Jehová Diospa Palabranqa kawsachkanmi

Apocalipsis libropa yachachikuyninkunamanta (2 kaq parte)

¿IMATAQ pasanqa Jehová Diospa serviqninkunata hinaspa mana serviqninkunatapas? ¿Imataq pasanqa Satanastawan demonionkunata? ¿Ima bendicionkunatam allin runakuna chaskinqaku Waranqa wata Jesucristo kay Pachata Kamachimuptin? Kay tapukuykunapa hinaspa wakin tapukuykunapa kutichiynintam tarisunchik Apocalipsis 13:1–22:21 versiculonkunapi. * Kay capitulokunam rimachkan isqon revelacionkunamanta, chaytam apostol Juan chaskirqa wañukuynin hichpallapiña kachkaptin.

Apostol Juanmi kaynata qellqarqa: “Mayna kusisqam kay libro leeqkunaqa, Diospa revelasqanta leeptin uyariqkunapas chaynataq kaypi qellqasqa kamachikuykuna kasukuqkunapas”, nispa (Apo. 1:3; 22:7). Apocalipsis librota leespa kasukuspanchikqa, kusikuywanmi Diosta servisun, iñiyninchikpas kallpanchakunqam hinaspa suma-sumaq suyakuyniyoqmi kasunchik (Heb. 4:12). *

QANCHIS TAZONKUNAPI DIOSPA PIÑAKUYNINTA TALLISQANKUMANTA

(Apo. 13:1–16:21)

Apocalipsis 11:18 kaynata nin: ‘Nacionkunam piñakurunku, ichaqa chayaramunmi punchaw [. . .] kay pacha chinkachiqkunata chinkachinaykipaq’, nispa. ¿Imanasqam Diosqa chinkachinqa? Chaytam ruranqa ‘qanchis umayoq hinaspa chunka waqrayoq animalpa’ tukuy imaymana rurasqanmanta, chaytam pusaq kaq revelacionninpi Juan rikurqa (Apo. 13:1).

Isqon kaq revelacionpim Juan ‘rikururqa Sion Moqopa hawanpi Carnero sayachkaqta. Paywanmi sayachkasqa pachak tawa chunkan tawayoq waranqa runakuna’ paykunam ‘runakuna ukumanta rantisqa karqaku’ (Apo. 14:1, 4). Chaymantañataq angelkunapa willakuyninkuna uyarikurqa. Chunka kaq revelacionpiñataq Juanqa qawarqa ‘qanchis angelkunata [paykunam] kachkasqa qanchis qepa kaq castigoyoqkama’. Kikin Jehová Diosmi kay angelkunata kamachin ‘piñakuyninwan huntasqa qanchis tazonkunata’ Satanaspa munaychakusqanman tallinankupaq. Chay tazonkunaqa Diospa piñakuyninmanta willakuykunam (Apo. 15:1; 16:1). Kay iskay revelacionkunam qawachiwanchik qanchis kaq cornetilla tocakuptin hinaspa kimsa kaq “¡Ay!” kaptin imakuna pasananmanta (Apo. 11:14, 15).

Tapukuykunapa kutichiyninkuna:

13:8. ¿Imataq ‘Carneropa kawsay libronqa’? Kay libroqa huk tupachiyllam, chaypim qellqasqa kachkan Diospa Gobiernonpi Jesuswan kamachiqkunapa sutinkuna; kachkantaqmi kunan tiempopi hanaq pachaman rinankupaq suyakuyniyoq kaqkunapa sutinkupas.

13:11-13. ¿Ima ninantaq, carnero hina waqrayoq animalpa dragon hina rimasqanqa, hinaspa cielomantapas ninakunata wichichimusqanqa? Carnero hina waqrayoq animalqa tupanmi Estados Unidos hinaspa Gran Bretaña nacionkunawan, kaykunam dragon hina rimanku: runakunata tukuy imawan obligaspanku chaynataq imayna kamachikuyninta kasukunankupaq manchachispanku. ¿Ima ninantaq cielomantapas ninakunata wichichimun nisqanqa? Kay nisqanqa Diospa profetan tukuspan Comunismo nisqa kamachikuyta hinaspa enteron pachapi iskay hatun guerrakuna chinkachisqanta willakusqanmi.

 16:17. Kay textopa nisqanman hina, ¿imataq kay ‘wayraqa? Kay ‘wayraqa’ Satanaspa munasqanman hina runakunapa imayna piensasqankum. Kaykunawanmi ‘Diosta mana kasukuqkunaqa’ wayrata muskichkankumanpas hina intuchikuchkanku (Efe. 2:2).

