Jobqa Jehová Diospa sutintam hatuncharqa

“Tayta Diosyá alabasqa kachun.” (JOB 1:21.)

1. ¿Pitaq Job librota qellqanman karqa hinaspa ima tiempopi?

MOISESQA yaqa 40 watayoqmi karqa, Egipto nacionpi kamachikuq faraon wañuchinanmanta Madian lawman ayqekuspanqa (Hech. 7:23). Chaypi kaspanchusmi Jobpa ñakarisqanmanta uyarirqa, payqa Uz sutiyoq lawpim yacharqa. Tiempopa risqanman hinam chunniqpi purisqankuta israelitakuna tukuykuchkaspanku Uz llaqtapa hichpanta pasarqaku. Yaqapaschá Moisesqa chaypipas uyarirqa Job manaraq wañukuchkaptin imakuna pasasqantapas. Judiokunapa nisqankuman hinaqa Moisesmi Job sutiyoq librota qellqarqa Jobpa wañukusqan qepata.

2. ¿Imanasqataq Diospa serviqninkunata Job libroqa kallpanchan?

² Job libroqa kallpanchanmi kunan tiempopi Diospa serviqninkunata. ¿Imanasqa? Willawanchikmi hanaq pachapi imakuna pasasqanta hinaspam qawachiwanchik pim Llapallan Kamachiq kananpaq derechoyoq kasqanta. Yanapawanchikmi serviqninkuna ñakarinanta Jehová Dios imanasqa saqesqanmanta hinaspa mana huchallikuq kaymanta allinta entiendenapaq. Chaymantapas, yachachiwanchikmi Jehová Diospa hinaspa runakunapa enemigon Satanas kasqanta, chaynataq Job hina llumpay ñakariypi kaspapas pantaq runakunaqa Dios kasukuyta atisqankumanta. Yachasunchikyá kay libropa nisqanman hina imakuna pasasqanmanta.

Jobta Satanas pruebaman churasqanmanta

3. a) ¿Imayna runam Jobqa karqa? b) ¿Imanasqataq Jobta Diabloqa pruebaman churarqa?

³ Jobqa karqa ancha reqsisqa, necesitaqkunata yanapaq apu runa, allin ruraq, consejokunata qoq hinaspa ancha respetasqa runam. Astawanqa Jehová Diostam respetarqa. Jobmantam Biblia nin: “Mana huchallikuspam Diospa munasqanman hina allinta ruraq. Payqa Diosta adoraqmi karqa, payqa imapas mana allinmantaqa rakikuqpunim”, nispa. Diosman sonqo kasqanraykum Diabloqa Jobta pruebaman churarqa, manam apu otaq ancha reqsisqa kasqanraykuchu (Job 1:1; 29:7-16; 31:1).

4. ¿Imaynataq mana huchallikuqqa?

⁴ Job librom qallarin hanaq pachapi huñunakuy kasqanmanta willawaspanchik: angelkunam Diospa qayllanpi kachkarqaku, Satanaspas chaypi kaspanmi Jobpa contranpi rimayta qallaykurqa (leey Job 1: 6-11). Job apu kasqanmanta rimaspanpas Diabloqa munarqam imanasqa mana huchallikuq kasqanta pruebaman churayta. Mana huchallikuqqa imamantapas mana acusasqa hinaspa allin kawsakuqmi. Bibliapa nisqanman hinaqa mana huchallikuq kayqa tupanmi imaña kaptinpas tukuy sonqomanta Jehová Diosta kasukuywan.

5. ¿Imatam Satanasqa Jobmanta nirqa?

