¿Hikutakunanchikchu munasqallanchikta ruranapaq?

ISKAY warmachakunam pukllachkanku. Hinaptinmi huknin warmacha qawan kuyasqan pukllananta huknin hapisqanta, hinaspanmi qechun kaynata nispan: “¡Ñoqapam kayqa!”, nispa. Runakunaqa warmachallaraq kasqanchikmantapacham kikillanchikpaq imatapas munaq kanchik (Gen. 8:21; Rom. 3:23). Chaymantapas kay tiempopi runakunam kallpanchawanchik kikillanchikpaq munaq kananchikpaq. Chayraykum cristianokunaqa kallpanchakunanchik mana kikillanchikpaq munaq kananchikpaq. Mana chayqa hukkunatam iñiyninkupi hukmanyarachichwan, hinaptinmi Dios serviyninchikpas yanqachakurunman (Rom. 7:21-23).

Apostol Pablom niwanchik imatapas ruraspanchik hukkunapi piensanapaq. Paymi nin: “Ruraymanmi tukuy ima munasqaytaqa ichaqa manam lliwchu allin. [. . .] Manam lliwchu espiritupi wiñachikun”, nispa. Nirqataq: “Amayá huchallichiychikchu”, nispa (1 Cor. 10:23, 32). Hinaptinqa, imapas munasqallanchikta ruranamantaqa tapukuchwanmi: “¿Chay munasqayta saqeruymanchu iñiqmasiyta mana hukmanyachinaypaq? ¿Kasukuymanchu Bibliapa nisqanta mana allinniypaq hina kaptinpas?”.

Llamkayta akllaspa

Yaqa lliw runakunam ninku, hukkunaqa manam imatapas niwanmankuchu imapi  llamkasqaymantaqa, nispa. Ichaqa piensarisun sudamérica lawpi yachaq negociantepi. Payqa qollqepaq pukllaq hinaspa sinkakuqllaña kaspanpas, Jehová Diospa testigonkunawanmi Biblia estudiayta qallaykurqa, hinaspam estudiasqanman hina vidanta cambiarurqa (2 Cor. 7:1). Congregacionwan predicayta munaptinmi, huk anciano sumaqllata rimapayarqa llamkaynin mana allin kasqanpi piensarinanpaq. Payqa unay watañam chay llaqtanpi alcoholta rantikurqa. Alcoholtaqa tukuypim servichikunku, chay llaqtapim ichaqa yakuwan chapuykuspa tragopaq servichikunku.

Payqa entienderurqam, predicayta qallaykuspan hinalla alcoholta rantikuptinqa, Dioswan amistadnin yanqachakurunanmanta hinaspa iñiqmasinkunata penqaypi churarunanmantapas. Señorantawan churinkunata uywanan kaptinpas alcohol rantikusqantam saqerurqa, hinaspam kunanqa tukuy rikchaq papelkunataña rantikun. Kunanqa paypas chaynataq señoranwan iskay warmi churinkunapas bautizakurunkuñam, hinaspam kusikuywan hawka concienciayoq predicachkanku.

Amistadninchikta akllaspa

Wakin iñiqmasinkunam ninku, Diosta mana serviq runakunawan amistad rurayqa sapakamamantam nispa. ¿Chaynachu kanman, icha imatam Biblia nin? Huk paninchikta ima pasasqanmantayá qawasunchik. Paymi mana iñiq mozowan fiestaman riyta munarqa. Sasachakuypi tarikunanmanta hukkuna nichkaptinkupas, payqa piensarqam chaytaqa kikin tanteakunanta, hinaspanmi fiestaman pasakurqa. Hinaptinmi chay fiestapi llumpay puñuchikuq hampita yakullapi tomarachirqaku. Puñurusqanmanta rikchariruspanmi musyakururqa chay amistadnin tukuq abusarusqanmanta (tupachiy Genesis 34:2).

Kay iñiqmasinchikta hina mana pasawaptinchikpas, Bibliaqa kaynatam nin: “Yachayniyoq runakunawan juntanakuspaykiqa yachayniyoqmi kanki. Sonso runakunawan juntanakuspam ichaqa sasachakuypi kanki”, nispa (Pro. 13:20). Arí, mana allin amistadkunata akllayqa sasachakuykunamanmi apawanchikman. Proverbios 22:3 kaynata niwanchik: ‘Tanteoyoq runaqa desgracia sucedenanta qawarispanmi asurikun. Pisi experienciayoq runañataqmi chayninta pasaykuspan ñakarin’, nispa. Hinaptinqa mana allin amistadkunaqa Jehová Dioswan amistadninchiktam yanqacharunman (1 Cor. 15:33; Sant. 4:4).