Imakunatam yachachwan:

13:1-4, 18. ‘Qanchis umayoq hinaspa chunka waqrayoq animalqa’ rikchanachisqam kachkan kay pachapi kamachikuqkunawan, paykunam ‘lamar qochamanta’ lloqsinku. Lamar qochañataqmi kanku lliw runakuna (Isa. 17:12, 13; Dan. 7:2-8, 17). Kay manchakuypaq animalqa Satanaspa rikurichisqanmi, hinaspam paymanta atiyta chaskin, apantaqmi 666 numerota, kay numeroqa llumpa-llumpay huchasapa ninanmi. Kay manchakuypaq animalta reqsisqanchikraykum mana hatunchanchikchu nitaq alabanchikchu runakuna hinaqa (Juan 12:31; 15:19).

13:16, 17. Sapa punchaw, ‘rantipakuy’ otaq ‘rantikuy’ sasa kaptinpas manam saqekunanchikchu vidanchikta kay manchakuypaq animal controlawananchiktaqa. Makinchikpi otaq urkunchikpi marcachikuspaqqa saqekuchkanchikmi kawsasqanchiktawan piensayninchikta controlananta.

14:6, 7. Kay angelpa allin noticia apasqanqa qawachiwanchikmi utqaylla ñoqanchikpas Diospa Gobiernomanta willakunanchikpaq. Biblia estudiachisqanchikkunatam Jehová Diosta respetanankupaq hinaspa sutintawan hatunchanankupaq yachachinanchik.

14:14-20. ‘Cosecha’ tiempo tukuruptinmi otaq runankunata Dios salvananpaq huñuruptinmi, kay angelqa, “kay pachapi uvaskunata” ‘Diospa piñakuynin sutiyoq pozoman’ wischunqa. Chaypim wiñaypaq chinkachisqa kanqaku. Kay pachapi uvaskunaqa, Satanaspa munaychakusqan lliw kamachikuqkunam, rurunñataqmi rikchakun mana allin rurasqankunaman. Chaynaqa amayá kay pachapi kamachikuqkunawanqa intuchikusunchu.

16:13-16. Siminkunamanta kay mana allin lloqsimuqqa, Satanaspa tukuy imaymana willakuyninkunam. Kay willakuyninkunawanmi engañachkan kay Pachapi kamachiqkunata, chaynapi Diospa piñakuyninta mana kasukuspanku contranpi churakunankupaq (Mat. 24:42, 44).

16:21. Tukupay punchaw hichpallapiña kachkaptinqa, yaqapaschá Diospa piñakuyninmanta willakuyqa astawan yachanankupaq kanqa, kayqa yaqachusmi tupachisqa kachkan hatu-hatun ‘runtu parawan’. Chayna kaptinpas yaqa lliw runakunam Diostaqa mana kasukunqakuchu.

KAMACHICHKANÑAM MANA VENCEY ATINA REYQA

(Apo. 17:1–22:21)

Hatun Babiloniam otaq llapallan pantasqa religionmi Satanaspa munaychakuyninpi aswan millakuypaq kaqqa. Kaymi chunka hukniyoq kaq revelacionpi rikurin manchakuypaq puka animalpi sillasqa ‘chuchumika warmi’ hina. Kay animalpa ‘chunka waqrankunam’ chinkachinqa kay warmitaqa (Apo. 17:1, 3, 16). Chunka iskayniyoq kaq revelacionpiñataqmi kay warmitaqa tupachin ‘hatu-hatun llaqtawan’, kay revelacionpim willakun wichichisqa kananmanta, hinaptinmi Diosqa runankunata nin: “Chay llaqtamantayá lloqsiychik”, nispa. Achkallaña runakunam waqanku wichisqanmanta, hanaq pachapiñataqmi kusikunku ‘Carneropa casarakusqanwan’ (Apo. 18:4, 9, 10, 15-19; 19:7). Chunka kimsayoq kaq revelacionpiñataqmi ‘yuraq caballopi’ sillakuqqa nacionkunapa contranpi sayarin, hinaspam Satanaspa munaychakusqan runankunata chinkachin (Apo. 19:11-16).

¿Imataq pasanqa ‘culebrawan sutichasqa Satanas Diablota’? ¿Haykapitaq wischusqa kanqa “azufreyoq rupachkaq qochaman”? Kaymantam rimachkan chunka tawayoq kaq revelacionpi (Apo. 20:2, 10). Tukuyninpi iskay kaq revelacionkunañataqmi qawachiwanchik, waranqa wata Jesus kamachiptin imayna kawsakuy kananmanta. ‘Revelacionkunapa’ tukupayninpiñataqmi apostol Juan qawarqa callepa chawpinta kallpachkaq chuyay-chuyay mayuta, hinaspam uyarirqa lliw ‘yakunayachikuqkunapaq’ invitacionta (Apo. 1:1; 22:1, 2, 17).

