Yanapachikuy Jesuspa yachachisqankunawan
Yanapachikuy Jesuspa yachachisqankunawan
“Diospa kachamusqanqa willakun Diosllamantam.” (JUAN 3:34.)
1, 2. ¿Imanasqataq ninchik Jesuspa yachachisqankunaqa ‘Diosmantam karqa’ nispa?
JESUSQA Orqopi Yachachispanmi ancha allin yachachikuykunamanta rimarqa. Yachachisqanqa ancha allinmi karqa Jehová Diosmanta kasqanrayku. Jesusmanta rimaspanmi Biblia kaynata nin: “Diospa kachamusqanqa willakun Diosllamantam”, nispa (Juan 3:34-36).
2 Orqopi Yachachisqantaqa yaqapaschá 30 minutollapi rimarqa, chayna kaptinpas hebreo simipi qellqasqa Diospa Palabranpa 8 libronkunamantam 21 textokunamanta rimarqa. Arí, ‘willakusqanqa Diosmantam’ karqa. Qawasunchikyá imaynatam kasukuchwan Jesuspa admirakuypaq yachachisqankunata.
Puntataqa iñiqmasikiwanyá allinyanakamuy
3. Piñasqalla tarikuy mana allin kasqanmanta yacharachispan, ¿ima consejotam Jesusqa qorqa?
3 Chuya espiritupa wakin rurunmi kusisqalla kay hinaspa hawkalla kay (Gal. 5:22, 23). Chaymi chuya espiritu yanapawaptinchik cristianokunaqa kusisqa hinaspa hawkalla kawsakunchik. Qatiqninkuna chayna kawsakunankutam Jesusqa munarqa, chayraykum piñasqalla kayqa imapi tukunanmanta yachachirqa (leey Mateo 5:21, 22). Hinaspam kaynata nirqa: “Chaynaqa sichum ofrendaykita apamunki templopi altarman hinaspañataq yuyariruwaq runamasiki imamantapas piñachisqaykita [otaq piñachisusqaykita], chayna kaptinqa ofrendaykita altarpa ñawpaqninpi saqeykuspayá kutirispa paywan allinyanakamuy hinaspañayá qoy ofrendaykitaqa”, nispa (Mat. 5:23, 24).
4, 5. a) ¿Imataq karqa Mateo 5:23, 24 versiculokunapi ‘ofrendamanta’ Jesuspa nisqanqa? b) ¿Mayna allintaq iñiqmasinchikwan allinyanakuyqa?
4 ‘Ofrendamanta’ Jesuspa rimasqanqa kanmanmi Jerusalen templopi animalkunata Diospaq kañasqanku otaq ima ofrenda apasqankupas. Ofrenda qosqankuqa ancha allinmi karqa, chayta ruraspankupas Jehová Diostam israelitakunaqa yupaycharqaku. Ichaqa Jesusmi qawachirqa huk ruray aswan allin kasqanta: ima ofrendatapas Diosman manaraq qochkaspam iñiqmasinchik ñoqanchikwan piñasqa kaptinqa paywan allinyanakunanchik.
5 ¿Imatam yachachiwanchik Jesuspa nisqanqa? Kaytam yachachiwanchik: iñiqmasinchikwan imayna kasqanchikmantam Jehová Dioswan amistadninchikqa allin otaq mana allin kanqa (1 Juan 4:20). Chaymi, runamasinkuta mana allinta ruraptinkuqa ñawpa tiempopi ofrenda qosqankuqa yanqapaq karqa (leey Miqueas 6:6-8).
Humilde kayqa ancha allinmi
6, 7. ¿Imanasqataq humilde kananchik iñiqmasinchikwan allinyanakunanchikpaq?