⁵ Satanasqa Jobmantam nirqa imatapas kikillanpaq munaspan Dios yupaychasqanta, manam kuyasqanraykuchu. Nirqataqmi imatapas chaskispallan otaq waqaychasqa kaspallan Diosman sonqo kasqanta. Satanaspa llulla kasqanta qawachinanpaqmi Jehová Diosqa tukuywan pruebananta saqerqa. Chaymi Jobpa animalninkuna wañuchisqa otaq suwasqa karqa, yaqa llapallan serviqninkuna hinaspa 10 churinkunapas wañururqaku, kaykunaqa pasarurqa huk punchawllapim (Job 1:13-19). Jobqa, ¿Diablopa munasqanman hinachu rurarqa? Manam. Aswanqa kaynatam nirqa: “Tayta Diosmi qowarqa imatapas. Paytaqmi  qechuruwanpas. Tayta Diosyá alabasqa kachun”, nispa (Job 1:21).

6. a) ¿Imam pasarqa hanaq pachapi kaqmanta huñunakuy kaptin? b) Jobpa Diosman sonqo kasqanta Satanas iskayrayachiyta munaspan, ¿pikunapatawanmi iskayrayachiyta munarqa?

⁶ Pisi tiempollamantam hanaq pachapi kaqmanta huñunakuy karqa. Hinaptinmi Satanasqa Jobpa contranpi kaynatawan nirqa: “Vidanraykum runaqa; tukuy ima kapuqnintapas qonman. Aychanpiwan tullunpi nanayta qoykuptikiqa uyaykipipunim ñakasunki”, nispa. ‘Vidanraykum runaqa tukuy ima kapuqnintapas qonman’ nisqanwanqa manam Jobpa Diosman sonqo kasqallantachu iskayrayachiyta munarqa aswanqa Diospa llapallan serviqninkunapatam. Kaqllamantam Diosqa saqeykurqa Jobta ñakarichinanpaq, kay kutipim ichaqa llumpay nanakuq onqoywanña (Job 2:1-8). Ichaqa manam chaykunallawanchu ñakarirqa.

¿Imakunatam yachachiwanchik Jobpa ejemplon?

7. ¿Imaynatam Jobtaqa señoranpas chaynataq consuelaq tukuq amistadninkunapas sasacharqa?

⁷ Qallariypiqa Jobpa señoranpas pay hinam sasachakuypi karqa. Llumpay llakisqachá tarikurqa wawankuna wañuruptin, kapuqninkuna chinkaruptin hinaspa qosan onqoruspan nanaywan ñakarisqanta qawaspanpas. Ichaqa qosantam kaynata nirqa: “¿Hinallaraqchu qamqa mana huchallikuq kachkanki? ¡Diosta ñakaspaykiyá wañuy!”, nispa. Chaymantam Elifaz, Bildad hinaspa Zofar sutiyoq runakunapas Jobman asuykurqaku ‘consuelaq tukuspanku’, ichaqa yanqakunata rimaspankum Jobta piñachirqaku. Ejemplopaq, Bildadmi nirqa Diospa contranpi churinkuna huchallikusqankurayku wañuchisqa kasqankuta. Elifazñataqmi nirqa ñawpaqpi mana allin rurasqanmanta Dios ñakarichisqanta. Nirqataqmi kasukuqninkunata Dios mana serviqpaq qawasqanta (Job 2:9, 11; 4:8; 8:4; 16:2; 22:2, 3). Chaynapi tarikuspanpas Jobqa manam huchallikurqachu. Arí, Jobqa pantarurqam ‘mana huchayoq’ kasqanmanta rimaspan (Job 32:2). Ichaqa wañukunankamam Diosman sonqo karqa.

8. ¿Ima ejemplotam qorqa Elihu kunan tiempopi consejo qoq cristianokunaman?