Pachakuyninchikpi hinaspa allichapakuyninchikpi

Imayna pachakuyqa tiempopa risqanman hinam cambian. Ichaqa imayna pachakunapaq hinaspa allichapakunapaq Bibliapa yachachisqanqa manam cambianchu. Apostol Pablom cristianakunata nirqa ‘humildadwan pachakunankupaq chaynapi ama pitapas  hukmankunata piensachinankupaq’, kay kamachikuytaqa qarikunapas kasukunankum (1 Tim. 2:9). Kaywanqa manam pi cristianotapas obligachkarqachu imayna pachakunankupaqqa. Aswanmi humildadwan pachakunankupaq consejachkarqa. Diccionariom kaynata nin: “Humildadwan pachakuyqa, manam hatuntukunapaq nitaq alabakunapaq hina pachakuychu”, nispa.

Tapukunanchikmi: “Hukkuna qawawananpaq mana allinta pachakuchkaspay, ¿niymanchu humildadwan pachakusqayta? ¿Mana allinkunatachu hukkunata piensachini imayna pachakusqaywan? Pitapas mana hukmanyachinapaqqa ‘manam kikillanchikpaqchu allin kaqtaqa munananchik aswanqa wakinkunapaqwanmi’ (2 Cor. 6:3; Fili. 2:4).

Qollqewan sasachakuypi kaspa

Corinto llaqtapi cristianokuna qollqemanta quejanakuptinkum, Pablo kaynata qellqarqa: “¿Imanasqataq mana aguantaykunkichikchu mana allinta rurarusuptikichikqa otaq engañarusuptikichikqa?”, nispa. Iñiqmasinwan autoridadkunaman apanakunankumantaqa qollqe pierdeymi aswan allin karqa (1 Cor. 6:1-7). Estados Unidos nacionpi wawqenchikmi kay textopa nisqanta kasukurqa. Paymi huk wawqenchikpaq llamkarqa hinaspam llamkasqanmanta hayka debesqanta mana tanteanakuyta atirqakuchu. Bibliapa nisqanta kasukuspankum achka kutita huñunakurqaku chay sasachakuyta allichanankupaq, ichaqa yanqapaqmi karqa. Hinaptinmi congregacionpi ancianokunawan rimarqaku (Mat. 18:15-17).

Chaynata ruraspankupas hinallam chay sasachakuywan karqaku. Hinaptinmi llamkapakuq iñiqmasinchikqa Jehová Diosman anchata orakuruspan, chay piensasqan qollqentaqa saqerurqa. ¿Imanasqa? Paymi nirqa: “Chay sasachakuymi Dios servisqaypi kusikuyniyta chinkachichkarqa, hinaspam tiempoytapas usuchichkarqani”, nispa. Chaymantam, chayllaraq kusisqa sientikurqa hinaspam Jehová Dios serviyninpipas bendicionkunata chaskirqa.

Mana valorniyoq kaqkunapipas

Mana ancha valorniyoq kaqkunapipas, munasqanchikkunata saqeyqa allinpim tukun. Huk kutipim kimsa punchaw asamblea kaptin, huk precursor señoranpiwan temprano localman chayaruspa tiyanankupaq asientota rakirurqaku. Hinaptinmi asamblea qallaykuptinña achka warmayoq tayta-mama chayaramurqa. Tiyanankupaq qawaykachakusqanta kay precursor rikuruspanmi tiyasqanku asientonkuta qoykurqa. Chaymi kay familiaqa lliwchanku huñulla tiyarqaku. Iskay-kimsa punchawmantam kay precursorqa chay familiapa agradecekusqan cartanta chaskirqa. Chay cartapim willarqa, asambleaman qepataña chayaruspanku llakisqa kasqankumanta. Hinaspa tiyanankuta qoykusqankuwan ancha kusisqa sientekusqankutapas.

Chaynaqa amayá haykapipas munasqallanchiktaqa maskasunchu, aswanqa kikillanchikpaq munasqanchikta saqespayá runamasinchikpa allinninpaq maskasunchik. ‘Kikillanchikpaq munasqallanchikta’ mana maskaspaqa, iñiqmasinchikkunawan hinaspa hukkunawanpas hawkallam kasunchik (1 Cor. 13:5). Chaymantapas Jehová Dioswan amistadninchikmi imamantapas aswan allinqa kanqa.

[20 kaq paginapi dibujo]

Pachanchikta rantispa, ¿munasqallanchikman hinachu akllakunchik?

[20 hinaspa 21 kaq paginakunapi dibujo]

¿Qochwanchu hukkunaman tiyasqanchik asientota?