6 Iñiqmasinchikwan allinyanapaqqa, yaqapaschá sasa kanqa humilde kasqanchikta qawachiyqa. Humilde cristianoqa manam iñiqmasinkunawanqa atipanakunchu, paypa tanteasqallan otaq rurasqallan allin kasqanta piensaspanqa. Mana humilde kaspanchikqa ñawpaq Corinto llaqtapi wakin cristianokuna hinam sasachakuypi tarikuchwan, paykunatam apostol Pablo kaynata nirqa: “Kikikichikpura quejanakuynikichikqa penqaypaqmi ¿imanasqataq mana aguantaykunkichikchu mana allinta rurarusuptikichikqa otaq engañarusuptikichikqa?”, nispa (1 Cor. 6:7).
7 Jesusqa manam nirqachu iñiqmasinchikwan allinyanakuspa, ñoqanchik allin ruraq kasqanchikta hinaspa iñiqmasinchik pantaq kasqanta qawachinamantachu. Aswanqa allinyanakunanchikpaqmi rimananchikqa. Clarotam piensasqanchikmanta rimana, ichaqa yuyarinanchikmi iñiqmasinchikpas llakisqa sientekusqanta. Paypa contranpi imatapas ruraruspaqa humillakuspam pampachaykuwananchikpaq ninanchik.
‘Alleq ñawiki huchallichisuptiki’
8. Pisi rimayllapi willamuy Mateo 5:29, 30 versiculokunapi Jesuspa nisqanta.
8 Jesusqa Orqopi Yachachisqanpim allin consejokunata qorqa imayna kawsanamanta. Payqa yacharqam pantaq kasqanchikrayku cuerponchik mana allinman tanqawananchikta. Chaymi kaynata nirqa: “Sichu alleq ñawiki huchallichisuptikiqa horqoruspayá wischuruy, cuerpoykipa huknin partellan chinkaruyninmi allinqa enteron cuerpontin wiñaypaq castigoman [“Gehenaman”, NM] wischusqa kanaykimantaqa. Sichu alleq makiki huchallichisuptikiqa qoruruspayá wischuruy, cuerpoykipa huknin partellan chinkaruyninmi allinqa enteron cuerpontin wiñaypaq castigoman [“Gehenaman”, NM] wischusqa kanaykimantaqa”, nispa (Mat. 5:29, 30).
9. ¿Imaynatam ñawinchik hinaspa makinchikpas huchallichiwachwan?
9 Ñawimanta Jesus rimaspanqa nichkarqam imatapas munaspa chayllapi piensanamanta, makimanta rimaspanñataqmi imatapas makinchikwan rurasqanchikmanta. Ñawinchikta hinaspa makinchikta mana cuidaptinchikqa ‘huchallichiwachwanmi’ hinaspam harkawachwan Diospa agradonpaq kawsananchikta (Gen. 5:22; 6:9). Chaynaqa, Diosta mana kasukunapaq tentasqa kaspanchikqa utqaymanmi imatapas rurananchik mana huchallikunapaq, chayqa huknin ñawinchikta horqochkanchikmanpas otaq huknin makinchikta qoruchkanchikmanpas hinam kanman.
10, 11. ¿Imataq yanapawasun mana huchapakunapaq?
10 Huchapakunapaq kaqkunata ñawinchik mana qawananpaq, ¿imatam rurachwan? Diosman sonqo Jobmi kaynata nirqa: ‘Kikiypunim [ñawiywan] contratota rurarqani doncellakunata mana qawapayanaypaq’, nispa (Job 31:1). Jobqa casado runam karqa, sonqonpim tanteakururqa Diospa kamachikuyninkunata kasukuspa mana huchapakunanpaq. Ñoqanchikpas, casado otaq soltero kaspapas Job hinam kananchik. Mana huchapakunapaqqa Diospa espiritunpa yanapaynintam necesitanchik, chaynapim imapipas controlakuq kasunchik (Gal. 5:22-25).
11 Allinmi kanman kayna tapukuyninchik: “¿Qawanichu huchapakunapaq kaqkunata televisionpi, Internetpi otaq qellqakunapipas, chaynapi mana allin rurayta munapayanaypaq?”, nispa. Yuyarisunchik, Santiagom kaynata nirqa: “Runaqa kikinpa mana allin munasqankunawan engañachikuspanmi aysachikun tentachikunanpaq. Chayna mana allin munaykunam huchallichin chaymi huchallikusqanrayku wañunan”, nispa (Sant. 1:14, 15). Chaynaqa, pipas Diosta serviq kachkaspan warmita otaq qarita paywan huchapakunanpaq “munapayaspan qawaqqa”, chayllam chayna piensasqanta chinkachinan, chaymi tupan ñawita horqokuspa wischuyman (leey Mateo 5:27, 28).
