casarakusqanku punchawpi. Huknin cajonninpim ancha valorniyoq libro kachkan. Chaypim kachkan cartakuna qellqasqan, chaynataq Bibliamanta yachachikuykuna periodicopi lloqsinanpaq qellqasqankunapas. Wakinqa kachkan 1900 wata qallariymantaraqmi. Kasqataqmi misionero kaspayku cartakuna qellqamusqaykupas. ¡Mayna allinmá sientikuni chay cartakunata yapa-yapamanta leespay! Yuyaymanarinaykupaq hinam paypas sumaqllataña qellqamuwarqaku. Mamay misionera hina Dios serviyta mana atispanpas, anchata predicananpaq kallpanchakusqanmi ñoqaykuta yanapawarqaku misionero hina unay wata Diosta servinaykupaq. Tayta-mamaywan llapallayku suma-sumaq Paraisopi kaqmanta tupaykunaykutam sapa punchaw piensani (Apo. 21:3, 4).

[Willakuykuna]

[17 kaq paginapi dibujo]

Emilia Pederson

[18 kaq paginapi dibujo]

Mamaywan taytay (marqayninpim kachkan Marvin); uran patanpi, ichoq lawmanta alleq lawman: Orlen, Ester, Lilian hinaspa Mildred (1916)

[19 kaq paginapi dibujo]

Leo hinaspa Eunice manaraq wañukuchkaspanku

[20 kaq paginapi dibujo]

Hanan kaqpim ichoq lawmanta alleq lawman kachkanku: Ester, Mildred, Lilian, Eunice hinaspa ñoqa; uran kaqpiñataqmi: Orlen, mamay, taytay hinaspa Marvin (1950)

[20 kaq paginapi dibujo]

George Pappas qosaywan, congregacionkunata watukuspayku (2001)