⁸ Job sutiyoq libroqa willawanchiktaqmi Jobta Elihu watukuq risqanmantapas. Qallariypiqa Jobpa hinaspa kimsa amistadninkunapa rimasqankutam uyariylla-uyarirqa. Ichaqa, mozollaraq kachkaspanpas rimaspanmi qawachirqa paykunamanta allin tanteoyoq kasqanta. Jobta rimapayaspanmi wakinkunamantaqa qawachirqa respetasqanta hinaspa kuyakuywan nisqantapas. Allin ruraq kasqanmantapas alabarqam. Nirqataqmi mana huchayoq kasqanpi llumpayta piensasqanmanta. Chaymantam nirqa Diosta serviyqa hinaspa Payman sonqo kayqa ancha allin kasqanta (leey Job 36:1, 11). ¡Mayna allin ejemplom kunan tiempopi consejo qoq cristianokunapaq! Elihuqa pacienciakuqmi karqa, Jobtam allinta uyarirqa,  alabarqam atikuptinqa hinaspa allin consejokunatam qorqa (Job 32:6; 33:32).

9. ¿Imaynatam Jehová Diosqa Jobta yanaparqa?

⁹ Chaymantam ‘Jobta Tayta Dios rimapayarqa sinchi wayra ukumanta’. Tapukuykunata servichikuspanmi Jehová Diosqa Jobta kuyapayakuywan yanaparqa imayna piensasqanta cambiananpaq. Jobqa pantarusqantam reqsikurqa, chaymi nirqa: “Mana imapaq valeqmi kallaniqa”, nispa. Nirqataqmi: “Allpapiwan uchpapi tiyaykuspam wanakuniña”, nispa. Chaymantam Jehová Diosqa consuelaq tukuqkunata nirqa mana cheqapta rimasqankumanta paykunapaq piñasqa kasqanta. Jobtañataqmi nirqa paykunapa favorninpi mañakunanpaq. Chaynata “mañakuruptinmi Tayta Diosqa kasqallan payta bendecirqa. Paymanmi qoykurqa ñawpaq kapuqninmantapas huk chaynatawanraq” (Job 38:1; 40:4; 42:6-10).

¿Maynatam kuyanchik Jehová Diosta?

10. ¿Imanasqataq Jehová Diosqa Satanaspa nisqanta mana qonqarurqachu hinaspa mana wañurachirqachu?

¹⁰ Jehová Diosqa Unanchawaqninchik hinaspa Llapallan Kamachiqmi. Payqa atinmanmi karqa Satanaspa nisqankunata mana kaqpaqpas hapispan qonqaruyta. Ichaqa, ¿imanasqataq mana chaynatachu rurarqa? Sichu Satanaspa nisqanta mana kaqpaqpas hapinmanchu hinaspa wañurachinman karqa, hinaptinqa hukkunam mana yachanmankuchu karqa nisqan llulla otaq cheqap kasqanta. Diabloqa nirqam Job mana imayoq kaspanqa Diosta qepancharunanta, ichaqa mana kapuqniyoq kaspanpas Diosman sonqom karqa. Chaymantam Satanasqa nirqa runakuna ñakarichisqa kaspanku Diosta qepanchanankumanta. Llumpayta ñakarispanpas Jobqa manam huchallikurqachu. Chaynapim paypa contranpi nisqankuna llulla kasqanta qawachirqa, pantaq kaspanpas Diosman sonqom karqa. Hinaptinqa, ¿imatam nichwan Dios serviqkunamanta?

11. ¿Imaynatam Jesus qawachirqa Satanas llulla kasqanta?

¹¹ Satanaspa sasachasqanta Diosta serviqkuna aguantaspankuqa, qawachichkankum Diospa enemigonpa nisqan llulla kasqanta. Kay Pachaman Jesus hamuspanmi sutillata qawachirqa Diablo llulla kasqanta. Payqa Adan hina cabal runam karqa, chaymi wañukunankama kasukuspan qawachirqa Satanaspa llulla kasqanta (Apo. 12:10).

12. ¿Imatam llapallanchik qawachinanchik?