12. Pablopa, ¿ima nisqanmi yanapawasun mana allin munapayaykunata vencenanchikpaq?
12 Diospa kamachiwasqanchikpa contranpi kaqkunatam makinchikwanqa ruraruchwan, chaynapim huchallichiwachwan. Chaymi kallpanchakunanchik haykapipas mana huchallikunanchikpaq, Pablom kaynata nirqa: “Wañuchichkaq hinayá vidaykichikmanta chinkachiychik kay pachapi mana allin ruraykunata: amayá huchapakuychikchu, millakuypaq kaqkunataqa ruraychikchu, mana allin munaywanqa aysachikuychikchu nitaq intuchikuychikchu, amataqyá imatapas llumpaytaqa munapayaychikchu, kayqa taytacha-mamacha yupaychay hinam”, nispa (Col. 3:5, NM). Chaynaqa, aychapa munasqankunawan mana aysachikunapaqqa anchatam kallpanchakunanchik.
13, 14. ¿Imanasqataq ayqenanchik mana allin piensaykunamanta hinaspa huchapakuymantapas?
13 Vidankuta salvanankupaqmi runakunaqa makinkuta otaq chakinkutapas qoruchikunku. Chaynallataqmi, Dioswan amistadninchikta mana yanqacharunapaqqa ñawinchikta horqokuchkaq hina chaynataq makinchikta qorukuchkaq hinam, huchallikuyman apaq mana allin piensaykunamanta hinaspa ruraykunamanta ayqekunanchik. Chaynaqa, Gehenamanta lluptinapaq otaq wiñaypaq mana wañunapaqqa, kallpanchakunanchikmi piensayninchikpi, kawsakuyninchikpi hinaspa Diosta serviyninchikpipas limpio kanapaq.
14 Pantaq runakuna kasqanchikraykum limpio kanapaqqa anchata kallpanchakunanchik. Pablom kaynata nirqa: ‘Cuerpoytam kasuchini chaynapi hukkunatapas yachachichkaspay mana qeparunaypaq’, nispa (1 Cor. 9:27). Chaynaqa, kallpanchakusunyá Jesuspa yachachisqanman hina mana huchapakuspa kawsanapaq. Amayá haykapipas rurasunchu ñoqanchikrayku Jesuspa wañusqanta yanqachaqkunataqa (Mat. 20:28; Heb. 6:4-6).
“Qoychikyá runamasikichikman”
15, 16. a) ¿Ima ejemplotam Jesus qowarqanchik qokuykuq kanapaq? b) ¿Ima ninantaq Lucas 6:38 versiculopa nisqanqa?
15 Jesusmi yachachiwarqanchik rimasqanwan hinaspa rurasqanwanpas qokuykuq runa kananchikpaq. Payqa runakunarayku vidanta qonanpaqmi kay Pachaman hamuyta munarqa (leey 2 Corintios 8:9). Sonqomanta kasukuspanmi hanaq pachapi sumaq kawsakuyninta saqemurqa runa hina nacenanpaq hinaspa huchasapa runakunapa rantinpi wañunanpaq. Wañukusqanraykum Diosta serviqkunamanta wakinqa hanaq pachamanta paywan kuska kamachimunqaku (Rom. 8:16, 17). Jesusqa kallpanchawarqanchikmi qokuykuq runa kanapaq kaynata nispan:
16 “Qoychikyá runamasikichikman chaynapi Dios qosunaykichikpaq. Qoptikichikqa chanin tupupim [otaq millqaypim] ñiti-nitirispa hinaspa taspi-taspirispa llimparichkaqta kutichipusunkichik. Runakunawan imapas rurasqaykichikman hinam Diospas qamkunawan ruranqa” (Luc. 6:38). “Tupupim” otaq millqaypim kutichipusunkichik nisqanqa rimachkanmi chay tiempopi costumbremanta, rantikuqmi otaq vendeqmi rantiqpa qawan pachanpi wayqata hina hapiykuptin imatapas huntachiq. Jesuspa nisqanmi qawachin sonqomanta qosqanchikrayku imatapas ‘chaninninpi’ chaskinanchikmanta, wakinpiqa chaskinchikmanmi astawan necesitasqanchik tiempopi (Ecl. 11:2).
