Itai runa hinayá kasunchik

“TUKUY atiyniyoq Jehová Diosnillayku, hatu-hatun admirakuypaqmi tukuy rurasqaykikunaqa. Nacionkuna munaychakuq Reynillayku, allinpunim hinaspa cheqappunim ñannikikunaqa. Jehová Diosnillayku, ¿pitaq qamtaqa mana manchakusunkimanchu? ¿Pitaq qamtaqa mana alabasunkimanchu? Qamllam kanki tukuy rurasqaykikunapipas allin ruraqqa.” Kay takim sutillata qawachin Jehová Dios allin ruraq justo kasqanta, arí kay takitam hanaq pachapi takirqaku “manchakuypaq animaltawan imagennintapas” venceqkuna (Apo. 15:2-4, NM). Kayna allin ruraq justo kananchiktam Jehová Diosqa munan (Efe. 4:24).

Satanasmi ichaqa imatapas ruraspan Jehová Diosmanta karunchayta munawanchik. Chayna kaptinpas yaqa llapallan serviqninkunam sasachakuypi tarikuspankupas Diosman sonqo kanku. ¡Anchatamá Jehová Diosqa chayna kasqanchikta chaninchan! Bibliam niwanchik: “Diosqa kuyanmiki allin ruray arreglotaqa. Payqa manam saqenqachu payllamanña iñiykuqtaqa”, nispa (Sal. 37:28). Aguantananchikta  munaspanmi Jehová Diosqa Bibliapi qellqachirqa ñawpa tiempopi payman sonqo runakunamanta. Hukninmi karqa Gat llaqtamanta Itai sutiyoq runa.

Israel llaqtapi forastero runamanta

Itai runaqa guerrapi ancha peleaqmi karqa, yaqapaschá karqa ancha reqsisqa Gat llaqtamanta, chay llaqtamantamá karqa israelpa enemigon hatunkaray Goliat runapas. Kay Itai runaqa llaqtanmantam 600 runankunapiwan qarqosqa karqaku, hinaspam Jerusalenpa hichpanpi yacharqaku. Bibliapim paypa sutin rikurin Absalonmanta Davidpa lluptikusqanmanta willakusqanpi.

Davidqa allintam yacharqa runankunapiwan Itai imayna tarikusqankumanta, yaqapaschá chayrayku yuyarirqa ñawpa tiempopi 600 runankunapiwan Filistea nacionpi rey Aquispa kasqan Gat llaqtapi yachananpaq lluptikusqanmanta (1 Sam. 27:2, 3). ¿Imatataq Itaiqa runankunapiwan ruranmanku Davidpa contranpi Absalonpa churakusqanta yacharuspankuqa? Pimantaq sayapakunmanku karqa, ¿Absalonmanchu icha Davidmanchu, otaq manachu mayqenninmanpas?

Kay tapukuykunata kutichinapaqqa yuyarisunchik Jerusalenmanta David lloqsiptin ima pasasqanmanta. Paymi Jerusalenmanta karupiña kaq wasipi samarirqa. Kay wasiqa kanmanpaschá karqa manaraq Cedron wayqota chimpachkaspa Olivos moqoman rina ñanpi (2 Sam. 15:17). Chaypim Davidqa lliw tropankunata yuparqa. Chay tropankunapim karqa payman sonqo israelitakuna, Ceret hinaspa Pelet castamanta runakunapas. Ichaqa manam paykunallachu karqaku, karqataqmi Itai runapas guerrapi peleaq 600 runankunapiwan (2 Sam. 15:18).

Itai runa llaqtanmanta qarqosqa kasqanrayku imayna tarikusqanta yachaspanmi, Rey Davidqa kaynata nirqa: “¿Imapaqtaq qamqa rinki ñoqaykuwan? Kutispaykiyá kamuy chay huk reywan [Absalonwan]. Qamqa kanki forasterom llaqtaykimanta qarqomusqa. Qayna punchaw chayaramuq hinallaraqmi qamqa kachkanki. Chaynaqa ¿imapaqtaq ñoqaykuwan rinaykipaq nisqayki? ¿Ñoqapas atisqaymanchá maymanpas risaq? Qamqa kutikuspayá castaykikunatapas kutichiytaq. Tayta Diosyá cheqaptapuni favorecesunki”, nispa (2 Sam. 15:19, 20).