 Tapukuykunapa kutichiyninkuna:

17:16; 18:9, 10. ¿Imanasqataq ‘kay pachapi [. . .] reykunaqa’ waqanku Hatun Babiloniata kikinku puchukachichkaspankuqa? Kikillankupaq munaq kasqankuraykum. Yaqapaschá enteron pachapi pantasqa religionkunata chinkarachispanku, chayllaraq musyakunqaku allinninkupaq kasqanta. Hatun Babiloniam kay kamachikuqkunata yanaparqa mana allin rurasqankuta Diospa munasqanman hina kasqanta runakunaman creechispan, hawkalla kanankupaq yanapaq tukuspan chaynataq mozokunata guerrapi peleanankupaq hikutaspan.

19:12. ¿Ima ninantaq Jesusllam suntintaqa reqsikun ninanqa? Yaqapaschá kayna nisqanwanqa rimachkan 1914 watamantapacha Jesus kamachiq kaspan achka rurayniyoq kasqanmanta, imaynam Isaias 9:6 nisqanpi hina. Sutinta mana pipas yachasqanqa qawachinmi rurananpaq kaqkunata hinaspa imapipas kamachiq kasqanta mana pipas entiendesqanta. Chayna kachkaspanpas payqa manam sapallanchu kamachin, aswanmi hanaq pachaman riqkunawan kuska kaytaqa ruran, chaymi paykunapi ‘mosoq sutintapas qellqan’ (Apo. 3:12).

19:14. ¿Pikunataq Armagedon punchawpi Jesuswan riqkunaqa? Kay riqmasinkunaqa angelkunam hinaspa kay Allpamanta hanaq pachaman riqkunam, paykunawan kuskam Jesusqa Diospa guerranpi peleanqa (Mat. 25:31, 32; Apo. 2:26, 27).

20:11-15. ¿Pikunapa sutintaq ‘wiñay kawsay libropi’ qellqasqa kachkan? Qellqasqam kachkan llapallan wiñay kawsayta suyaqkunapa sutinkuna, paykunam kanku: hanaq pachaman riqkuna, kay Allpapi wiñay kawsayta suyaqkuna hinaspa hamuq punchawpi kawsarimuq ‘allin runakuna’ (Hech. 24:15; Apo. 2:10; 7:9). Hinaptinqa, ¿ima nichwantaq hamuq punchawpi kawsarimuq ‘mana allin runakunamanta’? Paykunapa sutinpas qellqasqam kanqa, sichu chay tiempopi mosoq ‘librokunapi qellqasqaman’ hina kawsaptinkuqa. Ichaqa, lliw kay rimasqanchik runakunapa sutinqa manaraqmi wiñaypaqraqchu qellqasqa kachkan. Hanaq pachaman riqkunapa sutinmi ichaqa wiñaypaq qellqa kanqa kasukuchkaspa wañukuptinku (Apo. 3:5). Kay Pachapi kawsakuyta suyaqkunapaqñataqmi Waranqa watapi pruebata pasaruptinkuña (Apo. 20:7, 8).

Imakunatam yachachwan:

17:3, 5, 7, 16. ‘Diosmanta yachayniyoq kasqanchikmi’ yanapawanchik “chay warmimantawan sillakusqan animalmanta” allinta entiendenapaq, sasa entiendenapaq kachkaptinpas (Sant. 3:17). Kay animalqa qallariyninpim karqa Liga de Naciones nisqa, chaymantañataqmi karqa Organización de las Naciones Unidas nisqa. Kay ñawpaqmantaraq sasa entiendena kaqta, kunan entiendesqanchikraykum, kusikuywan Diospa Gobiernonmanta hinaspa piñakuynin punchawmanta willakunanchik.

21:1-6. Segurom kachwan Diospa Gobiernonmanta willakuykuna cumplikunanmantaqa. ¿Imanasqa? Bibliam kaykunamanta riman rurakurunmanñapas hina. Ejemplopaq, Apocalipsis librom nin: “Ñam rurasqaña”, nispa.

22:1, 17. ‘Kallpachkaq chuyay-chuyay mayuqa’ rikchakunmi, huchatawan wañuyta chinkachinanpaq Jehová Diospa tukuy imaymana servichikusqanman. Kunan tiempopipas chay yakuqa kachkanmi kasukuq runakunapaq. Diosmi invitawanchik gratislla chay ‘kawsachikuq yakuta tomananchikpaq’. Anchata agracedekuspayá chaskikusunchik, hinaspayá runamasinchikkunamanpas apasunchik.

[Willakuy]

[5 kaq paginapi dibujo]

Diosmi Gobiernonwan, lliw kasukuqkunaman suma-sumaq bendicionkunata qonqa.