17. ¿Imaynatam Jehová Dios allin ejemplota qowanchik qokuykuq runa kanapaq, hinaspa ima ruraytaq kusichiwasun?
17 Jehová Diosqa kutichipunmi hinaspa kuyanmi tukuy sonqomanta qoqkunataqa. Kikinmi allin ejemplota qowanchik, sapallan Churintam qomurqa “pipas paypi iñiqqa manaña puchukaspa wiñaypaqña kawsananpaq” (Juan 3:16). Pablom kaynata qellqarqa: ‘Achka tarpuqmi achkata cosechan. Sapakamayá qochun sonqonpi tanteasqanman hina, ama llakikuspachu nitaq obligasqachu, Diosqa kuyan kusikuywan qoqtam’, nispa (2 Cor. 9:6, 7). Ñoqanchikpas, tiemponchiktawan kallpanchikta hinaspa kapuqninchikta Diosta yupaychanapaq qospanchikqa, kusisqam kasunchik hinaspapas achka bendicionkunatam chaskisunchik (leey Proverbios 19:17 hinaspa Lucas 16:9).
“Amayá corneta tocachkaq hinaqa willakachakuychu”
18. ¿Imata munaspa ruraspanchikmi Jehová Diosmanta premiotaqa mana chaskisunchu?
18 “Amayá allintaqa ruraychik runa qawanallanpaqchu, chayna kaptinqa hanaq pachapi Taytaykichikqa manam premiota qosunkichikchu.” (Mat. 6:1.) ‘Allin ruraymanta’ Jesuspa nisqanqa tupanmi Jehová Diospa munasqanman hina kawsakuywan. Payqa manam nirqachu runakuna qawawaptinchik allinkunata mana ruranamantachu, qatiqninkunataqa kaynatam kamachirqa: “Qamkunapas achkichkaq mechero hina kaychik runakunapa qayllanpi”, nispa (Mat. 5:14-16). Ichaqa hanaq pachapi Taytanchikqa ‘manam premiota qowasunchikchu’ actuaq runakunata hina ‘qawawanallanchikpaq’ otaq alabawanallanchikpaq imatapas ruraptinchikqa. Chayna kaspanchikqa manam haykapipas Diospa cheqap amistadninqa kasunchu nitaq Gobiernonpi wiñaypaq bendicionninkunatapas chaskisunchu.
19, 20. a) ¿Imamantam Jesusqa rimachkarqa “wakchakunata yanapaspaykiqa” amayá cornetataqa tocaychu nisqanwan? b) Hukkunata yanapaspanchikqa, ¿imatam mana rurananchikchu?