Chaymi Itaiñataq Davidta tukuy sonqonwan kuyasqanrayku nirqa: “Kawsaq Tayta Diosrayku chaynataq qam reyniyrayku juraspam nini: ‘Wañunay otaq kawsanay kaptinpas qam señor reywanmi kasaq’”, nispa (2 Sam. 15:21). Yaqapaschá Itaipa kayna nisqanqa Davidtaqa yuyarichirqa mamanpa abuelan Rutpa rimasqanta (Rut 1:16, 17). Hinaptinmi Davidqa llakirikuspan kaynata nirqa: ‘Chaynaqa hakuyá pasasunchik’, nispa. ‘Chaymi Gat llaqtayoq Itaiqa pasarqa llapallan tropantin hinaspa familiantin’ (2 Sam. 15:22).

Imatam ‘yachachiwanchik’

Romanos 15:4 nin: “Bibliapi imapas qellqasqa kaqkunaqa yachananchikpaqmi kachkan”, nispa. Hinaptinqa, ¿imatam yachachiwanchik Itaipa imayna kasqanqa? Puntataqa piensarisunyá imanasqa Davidta tukuy sonqonmanta yanapasqanta. Mana israelita kachkaspanpas, reqsikurqam Jehová cheqap Dios kasqanta, hinaspa Davidta rey kananpaq Dios churasqantapas. Itai runataqa manam imapas qokurqachu Filistea llaqtanwan Israel llaqta cheqninakusqankuqa. Davidtaqa payqa manamá Goliattawan wakin llaqtamasinkunatapas wañuchiq runata hinatachu qawarqa (1 Sam. 18:6, 7). Aswanmi payqa qawarqa Jehová Dios kuyaq runa kasqanta hinaspa allin runa kasqantapas. Chayna kasqanraykum Davidqa paypi confiarqa, hinaspam kimsa kaq tropanpa kamachiqninta churarqa Absalonpa contranpi peleanankupaq (2 Sam. 18:2).

Ñoqanchikpas manam sayapakunanchikchu runakuna may llaqtamanta hinaspa ima castamanta kaptinkupas. Qepanchananchikmi cheqninakuyta hinaspa kaminakuytaqa, aswanmi runakunapa sumaq kayninkunata qawananchik. Davidwan Itai allin amistadta rurasqankum, allinta qawachiwanchik pi runatapas allinta qawanapaq, chaypaqqa Jehová Diostam reqsina chaynataq kuyananchikpas.

 Ñoqanchikpas, ¿Itai runa Davidman hapipakusqanman hinachu Jesucristoman hapipakunchik? Tapukunanchiktaqmi, ¿qawachinichu payman sonqo kasqayta kusikuywan predicaspay chaynataq Jesuspa qatiqnin kanankupaq runakunata yachachispay?” (Mat. 24:14; 28:19, 20). “¿Atiymanchu qawachiyta ima sasachakuykunapipas Diosman sonqo kasqayta?”, nispa.

Tayta kaqkunapas Itaipa imayna kasqanpiqa yuyaymananmankum, hinaspa paymantapas yachanmankum. Davidta yanapananpaq Itaipa prometesqan chaynataq qatisqanpas, yanaparqataqmi runankunapas chaynata ruranankupaq. Chaynallataqmi Diosta servinankupaq taytakunapa tanteasqankuqa familiantapas yanapanmanmi chaynallata ruranankupaq, chay tanteasqanwan pisi tiempo sasachakuypi kaptinkupas. Amayá qonqasunchu, Bibliam niwanchik Jehová Diosqa ‘confiaqninkunawan [paypas] confiakunapaq’ kasqanta (Sal. 18:25).

Davidpa contranpi churin Absalonpa hoqarikusqan tukuruptinmi, Bibliaqa manaña Itai runamantaqa rimanñachu. Chayna kaptinpas Davidpa llumpay sasachakusqan tiempopi, Itai runamanta pisillapipas yachasqanchikqa, qawachiwanchikmi imayna runa kasqanmanta. Itai runapa imayna kasqanmanta Bibliapa rimasqanqa, qawachiwanchikmi allin ruraq justo runata Jehová Dios chaninchasqanmanta (Heb. 6:10).