¹² Kunankamapas Diabloqa hinallam Jehová Diospa serviqninkunata sasachachkan. Llapallanchikmi Diosman sonqo kaspanchik kayta qawachinanchik: Diostaqa servinchik kuyasqanchikraykum manam imatapas chaskispallanchikchu. Chayna kasqanta qawachinanchikpaqmi favorecesqa kanchik. Chaynataq, Jehová Diosqa aguantananchikpaqmi kallpata qowasun, manam munanqachu mana aguantay atinanchikkama pruebasqa kananchiktaqa, chaynatamá rurarqa Jobwanpas (1 Cor. 10:13).

Satanasqa mana llakipayakuq enemigom hinaspa Diospa contranpi churakuqmi

13. Job sutiyoq libroqa, ¿Satanaspa imakuna rurasqanmantam willawanchik?

¹³ Griego rimaypi qellqasqa Diospa Palabranqa willawanchikmi Diablomanta hinaspa Diospa contranpi churakusqanmantapas. Ejemplopaq, Apocalipsis librom willawanchik Jehová Dios Llapallan Kamachinanpaq derechoyoq kasqan qawachinanmanta hinaspa Satanasta  wiñaypaq puchukachinanmantapas. Hebreo rimaypi qellqasqa Diospa Palabranpas willawanchikmi Diospa contranpi Satanas llulla nisqankunamanta hinaspa runakunata pantachinanpaq tukuy ima rurasqanmantapas. Ejemplopaq, Job sutiyoq librom willawanchik iskay kutita hanaq pachapi huñunakusqankuman mana kasukuq Diablo risqanmanta. Rirqaqa manam Diosta alabananpaqchu, aswanqa mana allinkunata rurananpaqmi. Jobpa contrapi rimaruspan hinaspa pruebananpaq Dios saqeykuptinmi “Satanasqa lloqsirqa Tayta Diospa qayllanmanta” (Job 1:12; 2:7).

14. ¿Imayna kasqantam Satanas qawachin Jobta ñakarichispan?

¹⁴ Yachasqanchikman hinaqa Job sutiyoq librom qawachiwanchik mana llakipayakuq Satanas runakunapa enemigon kasqanta. Job 1:6 nisqanpi huñunakuy rurakusqanmanta Job 2:1 nisqanpi huñunakuykama hayka tiempo pasasqanmantaqa manam yachanchikchu, ichaqa chay tiempopim Jobqa llumpayta ñakarirqa. Job mana huchallikuq kasqanraykum Diosqa Satanasta kaynata nirqa: “Yanqapuni paypa kapuqninkunata tukurachiwaptikipas hinallaraqmi payqa mana huchayoq kachkan”, nispa. Llulla kasqanta mana reqsikuspanmi Satanasqa Diosta nirqa llumpay ñakariywanraq Jobta pruebananpaq. Apu hinaspa mana imayoq kaptinpas Jobtaqa ñakarichirqam, kaywanmi qawachin runakuna wakcha kaptin otaq ñakariptinpas mana llakipayasqanta chaynataq kasukuq runata cheqnisqantapas (Job 2:3-5). Anchata ñakarispanpas Jobqa mana huchallikuqmi karqa hinaspam qawachirqa Diablo llulla kasqanta.

15. Dios servisqankuta saqespan contranpi churakuqkuna, ¿imapitaq rikchakunku Satanaswan?

¹⁵ Satanasmi puntataqa Dios serviyta saqeruspan paypa contranpi churakurqa. Paymanmi rikchakunku Dios servisqankuta saqeruspanku kunan tiempopi contranpi churakuqkunapas. Iñiqmasinchikmanta, ancianokunamanta hinaspa Diospa Llaqtanpi Punta Apaqkunamanta mana allinkunata rimasqankum veneno hina rikurirun. Wakinkuqa Jehová Diospa sutintam mana rimankuchu, manataqmi paymanta yachayta nitaq serviytapas munankuchu. Taytanku Satanas hinam Diosta serviqkunapa contranpi churakunku (Juan 8:44). Chaymi paykunawanqa amistadta mana ruranchikchu (2 Juan 10, 11).