19 Diospa agradonpaq hina imatapas ruraspaqa, Jesuspa kayna nisqantam kasukusunchik: “Wakchakunata yanapaspaykiqa amayá corneta tocachkaq hinaqa willakachakuychu llapa runakunamanqa, iskay uyakunallam chaynataqa ruranku huñunakuna wasikunapipas chaynataq callekunapipas, chaynataqa ruranku runakunapa alabasqan kanankupaqmi, cheqaptapunim nikichik: Chaywanqa ñam chaskirunkuña premionkuta” (Mat. 6:2). ‘Wakchakunata yanapanankupaq’ qosqankuqa karqa, imapas necesitaqkunata yanapanankupaq qosqankum (leey Isaias 58:6, 7). Jesuspa chaynataq qatiqninkunapapas karqam wakchakunapaq huñusqankuqa (Juan 12:5-8; 13:29). Manam cornetataqa pipas tocaqchu wakchakunata yanapaspanqa, hinaptinqa ¿imamantam Jesusqa rimachkarqa? Rimachkarqam hukkunata yanapasqankurayku fariseokuna hina willakachakuy mana allin kasqanmanta. Paykunatam Jesusqa suticharqa iskay uyakuna nispa, “huñunakuna wasikunapipas chaynataq callekunapipas” wakchakunaman qosqankumanta willakusqankurayku. Paykunaqa ‘ñam chaskirurqakuña premionkutaqa’. Premionkuqa karqa runakunapa alabasqanmi hinaspa huñunakuna wasikunapi yachachiqkunawan puntapi kuska tiyasqankum. Jehová Diosmantam ichaqa mana imatapas chaskirqakuchu (Mat. 23:6). Ichaqa, ¿imatam rurananku karqa Jesuspa qatiqninkunaqa? Jesusmi paykunatapas hinaspa ñoqanchiktapas kaynata niwanchik:
20 “Limosnata qoptikiqa [otaq wakchakunata yanapaptikiqa] amayá pipas yachachunchu, nitaq kuyasqaykipas. Pipapas mana yachasqallanta qoptikiqa tukuy ima yachaq Taytaykim premioykita qosunki”, nispa (Mat. 6:3, 4.) Kaypi nisqanman hinaqa manam allinchu kanman yanapasqanchikmanta ayllunchikmanpas otaq amistadninchikmanpas willakachakuyqa.
21. ¿Imakunapiwanmi “tukuy ima yachaq” Diospa premio qowasqanchikqa?
21 ‘Wakchakunata yanapasqanchikmanta’ mana pimanpas willakusqanchikraykum, chay rurasqanchiktaqa mana pipas yachanchu. Chaymi ‘pipapas mana yachasqanta’ yachaq Taytanchik premiota qowasun. Hanaq pachapi hinaspa mana rikuy atina kasqanraykum Paytaqa mana pipas ‘rikunchu’ (Juan 1:18). Premio qowasqanchikqa kaykunapiwanmi: Paywan allin amistadninchik, huchanchikmanta pampachasqa kasqanchik hinaspa wiñaypaq kawsakuypas (Pro. 3:32; Juan 17:3; Efe. 1:7). Kaykunam aswan allinqa runakuna alabawananchikmantaqa.
Mana qonqananchikpaq yachachikuykuna
22, 23. ¿Imanasqataq chaninchananchik Jesuspa yachachisqankunata?
22 Qawasqanchikman hinaqa, Jesuspa Orqopi Yachachisqanpim achkallaña yachaykuna kachkan. Yachachisqanmi kusikuyta tarichiwanchik kay sasallaña tiempopi. Arí, Jesuspa yachachisqankunata chaninchaspa hinaspa yachachisqanman hina imayna piensasqanchikta chaynataq vidanchikta cambiaspanchikqa ancha kusisqam kasunchik.
23 Jesuspa yachachisqanman hina ruraqkunaqa achka bendicionkunatam chaskinqaku (leey Mateo 7:24, 25). Chaynaqa, kallpanchakusunyá Jesuspa nisqankunata kasukunapaq. Jesuspa Orqopi Yachachisqanqa achkam karqa, qatiqnin estudiopim qawasunchik huk yachachikuykunamanta.
¿Ima niwaqtaq?
• ¿Imanasqataq ñoqanchikwan piñasqa tarikuq iñiqmasinchikwan allinyanakuyqa ancha allin?
• ¿Imatam rurachwan ‘alleq ñawinchik’ mana huchallichiwananchikpaq?
• ¿Imatam mana ruranachu hukkunata yanapaspaqa?
[Kay yachachikuypa tapukuyninkuna]
[11 kaq paginapi dibujo]
Ñoqanchikwan piñasqa tarikuq iñiqmasinchikwan allinyanakuyqa ¡mayna allinmi!
[12 hinaspa 13 kaq paginakunapi dibujokuna]
Jehová Diosqa bendicionnintam qon kusisqa qoqmanqa