Jobqa Jehová Diospa sutintam hatuncharqa

16. ¿Imaynatam Jobqa qawarqa Jehová Diospa sutinta?

¹⁶ Jobqa Jehová Diospa sutintam rimarqa hinaspa hatuncharqa. Churinkuna wañukusqanmanta yacharuspanpas manam Diosmantaqa mana allinta rimarqachu. Jehová Diospa qechurusqanta piensaspanpas, Paypa sutintaqa hatuncharqam. Jobqa kaynatam nirqa:  ‘Runa yachayniyoq kananpaqqa [. . .] Señortam respetanan. Runa allin entiendeq kananpaqqa mana allinmantam rakikunan’, nispa (Job 28:28).

17. ¿Imataq Jobta yanaparqa mana huchallikuq kananpaq?

¹⁷ ¿Imataq Jobta yanaparqa mana huchallikuq kananpaq? Dioswan amistad kasqanmi, chaynañam karqa manaraq ñakarichkaspan. Jobqa manam yacharqachu Satanaspa imakunawan ñakarichinanmantaqa, chaywanpas Diosta kasukuqmi karqa. Kaynatam nirqa: “Kawsanaykamaqa [. . .] mana huchayoqmi kasaq’, nispa (Job 27:5). ¿Imatam rurarqa Dioswan allin amistad kananpaq? Payqa reqsirqachá Jehová Diosta ñawpaq abuelonkuna Abrahan, Isaac hinaspa Jacob Paywan allin amistad kasqankumanta hinaspa sonqonpichá waqaycharqa chay yachasqankunata. Chaynataq Diospa unanchasqankunata qawaspan paypa sumaq kayninkunamantapas yacharqa (leey Job 12:7-9, 13, 16).

18. a) ¿Imaynatam Jobqa qawachirqa Diospa agradonpaq rurasqanta? b) ¿Imaynatam Jobta qatipakuchwan?

¹⁸ Jehová Diosmanta yachasqanmi Jobta yanaparqa Paypa agradonpaq kaqta imatapas rurananpaq. Sapa kutim Diospaq animalkunata kañapuq ichapas churiykunaqa “sonqonkupi Diosta insultarunku” nispa (Job 1:5). Llumpay sasachakuypi tarikuspanpas Diosmantam allinta rimarqa (Job 10:12). ¡Mayna allin ejemplom payqa! Ñoqanchikpas allintam yachananchik Jehová Diosmanta hinaspa ima rurananmantapas. Dioswan amistadninchik allin kallpanchasqa kananpaqqa tiempochakunanchikmi estudianapaq, huñunakuyman rinapaq, mañakunapaq hinaspa predicaq lloqsinapaqpas. Chaymantapas kallpanchakunanchikmi Diospa sutinta reqsichinapaq. Imaynam Jobpas mana huchallikuq kaspan Jehová Diosta kusichirqa, chaynam ñoqanchikpas pay hina kaspa Diosta kusichisunchik. Chaymantam yachasunchik qatiqnin estudiopi.

¿Yuyachkankichu?

• ¿Imanasqataq Jobta Diabloqa pruebaman churarqa?

• ¿Ima sasachakuykunatam Job pasarqa, hinaspa imaynam chaykunawan tarikurqa?

• ¿Imataq yanapawasun Jobta qatipakunapaq hinaspa Diosman sonqo kanapaq?

• ¿Imatam Satanasmanta yachachiwanchik Job sutiyoq libro?

[Kay yachachikuypa tapukuyninkuna]

[4 kaq paginapi dibujo]

Jobmanta willakuymi qawachiwanchik pim Llapallan Kamachiq kananpaq derechoyoq kasqanta

[6 kaq paginapi dibujo]

¿Imakunam pruebaman churanman Dios kasukuyninchikta?